India vs Bangladesh: ಮೊದಲ ಟಿ-20 ಪಂದ್ಯದಲ್ಲೇ ಗೆದ್ದು ಬೀಗಲಿದೆ ಭಾರತ; ಯಾಕೆ ಗೊತ್ತಾ..?

ಬೆಂಗಳೂರು (ನ. 02): ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ ಸರಣಿಯನ್ನು ವೈಟ್​ವಾಶ್ ಮಾಡಿದ ಬಳಿಕ ಟೀಂ ಇಂಡಿಯಾ ಸದ್ಯ ಟಿ-20 ಸರಣಿಗೆ ಸಜ್ಜಾಗಿದೆ. ನಾಳೆ (ನ. 03) ದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ಮೊದಲ ಪಂದ್ಯ ನಡೆಯಲಿದ್ದು, ರೋಹಿತ್ ಪಡೆ ಶುಭಾರಂಭ ಮಾಡುವ ವಿಶ್ವಾಸದಲ್ಲಿದೆ.

ಮೊದಲ ಟಿ-20 ಕದನದಲ್ಲಿ ಭಾರತವೇ ಗೆಲ್ಲಲಿದೆ ಎಂಬುದಕ್ಕೆ ಅನೇಕ ಕಾರಣಗಳಿವೆ. ಅವುಗಳಲ್ಲಿ ಪ್ರಮುಖವಾದವುಗಳನ್ನು ನೋಡುವುದಾದರೆ…

ಈವರೆಗೆ ಬಾಂಗ್ಲಾದೇಶ ವಿರುದ್ಧದ ಟಿ-20 ಪಂದ್ಯದಲ್ಲಿ ಭಾರತ ಒಂದೇ ಒಂದು ಸೋಲನ್ನು ಕಂಡಿಲ್ಲ. ಉಭಯ ತಂಡಗಳು ಒಟ್ಟು 8 ಟಿ-20 ಪಂದ್ಯಗಳಲ್ಲಿ ಮುಖಾಮುಖಿ ಆಗಿವೆ. ಇದರಲ್ಲಿ ಎಂಟೂ ಪಂದ್ಯಗಳಲ್ಲಿ ಗೆದ್ದು ಬೀಗಿದ್ದು ಭಾರತ.

(VIDEO): ಪುರುಷರಿಂದಲೂ ಅಸಾಧ್ಯ ಬೌಂಡರಿ ಲೈನ್​ ಪಕ್ಕ ಹರ್ಮನ್​​ಪ್ರೀತ್ ಹಿಡಿದ ಈ ಮ್ಯಾಜಿಕ್ ಕ್ಯಾಚ್

ಭಾರತ ಪರ ಟಿ-20 ಪಂದ್ಯಗಳಲ್ಲಿ ನಾಯಕನಾಗಿ ರೋಹಿತ್ ಶರ್ಮಾ ಅದ್ಭುತ ದಾಖಲೆ ಹೊಂದಿದ್ದಾರೆ. ಅಲ್ಲದೆ ಅರುಣ್ ಜೇಟ್ಲಿ ಕ್ರೀಡಾಂಗಣ ಹಿಟ್​ಮ್ಯಾನ್​ಗೆ ಲಕ್ಕಿ ಗ್ರೌಂಡ್ ಎಂದೇ ಹೇಳಬಹುದು. ಈ ಸ್ಟೇಡಿಯಂನಲ್ಲಿ ರೋಹಿತ್ ಒಂದು ಪಂದ್ಯವನ್ನಾಡಿದ್ದು ನ್ಯೂಜಿಲೆಂಡ್ ವಿರುದ್ಧ 55 ಎಸೆತಗಳಲ್ಲಿ 80 ರನ್ ಬಾರಿಸಿದ್ದರು. ಅಲ್ಲದೆ ಐಪಿಎಲ್​ನಲ್ಲಿ ಎರಡು ಅರ್ಧಶತಕ ಕೂಡ ಇದೇ ಮೈದಾನದಲ್ಲಿ ಸಿಡಿಸಿದ್ದಾರೆ.

ಶಿಖರ್ ಧವನ್​ಗೆ ಇದು ಹೋಮ್​ ಗ್ರೌಂಡ್ ಆಗಿರುವುದರಿಂದ ಅಬ್ಬರಿಸುವುದು ಖಚಿತ. ಜೊತೆಗೆ ಧವನ್ ಕೂಡ ಈ ಮೈದಾನದಲ್ಲಿ ನ್ಯೂಜಿಲೆಂಡ್ ವಿರುದ್ಧ ಮತ್ತು ಐಪಿಎಲ್ ಸೇರಿ ಒಟ್ಟು 4 ಅರ್ಧಶತಕ ಗಳಿಸಿದ್ದಾರೆ. ಶ್ರೇಯಸ್ ಐಯರ್ ಐಪಿಎಲ್​ನಲ್ಲಿ ಡೆಲ್ಲಿ ತಂಡದ ನಾಯಕ. ಹೀಗಾಗಿ ಈ ಗ್ರೌಂಡ್​ನ ಬಗ್ಗೆ ಚೆನ್ನಾಗಿಯೆ ಅರಿತುಕೊಂಡಿದ್ದಾರೆ.

ಶಾರ್ದೂಲ್ ಠಾಕೂರ್, ದೀಪಕ್ ಚಹಾರ್ ಹಾಗೂ ಖಲೀಲ್ ಅಹ್ಮದ್​ಗೆ ತಮ್ಮ ಪ್ರತಿಭೆಯನ್ನು ತೋರ್ಪಡಿಸಲು ಇದೊಂದು ಅತ್ಯುತ್ತಮ ವೇದಿಕೆ. ಇನ್ನು ಸ್ಪಿನ್ನರ್ ಯಜುವೇಂದ್ರ ಚಹಾಲ್ ಕೂಡ ಹಿಂದಿನ ನ್ಯೂಜಿಲೆಂಡ್ ವಿರುದ್ಧ 4 ಓವರ್​ಗೆ 26 ರನ್ ನೀಡಿ 2 ವಿಕೆಟ್ ಪಡೆದು ಉತ್ತಮ ಬೌಲಿಂಗ್ ಪ್ರದರ್ಶನ ನೀಡಿದ್ದರು.

IND vs BAN: 2015ರಲ್ಲಿ ಕೊನೆ ಪಂದ್ಯ: 4 ವರ್ಷದ ಬಳಿಕ ಟೀಂ ಇಂಡಿಯಾ ಪರ ಕಣಕ್ಕಿಳಿಯಲಿದ್ದಾರೆ ಈ ಆಟಗಾರ?

ಇತ್ತ ಬಾಂಗ್ಲಾದೇಶ ಈ ಮೈದಾನದಲ್ಲಿ ಆಡುತ್ತಿರುವುದು ಇದೇ ಮೊದಲು. ಕೆಲ ಬಾಂಗ್ಲಾ ಆಟಗಾರರಿಗಷ್ಟೆ ಭಾರತದ ಮೈದಾನದಲ್ಲಿ ಆಡಿದ ಅನುಭವವಿದೆ. ಇದು ಬಾಂಗ್ಲಾ ಹುಲಿಗಳಿಗೆ ಹಿನ್ನಡೆಯಾಗುವುದು ಖಚಿತ. ಜೊತೆಗೆ ಶಕಿಬ್ ಅಲ್ ಹಸನ್ ಎರಡು ವರ್ಷ ಕ್ರಿಕೆಟ್​ನಿಂದ ಬ್ಯಾನ್ ಆಗಿರುವ ಶಾಕ್​ನಿಂದ ಬಾಂಗ್ಲಾ ಆಟಗಾರರು ಇನ್ನೂ ಹೊರಬಂದಿಲ್ಲ.

ಅಂಕಿಅಂಶದ ಜೊತೆ ಬಾಂಗ್ಲಾ ಆಟಗಾರರಿಗೆ ಅನುಭವದ ಕೊರತೆ ಇರುವ ಕಾರಣ ಮೊದಲ ಟಿ-20 ಪಂದ್ಯದಲ್ಲಿ ಭಾರತ ಗೆಲುವು ಸಾಧಿಸುವುದು ನಿಶ್ಚಿತ ಎಂದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ಪಂದ್ಯ ನಾಳೆ ಸಂಜೆ 7 ಗಂಟೆಗೆ ಆರಂಭವಾಗಲಿದೆ.