ICC World Cup Final: ಇಂಗ್ಲೆಂಡ್ ತಂಡವೇ ಫೇವರೇಟ್: ನ್ಯೂಜಿಲೆಂಡ್ ನಾಯಕನ ಅಚ್ಚರಿಯ ಹೇಳಿಕೆ

ಐಸಿಸಿ ವಿಶ್ವಕಪ್​ 2019ನಲ್ಲಿ ಅಂಡರ್​ಡಾಗ್ ಹಣೆ ಪಟ್ಟಿಯೊಂದಿಗೆ ಫೈನಲ್​ಗೇರಿರುವ ನ್ಯೂಜಿಲೆಂಡ್ ತಂಡ ಇಂದು ಇಂಗ್ಲೆಂಡ್ ವಿರುದ್ಧ ವಿಶ್ವಕಪ್ ಕಿರೀಟಕ್ಕಾಗಿ ಸೆಣಸಲಿದೆ. ಲಾರ್ಡ್ಸ್​ ಮೈದಾನದಲ್ಲಿ ನಡೆಯಲಿರುವ ಈ ಹಣಾಹಣಿಯಲ್ಲಿ ಇಂಗ್ಲೆಂಡ್ ತಂಡ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡ ಎಂಬ ಅಚ್ಚರಿಯ ಹೇಳಿಕೆಯೊಂದನ್ನು ಕೇನ್ ವಿಲಿಯಮ್ಸನ್ ನೀಡಿದ್ದಾರೆ.

ಪಂದ್ಯಕ್ಕೂ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ನ್ಯೂಜಿಲೆಂಡ್ ನಾಯಕ, ಫೈನಲ್​ನಲ್ಲಿ ನಮ್ಮ ತಂಡವು ಉತ್ತಮ ಸಾಮರ್ಥ್ಯದಿಂದ ಕೂಡಿದೆ. ಅದಕ್ಕೆ ತಕ್ಕಂತಹ ಪ್ರದರ್ಶನ ನೀಡಲಿದೆ. ವಿಶ್ವಕಪ್​ನಲ್ಲಿ ಇಂಗ್ಲೆಂಡ್​ ತಂಡ ಪ್ರಶಸ್ತಿ ಗೆಲ್ಲಲಿದೆ ಎಂಬ ಮಾತುಗಳ ಎಲ್ಲೆಡೆ ಕೇಳಿ ಬರುತ್ತಿದೆ. ಇಂತಹ ಫೇವರೇಟ್ ಪಟ್ಟಕ್ಕೆ ಆಂಗ್ಲರ ತಂಡ ಅರ್ಹರು. ನಾವು ಅವರೊಂದಿಗೆ ಉತ್ತಮ ಕ್ರಿಕೆಟ್ ಆಡಲು ಬಯಸುತ್ತೇವೆ. ಹೀಗಾಗಿ ಫೈನಲ್​ ಪಂದ್ಯ ರೋಚಕ ಹೋರಾಟಕ್ಕೆ ಸಾಕ್ಷಿಯಾಗಲಿದೆ ಎಂದು ಕೇನ್ ವಿಲಿಯಮ್ಸನ್ ಹೇಳಿದ್ದಾರೆ.

ಇನ್ನು ಭಾರತದ ವಿರುದ್ಧ ಆಡಿದ ತಂಡವನ್ನೇ ಫೈನಲ್​ನಲ್ಲೂ ಮುಂದುವರೆಸುವ ಸೂಚನೆ ನೀಡಿದ ಕಿವೀಸ್ ನಾಯಕ ಕೇನ್, ಬಲಿಷ್ಠ ತಂಡದ ಎದುರು ಗೆದ್ದು ಚೊಚ್ಚಲ ವಿಶ್ವ ಚಾಂಪಿಯನ್ ಪಟ್ಟ ಮುಡಿಗೇರಿಸಿಕೊಳ್ಳುವ ವಿಶ್ವಾದಲ್ಲಿದ್ದೇವೆ ಎಂದಿದ್ದಾರೆ. ಇನ್ನು ರೌಂಡ್​ ರಾಬಿನ್ ಲೀಗ್ ಹಂತದಲ್ಲಿ ಉಭಯ ತಂಡಗಳು ಮುಖಾಮುಖಿಯಾಗಿದ್ದು, ಇಲ್ಲಿ ನ್ಯೂಜಿಲೆಂಡ್ ತಂಡ ಇಂಗ್ಲೆಂಡ್ ವಿರುದ್ಧ 119 ರನ್​ಗಳ ಅಂತರದಿಂದ ಹೀನಾಯ ಸೋಲುಂಡಿತ್ತು. ಈ ಗೆಲುವಿನ ಆತ್ಮ ವಿಶ್ವಾದಲ್ಲಿ ಅಂತಿಮ ಹೋರಾಟಕ್ಕಿಳಿಯುವ ವಿಶ್ವಾಸದಲ್ಲಿದೆ ಇಂಗ್ಲೆಂಡ್ ತಂಡ.

ಇದನ್ನೂ ಓದಿ: ವಿಶ್ವಕಪ್​ ಮಹಾಸಮರಕ್ಕೆ ಇಂಗ್ಲೆಂಡ್-ನ್ಯೂಜಿಲೆಂಡ್ ಸಜ್ಜು: ಯಾರು ಬಲಿಷ್ಠ? ಇಲ್ಲಿದೆ ಅಂಕಿ ಅಂಶ