Border–Gavaskar Trophy: ಭಾರತ ಪ್ರವಾಸಕ್ಕೆ 18 ಸದಸ್ಯರ ಬಲಿಷ್ಠ ಟೆಸ್ಟ್​ ತಂಡ ಪ್ರಕಟಿಸಿದ ಆಸ್ಟ್ರೇಲಿಯಾ

ಭಾರತದಲ್ಲಿ ಫೆಬ್ರವರಿ ಹಾಗೂ ಮಾರ್ಚ್​ನಲ್ಲಿ ನಡೆಯಲ್ಲಿರುವ 4 ಟೆಸ್ಟ್ ಪಂದ್ಯಗಳ ಬಾರ್ಡರ್- ಗವಾಸ್ಕರ್ (Border - Gavaskar) ಟೆಸ್ಟ್ ಸರಣಿಗಾಗಿ ಕ್ರಿಕೆಟ್ ಆಸ್ಟ್ರೇಲಿಯಾ(Cricket Australia) 18 ಸದಸ್ಯರ ಟೆಸ್ಟ್ ತಂಡವನ್ನು ಪ್ರಕಟಿಸಿದೆ. ಈ ತಂಡದಲ್ಲಿ ಯುವ ಸ್ಪಿನ್ನರ್​ ಟಾಡ್​ ಮರ್ಫಿಗೆ(Todd Murphy) ಅವಕಾಶ ಪಡೆದುಕೊಂಡಿದ್ದಾರೆ. ಉಪಖಂಡದಲ್ಲಿ ಸರಣಿ ನಡೆಯುತ್ತಿರುವುದರಿಂದ ಆಯ್ಕೆ ಸಮಿತಿ 4 ಸ್ಪಿನ್ನರ್​ಗಳನ್ನು ಆಯ್ಕೆ ಮಾಡಿದೆ.

ಇತ್ತೀಚೆಗೆ  ದಕ್ಷಿಣ ಆಫ್ರಿಕಾ ತಂಡವನ್ನು ಮಣಿಸಿರುವ ಆತ್ಮವಿಶ್ವಾಸದಲ್ಲಿರುವ ಆಸ್ಟ್ರೇಲಿಯಾ ತಂಡ ಭಾರತದಲ್ಲಿ ಭಾರತ ತಂಡವನ್ನು ಮಣಿಸುವ ಆಶಯದೊಂದಿಗೆ ಭಾರತಕ್ಕೆ ಕಾಲಿಡಲಿದೆ. ತವರಿನಲ್ಲಿ ನಡೆದಿದ್ದ ಕಳೆದ ಬಾರ್ಡರ್ ಗವಾಸ್ಕರ್ ಸರಣಿಯನ್ನು ಆಸ್ಟ್ರೇಲಿಯಾ 1-2 ರಲ್ಲಿ ಸೋಲು ಕಂಡಿತ್ತು.

ನಾಲ್ವರು ಸ್ಪಿನ್ನರ್​ಗಳಿಗೆ ಅವಕಾಶ

ಭಾರತದ ನೆಲದಲ್ಲಿ ಸರಣಿ ನಡೆಯುವುದನ್ನು ಗಮನದಲ್ಲಿಟ್ಟುಕೊಂಡು ಆಸ್ಟ್ರೇಲಿಯಾ ಆಯ್ಕೆ ಸಮಿತಿ ಟೆಸ್ಟ್ ತಂಡದಲ್ಲಿ 4 ಸ್ಪಿನ್ನರ್‌ಗಳಿಗೆ ಸ್ಥಾನ ನೀಡಿದೆ.  ಹಿರಿಯ ಸ್ಪಿನ್ನರ್ ನೇಥನ್ ಲಿಯಾನ್, ಆಷ್ಟನ್ ಅಗರ್ ಮತ್ತು ಮಿಚೆಲ್ ಸ್ವೆಪ್​ಸನ್​ ಜೊತೆಗೆ ಡೊಮೆಸ್ಟಿಕ್ ಕ್ರಿಕೆಟ್​ನಲ್ಲಿ ಮಿಂಚುತ್ತಿರುವ ವಿಕ್ಟೋರಿಯಾದ ಉದಯೋನ್ಮುಖ ಸ್ಪಿನ್ನರ್ ಟಾಡ್ ಮರ್ಫಿ ಕೂಡ ಆಸ್ಟ್ರೇಲಿಯಾ ತಂಡದಲ್ಲಿ ಅವಕಾಶ ಗಿಟ್ಟಿಸಿಕೊಂಡಿದ್ದಾರೆ.

ಇದನ್ನೂ ಓದಿ:IND vs SL T20: ಭಾರತ-ಲಂಕಾ ಪಂದ್ಯದಲ್ಲಿ ಸಾಲು ಸಾಲು ದಾಖಲೆ! ವಿಶ್ವ ಕ್ರಿಕೆಟ್‌ನಲ್ಲಿ ಯಾರೂ ಮಾಡದ ರೆಕಾರ್ಡ್ ಮಾಡಿದ ಟೀಂ ಇಂಡಿಯಾ

ಇತ್ತೀಚೆಗೆ ಮುಕ್ತಾಯವಾದ ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿ ಮಧ್ಯದಲ್ಲಿ ಅವಕಾಶ ಪಡೆದಿದ್ದ ವಿಕೆಟ್ ಕೀಪರ್ ಬ್ಯಾಟರ್ ಪೀಟರ್ ಹ್ಯಾಂಡ್​ಸ್ಕಾಂಬ್ ಕೂಡ 3 ವರ್ಷಗಳ ಬಳಿಕ ತಂಡಕ್ಕೆ ಮರಳಿದ್ದಾರೆ. ಇವರ ಜೊತೆಗೆ ಬ್ಯಾಟಿಂಗ್​ ಬ್ಯಾಕ್​ ಅಪ್ ಆಗಿ ಮ್ಯಾಥ್ಯೂ ರೆನ್ಷಾ ಅವಕಾಶ ಪಡೆದಿದ್ದಾರೆ.

ಆಸ್ಟ್ರೇಲಿಯಾ 18 ಸದಸ್ಯರ ಟೆಸ್ಟ್ ತಂಡ

ಪ್ಯಾಟ್ ಕಮ್ಮಿನ್ಸ್ (ನಾಯಕ), ಸ್ಟೀವ್​ ಸ್ಮಿತ್, ಅಲೆಕ್ಸ್ ಕ್ಯಾರಿ, ಕ್ಯಾಮೆರಾನ್ ಗ್ರೀನ್, ಜೋಶ್ ಹೆಜಲ್​ವುಡ್​, ಟ್ರಾವಿಸ್ ಹೆಡ್, ಆಷ್ಟನ್ ಅಗರ್, ಉಸ್ಮಾನ್ ಖವಾಜಾ, ಡೇವಿಡ್ ವಾರ್ನರ್, ಮಾರ್ನಸ್ ಲಾಬುಶೇನ್, ನೇಥನ್ ಲಿಯಾನ್, ಲ್ಯಾನ್ಸ್ ಮೋರಿಸ್, ಟಾಡ್ ಮರ್ಫಿ, ಮ್ಯಾಥ್ಯೂ ರೆನ್ಷಾ, ಮಿಚೆಲ್ ಸ್ಟಾರ್ಕ್, ಸ್ಕಾಟ್ ಬೋಲ್ಯಾಂಡ್, ಮಿಚೆಲ್ ಸ್ವೆಪ್ಸನ್, ಪೀಟರ್ ಹ್ಯಾಂಡ್​ಸ್ಕಾಂಬ್

ಪಂದ್ಯಗಳ ವೇಳಾಪಟ್ಟಿ

ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಮೊದಲ ಟಸ್ಟ್​ ಪಂದ್ಯ ಫೆಬ್ರವರಿ 9-13ರವರೆಗೆ ನಾಗ್ಪುರದಲ್ಲಿ ನಡೆಯಲಿದೆ. 2ನೇ ಟೆಸ್ಟ್​ ಫೆಬ್ರವರಿ 17-21, 3ನೇ ಟೆಸ್ಟ್​ ಧರ್ಮಸಾಲದಲ್ಲಿ ಮಾರ್ಚ್​ 1-5ರವರೆ ಹಾಗೂ ಕೊನೆಯ ಟೆಸ್ಟ್​ ಅಹ್ಮದಾಬಾದ್​ನಲ್ಲಿ 9-13ರವರೆಗೆ ನಡೆಯಲಿದೆ. ಟೆಸ್ಟ್​ ಸರಣಿಯ ನಂತರ 3 ಪಂದ್ಯಗಳ ಏಕದಿನ ಪಂದ್ಯ ನಡೆಯಲಿದ್ದು, ಮೊದಲನೇ ಪಂದ್ಯ ಮಾರ್ಚ್​ 17ರಂದು ಮುಂಬೈನ ವಾಂಖೆಡೆಯಲ್ಲಿ, 2ನೇ ಪಂದ್ಯ ವಿಶಾಖಪಟ್ಟಣದ ವೈ ಎಸ್ ರಾಜಶೇಖರ್ ರೆಡ್ಡಿ ಸ್ಟೇಡಿಯಂನಲ್ಲಿ ಹಾಗೂ ಮೂರನೇ ಪಂದ್ಯ ಚೆನ್ನೈನ ಎಂ ಚಿದಂಬರಂ ಸ್ಟೇಡಿಯಂನಲ್ಲಿ ನಡೆಯಲಿದೆ.

ಬಾರ್ಡರ್-ಗಾವಾಸ್ಕರ್ ಟ್ರೋಪಿ ಅಂಕಿ-ಅಂಶ

ಎರಡು ತಂಡಗಳ ನಡುವೆ 1996/7ರವರೆಗ ಒಟ್ಟು 15 ಬಾರ್ಡರ್ ಗವಾಸ್ಕರ್ ಸರಣಿ ನಡೆದಿದ್ದು, ಅದರಲ್ಲಿ ಭಾರತ ತಂಡ ಸಿಂಹ ಪಾಲು ಪಡೆದುಕೊಂಡಿದೆ. ಭಾರತ ತಂಡ ಒಟ್ಟು 9 ಬಾರಿ ಟ್ರೋಪಿಯನ್ನು ತನ್ನದಾಗಿಸಿಕೊಂಡಿದ್ದರೆ, ಆಸ್ಟ್ರೇಲಿಯಾ 5 ಬಾರಿ ಗೆಲುವು ಸಾಧಿಸಿದೆ. ಒಂದು ಸರಣಿ ಡ್ರಾನಲ್ಲಿ ಅಂತ್ಯಗೊಂಡಿದೆ.

18 ವರ್ಷಗಳಿಂದ ತವರಿನಲ್ಲಿ ಭಾರತಕ್ಕೆ ಸೋಲಿಲ್ಲ

15 ಸರಣಿಗಳಲ್ಲಿ ಭಾರತದಲ್ಲಿ 8 ಆಸ್ಟ್ರೇಲಿಯಾದಲ್ಲಿ 7 ಸರಣಿ ನಡೆದಿವೆ. ಭಾರತ ತಂಡದ ತವರಿನಲ್ಲಿ ಕಳೆದ 18 ವರ್ಷಗಳಿಂದ ಕಾಂಗರೂ ಪಡೆದ ವಿರುದ್ಧ ಸರಣಿ ಕಳೆದುಕೊಂಡಿಲ್ಲ. 2004-5ರಲ್ಲಿ ಕೊನೆಯ ಬಾರಿಗೆ ಆಸ್ಟ್ರೇಲಿಯಾ 2-1ರಲ್ಲಿ ಗೆಲುವು ಸಾಧಿಸಿತ್ತು. ಇನ್ನು ತವರಿನಲ್ಲಿ ನಡೆದಿರುವ 8 ಸರಣಿಗಳಲ್ಲಿ ಭಾರತ ತಂಡ 7 ರಲ್ಲಿ ಗೆಲುವು ಸಾದಿಸಿ ಒಮ್ಮೆ ಮಾತ್ರ ಸೋಲು ಕಂಡಿದೆ. ಇನ್ನು ಆಸ್ಟ್ರೇಲಿಯಾದಲ್ಲಿ ನಡೆದಿರುವ 7 ಸರಣಿಗಳಲ್ಲಿ ಆಸ್ಟ್ರೇಲಿಯಾ 4 ಹಾಗೂ ಭಾರತ 2 ಬಾರಿ ಟ್ರೋಫಿ ತನ್ನದಾಗಿಸಿಕೊಂಡಿದೆ. ಒಂದು ಬಾರಿ ಡ್ರಾನಲ್ಲಿ ಅಂತ್ಯಗೊಂಡಿದೆ.