Union Budget 2021: ಜನವರಿ ತಿಂಗಳಲ್ಲಿ 1.2 ಲಕ್ಷ ಕೋಟಿ ಜಿಎಸ್​ಟಿ ಆದಾಯ; ಬಜೆಟ್​ಗೂ ಮುನ್ನವೇ ದಾಖಲೆ ಬರೆದ ಕೇಂದ್ರ

ನವ ದೆಹಲಿ: ಸರಕು ಮತ್ತು ಸೇವಾ ತೆರಿಗೆ ಅಥವಾ ಜನವರಿಯಲ್ಲಿ ಸಂಗ್ರಹಿಸಿದ ಜಿಎಸ್‌ಟಿ ಆದಾಯವು 1.19 ಲಕ್ಷ ಕೋಟಿ ಎಂದು ಹಣಕಾಸು ಸಚಿವಾಲಯ ಭಾನುವಾರ ತಿಳಿಸಿದೆ. ದೇಶದ ವಾರ್ಷಿಕ ಬಜೆಟ್ ಅನ್ನು ಸರ್ಕಾರ ಅನಾವರಣ ಗೊಳಿಸುವ ಒಂದು ದಿನ ಮೊದಲು ದಾಖಲೆ ಪ್ರಮಾಣದ ಜಿಎಸ್​ಟಿ ಹಣವನ್ನು ಸಂಗ್ರಹಿಸಲಾಗಿದೆ ಎಂದು ಕೇಂದ್ರ ಸರ್ಕಾರದ ಹಣಕಾಸು ಸಚಿವಾಲಯ ತಿಳಿಸಿದೆ. ದೇಶದಲ್ಲಿ ಜಿಎಸ್​ಟಿ ತೆರಿಗೆ ಮಾದರಿಯನ್ನು ಪರಿಚಯಿಸಿದ ನಂತರ ಜನವರಿ 2021ರಲ್ಲಿ ಸಂಗ್ರಹಿಸಲಾಗಿರುವ ತೆರಿಗೆಯೇ ಅತ್ಯಧಿಕ ಎನ್ನಲಾಗುತ್ತಿದೆ. ಕಳೆದ ತಿಂಗಳ ಸಹ 1.15 ಲಕ್ಷ ಕೋಟಿಯನ್ನು ಸಂಗ್ರಹಿಸಲಾಗಿತ್ತು. ಆದರೆ, ಜನವರಿ ತಿಂಗಳ ಜಿಎಸ್​ಟಿ ಹಣ ಸಂಗ್ರಹಣೆ ಎಲ್ಲಾ ದಾಖಲೆಗಳನ್ನು ಮುರಿದಿದೆ. ಹೀಗಾಗಿ ಸಾಮಾನ್ಯವಾಗಿಯೇ ಈ ವರ್ಷ ಕೇಂದ್ರ ಬಜೆಟ್​ ಮೇಲೆ ಸಾಕಷ್ಟು ನಿರೀಕ್ಷೆಗಳು ಮನೆ ಮಾಡಿವೆ.

ಕೋವಿಡ್​ ಸಂಕಷ್ಟದ ಕಾಲದಲ್ಲಿ ಕಳೆದ ಒಂದು ವರ್ಷದಿಂದ ಜಿಎಸ್​ಟಿ ರೂಪದ ತೆರಿಗೆ ಸಂಗ್ರಹಣೆಯಲ್ಲಿ ಸಾಕಷ್ಟು ಹಿನ್ನಡೆಯಾಗಿತ್ತು. ಆದರೆ, ಇದೀಗ ಕಳೆದ ನಾಲ್ಕು ತಿಂಗಳಿನಿಂದ ಸತತ 1 ಲಕ್ಷ ಕೋಟಿಗೂ ಅಧಿಕ ಹಣವನ್ನು ಟಿಎಸ್​ಟಿ ರೂಪದಲ್ಲಿ ಸಂಗ್ರಹಿಸುತ್ತಿರುವುದು ಆಶಾದಾಯಕ ಬೆಳವಣಿಗೆ. ಇದು COVID-19 ಸಾಂಕ್ರಾಮಿಕ ರೋಗದ ನಂತರದ ತ್ವರಿತ ಆರ್ಥಿಕ ಚೇತರಿಕೆಯ ಸ್ಪಷ್ಟ ಸೂಚಕಗಳಾಗಿವೆ ಎಂದು ಹೇಳಲಾಗುತ್ತಿದೆ.

"ಜನವರಿ 2021 ರ ತಿಂಗಳಲ್ಲಿ 31.01.2021 ರಂದು ಸಂಜೆ 6 ಗಂಟೆಯವರೆಗೆ ಒಟ್ಟು ಜಿಎಸ್ಟಿ ಆದಾಯ 1,19,847 ಕೋಟಿ. ಇದರಲ್ಲಿ ಕೇಂದ್ರದ ಸಿಜಿಎಸ್​ಟಿ  21,923 ಕೋಟಿ, ರಾಜ್ಯದ ಪಾಲಿನ ಎಸ್​ಜಿಎಸ್​ಟಿ  29,014 ಕೋಟಿ ಇನ್ನೂ ಐಜಿಎಸ್​ಟಿ  60,288 ಕೋಟಿ ಎಂದು ಅಂದಾಜಿಸಲಾಗಿದೆ. ಇದಲ್ಲದೆ, ಸರಕುಗಳ ಆಮದಿನಿಂದಾಗಿ 27,424 ಕೋಟಿ ಹಣ ಸಂಗ್ರಹಿಸಲಾಗಿದೆ" ಎಂದು ಹಣಕಾಸು ಸಚಿವಾಲಯ ಹೇಳಿದೆ.

ಇದನ್ನೂ ಓದಿ: Union Budget 2021 – ಈ ಬಾರಿಯ ಬಜೆಟ್​ನಿಂದ ಜನಸಾಮಾನ್ಯನಿಗಿರುವ ಕೆಲ ನಿರೀಕ್ಷೆಗಳು

2021 ರ ಜನವರಿಯ ಆದಾಯವು ಕಳೆದ ತಿಂಗಳಿಗಿಂತ ಶೇ.8 ರಷ್ಟು ಹೆಚ್ಚಾಗಿದೆ. ಈ ತಿಂಗಳಲ್ಲಿ ಸರಕುಗಳ ಆಮದಿನಿಂದ ಬರುವ ಆದಾಯವು ಸಹ ಶೇ.16 ರಷ್ಟು ಹೆಚ್ಚಾಗಿದೆ ಮತ್ತು ದೇಶೀಯ ವಹಿವಾಟಿನ ಆದಾಯ (ಸೇವೆಗಳ ಆಮದು ಸೇರಿದಂತೆ) ಕಳೆದ ತಿಂಗಳು ಈ ಮೂಲಗಳಿಂದ ಬಂದ ಆದಾಯಕ್ಕಿಂತ ಶೇ.6 ರಷ್ಟು ಹೆಚ್ಚಾಗಿದೆ.

"ನಕಲಿ-ಬಿಲ್ಲಿಂಗ್ ವಿರುದ್ಧ ನಿಕಟ ಮೇಲ್ವಿಚಾರಣೆ, ಜಿಎಸ್​ಟಿ, ಆದಾಯ-ತೆರಿಗೆ ಮತ್ತು ಕಸ್ಟಮ್ಸ್ ಐಟಿ ವ್ಯವಸ್ಥೆಗಳು, ಪರಿಣಾಮಕಾರಿ ತೆರಿಗೆ ಆಡಳಿತ ಸೇರಿದಂತೆ ಅನೇಕ ಮೂಲಗಳಿಂದ ಬಳಸುವ ಆಳವಾದ ದತ್ತಾಂಶ ವಿಶ್ಲೇಷಣೆಗಳು ಕಳೆದ ಕೆಲವು ತಿಂಗಳುಗಳಲ್ಲಿ ತೆರಿಗೆ ಆದಾಯದಲ್ಲಿ ಸ್ಥಿರ ಹೆಚ್ಚಳಕ್ಕೆ ಕಾರಣವಾಗಿವೆ" ಎಂದು ಸರ್ಕಾರದ ಮೂಲಗಳು" ತಿಳಿಸಿವೆ.