AUS vs IND: ಭಾರತ-ಆಸ್ಟ್ರೇಲಿಯಾ ಮೊದಲ ಟೆಸ್ಟ್​; ಅಂತಿಮ ಹನ್ನೊಂದು ಆಟಗಾರರ ಪಟ್ಟಿ ಬಿಡುಗಡೆ; ಯಾರೆಲ್ಲಾ ಇದ್ದಾರೆ ಗೊತ್ತಾ?

ಸಿಡ್ನಿ (ಡಿಸೆಂಬರ್​ 16); ಕಾಂಗರೂ ನೆಲದಲ್ಲಿ ಏಕದಿನ ಸರಣಿ ಸೋತರೂ ಟಿ-20 ಸರಣಿಯಲ್ಲಿ ಗೆಲುವು ಸಾಧಿಸುವ ಮೂಲಕ ವಿಜಯದ ಹಾದಿಗೆ ಮರಳಿರುವ ಭಾರತ ತಂಡ ನಾಳೆಯಿಂದ ಟೆಸ್ಟ್​ ಸರಣಿಗಾಗಿ ಕಣಕ್ಕಿಳಿಯಲಿದೆ. ಆಸೀಸ್​ ಎದುರು ಭಾರತ ಟೆಸ್ಟ್​ ತಂಡದಲ್ಲಿ ಆಡುವ ಹನ್ನೊಂದರ ಬಳಗದಲ್ಲಿ ಯಾರೆಲ್ಲಾ ಸ್ಥಾನ ಪಡೆಯಲಿದ್ದಾರೆ? ಎಂಬ ಕುತೂಹಲ ಮೂಡಿತ್ತು. ಆದರೆ, ಟೀಮ್​ ಇಂಡಿಯಾ ಇಂದು ಆಡುವ ಹನ್ನೊಂದು ಆಟಗಾರರ ಪಟ್ಟಿಯಲ್ಲಿ ಬಿಡುಗಡೆ ಮಾಡಿದ್ದು ಎಲ್ಲಾ ಕುತೂಹಲಕ್ಕೂ ತೆರೆ ಬಿದ್ದಿದೆ. ಅದರಂತೆ ಈ ಬಾರಿ ಆಸ್ಟ್ರೇಲಿಯಾ ಎದುರಿನ ಟೆಸ್ಟ್​ ಪಂದ್ಯದಲ್ಲಿ ಆರಂಭಿಕರಾಗಿ ಪೃಥ್ವಿ ಶಾ ಜೊತೆಗೆ ಮಾಯಾಂಕ್ ಅಗರ್ವಾಲ್​ ಕಣಕ್ಕಿಳಿದರೆ ಮಧ್ಯಮ ಕ್ರಮಾಂಕದಲ್ಲಿ ಹನುಮಾ ವಿಹಾರಿಗೆ ಸ್ಥಾನ ದೊರೆತಿದೆ. ಇನ್ನೂ ಸತತ ಕಳಪೆ ಫಾರ್ಮ್ ಅನುಭವಿಸುತ್ತಿರುವ ರಿಷಭ್​ ಪಂತ್​ ಬದಲಿಗೆ ವಿಕೆಟ್​ ಕೀಪರ್​ ಬ್ಯಾಟ್ಸ್​ಮನ್​ ಆಗಿ ಅನುಭವಿ ವೃದ್ಧಿಮಾನ್​ ಸಹಾ ಅವರಿಗೆ ಸ್ಥಾನ ನೀಡಿರುವುದು ಅಚ್ಚರಿಗೆ ಕಾರಣವಾಗಿದೆ.

ಕರ್ನಾಟಕದ ಆಟಗಾರ ಕೆ.ಎಲ್. ರಾಹುಲ್ ಮೊದಲ ಟೆಸ್ಟ್​ನಲ್ಲಿ ಕಣಕ್ಕಿಳಿಯುವುದಿಲ್ಲ ಎಂದು ನಾಯಕ ವಿರಾಟ್ ಕೊಹ್ಲಿ ಈ ಹಿಂದೆಯೇ ಮಾಹಿತಿ ನೀಡಿದ್ದರು. ಈ ಕುರಿತು ಇಂದು ಮಾತನಾಡಿರುವ ಕೊಹ್ಲಿ, "ಕೆ.ಎಲ್​. ರಾಹುಲ್ ನಿಸ್ಸಂಶಯವಾಗಿ ಅತ್ಯುತ್ತಮ ಆಟಗಾರ. ಆದರೆ, ಅವರನ್ನು ತಂಡದೊಳಗೆ ತೆಗೆದುಕೊಳ್ಳುವುದರಿಂದ ತಂಡದ ಸಂಯೋಜನೆ ಬದಲಾಗುತ್ತದೆ. ಸಮತೋಲನವಾದ ತಂಡವನ್ನು ಮೊದಲ ಪಂದ್ಯಕ್ಕೆ ಆಯ್ಕೆ ಮಾಡಲಾಗಿದೆ. ನಮ್ಮಲ್ಲಿ ಸಾಕಷ್ಟು ಗುಣಮಟ್ಟದ ಆಟಗಾರರಿದ್ದಾರೆ. ಹನುಮ ವಿಹಾರಿ ಸಹ ಟೆಸ್ಟ್​ ಪಂದ್ಯಗಳಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ. ಹೀಗಾಗಿಯೇ ರಾಹುಲ್ ಬದಲಿಗೆ ಅವರನ್ನು ಆಯ್ಕೆ ಮಾಡಲಾಗಿದೆ" ಎಂದು ತಿಳಿಸಿದ್ದಾರೆ.

UPDATE🚨: Here’s #TeamIndia’s playing XI for the first Border-Gavaskar Test against Australia starting tomorrow in Adelaide. #AUSvIND pic.twitter.com/WbVRWrhqwi

— BCCI (@BCCI) December 16, 2020

ಅಲ್ಲದೆ, "ನಮ್ಮ ಮುಂದೆ ಆರಂಭಿಕರಾಗಿ ಅನೇಕ ಆಯ್ಕೆಗಳಿವೆ. ಟೆಸ್ಟ್​ನಲ್ಲಿ ಕೆ.ಎಲ್​. ರಾಹುಲ್ ಅವರ ಪಾತ್ರವನ್ನು ಅರ್ಥ ಮಾಡಿಕೊಳ್ಳಲಾಗುತ್ತಿದೆ. ರೋಹಿತ್​ ಶರ್ಮಾ ತಂಡಕ್ಕೆ ಹಿಂದಿರುಗಿದ ನಂತರ ನಾವು ಇನ್ನೊಬ್ಬ ಸ್ಥಾಪಿತ ಓಪನರ್ ಜೊತೆಗೆ ಇನ್ನಿಂಗ್ಸ್​ ಆರಂಭಿಸಲಿದ್ದೇವೆ. ಆದ್ದರಿಂದ, ಕೆಎಲ್ ರಾಹುಲ್ ಎಲ್ಲಿ ಮತ್ತು ಹೇಗೆ ಹೊಂದಿಕೊಳ್ಳುತ್ತಾರೆ? ಎಂಬುದು ನಾವು ಸೂಕ್ಷ್ಮವಾಗಿ ಗಮನಿಸಬೇಕು.

ಇದನ್ನೂ ಓದಿ : ICC Test Rankings: ಟೆಸ್ಟ್​ ರ‍್ಯಾಂಕಿಂಗ್‌ ಪಟ್ಟಿ ಪ್ರಕಟ: ಟಾಪ್​ 10ನಲ್ಲಿ ಟೀಮ್ ಇಂಡಿಯಾದ 3 ಬ್ಯಾಟ್ಸ್​ಮನ್​​ಗಳು

ನಾವು ನಮ್ಮ ಅತ್ಯುತ್ತಮ ತಂಡವನ್ನು ಆಸ್ಟ್ರೇಲಿಯಾ ಎದುರು ಕಣಕ್ಕಿಳಿಸುವ ನಿಟ್ಟಿನಲ್ಲಿ ಈ ತಂಡವನ್ನು ಆಯ್ಕೆ ಮಾಡಿದ್ದೇವೆ. ಮುಂದಿನ ಪಂದ್ಯಗಳಲ್ಲಿ ತಂಡದ ಸಮತೋಲನಕ್ಕೆ ಅನುಗುಣವಾಗಿಯೇ ತಂಡವನ್ನು ಆಯ್ಕೆ ಮಾಡಲಾಗುವುದು" ಎಂದು ವಿರಾಟ್​ ಕೊಹ್ಲಿ ತಿಳಿಸಿದ್ದಾರೆ.

ಗುರುವಾರದ ಪಂದ್ಯದಲ್ಲಿ ರಾಹುಲ್ ನಮ್ಮ ಮೊದಲ ಆಯ್ಕೆಯಾಗಿರಲಿಲ್ಲ. ಹೀಗಾಗಿ ಪೃಥ್ವಿ ಶಾ ಮತ್ತು ಶುಭ್​ಮನ್​ ಗಿಲ್ ನಡುವೆ ಪೈಪೋಟಿ ಇತ್ತು. ಆದರೆ, ನಾವು ಪೃಥ್ವಿ ಶಾ ಅವರಿಗೆ ಅವಕಾಶ ನೀಡಿದ್ದೇವೆ. ಅಲ್ಲದೆ, ಹಿರಿಯರು ಜವಾಬ್ದಾರಿಯುತವಾಗಿ ಆಡುವ ಮೂಲಕ ಯುವಕರು ಸ್ವಾತಂತ್ರ್ಯವಾಗಿ ಬ್ಯಾಟ್​ ಬೀಸಲು ಅವಕಾಶ ಕಲ್ಪಿಸಬೇಕು ಎಂದು ಕೊಹ್ಲಿ ಭರವಸೆ ನೀಡಿದ್ದಾರೆ.