ENG vs SL: ಮಿಂಚಿದ ಜೋ ರೂಟ್: ಟೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್ ವಿರುದ್ಧ ಶ್ರೀಲಂಕಾಕ್ಕೆ ಕ್ಲೀನ್ ಸ್ವೀಪ್ ಆಘಾತ

ಇಂಗ್ಲೆಂಡ್ ತಂಡದ ನಾಯಕ ಜೋ ರೂಟ್‌ ಹಾಗೂ ಡಾಮ್‌ ಸಿಬ್ಲಿ ಅವರ ಅದ್ಭುತ ಬ್ಯಾಟಿಂಗ್‌ ನೆರವಿನಿಂದ ಆಂಗ್ಲರು ಎರಡನೇ ಟೆಸ್ಟ್ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ 6 ವಿಕೆಟ್​ಗಳ ಭರ್ಜರಿ ಗೆಲುವು ಸಾಧಿಸುವ ಮೂಲಕ ಎರಡು ಪಂದ್ಯಗಳ ಟೆಸ್ಟ್‌ ಸರಣಿಯನ್ನು 2-0 ಅಂತರದಲ್ಲಿ ಕ್ಲೀನ್‌ ಸ್ವೀಪ್‌ ಮಾಡಿಕೊಂಡಿದೆ. ಟೆಸ್ಟ್‌ ಸರಣಿಯಲ್ಲಿ ವೈಟ್‌ವಾಶ್‌ ಅನುಭವಿಸಿದ ಶ್ರೀಲಂಕಾ ತವರಲ್ಲೇ ತೀವ್ರ ಮುಖಭಂಗಕ್ಕೀಡಾಗಿದೆ. ಆಂಗ್ಲರು ಅಮೋಘ ಜಯದ ಇದೇ ಆತ್ಮವಿಶ್ವಾಸದೊಂದಿಗೆ ಭಾರತಕ್ಕೆ ಬರಲು ಸಜ್ಜಾಗಿದ್ದಾರೆ. ಹಾಗೆಯೇ ರೂಟ್‌ ಬಳಗದ ಈ ಪರಾಕ್ರಮ ಕೊಹ್ಲಿ ಪಡೆಯ ಪಾಲಿಗೊಂದು ಎಚ್ಚರಿಕೆಯ ಗಂಟೆಯೂ ಆಗಿದೆ.

ಸರಣಿಯಲ್ಲಿ ಹಿಂದಿದ್ದ ಶ್ರೀಲಂಕಾಕ್ಕೆ ಈ ಪಂದ್ಯವನ್ನು ಡ್ರಾ ಮಾಡಿಕೊಳ್ಳುವ ಉತ್ತಮ ಅವಕಾಶವಿತ್ತು. ಆದರೆ 37 ರನ್‌ ಮುನ್ನಡೆಯ ಹೊರತಾಗಿಯೂ ದ್ವಿತೀಯ ಸರದಿಯಲ್ಲಿ ಆಂಗ್ಲರ ಸ್ಪಿನ್‌ ದಾಳಿಗೆ ತತ್ತರಿಸಿ 126ಕ್ಕೆ ಕುಸಿಯಿತು. 164 ರನ್‌ ಗುರಿ ಪಡೆದ ಇಂಗ್ಲೆಂಡ್‌ 4 ವಿಕೆಟ್‌ ಕಳೆದುಕೊಂಡು ಜಯಭೇರಿ ಮೊಳಗಿಸಿತು. 2019ರ ಪ್ರವಾಸದ ವೇಳೆ ಇಂಗ್ಲೆಂಡ್‌ 3-0 ಅಂತರದಿಂದ ಲಂಕೆಗೆ ವೈಟ್‌ವಾಶ್‌ ಮಾಡಿತ್ತು ಎಂಬುದನ್ನು ನಾವಿಲ್ಲಿ ನೆನಪಿಸಬಹುದು.

Rahul Dravid: ಎಲ್ಲಾ ಪ್ರಶಂಸೆ ಹುಡುಗರಿಗೆ ಸಲ್ಲಬೇಕು, ನನಗೆ ಯಾವ ಕ್ರೆಡಿಟ್ ಕೂಡ ಬೇಡ ಎಂದ ರಾಹುಲ್ ದ್ರಾವಿಡ್

Respect 🤜 🤛

Thank you @OfficialSLC for your hospitality and a brilliant series!

🇱🇰 #SLvENG 🏴󠁧󠁢󠁥󠁮󠁧󠁿 pic.twitter.com/ieQJQZA2Ll

— England Cricket (@englandcricket) January 25, 2021

ಮೊದಲ ಇನ್ನಿಂಗ್ಸ್​ನಲ್ಲಿ ಶ್ರೀಲಂಕಾ ಏಂಜಲೋ ಮ್ಯಾಥ್ಯೂಸ್ ಅವರ 110, ಡಿಕ್​ವೆಲ್ ಅವರ 92 ಹಾಗೂ ನಾಯಕ ದಿನೇಶ್ ಚಾಂದಿಮಲ್ ಅವರ ಅರ್ಧಶತಕದ ನೆರವಿನಿಂದ 139.3 ಓವರ್​​ನಲ್ಲಿ 381 ರನ್​ಗೆ ಆಲೌಟ್ ಆಯಿತು. ಇಂಗ್ಲೆಂಡ್ ಪರ ಜೇಮ್ಸ್ ಆ್ಯಂಡರ್ಸನ್ 6 ವಿಕೆಟ್ ಕಿತ್ತ ವಿಶೇಷ ಸಾಧನೆ ಮಾಡಿದರು.

ಇತ್ತ ತನ್ನ ಮೊದಲ ಇನ್ನಿಂಗ್ಸ್​ನಲ್ಲಿ ಇಂಗ್ಲೆಂಡ್ ತಂಡ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿತು. ಇದರ ನಡುವೆ ಕ್ರೀಸ್ ಕಚ್ಚಿ ನಿಂತು ಆಡಿದ ನಾಯಕ ಜೋ ರೂಟ್ 309 ಎಸೆತಗಳಲ್ಲಿ 186 ರನ್ ಚಚ್ಚಿದರು. ಜಾಸ್ ಬಟ್ಲರ್ 55 ರನ್ ಗಳಿಸಿ ನೆರವಾದರು. ಇಂಗ್ಲೆಂಡ್ 344 ರನ್​ಗೆ ಸರ್ವಪತನ ಕಂಡಿತು. ಲಂಕಾ ಪರ ಲಸಿತ್ ಎಂಬುಲ್ಡೇನಿಯಾ 6 ವಿಕೆಟ್ ಕಿತ್ತರು.

BBL: ಒಂದೇ ಎಸೆತದಲ್ಲಿ ಒಬ್ಬ ಬ್ಯಾಟ್ಸ್​ಮನ್​ ಎರಡೂ ಕಡೆ ರನೌಟ್: ಹೇಗೆ?, ಈ ವಿಡಿಯೋ ನೋಡಿ

ಹೀಗೆ 37 ರನ್​ಗಳ ಮುನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್​ ಆರಂಭಿಸಿದ ಶ್ರೀಲಂಕಾ ಡಾಮ್​ ಬೆಸ್ (4 ವಿಕೆಟ್)​ ಮತ್ತು ಜ್ಯಾಕ್​ ಲೀಚ್ (4 ವಿಕೆಟ್)​ ದಾಳಿಗೆ 35.5 ಓವರ್​ಗಳಲ್ಲಿ 126 ರನ್​ಗಳಿಗೆ ಆಲೌಟ್​ ಆಯಿತು. 10ನೇ ಬ್ಯಾಟ್ಸ್​ಮನ್ ಆಗಿ ಕಣಕ್ಕಿಳಿದಿದ್ದ ಎಂಬುಲ್ಡೇನಿಯಾ 40 ರನ್​ಗಳಿಸಿ ಶ್ರೀಲಂಕಾ ಪರ ಗರಿಷ್ಠ ಸ್ಕೋರರ್​ ಎನಿಸಿಕೊಂಡರು.

164 ರನ್​ಗಳ ಸುಲಭ ಟಾರ್ಗೆಟ್ ಬೆನ್ನಟ್ಟಿದ ಇಂಗ್ಲೆಂಡ್​ ತಂಡ 43.3 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು ಗುರಿ ತಲುಪಿ, 6 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿ ಟೆಸ್ಟ್​ ಸರಣಿಯನ್ನು 2-0 ಯಲ್ಲಿ ಕ್ಲೀನ್ ಸ್ವೀಪ್​ ಮಾಡಿತು. ಜೋ ರೂಟ್ ಪಂದ್ಯಶ್ರೇಷ್ಠ ಹಾಗೂ ಸರಣಿಶ್ರೇಷ್ಠ ತಮ್ಮದಾಗಿಸಿದರು.

England gain two rating points in the @MRFWorldwide ICC Test Team Rankings after the conclusion of the #SLvENG series 👇 pic.twitter.com/I02hpazHWz

— ICC (@ICC) January 25, 2021

ಇಂಗ್ಲೆಂಡ್ ತಂಡ ಚಾಂಪಿಯನ್​ಶಿಪ್​ ಪಟ್ಟಿಯಲ್ಲಿ 120 ಅಂಕಗಳಿಸಿ ಫೈನಲ್​ ರೇಸ್​ಗೆ ಮರಳಿದೆ. ಪ್ರಸ್ತುತ 68.7 ಗೆಲುವಿನ ಸರಾಸರಿ ಹೊಂದಿರುವ ಇಂಗ್ಲೆಂಡ್​ 3ನೇ ಸ್ಥಾನದಲ್ಲಿರುವ ಆಸ್ಟ್ರೇಲಿಯಾ (69.2) ತಂಡಕ್ಕಿಂತ ಕೇವಲ 0.5 ಅಂಕ ಮಾತ್ರ ಹಿಂದಿದೆ. ಒಂದು ವೇಳೆ ಭಾರತ ತಂಡವನ್ನು 3-0 ಅಥವಾ 4-0ಯಲ್ಲಿ ಮಣಿಸಿದರೆ ಫೈನಲ್ ತಲುಪುವ ಅವಕಾಶವಿದೆ.