ಸೆಂಚುರಿ ಬಾರಿಸಿರುವ ಈ ಅಜ್ಜಿ ನೀಡಿದ್ದಾಳೆ ಜೀವನಕ್ಕೆ 5 ಸಲಹೆಗಳು: ವಿಡಿಯೋ ವೈರಲ್

ಸೋಷಿಯಲ್ ಮೀಡಿಯಾದಲ್ಲಿ ಪ್ರತಿದಿನವೂ ಅನೇಕ ವಿಡಿಯೋಗಳು ವೈರಲ್ ಆಗುತ್ತಿರುತ್ತವೆ. ಕೆಲವುಗಳು ನಮಗೆ ಸಿಕ್ಕಾಪಟ್ಟೆ ಮನರಂಜನೆ ನೀಡಿದರೆ, ಇನ್ನೂ ಕೆಲವು ಜೀವನಪಾಠ ಹೇಳಿಕೊಡುತ್ತವೆ. ಅಂತಹದ್ದೇ ಮತ್ತೊಂದು ವಿಡಿಯೋ ಇದೀಗ ಭಾರಿ ಸದ್ದು ಮಾಡುತ್ತಿದೆ. ಸೆಂಚುರಿ ಬಾರಿಸಿದರೂ ಕೂಡ ಇನ್ನೂ ಗಟ್ಟಿಮುಟ್ಟಾಗಿರುವ ಈ ಅಜ್ಜಿ ನೀಡಿರುವ ಜೀವನಪಾಠಗಳು ಪ್ರತಿಯೊಬ್ಬರಿಗೂ ಅಗತ್ಯವಾಗಿವೆ.

100 ವರ್ಷ ತುಂಬಿರುವ ಲಿಯೊನೊರಾ ರೇಮಂಡ್ ಎಂಬ ಅಜ್ಜಿ ಪ್ರತಿಯೊಬ್ಬರೂ ತಮ್ಮ ಜೀವನದಲ್ಲಿ ಪಾಲಿಸಬೇಕಾದ 5 ಉಪಯುಕ್ತ ಸಲಹೆಗಳು ನೀಡಿದ್ದಾರೆ. ಹೀಗಾಗಿ ಸೋಷಿಯಲ್ ಮೀಡಿಯಾದಲ್ಲಿ ಲಕ್ಷಾಂತರ ಜನರ ಹೃದಯವನ್ನು ಗೆದ್ದಿದ್ದಾರೆ. ‘ಹ್ಯೂಮನ್ಸ್ ಆಫ್ ಬಾಂಬೆ’ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಪೋಸ್ಟ್ ಮಾಡಲಾಗಿರುವ ಈ ವಿಡಿಯೋದಲ್ಲಿ ಅಜ್ಜಿ ಟೋಪಿ ಹಾಗೂ ವರ್ಣರಂಜಿತ ಉಡುಪು ಧರಿಸಿದ್ದಾರೆ. ಪ್ರತಿಯೊಬ್ಬರೂ ತಮ್ಮ ಜೀವನದಲ್ಲಿ ಸಾಧ್ಯವಾದಷ್ಟು ಖುಷಿ ಖುಷಿಯಿಂದ ಇರಲು ಪ್ರಯತ್ನಿಸಿ. ನಾನು ನೀಡುವ ಈ 5 ಉಪಯುಕ್ತ ಸಲಹೆಗಳನ್ನು ಪಾಲಿಸಿ ಉತ್ತಮ ಜೀವನ ನಡೆಸಿರಿ ಎಂದು ಅವರು ಸಲಹೆ ನೀಡಿದ್ದಾರೆ.

ಹಾಗಾದ್ರೆ ಆ ಅಜ್ಜಿ ನೀಡಿರುವ 5 ಉಪಯುಕ್ತ ಸಲಹೆಗಳು ಯಾವುವು ಅಂತೀರಾ..?. ‘ನಿಮಗೆ ಅಗತ್ಯವೆನಿಸುವವರೆಗೂ ಒಬ್ಬಂಟಿಯಾಗಿರಿ’, ‘ನಿಮ್ಮ ಸ್ಮಾರ್ಟ್‌ಫೋನ್‌ಗಳನ್ನು ದೂರ ಎಸೆಯಿರಿ', ‘ಪ್ರತಿ ವರ್ಷವೂ ಒಂದು ತಿಂಗಳ ಸಂಬಳವನ್ನು ಉಳಿಸಿ’,' ‘ನಿಮ್ಮ ಜೀವನವನ್ನು ಯಾವಾಗಲೂ ಗಂಭೀರವಾಗಿ ತೆಗೆದುಕೊಳ್ಳಬೇಡಿ’ ಮತ್ತು ‘ಯಾರಾದರೂ ನಗುವಿಲ್ಲದವರನ್ನು ನೋಡಿದರೆ ಅವರಿಗೆ ನಿಮ್ಮ ನಗುವನ್ನು ನೀಡಿ’ ಎಂದು ಜೀವನಪಾಠ ಹೇಳಿದ್ದಾರೆ.

View this post on Instagram

A post shared by Humans of Bombay (@officialhumansofbombay)

ಸಾಮಾನ್ಯವಾಗಿ 60 ವರ್ಷಕ್ಕಿಂತ ಮೇಲ್ಪಟ್ಟ ಜನರು ‘ನೀರಸ’ ಜೀವನ ನಡೆಸಬಹುದು ಅಥವಾ ತಾವು ಇನ್ನು ಬದುಕಿರುವುದಕ್ಕೆ ಯಾವುದೇ ಉದ್ದೇಶವಿಲ್ಲವೆಂದು ಜನರು ನಂಬುತ್ತಾರೆ. ಕಾಲಕಾಲಕ್ಕೆ ಆ ವಯಸ್ಸಿನ ಜನರು ಇನ್ನೂ ಕೂಡ ಅತ್ಯುತ್ಸಾಹ ತುಂಬಿಕೊಂಡು ಜೀವನ ನಡೆಸುತ್ತಾರೆಂಬುದು ಈ ಅಜ್ಜಿಯ ಮೂಲಕ ಸಾಬೀತಾಗಿದೆ. ತಮ್ಮ ಮುಂದಿನ ಪೀಳಿಗೆಯ ಮಕ್ಕಳಿಗೆ ಅವರು ಉಪಯುಕ್ತ ಸಲಹೆ ನೀಡುತ್ತಾ ಜೀವನ ನಡೆಸುತ್ತಿರುತ್ತಾರೆ. ಇಂದಿನ ಪೀಳಿಗೆಯ ಜನರು ಸಣ್ಣ-ಸಣ್ಣದ್ದಕ್ಕೂ ಕೊರಗುತ್ತಾರೆಂಬುದನ್ನು ಮನಗಂಡಿರುವ ಹಿಂದಿನ ಜನರು ಆಗಾಗ ನಮಗೆ ಜೀವನಪಾಠ ಹೇಳುತ್ತಿರುತ್ತಾರೆ. ಅದೇ ರೀತಿ ಲಿಯೊನೊರಾ ರೇಮಂಡ್ ಕೂಡ ಅತ್ಯಂತ ಉತ್ಸಾಹದಿಂದ ಇಂದಿನ ಪೀಳಿಗೆಯ ಜನರಿಗೆ ಉಪಯುಕ್ತ ಸಲಹೆಗಳನ್ನು ನೀಡಿದ್ದು, ಪ್ರತಿಯೊಬ್ಬರಿಗೂ ಮಾದರಿಯಾಗಿದೆ.

ಈ ವಿಡಿಯೋ ಪೋಸ್ಟ್ ಮಾಡಿದ ಬಳಿಕ ಇದುವರೆಗೂ ಲಕ್ಷಾಂತರ ಜನರು ವೀಕ್ಷಿಸಿದ್ದು, ಇನ್ನೂ ಕೂಡ ವೈರಲ್ ಆಗುತ್ತಿದೆ. 100 ವರ್ಷ ತುಂಬಿದರೂ ಕೂಡ ಉತ್ಸಾಹ ಕಳೆದುಕೊಳ್ಳದ ಅಜ್ಜಿ ಅತ್ಯುತ್ಸಾಹದಿಂದ ಬದುಕುವಂತೆ ಸಲಹೆ ನೀಡಿರುವುದು ನೆಟಿಜನ್‌ಗಳ ಮನಸ್ಸು ಗೆದ್ದಿದೆ. ಅಜ್ಜಿ ಎಲ್ಲರಿಗೂ ನೀಡಿರುವ ಸ್ಫೂರ್ತಿ ಬಣ್ಣಿಸಲಾಗದು ಎಂದು ಕೆಲವರು ಹೇಳಿದರೆ, ‘ಇದು ದಿನದ ನನ್ನ ನೆಚ್ಚಿನ ವಿಡಿಯೋ’ವೆಂದು ಮತ್ತೊಬ್ಬರು ಹೇಳಿದ್ದಾರೆ. ‘ಇಂದಿನ ನನ್ನ ದಿನವನ್ನು ನಾನು ಇಷ್ಟಪಟ್ಟೆ, ಅದಕ್ಕೆ ಕಾರಣ ಈ ವಿಡಿಯೋ. ಅಜ್ಜಿಗೆ ಧನ್ಯವಾದಗಳು’ ಎಂದು ಇನ್ನೊಬ್ಬರು ಕಾಮೆಂಟ್ ಮಾಡಿದ್ದಾರೆ.
ಸದ್ಯ ಸೆಂಚುರಿ ಬಾರಿಸಿರುವ ಅಜ್ಜಿ ನೀಡಿರುವ 5 ಉಪಯುಕ್ತ ಸಲಹೆಗಳ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಸದ್ದು ಮಾಡುತ್ತಿದೆ.