Aus Vs Ind - ಮೆಲ್ಬೋರ್ನ್​ನಲ್ಲಿ ರಹಾನೆ ಭರ್ಜರಿ ಶತಕ; 2ನೇ ದಿನವೂ ಆಸ್ಟ್ರೇಲಿಯಾ ವಿರುದ್ಧ ಭಾರತ ಮೇಲುಗೈ

ಮೆಲ್ಬೋರ್ನ್(ಡಿ. 27): ಅಡಿಲೇಡ್​ನಲ್ಲಿ ಹೋದ ಮಾನವನ್ನು ಭಾರತ ಮೆಲ್ಬೋರ್ನ್​ನಲ್ಲಿ ಪಡೆದುಕೊಳ್ಳುವಂತೆ ತೋರುತ್ತಿದೆ. ಆಸ್ಟ್ರೇಲಿಯಾ ವಿರುದ್ಧದ 4 ಪಂದ್ಯಗಳ ಟೆಸ್ಟ್ ಸರಣಿಯ 2ನೇ ಪಂದ್ಯದಲ್ಲಿ 2ನೇ ದಿನವೂ ಭಾರತ ಮೇಲುಗೈ ಸಾಧಿಸಿದೆ. ಅಜಿಂಕ್ಯ ರಹಾನೆ ಅವರ ಅಮೋಘ ಶತಕದಿಂದ ಭಾರತ ತಂಡ ಮೊದಲ ಇನ್ನಿಂಗ್ಸ್ ಮುನ್ನಡೆ ಸಾಧಿಸಿ ಮುನ್ನುಗ್ಗುತ್ತಿದೆ. ಆಸ್ಟ್ರೇಲಿಯಾದ 195 ರನ್​ಗಳ ಮೊದಲ ಇನ್ನಿಂಗ್ಸ್​ಗೆ ಪ್ರತಿಯಾಗಿ ಭಾರತ ತಂಡ 5 ವಿಕೆಟ್ ನಷ್ಟಕ್ಕೆ 277 ರನ್ ಗಳಿಸಿ 82 ರನ್​ಗಳ ಮುನ್ನಡೆ ಹೊಂದಿದೆ.

ನಿನ್ನೆ ಮೊದಲ ದಿನಾಂತ್ಯದಲ್ಲಿ 1 ವಿಕೆಟ್ ನಷ್ಟಕ್ಕೆ 36 ರನ್ ಗಳಿಸಿದ್ದ ಭಾರತ ತಂಡ ಇಂದು ಎರಡನೇ ದಿನದಾಟದ ಆರಂಭದಲ್ಲಿ ಬೇಗನೇ 2 ವಿಕೆಟ್ ಕಳೆದುಕೊಂಡಿತು. ಒಳ್ಳೆಯ ಫಾರ್ಮ್​ನಲ್ಲಿದ್ದ ಶುಭ್ಮನ್ ಗಿಲ್ ಮತ್ತು ಚೇತೇಶ್ವರ್ ಪೂಜಾರ ಇಬ್ಬರೂ ತಂಡದ ಮೊತ್ತ 64 ರನ್ ಇದ್ದಾಗ ನಿರ್ಗಮಿಸಿದರು. ಆದರೆ, ಅದಾದ ಬಳಿಕ ನಾಯಕ ಅಜಿಂಕ್ಯ ರಹಾನೆ ಬಂಡೆಯಂತೆ ನಿಂತು ತಂಡಕ್ಕೆ ಚೇತರಿಕೆ ನೀಡಿದರು. ರಹಾನೆಗೆ ಗಗನ ಹನುಮ ವಿಹಾರಿ, ರಿಷಭ್ ಪಂತ್ ಮತ್ತು ರವೀಂದ್ರ ಜಡೇಜಾ ಉತ್ತಮ ರೀತಿಯಲ್ಲಿ ಜೊತೆಯಾದರು. ರಹಾನೆ-ವಿಹಾರಿ ಮಧ್ಯೆ 4ನೇ ವಿಕೆಟ್​ಗೆ 52 ರನ್ ಜೊತೆಯಾಟ ಬಂದಿತ. ರಹಾನೆ ಮತ್ತು ಪಂತ್ ಇಬ್ಬರೂ 5ನೇ ವಿಕೆಟ್​ಗೆ 57 ರನ್ ಸೇರಿಸಿದರು. ನಂತರ ರಹಾನೆಗೆ ಜೊತೆಯಾದ ರವೀಂದ್ರ ಜಡೇಜಾ 6 ನೇ ವಿಕೆಟ್​ಗೆ 100ಕ್ಕೂ ಹೆಚ್ಚು ರನ್​ಗಳ ಜೊತೆಯಾಟದಲ್ಲಿ ಭಾಗಿಯಾದರು.

ಇದನ್ನೂ ಓದಿ: ಚೇತರಿಸಿಕೊಳ್ಳುತ್ತಿರುವ ಟೀಮ್ ಇಂಡಿಯಾ ವೇಗಿ: ಸದ್ಯಕ್ಕಂತು ಕಣಕ್ಕಿಳಿಯಲ್ಲ ಭುವನೇಶ್ವರ್ ಕುಮಾರ್..!

ಈ ವೇಳೆ ಅಜಿಂಕ್ಯ ರಹಾನೆ 12ನೇ ಟೆಸ್ಟ್ ಶತಕ ದಾಖಲಿಸಿದರು. ತಂಡಕ್ಕೆ ಅಮೂಲ್ಯ ಮೊದಲ ಇನ್ನಿಂಗ್ಸ್ ಮುನ್ನಡೆ ದೊರಕಿಸಿಕೊಳ್ಳಲು ಪ್ರಮುಖ ಪಾತ್ರ ವಹಿಸಿದರು. ನಾಯಕನ ಆಟದ ಪ್ರದರ್ಶನ ನೀಡಿದರು. ಮೊದಲ ದಿನದಾಟದಲ್ಲಿ ಭಾರತದ ಬ್ಯಾಟ್ಸ್​ಮನ್​ಗಳಿಗೆ ಸಿಂಹಸ್ವಪ್ನವಾಗಿ ಕಾಡಿದ್ದ ಮಿಶೆಲ್ ಸ್ಟಾರ್ಕ್ ಎರಡನೇ ದಿನ ಅಷ್ಟೇನೂ ಪರಿಣಾಮಕಾರಿ ಎನಿಸಲಿಲ್ಲ.

ಸ್ಕೋರು ವಿವರ (2ನೇ ದಿನದಾಟ):

ಆಸ್ಟ್ರೇಲಿಯಾ ಮೊದಲ ಇನ್ನಿಂಗ್ಸ್ 72.3 ಓವರ್ 195/10

ಭಾರತ ಮೊದಲ ಇನ್ನಿಂಗ್ಸ್ 277/5
(ಶುಭ್ಮನ್ ಗಿಲ್ 45, ರಿಷಭ್ ಪಂತ್ 29, ಅಜಿಂಕ್ಯ ರಹಾನೆ ಅಜೇಯ 104, ರವೀಂದ್ರ ಜಡೇಜಾ ಅಜೇಯ 40 ರನ್ – ಮಿಶೆಲ್ ಸ್ಟಾರ್ಕ್ 61/2, ಪ್ಯಾಟ್ ಕುಮಿನ್ಸ್ 71/2)