ಡಿಜಿಟಲ್​ ರೂಪದಲ್ಲಿ ಮತದಾರರ ಗುರುತಿನ ಚೀಟಿ; ಮುಂದಿನ ವರ್ಷದೊಳಗೆ ಸೌಲಭ್ಯ

ಮತದಾರರ ಗುರುತಿನ ಚೀಟಿಯನ್ನು ಕೂಡ ಆಧಾರ್​ ಕಾರ್ಡ್​ನಂತೆ ಡಿಜಿಟಲ್​​ಗೆ ಬದಲಾಯಿಸುವ ಬಗ್ಗೆ ಚುನಾವಣಾ ಆಯೋಗ ಚಿಂತನೆ ನಡೆಸಿದೆ. ಈ ಬಗ್ಗೆ ಅಂತಿಮ ಆದೇಶ ಬಾಕಿ ಇದೆ. ಒಂದು ವೇಳೆ ಮತದಾರರ ಗುರುತಿನ ಚೀಟಿ ಡಿಜಿಟಲ್​ಗೆ ಬದಲಾದರೆ, ಗುರುತಿನ ಚೀಟಿಯನ್ನು ಸುಲಭವಾಗಿ ಡೌನ್​ಲೋಡ್​ ಮಾಡಿಕೊಂಡು ಡಿಜಿಟಲ್​ ಆವೃತ್ತಿ ಮೂಲಕವೇ ಮತ ಚಲಾಯಿಸಲು ಸಾಧ್ಯವಾಗಲಿದೆ. ಈ ಕುರಿತು ಚುನಾವಣಾ ಸಮಿತಿ ಯೋಜನೆ ಸಿದ್ಧತೆ ನಡೆಸಿದೆ.  ಈ ಬಗ್ಗೆ ಆಯೋಗ  ಅಂತಿಮ ಪರಿಶೀಲನೆ ನಡೆಸಲಿದ್ದು,  ಮತದಾರರಿಗೆ ಶೀಘ್ರದಲ್ಲಿಯೇ ಈ ಸೌಲಭ್ಯ ನೀಡಲಿದ್ದಾರೆ ಎಂಬ ಮಾಹಿತಿ ನ್ಯೂಸ್​ 18ಗೆ ಲಭ್ಯವಾಗಿದೆ.  ಮೂಲಗಳ ಪ್ರಕಾರ ಹೊಸದಾಗಿ ದಾಖಲಾದ ಮತದಾರರ ಗುರುತಿನ ಚೀಟಿಯನ್ನು ಸ್ವಯಂಚಾಲಿತವಾಗಿ ಪಡೆಯುವ ವ್ಯವಸ್ಥೆ ಮಾಡಲಾಗಿದೆ. ಈಗಾಗಲೇ ಗುರುತಿನ ಚೀಟಿ ಹೊಂದಿರುವ ಮತದಾರರು, ಮತದಾರರ ಸಹಾಯವಾಣಿ ಆ್ಯಪ್​ ಮೂಲಕ ಕೆಲವು ಕಾರ್ಯ  ಪೂರ್ಣಗೊಳಿಸಬೇಕಿದೆ.

ಈ ಕುರಿತು ಚುನಾವಣಾ ಆಯೋಗವು ತನ್ನ ಅಂತಿಮ ಅನುಮೋದನೆ ನೀಡಲು ಮತ್ತು ಅಂತಿಮ ಯೋಜನೆಯನ್ನು ಬಹಿರಂಗಪಡಿಸಲು ಸಿದ್ದವಾಗಿದೆ. ಈ ಮೂಲಕ ಮತದಾರರು ಡಿಜಿಟಲ್​ ಗುರುತಿನ ಕಾರ್ಡನ್ನು ಕೂಡ ಡೌನ್​ಲೋಡ್​ ಮಾಡಿಕೊಳ್ಳಬಹುದು. ಈ ಯೋಜನೆಯ ಉದ್ದೇಶ ಸುಲಭವಾಗಿ ಮತದಾರರಿಗೆ ಗುರುತಿನ ಚೀಟಿ ಒದಗಿಸುವುದಾಗಿದೆ.

ಮೊಬೈಲ್​ ನಂಬರ್​ ದಾಖಲಿಸುವ ಮೂಲಕ ಹೊಸ ಮತದಾರರು ಗುರುತಿನ ಚೀಟಿ ಡೌನ್​ಲೋಡ್​ ಮಾಡಿಕೊಳ್ಳಬಹುದು. ಅಧಿಕಾರಿಗಳಿಂದ ಅನುಮೋದನೆ ಪಡೆದ ನಂತರ ಮತದಾರರು ಡಿಜಿಟಲ್​ ರೂಪದಲ್ಲಿ ಗುರುತಿನ ಚೀಟಿ ಪಡೆಯಬಹುದು.

ಇದನ್ನು ಓದಿ: ತ್ರಿಕೋನಾಕೃತಿಯಲ್ಲಿ ನಿರ್ಮಾಣವಾಗುತ್ತಿರುವ ಹೊಸ ಸಂಸತ್​​ ಭವನದಲ್ಲಿರಲಿದೆ ಈ ವಿಶೇಷ ಸೌಲಭ್ಯಗಳು

ಈ ಗುರುತಿನ ಚೀಟಿಗೆ ಎರಡು ವಿಧವಾದ ಕ್ಯೂಆರ್​ ಕೋಡ್​ ಇರಲಿದೆ. ಒಂದು ಕ್ಯೂಆರ್​ ಕೋಡ್​ ಮತದಾರರ ಹೆಸರು, ವಿವರಗಳನ್ನು ಹೊಂದಿರಲಿದೆ. ಮತ್ತೊಂದು ಕೋಡ್​ನಲ್ಲಿ ಮತದಾರರ ಇತರೆ ಮಾಹಿತಿ ಇರಲಿದೆ. ಕ್ಯೂಆರ್​ ಕೋಡ್​ಗಳಲ್ಲಿ ಸಂಗ್ರಹಿಸಲಾದ ಮಾಹಿತಿ ಆಧಾರದ ಮೇಲೆ ಮತದಾನದ ಹಕ್ಕಗಳನ್ನು ಪಡೆಯಬಹುದು.

ಚುನಾವಣಾ ಆಯೋಗದ ಯೋಜನೆ ಜಾರಿಬಂದ ಬಳಿಕ ಈ ಸೇವೆಯನ್ನು ವಿದೇಶಿ ಭಾರತೀಯ ಪ್ರಜೆಗಳು ಕೂಡ ಪಡೆಯಬಹುದಾಗಿದೆ. ವಿದೇಶಿ ಭಾರತೀಯ ಪ್ರಜೆಗಳಿ ಪ್ರಸ್ತುತ ಚಾಲ್ತಿಯಲ್ಲಿರುವ ಮತದಾರರ ಗುರುತಿನ ಚೀಟಿಯನ್ನು ನೀಡಲಾಗಿಲ್ಲ. ಈ ಡಿಜಿಟಲ್​ ಸೌಲಭ್ಯ ವಿದೇಶಿ ಭಾರತೀಯ ಪ್ರಜೆಗಳಿಗೂ ದಾಖಲೆ ಒದಗಿಸಲು ಸಹಾಯವಾಗಲಿದೆ. ಅಲ್ಲದೇ ಗುರುತಿನ ಚೀಟಿ ಕಳೆದುಕೊಂಡು ಹೊಸ ಗುರುತಿನ ಚೀಟಿಗೆ ಅರ್ಜಿ ಸಲ್ಲಿಸಿರುವ ಮತದಾರರು ಕೂಡ ಹೊಸ ಸೇವೆಗೆ ಬಳಸಿಕೊಳ್ಳಲು ಅನುಮೋದನೆ ಪಡೆಯಬಹುದಾಗಿದೆ.
ಚುನಾವಣಾ ಸಮಿತಿ ಅಂತಿಮ ನಿರ್ಧಾರದ ಬಳಿಕ ಮತದಾರರು ಈ ಸೇವೆ ಪಡೆಯಬಹುದು. ಇನ್ನು ಮುಂದಿನ ವರ್ಷ ಐದು ರಾಜ್ಯಗಳಲ್ಲಿ ಚುನಾವಣೆ ನಡೆಯಲಿದ್ದು, ಅದಕ್ಕೂ ಮುನ್ನವೇ ಈ ಸೇವೆ ದೇಶಾದ್ಯಂತ ಮತದಾರರಿಗೆ ಲಭ್ಯವಾಗಲಿದೆ ಎಂದು ಮೂಲಗಳು ತಿಳಿಸಿವೆ(ವರದಿ: ನೀರಜ್​ ಕುಮಾರ್​)