Yusuf Pathan Retirement: ಎಲ್ಲಾ ಮಾದರಿಯ ಕ್ರಿಕೆಟ್​ಗೆ ವಿದಾಯ ಘೋಷಿಸಿದ ಮತ್ತೋರ್ವ ಭಾರತೀಯ ಆಲ್​ರೌಂಡರ್​ ಯೂಸುಫ್​ ಪಠಾಣ್!

ಭಾರತದ ಆಲ್​ರೌಂಡರ್​ ವಿನಯ್​ ಕುಮಾರ್​ ತಮ್ಮ ಕ್ರಿಕೆಟ್​ ವೃತ್ತಿ ಬದುಕಿಗೆ ವಿದಾಯ ಘೋಷಿಸಿದ ಬೆನ್ನಿಗೆ ಮತ್ತೋರ್ವ ಆಲ್‌ರೌಂಡರ್ ಯೂಸುಫ್ ಪಠಾಣ್ ಅವರು ಸಹ ಇಂದು ಅಂತರರಾಷ್ಟ್ರೀಯ ಕ್ರಿಕೆಟ್ ಮತ್ತು ಎಲ್ಲಾ ಮಾದರಿಯ ಕ್ರಿಕೆಟ್​ನಿಂದ ತಾವು ನಿವೃತ್ತಿ ಹೊಂದುತ್ತಿರುವುದಾಗಿ ಟ್ವಿಟರ್​ ಮೂಲಕ ಘೋಷಣೆ ಮಾಡಿದ್ದಾರೆ. ತಮ್ಮ ಟ್ವಿಟರ್​ನಲ್ಲಿ ಪೋಸ್ಟ್ ಮಾಡುವ ಮೂಲಕ ನಿವೃತ್ತಿ ಘೋಷಿಸಿರುವ ಯೂಸುಫ್​ ಪಠಾಣ್ ಭಾರತ ಮತ್ತೋರ್ವ ಮಾಜಿ ಆಲ್​ರೌಂಡರ್​ ಇರ್ಫಾನ್ ಪಠಾಣ್ ಅವರ ಹಿರಿಯ ಸಹೋದರ ಎಂಬುದು ಉಲ್ಲೇಖಾರ್ಹ. ಇರ್ಫಾನ್ ಪಠಾಣ್​ ಸಹ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಘೋಷಿಸಿದ್ದುಇದೀಗ ವಿಶ್ವದ ವಿವಿಧ ಕ್ರಿಕೆಟ್​ ಲೀಗ್​ಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಯೂಸುಫ್​ ಪಠಾಣ್ ಸಹ ವಿದೇಶಿ ಕ್ರಿಕೆಟ್​ ಲೀಗ್​ನಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ. ​

I thank my family, friends, fans, teams, coaches and the whole country wholeheartedly for all the support and love. #retirement pic.twitter.com/usOzxer9CE

— Yusuf Pathan (@iamyusufpathan) February 26, 2021

38 ವರ್ಷದ ಯೂಸುಫ್​ ಪಠಾಣ್ 2007ರ ಮೊದಲ ಟಿ-20 ವಿಶ್ವಕಪ್​ ಟೂರ್ನಿಯಲ್ಲಿ ಪಾಕಿಸ್ತಾನದ ಎದುರಿನ ಫೈನಲ್​ ಪಂದ್ಯದಲ್ಲಿ ಆರಂಭಿಕನಾಗಿ ಆಡುವ ಮೂಲಕ ತಮ್ಮ ಅಂತಾರಾಷ್ಟ್ರೀಯ ಕ್ರಿಕೆಟ್​ ಬದುಕನ್ನು ಆರಂಭಿಸಿದ್ದರು. ಆನಂತರ ಟಿ20 ಮತ್ತು ಏಕದಿನ ಮಾದರಿ ಕ್ರಿಕೆಟ್​ನಲ್ಲಿ ಭಾರತ ಖಾಯಂ ಸದಸ್ಯನಾಗಿ ಸ್ಥಾನ ಪಡೆದಿದ್ದರು. ಹೊಡಿಬಡಿ ಆಟಗಾರನಾಗಿ ತನ್ನ ಮುದ್ರೆಯನ್ನು ಒತ್ತಿದ್ದ ಯೂಸುಫ್​ ಭಾರತಕ್ಕಾಗಿ ಅನೇಕ ಪಂದ್ಯಗಳನ್ನು ಗೆಲ್ಲಿಸಿಕೊಟ್ಟಿದ್ದಾರೆ. ಆದರೆ, ತದನಂತರದ ದಿನಗಳಲ್ಲಿ ಫಾರ್ಮ್​ ಕಳೆದುಕೊಂಡ ಕಾರಣ ಅವರನ್ನು ತಂಡದಿಂದ ಹೊರಹಾಕಲಾಗಿತ್ತು.

ಇದನ್ನೂ ಓದಿ: Vinay Kumar: ಎಲ್ಲಾ ಮಾದರಿಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ ಕರ್ನಾಟಕದ ಖ್ಯಾತ ಆಲ್​ರೌಂಡರ್​ ವಿನಯ್​ ಕುಮಾರ್!

ಭಾರತದ ಪರ ಒಟ್ಟು 22 ಟಿ-20 ಪಂದ್ಯಗಳನ್ನು ಆಡಿರುವ ಯೂಸುಫ್ 18.15 ಬ್ಯಾಟಿಂಗ್ ಸರಾಸರಿಯಲ್ಲಿ 236 ರನ್ ಕಲೆಹಾಕಿದ್ದರೆ, 8.62ರ ಎಕಾನಮಿಯಲ್ಲಿ 13 ವಿಕೆಟ್​ಗಳನ್ನೂ ಕಬಳಿಸಿದ್ದಾರೆ. ಇನ್ನೂ ಏಕದಿನ ಮಾದರಿಯಲ್ಲಿ 57 ಪಂದ್ಯಗಳಲ್ಲಿ ಭಾರತವನ್ನು ಪ್ರತಿನಿಧಿಸಿರುವ ಯೂಸುಫ್​ ಪಠಾಣ್, 27ರ ಬ್ಯಾಟಿಂಗ್ ಸರಾಸರಿಯಲ್ಲಿ 810 ರನ್​ಗಳನ್ನು ಬಾರಿಸಿದ್ದಾರೆ. ಇದರಲ್ಲಿ ಎರಡು ಶತಕ ಮೂರು ಅರ್ಧ ಶತಕ ಅಡಕವಾಗಿದೆ. ಏಕದಿನ ಮಾದರಿಯಲ್ಲಿ 5.5 ಎಕಾನಮಿಯಲ್ಲಿ ರನ್​ ನೀಡಿ 33 ವಿಕೆಟ್​ಗಳನ್ನೂ ಯೂಸುಫ್​ ಕಬಳಿಸಿದ್ದಾರೆ.

ಐಪಿಎಲ್​ನಲ್ಲಿ ಕೋಲ್ಕತ್ತಾ ನೈಟ್​ ರೈಡರ್ಸ್​, ಸನ್​ ರೈಸರ್ಸ್​ ಹೈದರಾಬಾದ್​ ಸೇರಿದಂತೆ ಅನೇಕ ತಂಡಗಳನ್ನು ಪ್ರತಿನಿಧಿಸಿರುವ ಯೂಸುಫ್​ ಪಠಾಣ್ ಒಟ್ಟು 174 ಪಂದ್ಯಗಳನ್ನಾಡಿದ್ದು, 29.13ರ ಸರಾಸರಿಯಲ್ಲಿ 3204 ರನ್​ ಕಬಳಿಸಿದ್ದರೆ, ಬೌಲಿಂಗ್​ನಲ್ಲೂ ಕೈಚಳಕ ತೋರಿಸಿದ್ದು, 7.4ರ ಉತ್ತಮ ಎಕಾನಮಿಯಲ್ಲಿ 42 ವಿಕೆಟ್​ಗಳನ್ನೂ ಕಬಳಿಸಿದ್ದಾರೆ. ಯೂಸುಫ್​ ಪಠಾಣ್​ ನಿವೃತ್ತಿ ಘೋಷಿಸುತ್ತಿದ್ದಂತೆ ಅವರ ಮುಂದಿನ ಬದುಕು ಸಂತಸದಿಂದ ಕೂಡಿರಲಿ ಎಂದು ಹಲವರು ಶುಭಕೋರಿದ್ದಾರೆ.