Love Affair: ಪ್ರೀತಿಸಿದ್ದಕ್ಕಾಗಿ ಮಗಳನ್ನು 25 ವರ್ಷ ಕೋಣೆಯಲ್ಲಿ ಕೂಡಿ ಹಾಕಿದ ತಾಯಿ, ಪ್ರೀತ್ಸೋದ್ ತಪ್ಪಾ?

Punished for Love: ಪ್ರೇಮಿಗಳು, ಆಗಾಗ್ಗೆ ತಮ್ಮ ಕುಟುಂಬದ ಪ್ರತಿರೋಧವನ್ನು ಎದುರಿಸುತ್ತಾರೆ. ಇದರಿಂದಾಗಿ ಅವರು ಮದುವೆಯಾಗಲು ಅಥವಾ ಪ್ರೀತಿಯಲ್ಲಿ ಬಿದ್ದ ನಂತರ ಒಟ್ಟಿಗೆ ಕಾಲ ಕಳೆಯಲು ಕಷ್ಟವಾಗುತ್ತದೆ. ಇದು ನಮ್ಮ ದೇಶದಲ್ಲಿ ಮಾತ್ರವಲ್ಲ, ಪ್ರಪಂಚದಾದ್ಯಂತ ಈ ರೀತಿ ಆಗುತ್ತದೆ. ಫ್ರಾನ್ಸ್‌ನಂತ ಮುಂದುವರಿದ ದೇಶದಲ್ಲೂ ವ್ಯಕ್ತಿಯೊಬ್ಬನನ್ನು ಪ್ರೀತಿಸಿ (Love) ಮದುವೆಯಾಗಲು ಹೊರಟಿದ್ದಕ್ಕೆ ಯುವತಿಯನ್ನು 25 ವರ್ಷಗಳ ಕಾಲ ಮನೆಯಲ್ಲೇ ಲಾಕ್‌ ಮಾಡಿರುವ ಘಟನೆ ನಡೆದಿತ್ತು. ಹೌದು, ನೀವು ಇದನ್ನು ನಂಬ್ಲೇಬೇಕು. ಅಂದಹಾಗೆ, ಈ ಘಟನೆ ನಡೆದಿದ್ದು, 19ನೇ ಶತಮಾನದ ಉತ್ತರಾರ್ಧದಲ್ಲಿ. ಮಗಳನ್ನು ಆಕೆಯ ತಾಯಿಯೇ 25 ವರ್ಷಗಳ ಕಾಲ ಆಕೆಯ ಮನೆಯಲ್ಲಿ ಕೂಡಿ (Locked in House) ಹಾಕಿದ್ದರು. ಫ್ರಾನ್ಸ್‌ನ ವಿಯೆನ್ನೆಯ ಬ್ಲಾಂಚೆ ಮೊನಿಯರ್‌ನನ್ನು ಆಕೆಯ ತಾಯಿ (Mother) ಮೇಡಮ್ ಮೊನಿಯರ್ ಕಿಟಕಿಯಿಲ್ಲದ ಕೋಣೆಯಲ್ಲಿ ಕಟ್ಟಿ ಹಾಕಿ ಬಂಧಿಸಿದ್ದರು. ಮಾನವ ಇತಿಹಾಸದಲ್ಲಿ, ಬ್ಲಾಂಚೆಯ ದುರಂತ ಕತೆಯನ್ನು ಅತ್ಯಂತ ಭೀಕರ ಪ್ರಕರಣವೆಂದು ಪರಿಗಣಿಸಲಾಗಿದೆ.

1876ರಲ್ಲಿ 25ನೇ ವಯಸ್ಸಿನವಳಿದ್ದಾಗ ಬ್ಲಾಂಚೆ ಕೆಲವು ವರ್ಷಗಳ ಹಿಂದೆ ಭೇಟಿಯಾದ ವ್ಯಕ್ತಿಯನ್ನು ಮದುವೆಯಾಗಲು ಬಯಸಿದ್ದರು. ಆದರೆ, ಆ ವ್ಯಕ್ತಿ ಆಕೆಯ ತಾಯಿ ಮೇಡಮ್ ಮೊನಿಯರ್ ನಿರೀಕ್ಷೆಗೆ ತಕ್ಕವರಾಗಿರಲಿಲ್ಲ. ಆಕೆ ವಿಧವೆಯಾದ್ದರಿಂದ ತನ್ನ ಮಗಳು ಬ್ಲಾಂಚೆಯನ್ನು ಶ್ರೀಮಂತ ಕುಟುಂಬಕ್ಕೆ ಕೊಟ್ಟು ಮದುವೆ ಮಾಡಲು ಬಯಸಿದ್ದರು. ಅಲ್ಲದೆ, ತಾವು ಇರುತ್ತಿದ್ದ ಉನ್ನತ ಸ್ಟ್ಯಾಂಡರ್ಡ್‌ನಲ್ಲಿರುವುದನ್ನು ಖಚಿತಪಡಿಸಿಕೊಳ್ಳಲು ಬಯಸಿದ್ದರು.

ಆದರೆ, ಬ್ಲಾಂಚೆ ತನ್ನ ತಾಯಿ ಆಯ್ಕೆ ಮಾಡಿದ ಯಾವುದೇ ದಾವೆದಾರರನ್ನು ಮದುವೆಯಾಗಲು ನಿರಾಕರಿಸಿದರು ಎಂದು ಮಾಧ್ಯಮಗಳ ವರದಿಗಳು ಹೇಳುತ್ತವೆ. ಅಲ್ಲದೆ, ಹಣಕ್ಕಿಂತ ಪ್ರೀತಿಯನ್ನು ಆರಿಸುವುದಾಗಿ ತನ್ನ ತಾಯಿಗೆ ಸ್ಪಷ್ಟಪಡಿಸಿದ್ದಳು. ಮಗಳ ಹೇಳಿಕೆಯಿಂದ ಕೋಪಗೊಂಡ ಮೇಡಮ್ ಮೊನಿಯರ್, ತನ್ನ ಮಗ ಮಾರ್ಸೆಲ್ ಸಹಾಯದಿಂದ, ಬ್ಲಾಂಚೆಯನ್ನು ಕಿಟಕಿಯಿಲ್ಲದ ಕೋಣೆಯಲ್ಲಿ ಹಾಸಿಗೆಯಲ್ಲೇ ಕಟ್ಟಿಹಾಕಿ ಬಂಧಿಸಿದ್ದರು.

ಇದನ್ನೂ ಓದಿ: ಅವ್ನಿಗೆ ಆಗ್ಲೇ ಮದುವೆ ಆಗಿದೆ, ಈ ಮದುವೆ ಬೇಡ ಎಂದಿದ್ದೇ ತಪ್ಪಾಯ್ತು, ಪ್ರೀತಿಯ ಹೆಸರಲ್ಲಿ ಜೋಡಿ ಆತ್ಮಹತ್ಯೆ!

ನೆರೆಹೊರೆಯವರು ಬ್ಲಾಂಚೆಯ ಕಿರುಚಾಟ ಕೇಳಿ, ಆಕೆಯ ಬಗ್ಗೆ ತಾಯಿಯನ್ನು ಕೇಳಿದರೆ, ತನ್ನ ಮಗಳಿಗೆ ಹುಚ್ಚು ಹಿಡಿದಿದೆ ಮತ್ತು ಆದ್ದರಿಂದ ಕೋಣೆಯಲ್ಲಿ ಕೂಡಿ ಹಾಕಬೇಕಾಯಿತು ಎಂದು ಮೇಡಮ್ ಮೊನಿಯರ್ ಹೇಳಿದ್ದರು. ಫ್ರಾನ್ಸ್‌ನ ಅತ್ಯಂತ ಸುಂದರ ಮಹಿಳೆಯರಲ್ಲಿ ಒಬ್ಬರಾಗಿದ್ದ ಬ್ಲಾಂಚೆ, ಕೊಳೆಯುತ್ತಿರುವ ಆಹಾರ ಮತ್ತು ಇಲಿಗಳಿಂದ ಆವೃತವಾಗಿದ್ದರು ಎಂದು ವರದಿಯಾಗಿದೆ.

ಬ್ಲಾಂಚೆ ಒಂದೇ ಕೋಣೆಯಲ್ಲಿ ಇರುತ್ತಿದ್ದಳು ಮತ್ತು ಆಕೆಗೆ ಐವತ್ತು ವರ್ಷವಾಗುವವರೆಗೂ ಹಾಸಿಗೆಯ ಮೇಲೆ ಸರಪಳಿ ಹಾಕಲಾಗಿತ್ತು. ಸೇವಕನೊಬ್ಬ ತನ್ನ ಕೊಳಕಾದ ಹಾಸಿಗೆಯ ಮೇಲೆ ಎಸೆದ ತುಣುಕುಗಳನ್ನು ಮಾತ್ರ ಆಕೆ ತಿನ್ನುತ್ತಿದ್ದಳು ಮತ್ತು ಮಲಗಿದ್ದ ಸ್ಥಳದಲ್ಲೇ ಮಲವಿಸರ್ಜನೆ ಮಾಡುವಂತಾಗಿತ್ತು. ಅಲ್ಲದೆ, ಆಕೆ ನಿಧಾನವಾಗಿ ಸಾವಿಗೆ ಹತ್ತಿರವಾಗುತ್ತಿದ್ದಳು, ಕೊಳೆಯುತ್ತಿದ್ದಳು ಮತ್ತು ಆಕೆಯ ತೂಕ ಕೇವಲ 55lbs ಅಂದರೆ ಸುಮಾರು 25 ಕೆಜಿಗೆ ಇಳಿದಿತ್ತು ಎಂದೂ ಡೈಲಿ ಸ್ಟಾರ್ ವರದಿ ಹೇಳುತ್ತದೆ.

ಇದನ್ನೂ ಓದಿ: ಎರಡನೇ ಪ್ರೀತಿಯಲ್ಲಿ ಏನೋ ಸರಿಯಿಲ್ಲ ಎಂಬ ಅನುಮಾನವೇ; ಈ ಐದು ಮಾರ್ಗ ಅನುಸರಿಸಿ

ಮೇ 23,1901 ರಂದು, ಪ್ಯಾರಿಸ್‌ನ ಅಟಾರ್ನಿ ಜನರಲ್‌ಗೆ ಕಳೆದ 25 ವರ್ಷಗಳಿಂದ ಮೇಡಮ್ ಮೊನಿಯರ್ ಮನೆಯಲ್ಲಿ ಅವಿವಾಹಿತೆಯನ್ನು ಕೂಡಿ ಹಾಕಲಾಗಿದೆ ಎಂಬ ಅನಾಮಧೇಯ ಪತ್ರ ಬರೆದರು. ನಂತರ, ಪೊಲೀಸರು ಮನೆಯ ಮೇಲೆ ದಾಳಿ ಮಾಡಿ ಬ್ಲಾಂಚೆಯನ್ನು ರಕ್ಷಿಸಿದರು. ಅಲ್ಲದೆ, ಆಕೆಯ ಸಹೋದರ ಮತ್ತು ತಾಯಿಯನ್ನು ಪೊಲೀಸರು ಬಂಧಿಸಿದ್ದರು ಎಂದೂ ತಿಳಿದುಬಂದಿದೆ.

ಅಲ್ಲದೆ, ಬ್ಲಾಂಚೆಯನ್ನು ಆಸ್ಪತ್ರೆಗೆ ಸಾಗಿಸಲಾಯಿತು. 1901ರಲ್ಲಿ ಪೊಲೀಸರಿಂದ ರಕ್ಷಿಸಲ್ಪಟ್ಟ ನಂತರ, ಆಕೆ ಇನ್ನೂ ಹಲವು ವರ್ಷಗಳ ಕಾಲ ಬದುಕಿದ್ದರು ಮತ್ತು 1913ರಲ್ಲಿ ನಿಧನರಾದರು ಎಂದು ಹೇಳಲಾಗಿದೆ.