Ashish Nehra: 2003ರ ವಿಶ್ವಕಪ್ ಸಾಧನೆ ಹಿಂದಿದೆ ಆಶಿಶ್ ನೆಹ್ರಾ ಅವರ ನೋವಿನ ಕಥೆ..!

ಟೀಮ್ ಇಂಡಿಯಾ ಪರ 17 ಟೆಸ್ಟ್‌, 120 ಏಕದಿನ ಹಾಗೂ 27 ಟಿ20 ಪಂದ್ಯಗಳನ್ನಾಡಿದ್ದ ನೆಹ್ರಾ 2017ರಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಹೇಳಿದ್ದರು. ತಮ್ಮ 17 ವರ್ಷಗಳ ವೃತ್ತಿ ಜೀವನದಲ್ಲಿ 235 ವಿಕೆಟ್ ಉರುಳಿಸಿದ್ದಾರೆ.

news18-kannada
Updated:September 16, 2020, 7:48 PM IST
Ashish Nehra: 2003ರ ವಿಶ್ವಕಪ್ ಸಾಧನೆ ಹಿಂದಿದೆ ಆಶಿಶ್ ನೆಹ್ರಾ ಅವರ ನೋವಿನ ಕಥೆ..!
ಟೀಮ್ ಇಂಡಿಯಾ ಪರ 17 ಟೆಸ್ಟ್‌, 120 ಏಕದಿನ ಹಾಗೂ 27 ಟಿ20 ಪಂದ್ಯಗಳನ್ನಾಡಿದ್ದ ನೆಹ್ರಾ 2017ರಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಹೇಳಿದ್ದರು. ತಮ್ಮ 17 ವರ್ಷಗಳ ವೃತ್ತಿ ಜೀವನದಲ್ಲಿ 235 ವಿಕೆಟ್ ಉರುಳಿಸಿದ್ದಾರೆ.
  • Share this:
ಅದು 2003ರ ವಿಶ್ವಕಪ್. ಫೆಬ್ರವರಿ 26 ರಂದು ದಕ್ಷಿಣ ಆಫ್ರಿಕಾದ ಕಿಂಗ್ಸ್​ಮೇಡ್ ಕ್ರಿಕೆಟ್ ಮೈದಾನದಲ್ಲಿ ಭಾರತ ಹಾಗೂ ಇಂಗ್ಲೆಂಡ್ ತಂಡಗಳು ಮುಖಾಮುಖಿಯಾಗಿದ್ದವು. ಮೊದಲೇ ಆತ್ಮವಿಶ್ವಾಸದಿಂದ ಪುಟಿದೇಳುತ್ತಿದ್ದ ಟೀಮ್ ಇಂಡಿಯಾಗೆ ಇಂಗ್ಲೆಂಡ್ ಕಠಿಣ ಸವಾಲು ಎಂಬುದರ ಸಂಪೂರ್ಣ ಅರಿವಿತ್ತು. ಹೀಗಾಗಿಯೇ ಟಾಸ್ ಗೆದ್ದ ಟೀಮ್ ಇಂಡಿಯಾ ನಾಯಕ ಸೌರವ್ ಗಂಗೂಲಿ ಬ್ಯಾಟಿಂಗ್ ಆಯ್ದುಕೊಂಡಿದ್ದರು. ಆದರೆ ದಾದಾ ಅವರ ಲೆಕ್ಕಚಾರವನ್ನು ತಲೆಕೆಳಗಾಗಿಸುವಂತೆ ಇಂಗ್ಲೆಂಡ್ ಬೌಲರುಗಳು ಪ್ರದರ್ಶನ ನೀಡಿದ್ದರು. ಪರಿಣಾಮ ಭಾರತ 50 ಓವರ್​ಗಳಲ್ಲಿ ಗಳಿಸಿದ್ದು ಬರೀ 250 ರನ್ ಮಾತ್ರ.

ಮತ್ತೊಂದೆಡೆ ಟ್ರೆಸ್ಕೊಥಿಕ್, ಮೈಕೆಲ್ ವಾನ್, ನಾಸೀರ್ ಹುಸೇನ್, ಕಾಲಿಂಗ್​ವುಡ್ ರಂತಹ ಬ್ಯಾಟ್ಸ್​ಮನ್​ಗಳನ್ನು ಹೊಂದಿದ್ದ ಇಂಗ್ಲೆಂಡ್ ಈ ಪಂದ್ಯವನ್ನು ಸುಲಭವಾಗಿ ಗೆಲ್ಲಲಿದೆ ಎಂದೇ ಎಲ್ಲರೂ ಭಾವಿಸಿದ್ದರು. ಆದರೆ 251 ರನ್ ಗುರಿ ಪಡೆದ  ಇಂಗ್ಲೆಂಡ್ ಬ್ಯಾಟ್ಸ್​ಮನ್​ಗಳಿಗೆ ಶಾಕ್ ನೀಡಿ ಟೀಮ್ ಇಂಡಿಯಾ ಎಡಗೈ ವೇಗಿ ಆಶಿಶ್ ನೆಹ್ರಾ ಹೊಸ ಇತಿಹಾಸ ಬರೆದಿದ್ದರು.

ಹೌದು, 10 ಓವರ್​ಗಳಲ್ಲಿ ಕೇವಲ 23 ರನ್​ ನೀಡಿ ನೆಹ್ರಾ 6 ವಿಕೆಟ್ ಉರುಳಿಸಿದ್ದರು. ಈ ಅದ್ಭುತ ಬೌಲಿಂಗ್ ಪರಿಣಾಮ ಇಂಗ್ಲೆಂಡ್ ಕೇವಲ 168 ರನ್​ಗಳಿಗೆ ಆಲೌಟ್ ಆಗಿ ಹೀನಾಯ ಸೋಲನುಭವಿಸಿತು. ಮರುದಿನ ಎಲ್ಲಾ ಮಾಧ್ಯಮಗಳಲ್ಲೂ ನೆಹ್ರಾ ಮಿಂಚಿದ್ದರು. ಆದರೆ ಈ ಸಾಧನೆಯ ಹಿಂದೆ ಒಂದು ನೋವಿನ ಕಥೆಯಿತ್ತು ಎಂಬುದು ಅನೇಕರಿಗೆ ಗೊತ್ತಿರಲಿಲ್ಲ. ಈ ವಿಷಯವನ್ನು ಇದೀಗ ಟೀಮ್ ಇಂಡಿಯಾ ಮಾಜಿ ಆಟಗಾರ ಆಕಾಶ್ ಚೋಪ್ರಾ ಬಹಿರಂಗಪಡಿಸಿದ್ದಾರೆ.

ಇಂಗ್ಲೆಂಡ್ ವಿರುದ್ಧದ ಪಂದ್ಯಕ್ಕೂ ಮುನ್ನ ಆಶಿಶ್ ನೆಹ್ರಾ ಅವರ ಕಾಲು ಊದಿಕೊಂಡಿತ್ತು. ಅಭ್ಯಾಸದ ವೇಳೆ ತಮ್ಮ ಕಾಲನ್ನು ಐಸ್ ಬಕೆಟ್​ನಲ್ಲಿಟ್ಟು ಪರಿಹಾರ ಕಂಡುಕೊಳ್ಳಲು ಯತ್ನಿಸಿದ್ದರು. ಏಕೆಂದರೆ ಕಾಲು ಊದಿಕೊಂಡಿದ್ದಾಗ ಅವರಿಗೆ ಶೂ ಹಾಕಲು ಕಷ್ಟವಾಗುತ್ತಿತ್ತು. ಆದರೆ ಮುಂದಿನ ದಿನ ಇಂಗ್ಲೆಂಡ್ ವಿರುದ್ಧ ಮಹತ್ವದ ಪಂದ್ಯ. ನೋವಿನಿಂದ ಬಳಲುತ್ತಿದ್ದ ನೆಹ್ರಾ ಊದಿಕೊಂಡ ಕಾಲಿನೊಂದಿಗೆ ಕಣಕ್ಕಿಳಿಯಲು ನಿರ್ಧರಿಸಿದ್ದರು.


ನಾಯಕ ಸೌರವ್ ಗಂಗೂಲಿ ಕೂಡ ನೆಹ್ರಾ ಪರ ಅಪಾರ ವಿಶ್ವಾಸವಿರಿಸಿಕೊಂಡಿದ್ದರು. ಹೀಗಾಗಿ ನೋವಿನ ನಡುವೆ ನೆಹ್ರಾ ಕಣಕ್ಕಿಳಿಯುವುದು ಅನಿವಾರ್ಯವಾಗಿತ್ತು. ಸವಾಲನ್ನು ಸ್ವೀಕರಿಸಿ ಮೈದಾನಕ್ಕಿಳಿದ ನೆಹ್ರಾ ಇಂಗ್ಲೆಂಡ್ ಬ್ಯಾಟ್ಸ್​ಮನ್​ಗಳ ವಿಕೆಟ್ ಉರುಳಿಸಿದರು. ತಮ್ಮ ಮೇಲೆ ನಾಯಕ ಇರಿಸಿದ್ದ ನಂಬಿಕೆಯನ್ನು ಹುಸಿಗೊಳಿಸದೇ ಭಾರತಕ್ಕೆ ಜಯ ತಂದುಕೊಟ್ಟರು. ಹೀಗೆ ಗಾಯದ ನಡುವೆ ಆಡಿ ಟೀಮ್ ಇಂಡಿಯಾ ಗೆಲುವಿಗೆ ಕಾರಣರಾದ ನೆಹ್ರಾಗಿಂತ ಶ್ರೇಷ್ಠ ವ್ಯಕ್ತಿ ಮತ್ತೊಬ್ಬರಿಲ್ಲ. ಈ ಮೂಲಕ ಆಶಿಶ್ ನೆಹ್ರಾ ಗಾಯ ಎಂಬುದಕ್ಕೆ ದೇಹಕ್ಕೆ ಮಾತ್ರ, ದೃಢ ಸಂಕಲ್ಪಕ್ಕಲ್ಲ ಎಂಬುದನ್ನು ಇಡೀ ವಿಶ್ವಕ್ಕೆ ಸಾರಿದ್ದರು ಆಕಾಶ್ ಚೋಪ್ರಾ ಹೇಳಿದ್ದಾರೆ.
ಟೀಮ್ ಇಂಡಿಯಾ ಪರ 17 ಟೆಸ್ಟ್‌, 120 ಏಕದಿನ ಹಾಗೂ 27 ಟಿ20 ಪಂದ್ಯಗಳನ್ನಾಡಿದ್ದ ನೆಹ್ರಾ 2017ರಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಹೇಳಿದ್ದರು. ತಮ್ಮ 17 ವರ್ಷಗಳ ವೃತ್ತಿ ಜೀವನದಲ್ಲಿ 235 ವಿಕೆಟ್ ಉರುಳಿಸಿದ್ದಾರೆ. ಇದರಲ್ಲಿ ಇಂಗ್ಲೆಂಡ್ ವಿರುದ್ದ 23ಕ್ಕೆ 6 ವಿಕೆಟ್ ಪಡೆದಿರುವುದು ನೆಹ್ರಾ ಪಾಲಿಗೆ ಶ್ರೇಷ್ಠ ದಾಖಲೆಯಾಗಿದೆ.
Published by: zahir
First published: September 16, 2020, 7:48 PM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories

corona virus btn
corona virus btn
Loading