India vs Australia Live: ಕುತೂಹಲದತ್ತ ನಾಲ್ಕನೇ ಟೆಸ್ಟ್: ಊಟದ ವಿರಾಮದ ವೇಳೆಗೆ ಆಸೀಸ್ 149-4

ಬ್ರಿಸ್ಬೇನ್ (ಜ. 18): ಇಲ್ಲಿನ ಗಬ್ಬಾ ಕ್ರೀಡಾಂಗಣದಲ್ಲಿ ಸಾಗುತ್ತಿರುವ ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಣ ಅಂತಿಮ ನಾಲ್ಕನೇ ಟೆಸ್ಟ್​ ಪಂದ್ಯ ಕುತೂಹಲ ಘಟ್ಟದತ್ತ ಸಾಗುತ್ತಿದೆ. 33 ರನ್​ಗಳ ಅಲ್ಪ ಮುನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್​ ಆರಂಭಿಸಿರುವ ಕಾಂಗರೂ ಪಡೆ ಊಟದ ವಿರಾಮದ ವೇಳೆಗೆ 4 ವಿಕೆಟ್ ಕಳೆದುಕೊಂಡಿದ್ದು 149 ರನ್ ಗಳಿಸಿದೆ. 182 ರನ್​ಗಳ ಮುನ್ನಡೆಯಲ್ಲಿದೆ. ಭಾರತೀಯ ಯುವ ಬೌಲರ್​ಗಳು ಪರಾಕ್ರಮ ಮೆರೆಯುತ್ತಿದ್ದು 4ನೇ ದಿನವನ್ನು ಉತ್ತಮವಾಗಿ ಆರಂಭಿಸಿದೆ. ಇತ್ತ ಸ್ಟೀವ್ ಸ್ಮಿತ್ ಹಾಗೂ ಕಾಮೆರನ್ ಗ್ರೀನ್ ಎಚ್ಚರಿಕೆಯಿಂದ ಬ್ಯಾಟ್ ಬೀಸುತ್ತಿದ್ದಾರೆ.

ನಿನ್ನೆ ಮೂರನೇ ದಿನದಾಟದ ಅಂತ್ಯಕ್ಕೆ ವಿಕೆಟ್ ನಷ್ಟವಿಲ್ಲದೆ 21 ರನ್ ಗಳಿಸಿ ಮುನ್ನಡೆಯನ್ನು 54 ರನ್​ಗೆ ಹೆಚ್ಚಿಸಿಕೊಂಡಿದ್ದ ಆಸ್ಟ್ರೇಲಿಯಾ ಇಂದು ಆರಂಭದಲ್ಲೆ ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಮಾರ್ಕಸ್​ ಹ್ಯಾರಿಸ್​ ಶಾರ್ದುಲ್​ ಠಾಕೂರ್​ ಓವರ್​ನಲ್ಲಿ ರಿಷಬ್​ ಪಂತ್​ಗೆ ಕ್ಯಾಚ್​ ಕೊಟ್ಟು 38 ರನ್​ ಗಳಿಸಿ ಪೆವಿಲಿಯನ್​ ಸೇರಿದರೆ, ಅದರ ಬೆನ್ನಲ್ಲೇ ಡೇವಿಡ್​ ವಾರ್ನರ್​ ಸಹ 48 ರನ್​ ಗಳಿಸಿ ಅರ್ಧಶತಕ ಹೊಸ್ತಿಲಿನಲ್ಲಿ ವಾಷಿಂಗ್ಟನ್​ ಸುಂದರ್​ಗೆ​ ವಿಕೆಟ್​ ಒಪ್ಪಿಸಿದರು.

It is Lunch on Day 4 with Australia on 149-4. #TeamIndia took 4 wickets in the morning session for 128 runs in 35 overs. #AUSvsIND

Details - https://t.co/OgU227xylR pic.twitter.com/qYi1PpkjxK

— BCCI (@BCCI) January 18, 2021

ಇದಾದ ನಂತರ ಎಚ್ಚರಿಕೆಯ ಆಟವಾಡುತ್ತಿದ್ದ, ಮೊದಲ ಇನ್ನಿಂಗ್ಸ್​ನಲ್ಲಿ ಶತಕ ಸಿಡಿಸಿ ಅಬ್ಬರಿಸಿದ್ದ ಮಾರ್ನಾಸ್​ ಲಾಬುಶಾನ್​ 25 ರನ್​ಗೆ ಹಾಗೂಮ್ಯಾಥ್ಯೂ ವೇಡ್​(0) ಅವರ ವಿಕೆಟ್​ ಅನ್ನು ಮೊಹಮ್ಮದ್​ ಸಿರಾಜ್​ ಉರಳಿಸಿದರು.

ಸದ್ಯ ಊಟದ ವಿರಾಮದ ವೇಳೆಗೆ ಆಸ್ಟ್ರೇಲಿಯಾ 4 ವಿಕೆಟ್ ಕಳೆದುಕೊಂಡಿದ್ದು 149 ರನ್ ಗಳಿಸಿದೆ. 182 ರನ್​ಗಳ ಮುನ್ನಡೆಯಲ್ಲಿದೆ. 28 ರನ್ ಗಳಿಸಿ ಸ್ಟೀವ್ ಸ್ಮಿತ್ ಹಾಗೂ 4 ರನ್ ಗಳಿಸಿ ಕ್ಯಾಮೆರಾನ್ ಗ್ರೀನ್ ಕ್ರೀಸ್​ನಲ್ಲಿದ್ದಾರೆ.

ಇದಕ್ಕೂ ಮುನ್ನ ನಿನ್ನೆ ಮೊದಲ ಇನ್ನಿಂಗ್ಸ್​​ನಲ್ಲಿ ಅಲ್ಪ ಮೊತ್ತಕ್ಕೆ ಕುಸಿಯುವ ಭೀತಿಯಲ್ಲಿದ್ದ ಭಾರತಕ್ಕೆ ವಾಷಿಂಗ್ಟನ್ ಸುಂದರ್ ಹಾಗೂ ಶಾರ್ದೂಲ್ ಠಾಕೂರ್ ಬ್ಯಾಟಿಂಗ್​ನಲ್ಲಿ ಅದ್ಭುತ ನೆರವಾದರು. 186 ರನ್ ಗೆ 6ನೇ ವಿಕೆಟ್ ಪತನವಾದಾಗ ಒಂದಾದ ಈ ಜೋಡಿ ಶತಕದ ಜೊತೆಯಾಟವಾಡಿತು. ಈ ಮೂಲಕ 30 ವರ್ಷಗಳ ಹಿಂದಿನ ದಾಖಲೆಯನ್ನು ಅಳಿಸಿ ಹಾಕಿದರು.

India vs Australia: ವಾಷಿಂಗ್ಟನ್ ಸುಂದರ ಆಟಕ್ಕೆ 110 ವರ್ಷಗಳ ಹಿಂದಿನ ದಾಖಲೆ ಧೂಳೀಪಟ..!

ಭಾರತ ಆಸ್ಟ್ರೇಲಿಯಾ ನಡುವಿನ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿ ಸದ್ಯ 1-1ರಿಂದ ಸಮವಾಗಿದ್ದು, ಕಳೆದ ಟೆಸ್ಟ್​ನಲ್ಲಿ ಭಾರತ ಸೋಲಿನ ದವಡೆಯಿಂದ ಪಾರಾಗಿ ರೋಚಕ ರೀತಿಯಲ್ಲಿ ಡ್ರಾ ಸಾಧಿಸಿತ್ತು. ಈ ನಾಲ್ಕನೇ ಪಂದ್ಯದ ಸದ್ಯದ ಗತಿ ಗಮನಿಸಿದರೆ ಡ್ರಾ ಆಗುವ ಸಾಧ್ಯತೆ ತುಸು ಹೆಚ್ಚಿದ್ದಂತಿದೆ.