Abu Dhabi T10: ಗ್ಲೇಡಿಯೇಟರ್ಸ್ ಚಾಂಪಿಯನ್- ಟೂರ್ನಿಯಲ್ಲಿ ಹೆಚ್ಚು ರನ್, ವಿಕೆಟ್ ಗಳಿಸಿದವರ ಪಟ್ಟಿ

Stats and Records of Abu Dhabi T10 League 2021- ಡೆಕನ್ ಗ್ಲೇಡಿಯೇಟರ್ಸ್ ತಂಡ ಈ ವರ್ಷದ ಟಿ10 ಕ್ರಿಕೆಟ್ ಲೀಗ್ ಚಾಂಪಿಯನ್ ಆಗಿದೆ. ಅಫ್ಘಾನಿಸ್ತಾನದ ಹಜ್ರತುಲ್ಲಾ ಜಜೈ ಅತಿ ಹೆಚ್ಚು ರನ್ ಗಳಿಸಿದರೆ, ಲಂಕಾ ಬೌಲರ್ ಹಸರಂಗ ಅತಿ ಹೆಚ್ಚು ವಿಕೆಟ್ ಪಡೆದಿದ್ದಾರೆ.

ಅಬುಧಾಬಿ ಟಿ10 ಲೀಗ್

ಅಬುಧಾಬಿ ಟಿ10 ಲೀಗ್

  • Share this:
    ಅಬುಧಾಬಿ, ಡಿ. 5: ಪಾಕಿಸ್ತಾನದ ವಹಾಬ್ ರಿಯಾಜ್ ನೇತೃತ್ವದ ಡೆಕನ್ ಗ್ಲೇಡಿಯೇಟರ್ಸ್ ತಂಡ ಅಬುಧಾಬಿ ಟಿ10 ಕ್ರಿಕೆಟ್ ಟೂರ್ನಿ ಚಾಂಪಿಯನ್ ಆಗಿದೆ. ನಿನ್ನೆ ನಡೆದ ಫೈನಲ್​ನಲ್ಲಿ ಡೆಲ್ಲಿ ಬುಲ್ಸ್ ತಂಡವನ್ನು 56 ರನ್​ಗಳಿಂದ ಗ್ಲೇಡಿಯೇಟರ್ಸ್ ಬಗ್ಗುಬಡಿದು ಜಯಿಸಿತು. ಕೆರಿಬಿಯನ್ ದೈತ್ಯ ಬ್ಯಾಟರ್ ಆಂಡ್ರೆ ರಸೆಲ್ ಮತ್ತು ಇಂಗ್ಲೆಂಡ್ ಬ್ಯಾಟರ್ ಟಾಮ್ ಕೊಹ್ಲರ್-ಕ್ಯಾಡ್ಮೋರ್ ಅವರ ಸಿಡಿಲಬ್ಬರದ ಬ್ಯಾಟಿಂಗ್ ನೆರವಿನಿಂದ ಗ್ಲೇಡಿಯೇಟರ್ಸ್ ತಂಡ ಫೈನಲ್ ಪಂದ್ಯವನ್ನು ನಿರೀಕ್ಷೆಮೀರಿ ಗೆದ್ದಿತು.

    ಮೊದಲು ಬ್ಯಾಟ್ ಮಾಡಿದ ಡೆಕನ್ ಗ್ಲೇಡಿಯೇಟರ್ಸ್ 10 ಓವರ್​​ಗಳಲ್ಲಿ 159 ರನ್​ಗಳ ಬೃಹತ್ ಮೊತ್ತ ಪೇರಿಸಿತು. ಇದಕ್ಕೆ ಪ್ರತಿಯಾಗಿ ಡ್ವೇನ್ ಬ್ರಾವೋ ನಾಯಕತ್ವದ ಡೆಲ್ಲಿ ಬುಲ್ಸ್ ತಂಡ ಕೇವಲ 103 ರನ್ ಮಾತ್ರ ಗಳಿಸಲು ಶಕ್ಯವಾಯಿತು. ಬುಲ್ಸ್ ಸ್ಫೋಟಕ ಆರಂಭ ಮಾಡಿ ಚೇಸಿಂಗ್ ಕಹಳೆ ಊದಿತಾದರೂ ಟಾರ್ಗೆಟ್ ತೀರಾ ಕಠಿಣವಾಗಿತ್ತು. ವೆಸ್ಟ್ ಇಂಡೀಸ್​ನ ಚಂದ್ರಪಾಲ್ ಹೇಮರಾಜ್ ಅವರೊಬ್ಬರು ಏಕಾಂಗಿಯಾಗಿ ಹೋರಾಡಿದರು. ಹೇಮರಾಜ್ 20 ಬಾಲ್​ನಲ್ಲಿ 42 ರನ್ ಗಳಿಸಿದರು. ಆದರೆ, ಉಳಿದ ಬ್ಯಾಟುಗಾರರು ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ಇರಲಿಲ್ಲ.

    ಇದಕ್ಕೆ ಮುನ್ನ ಡೆಕನ್ ಗ್ಲೇಡಿಯೇಟರ್ಸ್ ಇನ್ನಿಂಗ್ಸಲ್ಲಿ ಆಂಡ್ರೆ ರಸೆಲ್ ಮತ್ತು ಟಾಮ್ ಕೊಹ್ಲರ್-ಕಾಡ್ಮೋರ್ ಅವರಿಂದ ಬಂದ 159 ರನ್​ಗಳ ವಿಶ್ವದಾಖಲೆ ಜೊತೆಯಾಟ ಹೈಲೈಟ್ ಆಯಿತು. ಟಿ10 ಕ್ರಿಕೆಟ್ ಇತಿಹಾಸದಲ್ಲೇ ಯಾವುದೇ ವಿಕೆಟ್​ಗೆ ಬಂದ ಅತಿ ದೊಡ್ಡ ಜೊತೆಯಾಟ ಇದು. 20 ಓವರ್​ಗಳ ಕ್ರಿಕೆಟ್​ನಲ್ಲೇ 160 ರನ್ ಗುರಿ ಬಹಳ ಕಷ್ಟ. ಇನ್ನು, 10 ಓವರ್ ಕ್ರಿಕೆಟ್​ನಲ್ಲಿ ಇದು ಬಹುತೇಕ ಅಸಾಧ್ಯದ ಗುರಿ. ಆಂಡ್ರೆ ರಸೆಲ್ ಕೇವಲ 32 ಬಾಲ್​ನಲ್ಲಿ 90 ರನ್ ಚಚ್ಚಿದರು. ಕ್ಯಾಡ್ಮೋರ್ 28 ಬಾಲ್​ನಲ್ಲಿ 59 ರನ್ ಗಳಿಸಿದರು.

    ಇದನ್ನೂ ಓದಿ: Exhibition Match- ಸೌರವ್ ಗಂಗೂಲಿ ತಂಡದ ವಿರುದ್ಧ ಜಯ್ ಶಾ ಟೀಮ್​ಗೆ ರೋಚಕ ಜಯ

    ಟೂರ್ನಿಯ ಸಿಡಿಲಬ್ಬರದ ಬ್ಯಾಟರ್ಸ್:

    ಅಫ್ಘಾನಿಸ್ತಾನದ ಹಜ್ರತುಲ್ಲಾ ಜಜೈ 12 ಪಂದ್ಯಗಳಲ್ಲಿ 50ಕ್ಕೂ ಹೆಚ್ಚು ರನ್ ಸರಾಸರಿಯಲ್ಲಿ 353 ರನ್ ಗಳಿಸಿ ಟೂರ್ನಿಯಲ್ಲಿ ಟಾಪ್ ಬ್ಯಾಟರ್ ಎನಿಸಿದ್ದಾರೆ. ಇಂಗ್ಲೆಂಡ್​ನ ಫಿಲ್ ಸಾಲ್ಟ್ ಅವರಂತೂ ಇಡೀ ಟೂರ್ನಿಯಲ್ಲಿ 143 ಎಸೆಗಳನ್ನ ಆಡಿ 344 ರನ್ ಚಚ್ಚಿ ಎರಡನೇ ಸ್ಥಾನ ಪಡೆದಿದ್ದಾರೆ.

    ಟಾಪ್-5 ಬ್ಯಾಟರ್ಸ್:

    1) ಹಜ್ರತುಲ್ಲಾ ಜಜೈ, ಬಾಂಗ್ಲಾ ಟೈಗರ್ಸ್: 353 ರನ್
    2) ಫಿಲ್ ಸಾಲ್ಟ್, ಟೀಮ್ ಅಬುಧಾಬಿ: 344 ರನ್
    3) ರಹಮನುಲ್ಲಾ ಗುರ್ಬಜ್, ಡೆಲ್ಲಿ ಬುಲ್ಸ್: 343
    4) ಲಿಯಾಮ್ ಲಿವಿಂಗ್​ಸ್ಟೋನ್, ಟೀಮ್ ಅಬುಧಾಬಿ: 309 ರನ್
    5) ರಿಕಾರ್ಡೊ ಪೊವೆಲ್, ನಾರ್ತರ್ನ್ ವಾರಿಯರ್ಸ್: 305 ರನ್

    ಇದನ್ನೂ ಓದಿ: ಕ್ಲೀನ್ ಬೌಲ್ಡ್ ಆದರೂ ರಿವ್ಯೂ ಕೊಟ್ಟು ಪೇಚಿಗೆ ಸಿಕ್ಕ ಆರ್ ಅಶ್ವಿನ್; ಕಾರಣ ಇದಿರಬಹುದು

    ಟಾಪ್-5 ಬೌಲರ್ಸ್:

    1) ವನಿಂದು ಹಸರಂಗ, ಡೆಕನ್ ಗ್ಲೇಡಿಯೇಟರ್ಸ್: 21 ವಿಕೆಟ್
    2) ಡಾಮಿನಿಕ್ ಡ್ರೇಕ್ಸ್, ಡೆಲ್ಲಿ ಬುಲ್ಸ್: 19 ವಿಕೆಟ್
    3) ಮರ್ಚಂಟ್ ಡೀ ಲಾಂಗೆ, ಟೀಮ್ ಅಬುಧಾಬಿ: 14 ವಿಕೆಟ್
    4) ಟೈಲ್ ಮಿಲ್ಸ್, ಡೆಕನ್ ಗ್ಲೇಡಿಯೇಟರ್ಸ್: 11 ವಿಕೆಟ್
    5) ಅದಿಲ್ ರಷೀದ್, ಡೆಲ್ಲಿ ಬುಲ್ಸ್: 11 ವಿಕೆಟ್

    ಅತಿಹೆಚ್ಚು ಮೊತ್ತ:

    1) ಡೆಕನ್ ಗ್ಲೇಡಿಯೇಟರ್ಸ್: 159/0
    2) ನಾರ್ತರ್ನ್ ವಾರಿಯರ್ಸ್: 152/4
    3) ನಾರ್ತರ್ನ್ ವಾರಿಯರ್ಸ್: 146/0
    4) ಡೆಕನ್ ಗ್ಲೇಡಿಯೇಟರ್ಸ್: 146/3
    5) ಟೀಮ್ ಅಬುಧಾಬಿ: 145/3
    Published by:Vijayasarthy SN
    First published: