India vs England 2nd ODI: ಸಣ್ಣ ಎಡವಟ್ಟು..ಬೆನ್​ ಸ್ಟೋಕ್ಸ್​ಗೆ ಎಚ್ಚರಿಕೆ ನೀಡಿದ ಅಂಪೈರ್..!

ಭಾರತ-ಇಂಗ್ಲೆಂಡ್ ನಡುವೆ ಪುಣೆಯಲ್ಲಿ ನಡೆಯುತ್ತಿರುವ 2ನೇ ಏಕದಿನ ಪಂದ್ಯದ ವೇಳೆ ಆಲ್​ರೌಂಡರ್​ ಬೆನ್​ ಸ್ಟೋಕ್ಸ್​ಗೆ ಆನ್​-ಫೀಲ್ಡ್​ ಅಂಪೈರ್ ಎಚ್ಚರಿಕೆ ನೀಡಿರುವ ಘಟನೆ ನಡೆದಿದೆ. ಪಂದ್ಯದ ನಾಲ್ಕನೇ ಓವರ್​ ವೇಳೆ ಚೆಂಡು ಬೆನ್ ಸ್ಟೋಕ್ಸ್ ಕೈ ಸೇರಿತ್ತು. ಈ ವೇಳೆ ಸ್ಟೋಕ್ಸ್​ ಚೆಂಡಿಗೆ ಎಂಜಲು ಸವರಿದರು. ಆದರೆ ಕೊರೋನಾ ಕಾರಣದಿಂದ ಚೆಂಡಿಗೆ ಎಂಜಲು ಸವರುವುದು ನಿಷೇಧಿಸಲಾಗಿದೆ. ಇದಾಗ್ಯೂ ಬಾಲ್​ಗೆ ಎಂಜಲು ಹಾಕಿದ ಬೆನ್ ಸ್ಟೋಕ್ಸ್​ಗೆ ಅಂಪೈರ್ ಎಚ್ಚರಿಕೆ ನೀಡಿದರು.

ಕಳೆದ ಒಂದು ವರ್ಷದಿಂದ ಚೆಂಡಿಗೆ ಎಂಜಲು ಸವರುವುದನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ನಿಷೇಧಿಸಲಾಗಿದೆ. ಇದಾಗ್ಯೂ ಎಂಜಲು ಸವರಿದರೆ ಎದುರಾಳಿ ತಂಡಕ್ಕೆ ಪೆನಾಲ್ಟಿ ರನ್ ನೀಡಲಾಗುತ್ತದೆ. ಈ ಬಗ್ಗೆ ಬೆನ್​ ಸ್ಟೋಕ್ಸ್​ಗೆ ಎಚ್ಚರಿಕೆ ನೀಡಿದ ಆನ್​-ಫೀಲ್ಡ್ ಅಂಪೈರ್, ಬಳಿಕ ನಾಯಕ ಜೋಸ್ ಬಟ್ಲರ್​ಗೆ 2ನೇ ಬಾರಿ ಪುನಾರಾರ್ವತಿಸಿದರೆ ಪೆನಾಲ್ಟಿಯಾಗಿ ಭಾರತಕ್ಕೆ 5 ರನ್​ ನೀಡುವುದು ಎಚ್ಚರಿಸಿದರು.

ಅಲ್ಲದೆ ಬೆನ್ ಸ್ಟೋಕ್ಸ್ ಎಂಜಲು ಸವರಿದ ಚೆಂಡನ್ನು ಸ್ಯಾನಿಟೈಸ್ ಮಾಡಿ ಸ್ವಚ್ಛಗೊಳಿಸಿ ಪಂದ್ಯವನ್ನು ಮುಂದುವರೆಸಲಾಯಿತು. ಕಳೆದ ಐಪಿಎಲ್ ಟೂರ್ನಿ ವೇಳೆಯೂ ಈ ನಿಯಮವನ್ನು ಜಾರಿಗೊಳಿಸಲಾಗಿತ್ತು. ಇದೇ ಆರ್​ಸಿಬಿ ನಾಯಕ ವಿರಾಟ್ ಕೊಹ್ಲಿ ಹಾಗೂ ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿದ್ದ ರಾಬಿನ್ ಉತ್ತಪ್ಪ ಎಂಜಲು ಸವರಲು ಮುಂದಾಗಿರುವ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು.

ಈ ಬಾರಿ ನಡೆಯಲಿರುವ ಐಪಿಎಲ್​ನಲ್ಲೂ ಚೆಂಡಿಗೆ ಎಂಜಲು ಸವರುವುದನ್ನು ನಿಷೇಧಿಸಲಾಗಿದೆ. ಹೀಗಾಗಿ ಬೌಲರುಗಳಿಗೆ ಯಶಸ್ಸು ಸಾಧಿಸುವುದು ತುಸು ಕಷ್ಟ ಎನ್ನಬಹುದು. ಏಕೆಂದರೆ ಸಾಮಾನ್ಯವಾಗಿ ಚೆಂಡನ್ನು ಭಾರವಾಗಿ ಮತ್ತು ಮೃದುವಾಗಿಸಲು ಬೆವರು ಬಳಸಲಾಗುತ್ತದೆ. ಆದರೆ ರಿವರ್ಸ್ ಸ್ವಿಂಗ್​ಗೆ ಅನುಕೂಲವಾಗಲು ಎಂಜಲು ಬಳಸಲಾಗುತ್ತದೆ.