India vs Australia: ವಾಷಿಂಗ್ಟನ್ 'ಸುಂದರ' ಆಟಕ್ಕೆ 110 ವರ್ಷಗಳ ಹಿಂದಿನ ದಾಖಲೆ ಧೂಳೀಪಟ..!

ಭಾರತ-ಆಸ್ಟ್ರೇಲಿಯಾ ನಡುವಣ ಬಾರ್ಡರ್​-ಗವಾಸ್ಕರ್ ಸರಣಿಯ ಅಂತಿಮ ಟೆಸ್ಟ್ ಪಂದ್ಯವು ಕುತೂಹಲಘಟಕ್ಕೆ ತಲುಪಿದೆ. ವಾಷಿಂಗ್ಟನ್ ಸುಂದರ್ (62) ಮತ್ತು ಶಾರ್ದೂಲ್ ಠಾಕೂರ್ (67) ಅವರ ಅರ್ಧಶತಕಗಳ ಸಹಾಯದಿಂದ ಭಾರತ ತಂಡ ಬ್ರಿಸ್ಬೇನ್​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಮೊದಲ ಇನ್ನಿಂಗ್ಸ್​ನಲ್ಲಿ 336 ರನ್ ಗಳಿಸಿತು. ಆಸ್ಟ್ರೇಲಿಯಾದ 369 ರನ್​ಗಳ ಮೊದಲ ಇನ್ನಿಂಗ್ಸ್​ಗೆ ಪ್ರತಿಯಾಗಿ ಭಾರತ 33 ರನ್​ಗಳ ಹಿನ್ನಡೆ ಅನುಭವಿಸಿತು. ಎರಡನೇ ಇನ್ನಿಂಗ್ಸ್ ಪ್ರಾರಂಭಿಸಿದ ಆಸ್ಟ್ರೇಲಿಯಾ 3ನೇ ದಿನಾಂತ್ಯಕ್ಕೆ ವಿಕೆಟ್ ನಷ್ಟವಿಲ್ಲದೆ 21 ರನ್ ಗಳಿಸಿ ಮುನ್ನಡೆಯನ್ನು 54 ರನ್​ಗೆ ಹೆಚ್ಚಿಸಿಕೊಂಡು ತುಸು ಮೇಲುಗೈ ಸ್ಥಿತಿಯಲ್ಲಿದೆ.

ಇನ್ನು ಈ ಪಂದ್ಯದಲ್ಲಿ 7ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ವಾಷಿಂಗ್ಟನ್ ಸುಂದರ್ ಚೊಚ್ಚಲ ಇನಿಂಗ್ಸ್​ನಲ್ಲೇ ಅರ್ಧಶತಕ ಬಾರಿಸಿ ಗಮನ ಸೆಳೆದರು. 144 ಎಸೆತಗಳನ್ನು ಎದುರಿಸಿದ ಸುಂದರ್ 62 ರನ್​ ಕಲೆಹಾಕಿದರು. ಇದರಲ್ಲಿ 7 ಬೌಂಡರಿ ಹಾಗೂ 1 ಸಿಕ್ಸರ್ ಒಳಗೊಂಡಿತ್ತು. ಈ ಭರ್ಜರಿ ಇನಿಂಗ್ಸ್​ನೊಂದಿಗೆ ಟೆಸ್ಟ್ ಕ್ರಿಕೆಟ್​ನಲ್ಲಿ ಪಾದಾರ್ಪಣೆ ಪಂದ್ಯದಲ್ಲಿ 7ನೇ ಕ್ರಮಾಂಕದಲ್ಲಿ ಅತ್ಯಧಿಕ ರನ್ ಬಾರಿಸಿದ ಆಟಗಾರ ಎಂಬ ವಿಶ್ವ ದಾಖಲೆ ವಾಷಿಂಗ್ಟನ್ ಸುಂದರ್ ಪಾಲಾಗಿದೆ.

ಹೌದು, ಈ ಹಿಂದೆ 1911ರ ಡಿಸೆಂಬರ್​ನಲ್ಲಿ ಸಿಡ್ನಿಯಲ್ಲಿ ನಡೆದ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್​ ಪಂದ್ಯದಲ್ಲಿ ಪಾದಾರ್ಪಣೆ ಮಾಡಿದ್ದ ಇಂಗ್ಲೆಂಡ್ ತಂಡದ ಬೌಲರ್ ಫ್ರಾಂಕ್ ಪೋಸ್ಟರ್ 56 ರನ್ ಬಾರಿಸಿದ್ದರು. ಈ ದಾಖಲೆ ಅಚ್ಚಳಿಯದೇ ಉಳಿದಿತ್ತು. ಆದರೆ ಚೊಚ್ಚಲ ಪಂದ್ಯದಲ್ಲೇ 7ನೇ ಕ್ರಮಾಂಕದಲ್ಲಿ 62 ರನ್ ಕಲೆಹಾಕುವ ಮೂಲಕ ಸುಂದರ್ 110 ವರ್ಷಗಳ ಹಿಂದಿನ ದಾಖಲೆಯನ್ನು ಅಳಿಸಿ ಹಾಕಿದ್ದಾರೆ.

ಇನ್ನು ಸುಂದರ್-ಶಾರ್ದೂಲ್ ಜೋಡಿ 123 ರನ್ ಕಲೆಹಾಕುವ ಮೂಲಕ 7ನೇ ವಿಕೆಟ್​ನಲ್ಲಿ ಭಾರತದ ಪರ ಅತೀ ಹೆಚ್ಚು ರನ್ ಜೊತೆಯಾಟವಾಡಿದ ಜೋಡಿ ಎನಿಸಿಕೊಂಡಿದ್ದಾರೆ. ಇದಲ್ಲದೆ ಬ್ರಿಸ್ಬೇನ್ ಗಾಬ್ಬಾ ಮೈದಾನದಲ್ಲಿ 1991ರಲ್ಲಿ ಕಪಿಲ್ ದೇವ್ ಮತ್ತು ಮನೋಜ್ ಪ್ರಭಾಕರ್ 58 ರನ್​ ಜೊತೆಯಾಟವಾಡಿರುವುದು 7ನೇ ವಿಕೆಟ್​ ಅತ್ಯುತ್ತಮ ಜೊತೆಯಾಟವಾಗಿತ್ತು. ಆದರೆ ಸುಂದರ್ ಹಾಗೂ ಶಾರ್ದೂಲ್ ಜೋಡಿ 59 ರನ್​ ಗಳಿಸುವುದರೊಂದಿಗೆ 3 ದಶಕಗಳ ಹಿಂದಿನ ದಾಖಲೆಯನ್ನು ಮುರಿದರು. ಈ ಮೂಲಕ ಗಬ್ಬಾ ಮೈದಾನದಲ್ಲಿ 7ನೇ ವಿಕೆಟ್​ ಅತೀ ಹೆಚ್ಚು ರನ್ ಜೊತೆಯಾಟವಾಡಿದ ಜೋಡಿ ಎಂಬ ಹಿರಿಮೆಗೆ ಶಾರ್ದೂಲ್-ಸುಂದರ್ ಪಾತ್ರರಾಗಿದ್ದಾರೆ.