ತುಂಬು ಗರ್ಭಿಣಿ ಪತ್ನಿಯನ್ನು ಜೋಳಿಗೆಯಲ್ಲಿ ಹೊತ್ತು ಆಸ್ಪತ್ರೆ ಸೇರಿಸಿದ ಗಂಡ; ವಿಡಿಯೋ ವೈರಲ್

ನವದೆಹಲಿ (ಜು. 9): ಛತ್ತೀಸ್​ಗಢದ ಕೊಂಡಗಾಂವ್​ನ ಮೋಹನ್​ಬೇದ ಎಂಬ ಗ್ರಾಮದಲ್ಲಿ ರಸ್ತೆಯ ವ್ಯವಸ್ಥೆಯಿಲ್ಲದೆ ತುಂಬು ಗರ್ಭಿಣಿಯನ್ನು ಜೋಳಿಗೆಯಲ್ಲಿ ಕೂರಿಸಿಕೊಂಡು, ಹೆಗಲ ಮೇಲೆ ಹೊತ್ತು ಹೋಗಿರುವ ವಿಡಿಯೋ ಈಗ ವೈರಲ್ ಆಗಿದೆ.

ಊರಿಗೆ ರಸ್ತೆ ಸೌಕರ್ಯ ಇಲ್ಲದ ಕಾರಣ ಮೋಹನ್​ಬೇದ ಗ್ರಾಮದವರೆಲ್ಲರೂ ನಡೆದುಕೊಂಡೇ ಪಟ್ಟಣಕ್ಕೆ ಸಾಗಬೇಕಾಗಿತ್ತು. ಅದೇ ಊರಿನಲ್ಲಿದ್ದ 9 ತಿಂಗಳ ಗರ್ಭಿಣಿಯನ್ನು ಹೆರಿಗೆಗಾಗಿ ಆಸ್ಪತ್ರೆಗೆ ಸೇರಿಸಬೇಕಾಗಿತ್ತು. ಆದರೆ, ಊರಿಗೆ ರಸ್ತೆಯಿಲ್ಲದ ಕಾರಣ ಆ್ಯಂಬುಲೆನ್ಸ್​, ಬೇರೆ ವಾಹನಗಳು ಬರಲು ಸಾಧ್ಯವಿರಲಿಲ್ಲ. ಹೀಗಾಗಿ, ಆ ಮಹಿಳೆಯ ಗಂಡ ಮತ್ತು ಸಂಬಂಧಿಕರು ದಪ್ಪವಾದ ಕೋಲಿಗೆ ಹಗ್ಗವನ್ನು, ತೊಟ್ಟಿಲಿನ ರೀತಿ ಮಾಡಿ, ಅದರಲ್ಲಿ ಗರ್ಭಿಣಿಯನ್ನು ಕೂರಿಸಿಕೊಂಡು ಹೆಗಲ ಮೇಲೆ ಹೊತ್ತು ಸಾಗಿದ್ದಾರೆ.

#WATCH Chhattisgarh: Health care workers in Kondagaon's Mohanbeda village yesterday carried a pregnant woman on a makeshift basket, to take her to hospital for delivery. Ambulance could not reach her village due to absence of road, so they carried her to hospital in the basket pic.twitter.com/di7poWoYhf

— ANI (@ANI) July 8, 2020

ಕಿಲೋಮೀಟರ್​ಗಟ್ಟಲೆ ದೂರವಿದ್ದ ಆಸ್ಪತ್ರೆಗೆ ಗರ್ಭಿಣಿಯನ್ನು ಹೊತ್ತು ಸಾಗಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಅದಾಗಲೇ ಹೆರಿಗೆನೋವಿನಿಂದ ನರಳುತ್ತಿದ್ದ ಮಹಿಳೆಯನ್ನು ಆಸ್ಪತ್ರೆಗೆ ಸೇರಿಸಿದ ಕೆಲವೇ ಹೊತ್ತಿನಲ್ಲಿ ಹೆರಿಗೆಯಾಯಿತು. ಸದ್ಯಕ್ಕೆ ತಾಯಿ-ಮಗುವಿಬ್ಬರೂ ಆರೋಗ್ಯವಾಗಿದ್ದಾರೆ.