IND vs AUS; ರಾಹುಲ್​ ದ್ರಾವಿಡ್​ರನ್ನು ಆಸ್ಟ್ರೇಲಿಯಾಗೆ ಕಳಿಸಿ; ಮಾಜಿ ಆಟಗಾರ ವೆಂಗ್​ ಸರ್ಕಾರ್​ ಒತ್ತಾಯ

ಟೆಸ್ಟ್​ ಕ್ರಿಕೆಟ್​ನಲ್ಲಿ ಭಾರತ ತಂಡ ಈವರೆಗೆ ಆ ಮಟ್ಟದ ಕಳಪೆ ಪ್ರದರ್ಶನ ನೀಡಇದ ಇತಿಹಾಸವೇ ಇಲ್ಲ. ಆಸ್ಟ್ರೇಲಿಯಾ ಎದುರಿನ ಮೊದಲ ಟೆಸ್ಟ್​ನ ಮೊದಲ ಇನ್ನಿಂಗ್ಸ್​ನಲ್ಲಿ ಸಾಧಾರಣವಾಗಿಯೇ ಬ್ಯಾಟ್​ ಮಾಡಿದ್ದರೂ ಸಹ ಭಾರತದ ಬೌಲರ್​ಗಳು ಕಾಂಗರೂ ಬ್ಯಾಟ್ಸ್​ಮನ್​ಗಳನ್ನು ಕಟ್ಟಿಹಾಕಿದ್ದರು. ಪರಿಣಾಮ ಭಾರತದಕ್ಕೆ ಮೊದಲ ಇನ್ನಿಂಗ್ಸ್​ನಲ್ಲಿ ಅಲ್ಪ ಮುನ್ನಡೆ ಲಭ್ಯವಾಗಿತ್ತು. ಆದರೆ, ಎರಡನೇ ಇನ್ನಿಂಗ್ಸ್​ನಲ್ಲಿ ಕಂಡದ್ದು ಮಾತ್ರ ನಾಟಕೀಯ ಬೆಳವಣಿಗೆ. ನಾಯಕ ವಿರಾಟ್ ಕೊಹ್ಲಿ ಸೇರಿದಂತೆ ಯಾವೊಬ್ಬ ಬ್ಯಾಟ್ಸ್​ಮನ್​ ಸಹ ಎರಡಂಕಿ ಸ್ಕೋರ್​ ದಾಟಲಿಲ್ಲ. ಪರಿಣಾಮ ಭಾರತ ಕೇವಲ 36/9 ರನ್​ಗಳಿಗೆ ಆಟ ಮುಗಿಸಿ 8 ವಿಕೆಟ್​ಗಳ ಹೀನಾಯ ಸೋಲನುಭವಿಸಿತು. ಈ ಪಂದ್ಯದಲ್ಲಿ ಆಫ್​ಸ್ಟಂಪ್​ನಿಂದ ಹೊರಗೆ ಹೋಗುವ ವೇಗಿಗಳ ಸ್ವಿಂಗ್ ಎಸೆತಗಳನ್ನು ಎದುರಿಸುವಲ್ಲಿ ಭಾರತದ ಬ್ಯಾಟ್ಸ್​ಮನ್​ಗಳ ಪರಿಣಿತಿ ಏನು? ಎಂಬುದು ಇದೀಗ ಜಗಜ್ಜಾಹೀರಾಗಿದೆ. ಹೀಗಾಗಿ ಉಳಿದ ಮೂರು ಪಂದ್ಯಗಳಲ್ಲಿ ಭಾರತದ ಬ್ಯಾಟ್ಸ್​ಮನ್​ಗಳಿಗೆ ಸಲಹೆ ನೀಡುವ ಸಲುವಾಗಿ ಮಾಜಿ ನಾಯಕ ಗೋಡೆ ಖ್ಯಾತಿಯ ರಾಹುಲ್​ ದ್ರಾವಿಡ್​ ಅವರನ್ನು ಆಸ್ಟ್ರೇಲಿಯಾಗೆ ಕಳುಹಿಸಬೇಕು ಎಂಬ ಒತ್ತಾಯ ಎಲ್ಲೆಡೆಯಿಂದ ಕೇಳಿಬರುತ್ತಿದೆ. 

ಟೈಮ್ಸ್​ ಆಫ್​ ಇಂಡಿಯಾದ ವಿಶೇಷ ಚಾಟ್​ನಲ್ಲಿ ಈ ಕುರಿತು ಒತ್ತಾಯಿಸಿರುವ ಮಾಜಿ ಕ್ರಿಕೆಟ್​ ಆಟಗಾರ ಮತ್ತು ಬಿಸಿಸಿಐ ಆಯ್ಕೆ ಸಮಿತಿ ಅಧ್ಯಕ್ಷ ವೆಂಗ್ ಸರ್ಕಾರ್​, "ಭಾರತದ ಬ್ಯಾಟ್ಸ್​ಮನ್​ಗಳು ಆಸ್ಟ್ರೇಲಿಯಾ ನೆಲದಲ್ಲಿ ವೇಗಿಗಳನ್ನು ಎದುರಿಸಲು ಸಾಕಷ್ಟು ಪರದಾಡುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ರಾಹುಲ್​ ದ್ರಾವಿಡ್​ನಂತಹ ಪರಿಣತ ಟೆಸ್ಟ್​ ಆಟಗಾರ ಭಾರತ ತಂಡದ ಜೊತೆಗೆ ಇರುವುದು ಒಳ್ಳೆಯದು. ಅವರ ಅನುಭವ ಈಗಿನ ಯುವ ಬ್ಯಾಟ್ಸ್​ಮನ್​ಗಳಿಗೆ ಸಹಕಾರಿಯಾಗುತ್ತದೆ.

ಇದೇ ಸಂದರ್ಭದಲ್ಲಿ ಕೊರೋನಾ ವೈರಸ್​ ಕಾರಣದಿಂದಾಗಿ ಬೆಂಗಳೂರಿನಲ್ಲಿ ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿಯನ್ನು ಮುಚ್ಚಲಾಗಿರುವುದರಿಂದ ಕೂಡಲೇ ರಾಹುಲ್​ ದ್ರಾವಿಡ್​ ಅವರನ್ನು ಆಸ್ಟ್ರೇಲಿಯಾಗೆ ಕಳುಹಿಸುವುದು ಸೂಕ್ತ" ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಅಲ್ಲದೆ, "ಆಫ್​ ಸ್ಟಂಪ್​ನಿಂದ ಸ್ವಿಂಗ್​ ಆಗಿ ಹೊರಗೆ ಹೋಗುವ ಚೆಂಡುಗಳನ್ನು ಹೇಗೆ ಎದುರಿಸಬೇಕು ಎಂದು ಬ್ಯಾಟ್ಸ್​ಮನ್​ಗಳಿಗೆ ಮಾರ್ಗದರ್ಶನ ನೀಡಲು ರಾಹುಲ್​ ದ್ರಾವಿಡ್​ ಅವರಿಗಿಂತ ಉತ್ತಮ ವ್ಯಕ್ತಿ ಯಾರೂ ಇಲ್ಲ. ಅವರ ಉಪಸ್ಥಿತಿ ನೆಟ್ಸ್​ನಲ್ಲಿ ಭಾರತೀಯ ತಂಡಕ್ಕೆ ದೊಡ್ಡ ಉತ್ತೇಜನ ನೀಡುತ್ತದೆ. ಹೀಗಾಗಿ ಭಾರತ ತಂಡದ ಸಹಾಯಕ್ಕೆ ರಾಹುಲ್ ದ್ರಾವಿಡ್​ ಕೂಡಲೇ ಧಾವಿಸಬೇಕು" ಎಂದು ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ : IND vs AUS: ಹೀನಾಯ ಸೋಲಿನ ಬೆನ್ನಲ್ಲೇ ಟೀಂ ಇಂಡಿಯಾಕ್ಕೆ ಊಹಿಸಲಾಗದ ಮತ್ತೊಂದು ದೊಡ್ಡ ಆಘಾತ!

"ಪಿತೃತ್ವ ರಜೆಗಾಗಿ ನಾಯಕ ವಿರಾಟ್​ ಕೊಹ್ಲಿ ಭಾರತಕ್ಕೆ ಮರಳಲಿದ್ದಾರೆ. ಹೀಗಾಗಿ ಮುಂದಿನ ಮೂರು ಟೆಸ್ಟ್​ಗಳನ್ನು ಅವರ ಅನುಪಸ್ಥಿತಿಯಲ್ಲೇ ಭಾರತ ಆಡಬೇಕಿದೆ. ಇನ್ನೂ ರೋಹಿತ್​ ಶರ್ಮಾ ಸಿಡ್ನಿಯಲ್ಲಿ 14 ದಿನಗಳ ಕ್ವಾರಂಟೈನ್​ ಮುಗಿಸಿ ಮೂರನೇ ಪಂದ್ಯಕ್ಕೆ ಮಾತ್ರ ಲಭ್ಯರಾಗಲಿದ್ದಾರೆ. ರಾಹುಲ್​ ದ್ರಾವಿಡ್​ ಅವರನ್ನೂ ಈಗಲೇ ಆಸ್ಟ್ರೇಲಿಯಾಗೆ ಕಳುಹಿಸಿದರೆ ಮೂರನೇ ಟೆಸ್ಟ್​ ವೇಳೆಗೆ ಅವರೂ ತಂಡದ ಭಾಗವಾಗುವ ಸಾಧ್ಯತೆ ಇದೆ.

ರಾಹುಲ್​ ದ್ರಾವಿಡ್​ ಅಂತಹ ವ್ಯಕ್ತಿಯನ್ನು ರಾಷ್ಟ್ರೀಯ ತಂಡದೊಂದಿಗೆ ಹೆಚ್ಚು ತೊಡಗಿಸಿಕೊಳ್ಳಬೇಕಾದ ಸಮಯವಿದು. ಇಂತಹ ಅವಕಾಶವನ್ನು ಬಿಸಿಸಿಐ ಬಳಸಿಕೊಳ್ಳಬೇಕು" ಎಂದು 1983 ವಿಶ್ವಕಪ್ ವಿಜೇತ ತಂಡದ ಮಾಜಿ ಆಟಗಾರ ವೆಂಗ್​ ಸರ್ಕಾರ್​ ಅಭಿಪ್ರಾಯಪಟ್ಟಿದ್ದಾರೆ.