ದೂರವಾಣಿ ಮೂಲಕ ಸಚಿನ್‌ ಪೈಲಟ್‌ಗೆ ಪಿ. ಚಿದಂಬರಂ ಸಲಹೆ: ಕಾಂಗ್ರೆಸ್‌ಗೆ ಮರುಳುವರೇ ರಾಜಸ್ಥಾನದ ಯುವ ನಾಯಕ?

ಈ ನಡುವೆ ತಾನು ಯಾವುದೇ ಕಾರಣಕ್ಕೂ ಬಿಜೆಪಿ ಪಕ್ಷಕ್ಕೆ ಸೇರ್ಪಡೆಯಾಗುವುದಿಲ್ಲ ಎಂದು ಮತ್ತೆ ಸಚಿನ್ ಪೈಲಟ್ ಒತ್ತಿಹೇಳಿದ್ದಾರೆ. ಅಲ್ಲದೆ, ಸಚಿನ್ ಪೈಲಟ್ ರಾಹುಲ್ ಗಾಂಧಿ ಅವರ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದರು ಹೀಗಾಗಿ ಅವರನ್ನು ಪಕ್ಷದಿಂದ ಕಳುಹಿಸಲು ರಾಹುಲ್ ಗಾಂಧಿಗೂ ಇಷ್ಟವಿಲ್ಲ ಎನ್ನಲಾಗುತ್ತಿದೆ.

MAshok Kumar | news18-kannada
Updated:July 17, 2020, 1:32 PM IST
ದೂರವಾಣಿ ಮೂಲಕ ಸಚಿನ್‌ ಪೈಲಟ್‌ಗೆ ಪಿ. ಚಿದಂಬರಂ ಸಲಹೆ: ಕಾಂಗ್ರೆಸ್‌ಗೆ ಮರುಳುವರೇ ರಾಜಸ್ಥಾನದ ಯುವ ನಾಯಕ?
ಪಿ. ಚಿದಂಬರಂ
  • Share this:
ನವ ದೆಹಲಿ (ಜುಲೈ 17); ರಾಜಸ್ಥಾನ ಕಾಂಗ್ರೆಸ್ ಸಭೆ ಕರೆದು ಈ ಸಭೆಯಲ್ಲಿ ಹಿರಿಯ ನಾಯಕರ ಜೊತೆಗೆ ಮಾತನಾಡಿ, ತಮ್ಮ ತಕರಾರುಗಳನ್ನು ಮುಂದಿಟ್ಟು ಸಮಸ್ಯೆಯನ್ನು ಬಗೆಹರಿಸಿಕೊಳ್ಳಿ ಎಂದು ರಾಜಸ್ಥಾನದ ಮಾಜಿ ಡಿಸಿಎಂ ಸಚಿನ್ ಪೈಲಟ್ ಅವರಿಗೆ ಮಾಜಿ ಕೇಂದ್ರ ಸಚಿವ ಪಿ. ಚಿದಂಬರಂ ಕಿವಿಮಾತು ಹೇಳಿದ್ದಾರೆ ಎನ್ನಲಾಗುತ್ತಿದೆ.

ಪಕ್ಷ ವಿರೋಧಿ ಚಟುವಟಿಕೆಯಲ್ಲಿ ತೊಡಗಿದ್ದ ಆರೋಪದ ಮೇಲೆ ಈಗಾಗಲೇ ಸಚಿನ್ ಪೈಲಟ್ ಅವರನ್ನು ರಾಜಸ್ಥಾನದ ಡಿಸಿಎಂ ಹಾಗೂ ಪಕ್ಷದ ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಸಲಾಗಿದೆ. ಅಲ್ಲದೆ, ಪೈಲಟ್ ಮತ್ತು ಅವರ 18 ಬೆಂಬಲಿಗ ಶಾಸಕರನ್ನು ಶಾಸಕತ್ವ ಸ್ಥಾನದಿಂದ ಏಕೆ ವಜಾ ಮಾಡಬಾರದು? ಎಂದು ಪ್ರಶ್ನಿಸಿ ಸ್ಪೀಕರ್ ಸಚಿನ್‌ ಪೈಲಟ್‌ಗೆ ನೊಟೀಸ್ ನೀಡಿದ್ದಾರೆ. ಈ ನೊಟೀಸ್ ವಿರುದ್ಧ ಪೈಲಟ್ ಹೈಕೋರ್ಟ್ ಮೆಟ್ಟಿಲೇರಿದ್ದು ಇಂದು ಮಧ್ಯಾಹ್ನ ಈ ಅರ್ಜಿಯ ವಿಚಾರಣೆ ನಡೆಯಲಿದೆ.

ಈ ಹಿನ್ನೆಲೆಯಲ್ಲಿ ಮಾಜಿ ಕೇಂದ್ರ ಸಚಿವ ಪಿ. ಚಿದಂಬರಂ ಗುರುವಾರ ಸಂಜೆ ಸಚಿನ್ ಪೈಲಟ್ ಅವರಿಗೆ ಕರೆ ಮಾಡಿ ಮಾತನಾಡಿರುವುದಾಗಿ ಸ್ವತಃ ಖಚಿತಪಡಿಸಿದ್ದಾರೆ. ಈ ವೇಳೆ, “ಪಕ್ಷದಲ್ಲಿ ಮನಸ್ಥಾಪಗಳು ಸಹಜ. ಆದರೆ, ಏನೇ ತಕರಾರಿದ್ದರು ಹಿರಿಯ ಮುಖಂಡರ ಸಭೆ ಕರೆದು ಸಮಸ್ಯೆಯನ್ನು ಮಾತನಾಡಿ ಬಗೆಹರಿಸಿಕೊಳ್ಳಬೇಕು. ಈಗಲೂ ಕಾಂಗ್ರೆಸ್ ಬಾಗಿಲು ತಮಗಾಗಿ ತೆರೆದಿದೆ” ಎಂದು ಪೈಲಟ್‌ಗೆ ಕಿವಿಮಾತು ಹೇಳಿದ್ದಾಗಿ ಪಿ. ಚಿದಂಬರಂ ತಿಳಿಸಿದ್ದಾರೆ.

ರಾಜಸ್ಥಾನದಲ್ಲಿ ಆಡಳಿತರೂಢ ಸರ್ಕಾರದ ವಿರುದ್ಧ ಸಚಿನ್ ಪೈಲಟ್ ರಾಜಕೀಯ ಬಂಡಾಯ ಆರಂಭಿಸಿ ಒಂದು ವಾರದ ಮೇಲಾಗಿದೆ. ಈ ಅವಧಿಯಲ್ಲಿ ಕಾಂಗ್ರೆಸ್ ಹೈಕಮಾಂಡ್‌ನ ಹಲವಾರು ಹಿರಿಯ ನಾಯಕರು ಪೈಲಟ್ ಅವರನ್ನು ಸಂಪರ್ಕಿಸಲು ಯತ್ನಿಸಿದ್ದಾರೆ. ಆದರೆ, ಯಾರ ಸಂಪರ್ಕಕ್ಕೂ ಈವರೆಗೆ ಸಿಗದ ಪೈಲಟ್ ಪಿ. ಚಿದಂಬರಂ ಅವರ ಜೊತೆಗೆ ಮಾತನಾಡಿರುವುದು ಕುತೂಹಲಕ್ಕೆ ಕಾರಣವಾಗಿದೆ.

ಪಿ. ಚಿದಂಬರಂ ಕರೆ ಮಾಡಿ ಮಾತನಾಡಿರುವ ಬೆನ್ನಿಗೆ ಪ್ರಿಯಾಂಕಾ ಗಾಂಧಿ, ಅಭಿಷೇಕ್ ಮನು ಸಿಂಗ್ವಿ ಸಹ ಸಚಿನ್ ಪೈಲಟ್ ಅವರೊಂದಿಗೆ ಮಾತನಾಡಿದ್ದಾರೆ ಎನ್ನಲಾಗುತ್ತಿದೆ.

ಈ ನಡುವೆ ತಾನು ಯಾವುದೇ ಕಾರಣಕ್ಕೂ ಬಿಜೆಪಿ ಪಕ್ಷಕ್ಕೆ ಸೇರ್ಪಡೆಯಾಗುವುದಿಲ್ಲ ಎಂದು ಮತ್ತೆ ಸಚಿನ್ ಪೈಲಟ್ ಒತ್ತಿಹೇಳಿದ್ದಾರೆ. ಅಲ್ಲದೆ, ಸಚಿನ್ ಪೈಲಟ್ ರಾಹುಲ್ ಗಾಂಧಿ ಅವರ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದರು ಹೀಗಾಗಿ ಅವರನ್ನು ಪಕ್ಷದಿಂದ ಕಳುಹಿಸಲು ರಾಹುಲ್ ಗಾಂಧಿಗೂ ಇಷ್ಟವಿಲ್ಲ ಎನ್ನಲಾಗುತ್ತಿದೆ.

ಇದನ್ನೂ ಓದಿ : ವಸುಂಧರಾ ರಾಜೇ ಸ್ವತಃ ಮುಂದೆ ನಿಂತು ರಾಜಸ್ಥಾನದ ಕಾಂಗ್ರೆಸ್‌ ಸರ್ಕಾರವನ್ನು ಉಳಿಸಿದರೇ?; ಬಿಜೆಪಿ ಮಿತ್ರಪಕ್ಷಗಳ ಆರೋಪ

ಹಲವಾರು ಕಾಂಗ್ರೆಸ್ ನಾಯಕರು ಸಹ ಪೈಲಟ್ ಮತ್ತೆ ಕಾಂಗ್ರೆಸ್‌ ಪಕ್ಷದಲ್ಲಿ ಸಕ್ರೀಯರಾಗಬಹುದು ಎಂದು ಸಾರ್ವಜನಿಕವಾಗಿ ಕರೆ ನೀಡುತ್ತಿರುವುದನ್ನು ಗಮನಿಸಿದರೆ, ಸಚಿನ್ ಪೈಲಟ್ ಮನಸ್ಥಾಪ ಮರೆತು ಮತ್ತೆ ಕಾಂಗ್ರೆಸ್ ಭಾಗವಾದರೂ ಅಚ್ಚರಿ ಇಲ್ಲ ಎಂದು ವ್ಯಾಖ್ಯಾನಿಸಲಾಗುತ್ತಿದೆ.
Published by: MAshok Kumar
First published: July 17, 2020, 1:32 PM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories

corona virus btn
corona virus btn
Loading