Cristiano Ronaldo: ಕ್ರಿಸ್ಟಿಯಾನೊ ಕಾಲ್ಚಳಕ: ವಿಶ್ವ ದಾಖಲೆಯತ್ತ ರೊನಾಲ್ಡೊ

ಫುಟ್​ಬಾಲ್ ಅಂಗಳದ ಆಕ್ರಮಣಕಾರಿ ಆಟಗಾರನೆಂದೇ ಖ್ಯಾತರಾಗಿರುವ ಪೋರ್ಚುಗಲ್​ನ ಸೆನ್ಸೇಷನ್ ಕ್ರಿಸ್ಟಿಯಾನೊ ರೊನಾಲ್ಡೊ ಮತ್ತೊಂದು ವಿಶ್ವ ದಾಖಲೆಯತ್ತ ಮುಖ ಮಾಡಿದ್ದಾರೆ. ಬುಧವಾರ ನಡೆದ ಯುರೋ-2020 ಟೂರ್ನಿಯಲ್ಲಿ ಫ್ರಾನ್ಸ್​ ವಿರುದ್ದ 2 ಗೋಲುಗಳನ್ನು ದಾಖಲಿಸುವ ಮೂಲಕ ರೊನಾಲ್ಡೊ ಅಂತಾರಾಷ್ಟ್ರೀಯ ಫುಟ್​ಬಾಲ್​ನಲ್ಲಿ ಅತೀ ಹೆಚ್ಚು ಗೋಲುಗಳಿಸಿದ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ಹಂಗೇರಿಯ ಬುಡಾಪೆಸ್ಟ್​ನಲ್ಲಿ ನಡೆದ ಈ ಪಂದ್ಯದಲ್ಲಿ 29ನೇ ನಿಮಿಷದಲ್ಲಿ ಫ್ರಾನ್ಸ್ ಗೋಲ್ ಕೀಪರ್ ಮಾಡಿದ ತಪ್ಪಿನಿಂದ ಪೆನಾಲ್ಟಿ ಪಡೆದ ಪೋರ್ಚುಗಲ್ ಪರ ಕ್ರಿಸ್ಟಿಯಾನೊ ಮೊದಲ ಗೋಲು ದಾಖಲಿಸಿದರು. ಆದರೆ ಮೊದಲಾರ್ಧದ ಅಂತಿಮ ಕ್ಷಣದಲ್ಲಿ ಪೆಪೆ ಎದುರಾಳಿ ಆಟಗಾರ ಎಂಬಾಪೆಯನ್ನು ನೆಲಕ್ಕುರುಳಿಸಿದ ಪರಿಣಾಮ ಫ್ರಾನ್ಸ್​ಗೂ ಪೆನಾಲ್ಟಿ ಅವಕಾಶ ಲಭಿಸಿತು. ಸಿಕ್ಕ ಪೆನಾಲ್ಟಿ ಅವಕಾಶದಲ್ಲಿ ಕರೀಂ ಬೆನ್ಝಮಾ ಚೆಂಡನ್ನು ಗುರಿ ಮುಟ್ಟಿಸುವ ಮೂಲಕ ಗೋಲಿನ ಅಂತರವನ್ನು 1-1 ಸಮಬಲಗೊಳಿಸಿದರು.

ಇದರ ಬೆನ್ನಲ್ಲೇ 47 ನಿಮಿಷದಲ್ಲಿ ಬೆನ್ಝಮಾ ಮತ್ತೊಮ್ಮೆ ಮುನ್ನಗ್ಗಿ ಬಂದು ಚೆಂಡನ್ನು ಗೋಲು ಬಲೆಯೊಳಗೆ ತಲುಪಿಸಿದರು. ಇತ್ತ 2-1 ಅಂತರದಿಂದ ಹಿನ್ನಡೆ ಹೊಂದಿದ ಪೋರ್ಚುಗಲ್ ಹಲವು ಬಾರಿ ಫ್ರಾನ್ಸ್​ ಗೋಲಿನತ್ತ ದಾಳಿ ನಡೆಸಿದರೂ ಪ್ರಯೋಜನವಾಗಲಿಲ್ಲ. 59 ನಿಮಿಷದಲ್ಲಿ ಫ್ರಾನ್ಸ್ ಡಿಫೆಂಡರ್ ರೊನಾಲ್ಡೊ ಬಾರಿಸಿ ಚೆಂಡನ್ನು ಕೈಯಲ್ಲಿ ತಡೆದ ಪರಿಣಾಮ ಪೋರ್ಚುಗಲ್ ತಂಡಕ್ಕೆ ಮತ್ತೊಂದು ಪೆನಾಲ್ಟಿ ಅವಕಾಶ ದೊರೆಯಿತು.

ಈ ಅವಕಾಶವನ್ನು ಸದುಪಯೋಗಪಡಿಸಿಕೊಂಡ ಕ್ರಿಸ್ಟಿಯಾನೊ ರೊನಾಲ್ಡೊ ಗೋಲಿನ ಅಂತರವನ್ನು 2-2 ಸಮಬಲಗೊಳಿಸಿದರು. ಇದಾಗ್ಯೂ ಉಭಯ ತಂಡಗಳಿಂದ ಅಂತಿಮ ಹಂತದವರೆಗೆ ಉತ್ತಮ ಹೋರಾಟ ಕಂಡು ಬಂದರೂ ಗೋಲುಗಳಿಸಲು ಸಾಧ್ಯವಾಗಿರಲಿಲ್ಲ. ಇದರೊಂದಿಗೆ ಪೋರ್ಚುಗಲ್-ಫ್ರಾನ್ಸ್ ಪಂದ್ಯವು ಡ್ರಾನಲ್ಲಿ ಅಂತ್ಯಗೊಂಡತಾಯಿತು.



ರೊನಾಲ್ಡೊ ಬಾರಿಸಿದ ಈ ಎರಡು ಗೋಲುಗಳ ನೆರವಿನಿಂದ ಫೋರ್ಚ್‌ಗಲ್ ಅಂತಿಮ ಯುರೋ ಕಪ್​ನ 16ರ ಘಟ್ಟಕ್ಕೆ ತಲುಪಿದೆ. ಅಲ್ಲದೆ ಈ ಎರಡು ಗೋಲುಗಳ ಮೂಲಕ ಇರಾನಿನ ಮಾಜಿ ಫುಟ್​ಬಾಲ್ ಆಟಗಾರ ಅಲಿ ಡೇರಿ ಹೆಸರಿನಲ್ಲಿರುವ 109 ಅಂತಾರಾಷ್ಟ್ರೀಯ ಗೋಲುಗಳ ದಾಖಲೆಯನ್ನು ಕ್ರಿಸ್ಟಿಯಾನೊಸರಿಗಟ್ಟಿದ್ದು, ಇನ್ನೊಂದು ಗೋಲು ಮೂಡಿಬಂದರೆ ವಿಶ್ವ ದಾಖಲೆ ನಿರ್ಮಾಣವಾಗಲಿದೆ.