BBL 10: ಹೀಗೂ ಕ್ಯಾಚ್ ಹಿಡಿಯಬಹುದು: ವಿಭಿನ್ನ ಫೀಲ್ಡಿಂಗ್ ವಿಡಿಯೋ ವೈರಲ್

ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಬಿಗ್ ಬ್ಯಾಷ್ ಲೀಗ್​ನ 35ನೇ ಪಂದ್ಯವು ವಿಚಿತ್ರ ಕ್ಯಾಚ್​ವೊಂದಕ್ಕೆ ಸಾಕ್ಷಿಯಾಯಿತು. ಸಿಡ್ನಿ ಸಿಕ್ಸರ್ ಹಾಗೂ ಬ್ರಿಸ್ಬೇನ್ ಹೀಟ್ ನಡುವಣ ಪಂದ್ಯದಲ್ಲಿ ಟಾಸ್ ಗೆದ್ದ ಸಿಡ್ನಿ ಬೌಲಿಂಗ್ ಆಯ್ದುಕೊಂಡಿತು. ಅದರಂತೆ ಬ್ಯಾಟಿಂಗ್ ಆರಂಭಿಸಿದ ಬ್ರಿಸ್ಬೇನ್ ತಂಡಕ್ಕೆ ಕ್ರಿಸ್ ಲಿನ್ ಸ್ಪೋಟಕ ಆರಂಭ ಒದಗಿಸಿದ್ದರು.

ಒಂದೆಡೆ ವಿಕೆಟ್ ಬೀಳುತ್ತಿದ್ದರೆ ಮತ್ತೊಂದೆಡೆ ಸಿಕ್ಸ್-ಫೋರ್​ಗಳ ಸುರಿಮಳೆ ಸುರಿಸಿದ ಕ್ರಿಸ್ ಲಿನ್ ಅರ್ಧಶತಕ ಬಾರಿಸಿದರು. ಆದರೆ ಮತ್ಯಾವ ಆಟಗಾರರಿಂದಲೂ ಉತ್ತಮ ಜೊತೆಯಾಟ ಮೂಡಿಬರದ ಕಾರಣ ಅಂತಿಮವಾಗಿ ಬ್ರಿಸ್ಬೇನ್ ಹೀಟ್ 20 ಓವರ್​ನಲ್ಲಿ 148 ರನ್ ಕಲೆಹಾಕಿತು.

ಈ ನಡುವೆ ಬ್ರಿಸ್ಬೇನ್ ಬ್ಯಾಟ್ಸ್​ಮನ್ ಜಿಮ್ಮಿ ಪಿಯರ್ಸನ್ ಔಟ್ ಆಗಿದ್ದು ಎಲ್ಲರ ಗಮನ ಸೆಳೆಯಿತು. 15ನೇ ಓವರ್​ನಲ್ಲಿ ಜಾಕ್ ಬಾಲ್ ಎಸೆತವನ್ನು ಜಿಮ್ಮಿ ಕವರ್​ನತ್ತ ಬಾರಿಸಿದರು. ಚೆಂಡು ನೇರವಾಗಿ ಅಲ್ಲೇ ಫೀಲ್ಡಿಂಗ್​ ನಿಂತಿದ್ದ ಜಾಕ್ಸನ್ ಬರ್ಡ್​ನತ್ತ ಸಾಗಿತು. ಆದರೆ ಬಾಲ್ ಬಂದ ವೇಗದಲ್ಲಿ ಕ್ಯಾಚ್ ಹಿಡಿಯಲು ತಡಬಡಿಸಿದರು.

ಚೆಂಡು ಜಾಕ್ಸನ್ ಬರ್ಡ್ ಎದೆ ಭಾಗಕ್ಕೆ ತಾಗಿ ಇನ್ನೇನು ನೆಲಕ್ಕುರುಳಿತು, ಅನ್ನುವಷ್ಟರಲ್ಲಿ ಬಾಲ್​ನ್ನು ಕಾಲುಗಳ ನಡುವೆ ಬಂಧಿಸಿದರು. ಅತ್ತ ಪ್ರೇಕ್ಷಕರು ಕ್ಯಾಚ್ ಡ್ರಾಪ್ ಅಂದುಕೊಂಡರೆ, ಕಾಲುಗಳ ಮಧ್ಯೆಯಿಂದ ಚೆಂಡನ್ನು ಎತ್ತಿ ಜಾಕ್ಸನ್ ಬರ್ಡ್ ಔಟ್ ಎಂದರು. ಈ ವಿಡಿಯೋ ಇದೀಗ ಭಾರೀ ವೈರಲ್ ಆಗಿದೆ. ಹೀಗೂ ಕೂಡ ಕ್ಯಾಚ್ ಹಿಡಿಯಬಹುದು ಎಂದು ಸೋಷಿಯಲ್ ಮೀಡಿಯಾದಲ್ಲಿ ಹಾಸ್ಯ ಚಟಾಕಿ ಹಾರಿಸುತ್ತಿದ್ದಾರೆ.

ಇನ್ನು ಈ ಪಂದ್ಯದಲ್ಲಿ ಬ್ರಿಸ್ಬೇನ್ ಹೀಟ್ ನೀಡಿದ 148 ರನ್​ಗಳ ಟಾರ್ಗೆಟ್​ನ್ನು ಸಿಡ್ನಿ ಸಿಕ್ಸರ್ ಕೊನೆಯ ಎಸೆತದವರೆಗೆ ಕೊಂಡೊಯ್ದು 3 ವಿಕೆಟ್​ಗಳ ರೋಚಕ ಜಯ ಸಾಧಿಸಿತು.