RIL AGM 2020: 2ಜಿ ಮುಕ್ತ ಭಾರತಕ್ಕೆ ಜಿಯೋ-ಗೂಗಲ್ ಸಹಭಾಗಿತ್ವ ಸಹಕಾರಿ: ಮುಕೇಶ್​ ಅಂಬಾನಿ

ಮುಂಬೈ (ಜು.15): ವಿಶ್ವದ 6ನೇ ಅತಿ ಶ್ರೀಮಂತ ವ್ಯಕ್ತಿ ಎಂಬ ಖ್ಯಾತಿಗೆ ಪಾತ್ರರಾಗಿರುವ ರಿಲಯನ್ಸ್​ ಇಂಡಸ್ಟ್ರೀಸ್​ ಲಿಮಿಟೆಡ್​ನ ಮುಖ್ಯಸ್ಥ ಮುಖೇಶ್ ಅಂಬಾನಿ ಒಡೆತನದ ಜಿಯೋ ಪ್ಲಾಟ್​ಫಾರ್ಮ್​ನಲ್ಲಿ ಗೂಗಲ್ ಸಂಸ್ಥೆ 33,000 ಕೋಟಿ ರೂ. ಹೂಡಿಕೆ ಮಾಡುತ್ತಿದೆ. ಗೂಗಲ್ ಜೊತೆಗಿನ ಈ ಸಹಭಾಗಿತ್ವ 2ಜಿ ಮುಕ್ತ ಭಾರತ ಮಾಡಲು ಸಹಕಾರಿ ಎಂದು ಮುಕೇಶ್ ಅಂಬಾನಿ ಅಭಿಪ್ರಾಯಪಟ್ಟಿದ್ದಾರೆ.

ಇಂದು ನಡೆದ ಆರ್​ಐಎಲ್​ ವಾರ್ಷಿಕ ಸಭೆಯಲ್ಲಿ ಅಂಬಾನಿ ಈ ವಿಚಾರದ ಬಗ್ಗೆ ಮಾತನಾಡಿದ್ದಾರೆ. “ಈಗಿನ ಮಾರುಕಟ್ಟೆ ಬೆಲೆಯಲ್ಲೇ ನಾವು 4ಜಿ ಅಥವಾ 6ಜಿ ಸ್ಮಾರ್ಟ್​ಫೋನ್​ಗಳನ್ನು ಉತ್ಪಾದನೆ ಮಾಡುವ ಸಾಮರ್ಥ್ಯ ಹೊಂದಿದ್ದೇವೆ,” ಎಂದು ಅಂಬಾನಿ ಹೇಳಿದ್ದಾರೆ.

“ಕಡಿಮೆ ಬೆಲೆಯಲ್ಲಿ ಉತ್ತಮ ಸ್ಮಾರ್ಟ್​ಫೋನ್​ಗಳನ್ನು ನಿರ್ಮಾಣ ಮಾಡಬೇಕು ಎಂದಾದರೆ ನಮಗೆ ಅದೇ ಮೌಲ್ಯಯುತ ಸ್ಮಾರ್ಟ್​ಫೋನ್​ ಆಪರೇಟಿಂಗ್​ ಸಿಸ್ಟಮ್​ನ ಅಗತ್ಯವಿದೆ. ಗೂಗಲ್​ ಹಾಗೂ ಜಿಯೋ ಸಹಭಾಗಿತ್ವದಿಂದ ಭಾರತದಲ್ಲಿ ಈ ರೀತಿಯ ಆಪರೇಟಿಂಗ್​ ಸಿಸ್ಟಮ್​ಅನ್ನು ನಾವು ಡೆವಲಪ್​ ಮಾಡಬಹುದಾಗಿದೆ,” ಎಂದು ಅಂಬಾನಿ ಹೇಳಿದ್ದಾರೆ.

“ನಾವು ಈಗ 5ಜಿ ಅವಧಿಗೆ ಹತ್ತಿರವಾಗಿದ್ದೇವೆ. ಭಾರತದಲ್ಲಿ ಸುಮಾರು 35 ಕೋಟಿ ಜನರು 2ಜಿ ಮೊಬೈಲ್​ ಬಳಕೆ ಮಾಡುತ್ತಿದ್ದಾರೆ. ಅಂಥವರಿಗೆ ನಾವು ಕಡಿಮೆ ಬೆಲೆಯಲ್ಲಿ ಸ್ಮಾರ್ಟ್​ಫೋನ್​ ಸಿದ್ಧಪಡಿಸಿ ನೀಡಬೇಕಿದೆ. ಈ ಮೂಲಕ 2ಜಿ ಮುಕ್ತ ಭಾರತವನ್ನು ಮಾಡಬೇಕಿದೆ,” ಎಂದರು ಅಂಬಾನಿ.

“ಜಿಯೋ 30 ಕೋಟಿಗೂ ಅಧಿಕ ಭಾರತೀಯರಿಗೆ ಕಡಿಮೆ ಬೆಲೆಯಲ್ಲಿ ಸ್ಮಾರ್ಟ್​ಫೋನ್​ ನೀಡಲು ಬದ್ಧವಾಗಿದೆ. ಜಿಯೋ 4ಜಿ ಮೊಬೈಲ್​ ಅತಿ ಕಡಿಮೆ ಸಿಗುತ್ತಿರುವ ಸ್ಮಾರ್ಟ್​ಫೋನ್​ ಇದಾಗಿದೆ,”  ಎಂದು ಸಂತಸ ಹೊರಹಾಕಿದರು.