ಕತಾರ್ ಫುಟ್​ಬಾಲ್ ವಿಶ್ವಕಪ್ 2022: ಕಾಲ್ಚೆಂಡು ಕಾಳಗಕ್ಕೆ ಸಜ್ಜಾಗಿರುವ ಸ್ಟೇಡಿಯಂನ ಅದ್ಧೂರಿ ಅನಾವರಣ

2022 ಫಿಫಾ ಫುಟ್​ಬಾಲ್ ವಿಶ್ವಕಪ್​ಗೆ ಭರ್ಜರಿ ತಯಾರಿಗಳು ನಡೆಯುತ್ತಿವೆ. ಅದರಲ್ಲೂ ಮುಂದಿನ ಫುಟ್​ಬಾಲ್ ಕದನ ನಡೆಯುತ್ತಿರುವುದು ಸುಲ್ತಾನರ ನಾಡು ಕತಾರ್​ನಲ್ಲಿ ಎಂಬುದು ವಿಶೇಷ. ಹೀಗಾಗಿ 2022ರ ಕತಾರ್ ಫುಟ್​ಬಾಲ್ ವಿಶ್ವಕಪ್​ ಕಳೆದ ವರ್ಷದಿಂದಲೇ ಸುದ್ದಿಯಲ್ಲಿದೆ. ಇದಕ್ಕೆ ಒಂದು ಕಾರಣ, ಕತಾರ್ ಸರ್ಕಾರ ಸಜ್ಜುಗೊಳಿಸುತ್ತಿರುವ ಮೈದಾನಗಳು. ಹೌದು, ಕತಾರ್ ಫುಟ್​ಬಾಲ್ ವಿಶ್ವಕಪ್​ಗಾಗಿ ಬೃಹತ್ ಮೈದಾನಗಳನ್ನು ನಿರ್ಮಿಸಲಾಗಿದೆ.

ಅದರಲ್ಲೊಂದಾದ ಅಹ್ಮದ್ ಬಿನ್ ಅಲಿ ಸ್ಟೇಡಿಯಂನ್ನು ಅನಾವರಣಗೊಳಿಸಲಾಗಿದೆ. ಕತಾರ್ ರಾಷ್ಟ್ರೀಯ ದಿನದಂದು 48ನೇ ಅಮೀರ್​ ಕಪ್​ಗೆ ಈ ಕ್ರೀಡಾಂಗಣ ಆತಿಥ್ಯವಹಿಸಿದ್ದು, ಇದೇ ಮೈದಾನದಲ್ಲೇ ಫಿಫಾ ವರ್ಲ್ಡ್​ಕಪ್​ ಫುಟ್​ಬಾಲ್​ನ 7 ಪಂದ್ಯಗಳು ನಡೆಯಲಿದೆ.

ಅಹ್ಮದ್ ಬಿನ್ ಅಲಿ ಸ್ಟೇಡಿಯಂ ಒಟ್ಟು 40,000 ಪ್ರೇಕ್ಷಕರ ಸಾಮರ್ಥ್ಯವನ್ನು ಹೊಂದಿದ್ದು, ಇಲ್ಲಿನ ಹವಾನಿಯಂತ್ರಿತ ವ್ಯವಸ್ಥೆ, ಸುಸಜ್ಜಿತ ರೂಮ್​ಗಳನ್ನು ನಿರ್ಮಿಸಲಾಗಿದೆ. ಇನ್ನು ಅಮೀರ್ ಕಪ್ ಆರಂಭಕ್ಕೂ ಮುನ್ನ ಉದ್ಘಾಟನಾ ಕಾರ್ಯಕ್ರಮವು ಅದ್ದೂರಿಯಾಗಿ ನಡೆಯಿತು. ಬೆಳಕಿನ ಕಾರಂಜಿಯೊಂದಿಗೆ ದೃಶ್ಯ ವೈಭವ ಮೂಡಿ ಕ್ರೀಡಾಂಗಣದಲ್ಲಿ ನೆರೆದಿದ್ದ ಶೇ.50 ರಷ್ಟು ಜನರನ್ನು ನಿಬ್ಬೆರಗಾಗುವಂತೆ ಮಾಡಿದ್ದರು.