India vs England, 3rd ODI: ಇಂಗ್ಲೆಂಡ್ ವಿರುದ್ಧ ಹ್ಯಾಟ್ರಿಕ್ ಸರಣಿ ಗೆದ್ದ ಟೀಮ್ ಇಂಡಿಯಾ..!

ಪುಣೆಯ ಮಹಾರಾಷ್ಟ್ರ ಕ್ರಿಕೆಟ್​ ಅಸೋಸಿಯೇಷನ್ ಮೈದಾನದಲ್ಲಿ ನಡೆದ 3ನೇ ಏಕದಿನ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ ಭಾರತ 7 ರನ್​ಗಳ ರೋಚಕ ಜಯ ದಾಖಲಿಸಿದೆ. ಟೀಮ್ ಇಂಡಿಯಾ ನೀಡಿದ 330 ರನ್​ಗಳ ಟಾರ್ಗೆಟ್ ಬೆನ್ನತ್ತಿದ ಇಂಗ್ಲೆಂಡ್ 322 ರನ್​ಗಳಿಸಲಷ್ಟೇ ಶಕ್ತರಾದರು​. ಈ ಜಯದೊಂದಿಗೆ ಭಾರತ ಏಕದಿನ ಸರಣಿಯನ್ನು 2-1 ಅಂತರದಿಂದ ಗೆದ್ದುಕೊಂಡಿದೆ. ಈ ಮೂಲಕ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್, ಟಿ20 ಹಾಗೂ ಏಕದಿನ ಸರಣಿಯನ್ನು ತನ್ನದಾಗಿಸಿಕೊಂಡಿದೆ.

ಇದಕ್ಕೂ ಮುನ್ನ ಟಾಸ್ ಗೆದ್ದ ಇಂಗ್ಲೆಂಡ್ ತಂಡದ ನಾಯಕ ಜೋಸ್ ಬಟ್ಲರ್ ಫೀಲ್ಡಿಂಗ್ ಆಯ್ದುಕೊಂಡರು. ಅದರಂತೆ ಕ್ರೀಸ್​ಗಿಳಿದ ರೋಹಿತ್ ಶರ್ಮಾ ಹಾಗೂ ಶಿಖರ್ ಧವನ್ ಭಾರತಕ್ಕೆ ಉತ್ತಮ ಆರಂಭ ಒದಗಿಸಿದರು. ಮೊದಲ ವಿಕೆಟ್​ಗೆ ಶತಕದ ಜೊತೆಯಾಟವಾಡಿದ ಈ ಜೋಡಿ ತಂಡದ ಮೊತ್ತಕ್ಕೆ ಭದ್ರ ಅಡಿಪಾಯ ಹಾಕಿಕೊಟ್ಟರು. ಈ ನಡುವೆ ಶಿಖರ್ ಧವನ್ ಅರ್ಧಶತಕ ಬಾರಿಸಿ ಮಿಂಚಿದರು. ಆದರೆ ಶತಕದ ಜೊತೆಯಾಟದ ಬೆನ್ನಲ್ಲೇ ಆದಿಲ್ ರಶೀದ್ ಎಸೆತವನ್ನು ಗುರುತಿಸುವಲ್ಲಿ ಎಡವಿದ ರೋಹಿತ್ ಶರ್ಮಾ (37) ಕ್ಲೀನ್ ಬೌಲ್ಡ್ ಆದರು. ಇದರ ಬೆನ್ನಲ್ಲೇ 56 ಎಸೆತಗಳಲ್ಲಿ 10 ಬೌಂಡರಿಗಳೊಂದಿಗೆ 67 ರನ್​ ಬಾರಿಸಿದ್ದ ಶಿಖರ್ ಧವನ್​ ವಿಕೆಟ್ ಪಡೆಯುವಲ್ಲಿ ಆದಿಲ್ ರಶೀದ್ ಯಶಸ್ವಿಯಾದರು.

ಈ ಹಂತದಲ್ಲಿ ಜೊತೆಗೂಡಿದ ವಿರಾಟ್ ಕೊಹ್ಲಿ ಹಾಗೂ ರಿಷಭ್ ಪಂತ್ ಮೇಲೆ ಹೆಚ್ಚಿನ ನಿರೀಕ್ಷೆಯಿತ್ತು. ಆದರೆ 7 ರನ್​ಗಳಿಸಿದ್ದ ವೇಳೆ ಮೊಯೀನ್ ಅಲಿ ಎಸೆದ ಮ್ಯಾಜಿಕ್ ಎಸೆತಕ್ಕೆ ಕೊಹ್ಲಿ ಕ್ಲೀನ್ ಬೌಲ್ಡ್ ಆದರು.​ ನಾಯಕನ ಬೆನ್ನಲ್ಲೇ ಕೆಎಲ್ ರಾಹುಲ್ (7) ಸಹ ವಿಕೆಟ್ ಒಪ್ಪಿಸಿ ನಿರ್ಗಮಿಸಿದರು. ಈ ಹಂತದಲ್ಲಿ ಇಂಗ್ಲೆಂಡ್ ಬೌಲರುಗಳು ಮೇಲುಗೈ ಸಾಧಿಸಿದರು.

ಆದರೆ ಈ ವೇಳೆ ಜೊತೆಯಾದ ಪಂತ್-ಹಾರ್ದಿಕ್ ಪಾಂಡ್ಯ ಜೋಡಿ ಉತ್ತಮ ಜೊತೆಯಾಟದ ಮೂಲಕ ಮತ್ತೆ ಪಂದ್ಯವನ್ನು ತಮ್ಮ ತೆಕ್ಕೆಗೆ ತೆಗೆದುಕೊಂಡರು. ಅಲ್ಲದೆ 6ನೇ ವಿಕೆಟ್​ಗೆ 99 ರನ್​ಗಳನ್ನು ಪೇರಿಸಿದರು. ಇತ್ತ ರಿಷಭ್ ಪಂತ್ ಬಿರುಸಿನ ಅರ್ಧಶತಕ ಪೂರೈಸಿದರು. ತಂಡದ ಮೊತ್ತ 36 ಓವರ್​ನಲ್ಲಿ 256 ಆಗಿದ್ದ ವೇಳೆ 62 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸರ್ ಹಾಗೂ 5 ಬೌಂಡರಿಗಳೊಂದಿಗೆ 78 ರನ್​ಗಳಿಸಿದ್ದ ಪಂತ್, ಸ್ಯಾಮ್ ಕರ್ರನ್ ಎಸೆತದಲ್ಲಿ ವಿಕೆಟ್ ಕೀಪರ್ ಕ್ಯಾಚ್ ನೀಡಿ ಪೆವಿಲಿಯನ್ ಕಡೆ ಮುಖ ಮಾಡಿದರು.

ಮತ್ತೊಂದು ಬದಿಯಲ್ಲಿದ್ದ ಹಾರ್ದಿಕ್ ಪಾಂಡ್ಯ ಕೂಡ ಬಿರುಸಿನ ಬ್ಯಾಟಿಂಗ್ ಮೂಲಕ ಅರ್ಧಶತಕ ಬಾರಿಸಿ ಬ್ಯಾಟ್ ಮೇಲೆಕ್ಕೆತ್ತಿದರು. ಇದಾಗಿ ಕೆಲ ಹೊತ್ತಿನಲ್ಲೇ 4 ಸಿಕ್ಸರ್​ ಹಾಗೂ 5 ಬೌಂಡರಿಗಳೊಂದಿಗೆ 64 ರನ್ ಬಾರಿಸಿ ಅಪಾಯಕಾರಿಯಾಗುವ ಸೂಚನೆ ನೀಡಿದ್ದ ಪಾಂಡ್ಯ, ಸ್ಟೋಕ್ಸ್ ಎಸೆತದಲ್ಲಿ ಬೌಲ್ಡ್ ಆದರು. ಈ ಹಂತದಲ್ಲಿ ಜೊತೆಗೂಡಿದ ಕೃನಾಲ್ ಪಾಂಡ್ಯ ಹಾಗೂ ಶಾರ್ದುಲ್ ಠಾಕೂರ್ ಕೊನೆಯ 11 ಓವರ್​ಗಳನ್ನು ಆಡುವ ಜವಾಬ್ದಾರಿ ವಹಿಸಿಕೊಂಡರು. ಅಲ್ಲದೆ 44ನೇ ಓವರ್​ನಲ್ಲಿ ತಂಡದ ಮೊತ್ತವನ್ನು 300ರ ಗಡಿದಾಟಿಸಿದರು.

ಕೃನಾಲ್ ಪಾಂಡ್ಯ ಜೊತೆಗೂಡಿ 8ನೇ ವಿಕೆಟ್​ಗೆ 45 ರನ್​ಗಳ ಜೊತೆಯಾಟವಾಡಿದ ಶಾರ್ದುಲ್ ಠಾಕೂರ್ ಕೇವಲ 21 ಎಸೆತಗಳಲ್ಲಿ 3 ಸಿಕ್ಸರ್ ಹಾಗೂ 1 ಬೌಂಡರಿಯೊಂದಿಗೆ 30 ರನ್​ಗಳಿಸಿ ಮಾರ್ಕ್​ವುಡ್​ಗೆ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ 25 ರನ್ ಬಾರಿಸಿದ ಕೃನಾಲ್ ಪಾಂಡ್ಯ ಕೂಡ ಔಟ್ ಆದರು. ಇನ್ನು ಪ್ರಸಿಧ್ ಕೃಷ್ಣರನ್ನು ಶೂನ್ಯಕ್ಕೆ ಮಾರ್ಕ್​ವುಡ್ ಬೌಲ್ಡ್ ಮಾಡಿದರೆ, 3 ರನ್​ಗಳಿಸಿದ್ದ ಭುವನೇಶ್ವರ್ ಕುಮಾರ್​ರನ್ನು ರೀಸ್ ಟಾಪ್ಲೆ ಔಟ್ ಮಾಡಿದರು. ಇದರೊಂದಿಗೆ 48.2 ಓವರ್​ನಲ್ಲಿ ಟೀಮ್ ಇಂಡಿಯಾ 329 ರನ್​ಗೆ ಸರ್ವಪತನ ಕಂಡಿತು. ಇಂಗ್ಲೆಂಡ್ ಪರ ಮಾರ್ಕ್​ವುಡ್ 3 ವಿಕೆಟ್ ಕಬಳಿಸಿದರೆ, ಆದಿಲ್ ರಶೀದ್ 2 ವಿಕೆಟ್ ಉರುಳಿಸಿ ಮಿಂಚಿದರು.

ಟೀಮ್ ಇಂಡಿಯಾ ನೀಡಿದ 330 ರನ್​ಗಳ ಬೃಹತ್ ಗುರಿಯನ್ನು ಬೆನ್ನತ್ತಲು ಕಣಕ್ಕಿಳಿದ ಜೇಸನ್ ರಾಯ್ ಹಾಗೂ ಜಾನಿ ಬೈರ್​ಸ್ಟೋವ್​ರನ್ನು ಆರಂಭದಲ್ಲೇ ನಿಯಂತ್ರಿಸಲು ಈ ಬಾರಿ ಟೀಮ್ ಇಂಡಿಯಾ ಬೌಲರುಗಳು ಯಶಸ್ವಿಯಾದರು. ಅದರಲ್ಲೂ ಮೊದಲ ಓವರ್​ನಲ್ಲೇ 3 ಬೌಂಡರಿ ಬಾರಿಸಿ ಜೇಸನ್ ರಾಯ್ ಅಬ್ಬರಿಸುವ ಸೂಚನೆ ನೀಡಿದ್ದರು. ಆದರೆ ಈ ಓವರ್​ನ ಕೊನೆಯ ಎಸೆತದಲ್ಲಿ ಜೇಸನ್ ರಾಯ್​ (14)ರನ್ನ ಕ್ಲೀನ್ ಬೌಲ್ಡ್ ಮಾಡಿ ಭುವನೇಶ್ವರ್ ಕುಮಾರ್ ಮೊದಲ ಯಶಸ್ಸು ತಂದುಕೊಟ್ಟರು.

ಅಲ್ಲದೆ ತಂಡದ ಮೊತ್ತ 28 ಆಗಿದ್ದ ವೇಳೆ ಜಾನಿ ಬೈರ್​ಸ್ಟೊವ್ (1) ಅವರನ್ನು ಎಲ್​ಬಿ ಬಲೆಗೆ ಬೀಳಿಸಿ ಭುವಿ ಮತ್ತೊಂದು ವಿಕೆಟ್ ಉರುಳಿಸಿದರು. ಈ ಹಂತದಲ್ಲಿ ಜೊತೆಗೂಡಿದ ಬೆನ್​ ಸ್ಟೋಕ್ಸ್ ಹಾಗೂ ಡೇವಿಡ್ ಮಲಾನ್ ತಂಡವನ್ನು ಆರಂಭಿಕ ಆಘಾತದಿಂದ ಮೇಲೆತ್ತಿದರು. ಟೀಮ್ ಇಂಡಿಯಾ ಬೌಲರುಗಳ ವಿರುದ್ಧ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ ಈ ಜೋಡಿ 10 ಓವರ್​ ಮುಕ್ತಾಯದ ವೇಳೆಗೆ ತಂಡದ ಮೊತ್ತವನ್ನು 60ರ ಗಡಿದಾಟಿಸಿದರು.

11ನೇ ಓವರ್​ನಲ್ಲಿ ನಟರಾಜನ್ ಎಸೆದ ಫುಲ್​ಟಾಸ್ ಎಸೆತಕ್ಕೆ ಭರ್ಜರಿ ಉತ್ತರ ನೀಡಲು ಮುಂದಾದ ಬೆನ್​ ಸ್ಟೋಕ್ಸ್ (35) ಬೌಂಡರಿ ಲೈನ್​ನಲ್ಲಿದ್ದ ಶಿಖರ್ ಧವನ್​ಗೆ ಕ್ಯಾಚ್ ನೀಡಿದರು. ಇತ್ತ 5ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ನಾಯಕ ಜೋಸ್ ಬಟ್ಲರ್​ (15) ರನ್ನು ನೆಲೆಯೂರುವ ಮುನ್ನ ಎಲ್​ಬಿಡಬ್ಲ್ಯೂ ಮಾಡಿ ಶಾರ್ದುಲ್ ಠಾಕೂರ್ ಪೆವಿಲಿಯನ್​ಗೆ ಕಳುಹಿಸಿದರು.

ಇದಾಗ್ಯೂ ಇಂಗ್ಲೆಂಡ್ ತಂಡ 23 ಓವರ್​ ಮುಗಿಯುವಷ್ಟರಲ್ಲಿ 150 ರನ್ ಗಡಿ ದಾಟಿತ್ತು. ಅಲ್ಲದೆ ಮಲಾನ್ ಜೊತೆಗೂಡಿ ಲಿಯಾಮ್ ಲಿವಿಂಗ್ ಸ್ಟೋನ್ ಉತ್ತಮ ಪಾಲುದಾರಿಕೆ ನಡೆಸಿದರು. ಈ ಹಂತದಲ್ಲಿ ಮತ್ತೆ ದಾಳಿಗಿಳಿದ ಶಾರ್ದುಲ್ ಠಾಕೂರ್ ಲಿವಿಂಗ್​ಸ್ಟೋನ್ (36) ವಿಕೆಟ್ ಪಡೆದು ಭಾರತಕ್ಕೆ 5ನೇ ಯಶಸ್ಸು ತಂದುಕೊಟ್ಟರು. ಆದರೆ ಮತ್ತೊಂದು ತುದಿಯಲ್ಲಿದ್ದ ಡೇವಿಡ್ ಮಲಾನ್ 50 ಎಸೆತಗಳಲ್ಲಿ 6 ಬೌಂಡರಿಗಳೊಂದಿಗೆ ಅರ್ಧಶತಕ ಪೂರೈಸಿದರು. ಇದೇ ವೇಳೆ ಠಾಕೂರ್ ಎಸೆತದಲ್ಲಿ ಸ್ಪೋಟಕ ಹೊಡೆತಕ್ಕೆ ಮುಂದಾದ ಮಲಾನ್ ರೋಹಿತ್ ಶರ್ಮಾಗೆ ಕ್ಯಾಚಿತ್ತರು. ಇದರೊಂದಿಗೆ 168 ರನ್​ಗೆ ಇಂಗ್ಲೆಂಡ್ 6 ಪ್ರಮುಖ ವಿಕೆಟ್ ಕಳೆದುಕೊಂಡಿತು.

ಈ ವೇಳೆ ಜೊತೆಯಾದ ಆಲ್​ರೌಂಡರ್​ಗಳಾದ ಮೊಯೀನ್ ಅಲಿ ಹಾಗೂ ಸ್ಯಾಮ್ ಕರ್ರನ್ ಎಚ್ಚರಿಕೆಯ ಆಟದೊಂದಿಗೆ ರನ್​ ಪೇರಿಸುವತ್ತ ಗಮನ ಹರಿಸಿದರು. ಪರಿಣಾಮ 30 ಓವರ್​ ವೇಳೆಗೆ ತಂಡದ ಮೊತ್ತ 200ರ ಗಡಿಗೆ ಬಂದು ನಿಂತಿತು. ಈ ವೇಳೆ ಬೌಲಿಂಗ್​ನಲ್ಲಿ ಬದಲಾವಣೆ ಮಾಡಿದ ವಿರಾಟ್ ಕೊಹ್ಲಿ, ಮತ್ತೆ ಭುವನೇಶ್ವರ್​ ಕುಮಾರ್ ಕೈಗೆ ಚೆಂಡಿತ್ತರು. ನಾಯಕನ ನಿರೀಕ್ಷೆಯನ್ನು ಹುಸಿಗೊಳಿಸದ ಭುವಿ, 25 ಎಸೆತಗಳಲ್ಲಿ 29 ಬಾರಿಸಿ ಅಪಾಯಕಾರಿಯಾಗುವ ಸೂಚನೆ ನೀಡಿದ್ದ ಮೊಯೀನ್ ಅಲಿಯ ವಿಕೆಟ್ ಪಡೆದರು.

ಇನ್ನು 40ನೇ ಓವರ್​ನಲ್ಲಿ ವಿರಾಟ್ ಕೊಹ್ಲಿ ಹಿಡಿದ ಕ್ಯಾಚ್ ಪ್ರೇಕ್ಷಕರನ್ನು ದಂಗಾಗಿಸಿತ್ತು. ಶಾರ್ದುಲ್ ಠಾಕೂರ್ ಎಸೆತದಲ್ಲಿ ಆದಿಲ್ ರಶೀದ್ ಆಫ್​ ಸೈಡ್​ನತ್ತ ಬಾರಿಸಿದ್ದರು. ಅಲ್ಲೇ ಶಾರ್ಟ್​ ಕವರ್​ ಫೀಲ್ಡಿಂಗ್​ನಲ್ಲಿದ್ದ ವಿರಾಟ್ ಕೊಹ್ಲಿ ಚಕ್ಕನೆ ಚಿಮ್ಮಿ ಚೆಂಡನ್ನು ಹಿಡಿದು ಇಂಗ್ಲೆಂಡ್​ನ 8ನೇ ವಿಕೆಟ್​ ಪತನಕ್ಕೆ ಕಾರಣರಾದರು. ಇದಾಗ್ಯೂ ಮತ್ತೊಂದೆಡೆ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ ಸ್ಯಾಮ್ ಕರ್ರನ್ 45 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು.

ಅಂತಿಮ 6 ಓವರ್​ಗಳಲ್ಲಿ ಇಂಗ್ಲೆಂಡ್​ಗೆ ಗೆಲ್ಲಲು 51 ರನ್​ಗಳ ಅವಶ್ಯಕತೆಯಿತ್ತು. ಈ ಹಂತದಲ್ಲಿ ಬಿರುಸಿನ ಬ್ಯಾಟಿಂಗ್ ಪ್ರದರ್ಶಿಸಿದ ಸ್ಯಾಮ್ ಕರ್ರನ್ ಪಂದ್ಯದ ಚಿತ್ರಣ ಬದಲಿಸಿದರು. ಪರಿಣಾಮ ಅಂತಿಮ ಮೂರು ಓವರ್​ಗಳಲ್ಲಿ ಕೇವಲ 23 ರನ್​ಗಳ ಅವಶ್ಯಕತೆಯಿತ್ತು.

48ನೇ ಓವರ್ ಎಸೆದ ಭುವನೇಶ್ವರ್ ಕುಮಾರ್ ಕೇವಲ 4 ರನ್​ ನೀಡಿದರು. ಪರಿಣಾಮ ಅಂತಿಮ 2 ಓವರ್​ನಲ್ಲಿ 19 ರನ್​ಗಳು ಬೇಕಿತ್ತು.  ಹಾರ್ದಿಕ್ ಪಾಂಡ್ಯ ಎಸೆದ 49ನೇ ಓವರ್​ನಲ್ಲಿ ಮಾರ್ಕ್​ವುಡ್ ನೀಡಿದ ಕ್ಯಾಚ್​ನ್ನು ಶಾರ್ದುಲ್ ಠಾಕೂರ್ ಕೈಚೆಲ್ಲಿದರು. ಇದರ ಬೆನ್ನಲ್ಲೇ ಸ್ಯಾಮ್ ಕರ್ರನ್ ನೀಡಿದ ಕ್ಯಾಚ್ ಹಿಡಿಯುವಲ್ಲಿ ನಟರಾಜನ್ ವಿಫಲರಾದರು. ಇದಾಗ್ಯೂ ಕೇವಲ 5 ರನ್​ಗಳನ್ನು ನೀಡಿ ಪಾಂಡ್ಯ ಪಂದ್ಯವನ್ನು ಕೊನೆಯ ಓವರ್​ನತ್ತ ಕೊಂಡೊಯ್ದರು.

ಕೊನೆಯ ಓವರ್​ನಲ್ಲಿ 14 ರನ್​ಗಳ ಅವಶ್ಯಕತೆಯಿತ್ತು. ನಟರಾಜ್ ಎಸೆದ ಈ ಓವರ್​ನ ಮೊದಲ ಎಸೆತದಲ್ಲಿ ಸ್ಯಾಮ್ ಕರ್ರನ್ ಬಿರುಸಿನ ಹೊಡೆತ ಬಾರಿಸಿದರು. ಎರಡು ರನ್ ಕದಿಯುವ ತವಕದಲ್ಲಿದ್ದ ಸ್ಯಾಮ್ ಮೊದಲ ರನ್ ಪೂರೈಸಿದ ಬಳಿಕ ಎಡವಿದರು. ಇತ್ತ ಕೀಪರ್ ತುದಿಯಿಂದ ಎರಡನೇ ರನ್​ಗೆ ಓಡಿದ ಮಾರ್ಕ್​ವುಡ್ (14) ಮರಳಿ ಬರುವಷ್ಟರಲ್ಲಿ ಪಾಂಡ್ಯ ಎಸೆತ ನೇರ ಥ್ರೋಗೆ ವಿಕೆಟ್ ಕೀಪರ್ ರನೌಟ್ ಮಾಡಿದರು.

2ನೇ ಎಸೆತದಲ್ಲಿ ರೀಸ್ ಟಾಪ್ಲೆ 1 ರನ್ ತೆಗೆದರು. 3ನೇ ಹಾಗೂ 4ನೇ ಎಸೆತದಲ್ಲಿ ಸ್ಯಾಮ್ ಯಾವುದೇ ರನ್ ಓಡಲಿಲ್ಲ. ಕೊನೆಯ 2 ಬಾಲ್​ನಲ್ಲಿ 12 ರನ್​ಗಳ ಅವಶ್ಯಕತೆ. 5ನೇ ಎಸೆತದಲ್ಲಿ ಭರ್ಜರಿ ಬೌಂಡರಿ ಬಾರಿಸಿದರು. ಅಂತಿಮ ಎಸೆತದಲ್ಲಿ 8 ರನ್​ಗಳ ಅವಶ್ಯಕತೆಯಿತ್ತು. ಆದರೆ ಭರ್ಜರಿ ಹೊಡೆತ ಬಾರಿಸುವಲ್ಲಿ ಸ್ಯಾಮ್ ಕರ್ರನ್ (95) ವಿಫಲರಾದರು. ಅಲ್ಲದೆ ನಿಗದಿತ 50 ಓವರ್​ಗಳಲ್ಲಿ ಇಂಗ್ಲೆಂಡ್ ತಂಡವು 9 ವಿಕೆಟ್ ನಷ್ಟಕ್ಕೆ 322 ರನ್​ಗಳಿಸಲಷ್ಟೇ ಶಕ್ತರಾದರು. ಈ ಮೂಲಕ ಟೀಮ್ ಇಂಡಿಯಾ 7 ರನ್​ಗಳ ರೋಚಕ ಜಯದೊಂದಿಗೆ ಸರಣಿ ವಶಪಡಿಸಿಕೊಂಡಿತು.

ಟೀಮ್ ಇಂಡಿಯಾ ಪರ 10 ಓವರ್​ನಲ್ಲಿ ಕೇವಲ 43 ರನ್​ ನೀಡಿ 3 ವಿಕೆಟ್ ಕಬಳಿಸಿ ಭುವನೇಶ್ವರ್ ಕುಮಾರ್ ಮಿಂಚಿದರೆ, 10 ಓವರ್​ನಲ್ಲಿ 67 ರನ್​​ ನೀಡಿ ಶಾರ್ದುಲ್ ಠಾಕೂರ್ 4 ವಿಕೆಟ್ ಪಡೆದರು.