ಉದ್ದೀಪನ ಮದ್ದು ಸೇವನೆ: ಭಾರತದ ಕ್ರಿಕೆಟ್ ಆಟಗಾರ್ತಿಗೆ 4 ವರ್ಷ ನಿಷೇಧ..!

ಡೋಪಿಂಗ್ ಪ್ರಕರಣದ ಸುಳಿಗೆ ಸಿಲುಕಿದ್ದ ಭಾರತ ಮಹಿಳಾ ಕ್ರಿಕೆಟ್ ಆಟಗಾರ್ತಿ ಅಂಶುಲಾ ರಾವ್‍ಗೆ 4 ವರ್ಷ ನಿಷೇಧ ಹೇರಲಾಗಿದೆ. ನಾಡಾ ನಡೆಸಿದ ವಿಚಾರಣೆ ವೇಳೆ ಅಂಶುಲಾ ತಪ್ಪಿತಸ್ಥರೆಂದು ಸಾಬೀತಾಗಿದೆ. ಹೀಗಾಗಿ ಅವರನ್ನು ಉದ್ದೀಪನ ಸೇವನೆ ಪ್ರಕರಣದಡಿ ಕ್ರಿಕೆಟ್​ನಿಂದ ನಾಲ್ಕು ವರ್ಷಗಳವರೆಗೆ ನಿಷೇಧಿಸಲಾಗಿದೆ. ಈ ಮೂಲಕ ನಿಷೇಧಕ್ಕೆ ಒಳಗಾದ ಭಾರತದ ಮೊದಲ ಕ್ರಿಕೆಟ್ ಆಟಗಾರ್ತಿ ಎಂಬ ಅಪಖ್ಯಾತಿಗೊಳಗಾಗಿದ್ದಾರೆ.

ಮಧ್ಯಪ್ರದೇಶ ಮಹಿಳಾ ತಂಡದ ಅಲೌಂಡರ್ ಆಗಿ ಗುರುತಿಸಿಕೊಂಡಿದ್ದ ಅಂಶುಲಾ ರಾವ್ 2019-20ರಲ್ಲಿ ನಡೆದ ಅಂಡರ್-23 ಮಹಿಳಾ ಟಿ20 ಟೂರ್ನಿಯಲ್ಲಿ ಆಡಿದ್ದರು. ಕಳೆದ ವರ್ಷ ಮಾರ್ಚ್ 14ರಂದು ಬರೋಡಾದಲ್ಲಿ ನಡೆಸಲಾದ ಪರೀಕ್ಷೆಯ ವೇಳೆ ಅಂಶುಲಾ ಅವರು ನಿಷೇಧಿತ ಅನಾಬೊಲಿಕ್ ಸ್ಟಿರಾಯ್ಡ್ ಸೇವಿಸಿರುವುದು ಕಂಡು ಬಂದಿತ್ತು. ಆದರೆ ನಿಷೇಧಿತ ಉದ್ದೀಪನ ನನ್ನ ಅರಿವಿಗೆ ಬಾರದಂತೆ ದೇಹ ಸೇರಿದೆ ಎಂದು ಅಂಶುಲಾ ತಿಳಿಸಿದ್ದರು.

ಆ ಬಳಿಕ ವೈದ್ಯಕೀಯ ಪರೀಕ್ಷೆಯ ಜೊತೆ ವಿಚಾರಣೆ ಮುಂದುವರೆಸಲಾಗಿತ್ತು. ನಾಡಾ ಸಮಿತಿಯವರ ವಿಚಾರಣೆಯಿಂದ ಇದೀಗ ಅಂಶುಲಾ ಉದ್ದೇಶಪೂರ್ವವಾಗಿಯೇ ಡ್ರಗ್ಸ್​ ತೆಗೆದುಕೊಂಡಿದ್ದರು ಎಂಬುದು ತಿಳಿದು ಬಂದಿದೆ. ಹೀಗಾಗಿ ಅವರನ್ನು ಕ್ರಿಕೆಟ್​ನಿಂದ ನಾಲ್ಕು ವರ್ಷಗಳವರೆಗೆ ನಿಷೇಧಿಸಲಾಗಿದೆ.

ಈ ಹಿಂದೆ ಡ್ರಗ್ಸ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಭಾರತದ ಪ್ರದೀಪ್ ಸಾಂಗ್ವಾನ್, ಪಾಕಿಸ್ತಾನದ ಅಹಮದ್ ಶೆಹಝಾದ್, ಮೊಹಮ್ಮದ್ ಆಸಿಫ್, ಶೋಯೆಬ್ ಅಖ್ತರ್, ಯಾಸಿರ್ ಶಾ, ಆಸ್ಟ್ರೇಲಿಯಾದ ಶೇನ್‍ವಾರ್ನ್, ಇಯಾನ್ ಬಾಥಮ್, ನ್ಯೂಜಿಲ್ಯಾಂಡ್ ಸ್ಟೀಫನ್ ಫ್ಲೆಮಿಂಗ್, ಶ್ರೀಲಂಕಾದ ಉಪಲ್‍ತರಂಗಾ ಸೇರಿದಂತೆ ಹಲವು ಪುರುಷ ಕ್ರಿಕೆಟಿಗರು ನಿಷೇಧಕ್ಕೆ ಒಳಗಾಗಿದ್ದರು. ಇದೀಗ ಉದ್ದೀಪನ ಮದ್ದು ಸೇವನೆ ಪ್ರಕರಣದಡಿ ನಿಷೇಧಕ್ಕೊಳಗಾದ ಭಾರತದ ಮೊದಲ ಆಟಗಾರ್ತಿ ಎಂಬ ಅಪಕೀರ್ತಿಗೆ ಅಂಶುಲಾ ಪಾತ್ರರಾಗಿದ್ದಾರೆ.