WTC Final: ಅಂತಿಮ 98 ಓವರ್​ಗಳ ವಿಶ್ವ ಟೆಸ್ಟ್​ ಫೈನಲ್​: ನ್ಯೂಜಿಲೆಂಡ್​ಗೆ ಗೆಲ್ಲುವ ಅವಕಾಶ ಹೆಚ್ಚು..!

ಭಾರತ-ನ್ಯೂಜಿಲೆಂಡ್ ನಡುವಣ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ ಫೈನಲ್​ ಪಂದ್ಯವು ಅಂತಿಮ ದಿನಕ್ಕೆ ಕಾಲಿಟ್ಟಿದೆ. ಕಳೆದ ಐದು ದಿನಗಳಲ್ಲಿ ಫಲಿತಾಂಶ ಮೂಡಿಬರದ ಕಾರಣ ಮೀಸಲು ದಿನಕ್ಕೆ ಪಂದ್ಯ ಮುಂದೂಡಲ್ಪಟ್ಟಿದೆ. ಕಳೆದ ಐದು ದಿನದಲ್ಲಿ ಸಂಪೂರ್ಣ ಪಂದ್ಯ ನಡೆದಿರುವುದು 2 ದಿನ ಮಾತ್ರ ಎನ್ನಬಹುದು. ಅಂದರೆ ಈ ಐದು ದಿನಗಳಲ್ಲಿ ಉಭಯ ತಂಡಗಳು ಕೇವಲ 221 ಓವರ್‌ಗಳನ್ನು ಮಾತ್ರ ಆಡಲಾಗಿದೆ. ಐಸಿಸಿ ನಿಯಮದ ಪ್ರಕಾರ ಟೆಸ್ಟ್ ಕ್ರಿಕೆಟ್​ನಲ್ಲಿ ಯಾವುದೇ ಅಡಚಣೆ ಇಲ್ಲದಿದ್ರೆ ಐದು ದಿನಗಳಲ್ಲಿ 450 ಓವರ್​ಗಳನ್ನು ಆಡಬೇಕಾಗುತ್ತದೆ.

ಇದೀಗ ಪಂದ್ಯವು ಮೀಸಲು ದಿನಕ್ಕೆ ಮುಂದೂಡಲ್ಪಟ್ಟರೂ 229 ಓವರ್​ಗಳನ್ನು ಆಡಿಸಲು ಸಾಧ್ಯವಿಲ್ಲ. ಹೀಗಾಗಿ ಮೊದಲೇ ನಿರ್ಧರಿಸಿದಂತೆ ಮೀಸಲು ದಿನದಲ್ಲಿ ಕನಿಷ್ಠ 330 ನಿಮಿಷಗಳನ್ನು ಆಡಲಾಗುತ್ತದೆ. ಇದರ ಹೊರತಾಗಿ ಹೆಚ್ಚುವರಿ ಒಂದು ಗಂಟೆ ಆಡಿಸಬಹುದು. ಅದರಂತೆ ಅಂತಿಮ ದಿನದಲ್ಲಿ 98 ಓವರ್​ಗಳನ್ನು ಆಡಿಸಲಾಗುತ್ತದೆ. ಈ ವೇಳೆ ಕೂಡ ಫಲಿತಾಂಶ ಮೂಡಿಬರದಿದ್ದರೆ ಉಭಯ ತಂಡಗಳನ್ನು ಜಂಟಿ ಚಾಂಪಿಯನ್​ ಎಂದು ಘೋಷಿಸಲಾಗುತ್ತದೆ.

ಸದ್ಯ ಉಭಯ ತಂಡಗಳ ಮೊದಲ ಇನಿಂಗ್ಸ್​ ಮುಗಿದಿದ್ದು, ಅಂತಿಮ ದಿನದಲ್ಲಿ 2 ತಂಡಗಳು ಬಿರುಸಿನ ದ್ವಿತೀಯ ಇನಿಂಗ್ಸ್​ ಆಡುವ ಮೂಲಕ ಫಲಿತಾಂಶಕ್ಕಾಗಿ ಹೋರಾಟ ನಡೆಸಲಿದೆಯಾ ಎಂಬುದೇ ಪ್ರಶ್ನೆ. ಮೊದಲ ಇನಿಂಗ್ಸ್​ನಲ್ಲಿ ಭಾರತ 217 ರನ್​ ಕಲೆಹಾಕಿದರೆ, ನ್ಯೂಜಿಲೆಂಡ್ 249 ರನ್​ ಬಾರಿಸಿ 32 ರನ್​ಗಳ ಮುನ್ನಡೆ ಪಡೆದುಕೊಂಡಿದೆ. ಇನ್ನು ದ್ವಿತೀಯ ಇನಿಂಗ್ಸ್ ಆರಂಭಿಸಿರುವ ಭಾರತ 5ನೇ ದಿನದಾಟದ ಅಂತ್ಯಕ್ಕೆ 64 ರನ್​ಗೆ 2 ವಿಕೆಟ್ ಕಳೆದುಕೊಂಡು 32 ರನ್​ ಕಲೆಹಾಕಿದೆ.

ಹೀಗಾಗಿ ಮೀಸಲು ದಿನದಂದು ಬಿರುಸಿನ ಬ್ಯಾಟಿಂಗ್ ಮೂಲಕ 2ನೇ ಸೆಷನ್ ಅಂತ್ಯಕ್ಕೆ ಕನಿಷ್ಠ 300 ರನ್​ಗಳಿಸಿದರೆ ಮಾತ್ರ ಗೆಲ್ಲುವ ಅವಕಾಶ ದೊರೆಯಲಿದೆ. ಒಂದು ವೇಳೆ ಭಾರತವನ್ನು 2ನೇ ಸೆಷನ್​ ಒಳಗೆ ಕಡಿಮೆ ಮೊತ್ತಕ್ಕೆ ನ್ಯೂಜಿಲೆಂಡ್ ಆಲೌಟ್ ಮಾಡಿದರೆ ಕಿವೀಸ್​ ಪಡೆ ಗೆಲ್ಲುವ ಸಾಧ್ಯತೆ ಹೆಚ್ಚು. ಏಕೆಂದರೆ ಟೀಮ್ ಇಂಡಿಯಾ ಕೇವಲ 32 ರನ್​​ಗಳ ಮುನ್ನಡೆಗೆ 2 ವಿಕೆಟ್ ಕಳೆದುಕೊಂಡಿದೆ. ಇನ್ನು 8 ವಿಕೆಟ್​ಗಳನ್ನು ಬೇಗನೆ ಪಡೆದರೆ ಕಡಿಮೆ ಮೊತ್ತದ ಸವಾಲು ಪಡೆಯಲಿದೆ. ಅಲ್ಲದೆ ನಿರ್ದಿಷ್ಟ ಓವರ್​ಗಳಲ್ಲಿ ಗುರಿ ಇರುವುದರಿಂದ ಅದಕ್ಕೆ ತಕ್ಕಂತೆ ಬ್ಯಾಟಿಂಗ್ ನಡೆಸುವ ಅವಕಾಶ ನ್ಯೂಜಿಲೆಂಡ್​ಗೆ ದೊರೆಯಲಿದೆ. ಅಷ್ಟೇ ಅಲ್ಲದೆ ವಿಕೆಟ್ ನಷ್ಟವಾದರೆ ಎಚ್ಚರಿಕೆಯ ಆಟದೊಂದಿಗೆ ಡ್ರಾ ಮಾಡಿಕೊಳ್ಳಬಹುದು.

ಇನ್ನೊಂದೆಡೆ ಅಂತಿಮ ದಿನದಾಟವಾಗಿರುವುದರಿಂದ ಭಾರತ 2ನೇ ಸೆಷನ್​ಗೂ ಮುನ್ನ ಬೃಹತ್ ಮೊತ್ತ ಪೇರಿಸದೇ ಡಿಕ್ಲೇರ್ ಘೋಷಿಸುವುದನ್ನು ನಿರೀಕ್ಷಿಸುವಂತಿಲ್ಲ. ಅತ್ತ ಆದಷ್ಟು ಬೇಗ ಟೀಮ್ ಇಂಡಿಯಾವನ್ನು ಆಲೌಟ್ ಮಾಡಿದರೆ ಮಾತ್ರ ನ್ಯೂಜಿಲೆಂಡ್​ಗೆ ಗೆಲ್ಲುವ ಚಾನ್ಸ್​ ಸಿಗಲಿದೆ. ಹೀಗಾಗಿ ಭಾರತ 2ನೇ ಸೆಷನ್ ಅಂತಿಮದ ವೇಳೆಗೆ ಡಿಕ್ಲೇರ್ ನೀಡಿ 3ನೇ ಸೆಷನ್​ನಲ್ಲಿ ನ್ಯೂಜಿಲೆಂಡ್​ ಅನ್ನು ಬ್ಯಾಟಿಂಗ್​ಗೆ ಆಹ್ವಾನಿಸಲಿದೆ.

ಇತ್ತ 98 ಓವರ್​ಗಳು ನಡೆಯುವುದರಿಂದ 3ನೇ ಸೆಷನ್​ನಲ್ಲೂ ಹೆಚ್ಚುವರಿ ಬೌಲಿಂಗ್​ಗೆ ಅವಕಾಶ ದೊರೆಯಲಿದೆ. ಇದೇ ಪ್ಲ್ಯಾನ್ ಮೂಲಕ ಟೀಮ್ ಇಂಡಿಯಾ ಅಂತಿಮ ಹಂತದಲ್ಲಿ ಗೆಲ್ಲುವ ಪ್ರಯತ್ನ ಮಾಡಲಿದೆ. ಆದರೆ ಉಭಯ ತಂಡಗಳು ಬಲಿಷ್ಠವಾಗಿರುವುದರಿಂದ ಅಚ್ಚರಿಯ ಫಲಿತಾಂಶವನ್ನು ನಿರೀಕ್ಷಿಸುವಂತಿಲ್ಲ. ಹೀಗಾಗಿ ಚೊಚ್ಚಲ ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್ ನೀರಸ ಡ್ರಾನಲ್ಲಿ ಅಂತ್ಯಗೊಳ್ಳುವ ಸಾಧ್ಯತೆ ಹೆಚ್ಚು ಎನ್ನಬಹುದು. ಈ ಮೂಲಕ ಭಾರತ-ನ್ಯೂಜಿಲೆಂಡ್ ಚೊಚ್ಚಲ ಟೆಸ್ಟ್ ಕಿರೀಟವನ್ನು ಜೊತೆಯಾಗಿ ಹಂಚಿಕೊಳ್ಳಲಿದೆಯಾ ಕಾದು ನೋಡಬೇಕಿದೆ.

ಉಭಯ ತಂಡಗಳು ಹೀಗಿವೆ:-

ನ್ಯೂಜಿಲೆಂಡ್ ಪ್ಲೇಯಿಂಗ್ ಇಲೆವೆನ್: ಟಾಮ್ ಲಾಥಮ್, ಡೆವೊನ್ ಕಾನ್ವೇ, ಕೇನ್ ವಿಲಿಯಮ್ಸನ್ (ನಾಯಕ), ರಾಸ್ ಟೇಲರ್, ಹೆನ್ರಿ ನಿಕೋಲ್ಸ್, ಬಿಜೆ ವಾಟ್ಲಿಂಗ್, ಕಾಲಿನ್ ಡಿ ಗ್ರ್ಯಾಂಡ್‌ಹೋಮ್, ಕೈಲ್ ಜೇಮಿಸನ್, ನೀಲ್ ವಾಂಗ್ನರ್, ಟಿಮ್ ಸೌಥಿ, ಟ್ರೆಂಟ್ ಬೌಲ್ಟ್

ಟೀಮ್ ಇಂಡಿಯಾ ಪ್ಲೇಯಿಂಗ್ ಇಲೆವೆನ್: ರೋಹಿತ್ ಶರ್ಮಾ, ಶುಬ್ಮನ್ ಗಿಲ್, ಚೇತೇಶ್ವರ ಪೂಜಾರ, ವಿರಾಟ್ ಕೊಹ್ಲಿ (ನಾಯಕ), ಅಜಿಂಕ್ಯ ರಹಾನೆ, ರಿಷಭ್ ಪಂತ್, ರವೀಂದ್ರ ಜಡೇಜಾ, ರವಿ ಅಶ್ವಿನ್, ಇಶಾಂತ್ ಶರ್ಮಾ, ಮೊಹಮ್ಮದ್ ಶಮಿ, ಜಸ್ಪ್ರೀತ್ ಬುಮ್ರಾ