India vs Australia: ಪ್ರ್ಯಾಕ್ಟೀಸ್ ಬಿಟ್ಟು ಮೈದಾನದಿಂದ ಹೊರ ನಡೆದ ಟೀಂ ಇಂಡಿಯಾ ಆಟಗಾರರು

ಬೆಂಗಳೂರು (ಜೂ. 07): ವಿಶ್ವಕಪ್​ನಲ್ಲಿ ದ. ಆಫ್ರಿಕಾ ವಿರುದ್ಧ ಗೆದ್ದು ಭರ್ಜರಿ ಆರಂಭ ಪಡೆದಿರುವ ಟೀಂ ಇಂಡಿಯಾ ತನ್ನ ಎರಡನೇ ಪಂದ್ಯಕ್ಕೆ ಸಜ್ಜಾಗುತ್ತಿದೆ.

ಸೋಲಿಲ್ಲದ ಸರದಾರನಂತೆ ಮೆರೆಯುತ್ತಿರುವ ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಭಾನುವಾರ ಭಾರತ ಕಣಕ್ಕಿಳಿಯುತ್ತಿದೆ. ಇದಕ್ಕಾಗಿ ಈಗಾಗಲೇ ಸೌತಂಪ್ಟನ್​​ನಿಂದ ಲಂಡನ್​ನ ಕೆನ್ನಿಂಗ್ಟನ್​​ಗೆ ಭಾರತೀಯರು ಬಂದಿಳಿದಿದ್ದಾರೆ.

ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ ವಿರುದ್ಧ ಕಣಕ್ಕಿಳಿಯ ಬೇಕಾಗಿರುವುದರಿಂದ ಭಾರತ ಕಠಿಣ ಅಭ್ಯಾಸ ನಡೆಸಲು ಮೈದಾನ ಇಳಿಯುವಾಗ ವರುಣ ಅಡ್ಡಿ ಪಡಿಸಿದ್ದಾನೆ. ನೆಟ್​ನಲ್ಲಿ ಪ್ರ್ಯಾಕ್ಟೀಸ್ ನಡೆಸಲು ಚೂರು ಕಾಲವಕಾಶ ನೀಡದ ಮಳೆರಾಯ ಬೆಂಬಿಡದೆ ಕಾಡುತ್ತಿದ್ದಾನೆ. ಹೀಗಾಗಿ ಶುಕ್ರವಾರದ ಅಭ್ಯಾಸ ಮಳೆಯಿಂದಾಗಿ ರದ್ದಾಗಿದೆ.

'ಧೋನಿ ಗ್ಲೌಸ್​ ವಿಚಾರ ಬಿಟ್ಟು ಐಸಿಸಿ ಅಂಪೈರ್​​​ಗಳ ಕೆಟ್ಟ ತೀರ್ಪಿನ ಬಗ್ಗೆ ಚಿಂತಿಸಲಿ'!

ಸದ್ಯ ಭಾರತ ತಂಡಕ್ಕೆ ಒಂದು ದಿನದ ಅಭ್ಯಾಸ ಮಾತ್ರ ಉಳಿದಿದೆ. ಕೆನ್ನಿಂಗ್ಟನ್ ಓವಲ್​​ನಲ್ಲಿ ಜೋರಾಗಿ ಮಳೆ ಸುರಿಯುತ್ತಿದ್ದು ನಾಳೆ ಸಂಜೆಯ ವರೆಗೆ ಇದೇರೀತಿ ಮಳೆ ಇರಲಿದೆ ಎಂದು ಅಲ್ಲಿನ ಹವಾಮಾನ ಇಲಾಖೆ ತಿಳಿಸಿದೆ.​​

ಈಗಾಗಲೇ ಮೊದಲ ಪಂದ್ಯ ಗೆದ್ದು ವಿಶ್ವಾಸದಲ್ಲಿರುವ ವಿರಾಟ್ ಕೊಹ್ಲಿ ಪಡೆ ಎರಡನೇ ಗೆಲುವನ್ನು ಎದುರು ನೋಡುತ್ತಿದ್ದರೆ, ಇತ್ತ ಕಾಂಗರೂ ಪಡೆ ಹ್ಯಾಟ್ರಿಕ್ ಜಯಕ್ಕೆ ಕಾದು ಕುಳಿತಿದೆ.