Andre Russell: IPL ವೈಫಲ್ಯಕ್ಕೆ ಕಾರಣ ತಿಳಿಸಿದ ಆ್ಯಂಡ್ರೆ ರಸೆಲ್..!

IPL 2019 ರಲ್ಲಿ ಕೊಲ್ಕತ್ತಾ ನೈಟ್ ರೈಡರ್ಸ್ ಪರ ಅಬ್ಬರಿಸಿ ಬೊಬ್ಬರಿದ ಆ್ಯಂಡ್ರೆ ರಸೆಲ್ ಕಲೆಹಾಕಿದ್ದು ಬರೋಬ್ಬರಿ 510 ರನ್​ಗಳು. ಅದರಲ್ಲೂ 204. 81 ಸ್ಟ್ರೈಕ್ ರೇಟ್​ನಲ್ಲಿ ಬ್ಯಾಟ್ ಬೀಸಿದ್ದರು ಎಂಬುದು ವಿಶೇಷ. ಆದರೆ ಐಪಿಎಲ್ 2020 ಯಲ್ಲಿ ರಸೆಲ್ ಲೆಕ್ಕಚಾರಗಳು ಉಲ್ಟಾ ಪಲ್ಟಾ ಆಗಿದ್ದವು. ಇದಕ್ಕೆ ಸಾಕ್ಷಿಯೇ 13ನೇ ಸೀಸನ್​ ಐಪಿಎಲ್​ನ ಅವರ ಸಾಧನೆ. ಹೌದು, ಯುಎಇನಲ್ಲಿ ನಡೆದ ಟೂರ್ನಿಯಲ್ಲಿ 10 ಪಂದ್ಯಗಳಿಂದ ರಸೆಲ್ ಕಲೆಹಾಕಿದ್ದು ಕೇವಲ 117 ರನ್​ ಮಾತ್ರ. ವಿಂಡೀಸ್ ದಾಂಡಿಗ ಕಳಪೆ ಪ್ರದರ್ಶನ ಕೆಕೆಆರ್ ಫಲಿತಾಂಶದ ಮೇಲೆ ಪರಿಣಾಮ ಬೀರಿತ್ತು ಎಂದರೆ ತಪ್ಪಾಗಲಾರದು.

ಇದೀಗ ತಮ್ಮ ಕಳಪೆ ಫಾರ್ಮ್​ ಬಗ್ಗೆ ಖುದ್ದು ರಸೆಲ್ ಅವರೇ ಮಾತನಾಡಿದ್ದಾರೆ. ಈ ಬಾರಿಯ ಟೂರ್ನಿಯಲ್ಲಿ ವೈಫಲ್ಯಕ್ಕೆ ಕಾರಣವನ್ನೂ ತಿಳಿಸಿದ್ದಾರೆ. ಯುಎಇನಲ್ಲಿ ನಡೆದ ಐಪಿಎಲ್​ ನನ್ನ ಪಾಲಿಗೆ ಕಠಿಣವಾಗಿತ್ತು ಎಂದಿರುವ ರಸೆಲ್, ಹಲವು ಬಾರಿ ಬ್ಯಾಟಿಂಗ್ ಶೈಲಿಯನ್ನು ಬದಲಿಸಲು ಪ್ರಯತ್ನ ನಡೆಸಿದರೂ ಅದು ಫಲ ನೀಡಿರಲಿಲ್ಲ ಎಂದಿದ್ದಾರೆ.

ಬ್ಯಾಟಿಂಗ್ ತಂತ್ರಗಾರಿಕೆ, ಫುಟ್​ವರ್ಕ್​ನಲ್ಲಿ ಬದಲಾವಣೆ ಮಾಡಿಕೊಂಡರೂ ಯಾವುದೂ ಫಲ ನೀಡುತ್ತಿರಲಿಲ್ಲ. ಏನಾಯಿತು ಎಂಬುದೇ ನನಗೆ ತಿಳಿಯುತ್ತಿಲ್ಲ. ಇಂತಹ ವೈಫಲ್ಯವು ಬೇಗನೆ ಮುಗಿಯಲಿ ಎಂದು ನಾನು ಬಯಸುವೆ ಎಂದು ಆ್ಯಂಡ್ರೆ ರಸೆಲ್ ತಿಳಿಸಿದರು.

ಇನ್ನು ಐಪಿಎಲ್ ಬಯೋ ಬಬಲ್​ನ ಬಗ್ಗೆ ಅನುಭವ ಹಂಚಿಕೊಂಡ ರಸೆಲ್, ಇಂಡಿಯನ್ ಪ್ರೀಮಿಯರ್ ಲೀಗ್ ಮುಗಿಯುತ್ತಿದ್ದಂತೆ ನಾನು ದುಬೈನಲ್ಲಿ ಕೆಲ ಸಮಯ ಕಳೆಯಲುಉ ನಿರ್ಧರಿಸಿದ್ದೆ. ಏಕೆಂದರೆ ಕೆರಿಬಿಯನ್ ಪ್ರೀಮಿಯರ್ ಲೀಗ್​ನ ಬಯೋ ಬಬಲ್​ನಿಂದ ನೇರವಾಗಿ ಐಪಿಎಲ್ ಟೂರ್ನಿಯಲ್ಲಿ ಪಾಲ್ಗೊಂಡಿದ್ದೆ. ಹೀಗಾಗಿ ನನಗೆ ವಿರಾಮ ಅಗತ್ಯವಾಗಿತ್ತು. ಹೀಗಾಗಿ ಐಪಿಎಲ್ ಮುಕ್ತಾಯವಾಗುತ್ತಿದ್ದಂತೆ ದುಬೈಗೆ ತೆರಳಿ ಸಮಯವನ್ನು ಕಳೆದೆ. ಡ್ರಿಂಕ್ಸ್, ಪಾರ್ಟಿ ಮೂಲಕ ಮನಸ್ಸನ್ನು ಸಡಿಲಗೊಳಿಸಿದೆ ಎಂದು ರಸೆಲ್ ತಿಳಿಸಿದರು.

ಬಯೋ ಬಬಲ್​ನಿಂದ ಹೊರಬಂದಾಗ ನನಗೆ ಜೈಲ್​ನಿಂದ ಹೊರಬಂದ ಅನುಭವವಾಗಿತ್ತು. ಇದರಿಂದ ಹೊರಬಂದ ಬಳಿಕ ಬದುಕುತ್ತಿದ್ದೀನಿ ಎನ್ನುವ ಅನುಭವವನ್ನು ಪಡೆದೆ. ನಾನು ಜೈಲಿಗಂತು ಹೋಗಿಲ್ಲ. ಆದರೆ ಲಾಕ್​ಡೌನ್ ಬಂಧನ ಹೇಗಿರುತ್ತೆ ಎಂಬುದನ್ನು ಚೆನ್ನಾಗಿ ಕಲಿಸಿತು ಎಂದು ಆ್ಯಂಡ್ರೆ ರಸೆಲ್ ತಿಳಿಸಿದರು.