Tamil Nadu: ತಮಿಳುನಾಡಿನಿಂದ ನಾಪತ್ತೆಯಾದ ನಟರಾಜನ ಮೂರ್ತಿ ನ್ಯೂಯಾರ್ಕ್​​ನಲ್ಲಿ ಪತ್ತೆ!

ಚೆನ್ನೈ(ಸೆ.06): ತಮಿಳುನಾಡಿನ (Tamil Nadu) ತಂಜಾವೂರು ಜಿಲ್ಲೆಯ ಅರುಲ್ಮಿಗು ವೇದಪುರೀಶ್ವರ ದೇವಸ್ಥಾನದಿಂದ 62 ವರ್ಷಗಳ ಹಿಂದೆ ಕಳವಾಗಿದ್ದ ನಟರಾಜನ ವಿಗ್ರಹ (Statue of Nataraja) ಅಮೆರಿಕದ ನ್ಯೂಯಾರ್ಕ್‌ನಲ್ಲಿ (New York) ಪತ್ತೆಯಾಗಿದೆ. ತಮಿಳುನಾಡು ಪೊಲೀಸರ ಅಪರಾಧ ತನಿಖಾ ದಳದ (ಸಿಐಡಿ) ವಿಗ್ರಹ ಕೋಶ ಸೋಮವಾರ ಈ ಮಾಹಿತಿ ನೀಡಿದೆ. ಹಿಂದೂ ಧಾರ್ಮಿಕ ಮತ್ತು ದತ್ತಿ ಇಲಾಖೆಯ ಆಡಳಿತದಲ್ಲಿರುವ ಸುಮಾರು 2,000 ವರ್ಷಗಳಷ್ಟು ಹಳೆಯದಾದ ಅರುಲ್ಮಿಗು ವೇದಪುರೀಶ್ವರ ದೇವಸ್ಥಾನಕ್ಕೆ ಯಾರೋ ಕಳ್ಳರು ನುಗ್ಗಿ ವಿಗ್ರಹವನ್ನು ಕದ್ದೊಯ್ದಿದ್ದಾರೆ. ಸೆಪ್ಟೆಂಬರ್ 1 ರಂದು ತಿರುವೇಧಿಕುಡಿ ಗ್ರಾಮದ ಎಸ್ ವೆಂಕಟಾಚಲಂ ಎಂಬವರು ನೀಡಿದ ದೂರಿನ ಮೇರೆಗೆ ಸಿಐಡಿ ವಿಗ್ರಹ ದಳ ತನಿಖೆ ನಡೆಸಿದಾಗ ದೇವಸ್ಥಾನದಲ್ಲಿರುವ ನಟರಾಜ ವಿಗ್ರಹ ನಕಲಿ ಮತ್ತು ಮೂಲ ವಿಗ್ರಹ ನಾಪತ್ತೆಯಾಗಿದೆ ಎಂದು ತಿಳಿದುಬಂದಿದೆ.

ತನಿಖಾ ತಂಡವು ಪುದುಚೇರಿಯ ಇಂಡೋ-ಫ್ರೆಂಚ್ ಸಂಸ್ಥೆಯಿಂದ ವಿಗ್ರಹದ ಮೂಲ ಛಾಯಾಚಿತ್ರಗಳನ್ನು ಕೇಳಿದೆ. ವಿಗ್ರಹದ ಮೂಲ ಛಾಯಾಚಿತ್ರಗಳನ್ನು ಪಡೆದ ನಂತರ, CID ಯ ಐಡಲ್ ಸೆಲ್ ವಿವಿಧ ವಸ್ತುಸಂಗ್ರಹಾಲಯಗಳು, ಕಲಾಕೃತಿ ಸಂಗ್ರಾಹಕರ ಕರಪತ್ರಗಳು ಮತ್ತು ಹರಾಜು ಮನೆಗಳ ವೆಬ್‌ಸೈಟ್‌ಗಳನ್ನು ಹುಡುಕಲು ಪ್ರಾರಂಭಿಸಿತು.

ಇದನ್ನೂ ಓದಿ:  ಶ್ರೀರಾಮಾನುಜಾಚಾರ್ಯರ 216 ಅಡಿ ಎತ್ತರದ ಪ್ರತಿಮೆ ಲೋಕಾರ್ಪಣೆ

ತೀವ್ರ ಹುಡುಕಾಟದ ಬಳಿಕ, ತಂಡವು ನ್ಯೂಯಾರ್ಕ್‌ನ ಏಷ್ಯಾ ಸೊಸೈಟಿ ಮ್ಯೂಸಿಯಂನಲ್ಲಿ ಭಗವಾನ್ ನಟರಾಜನ ಮೂಲ ವಿಗ್ರಹವನ್ನು ಕಂಡುಕೊಂಡಿದೆ. ಸಿಐಡಿಯ ಐಡಲ್ ಸೆಲ್ ಬಿಡುಗಡೆ ಮಾಡಿದ ಅಧಿಕೃತ ಪ್ರಕಟಣೆಯ ಪ್ರಕಾರ, ಯುನೆಸ್ಕೋ ಒಪ್ಪಂದದ ಅಡಿಯಲ್ಲಿ ವಿಗ್ರಹವನ್ನು ಮರಳಿ ತರಲು ಪ್ರಯತ್ನಿಸಲಾಗುತ್ತಿದೆ. ಇಲ್ಲಿಗೆ ತಂದ ನಂತರ ಮೂರ್ತಿಯನ್ನು ದೇವಸ್ಥಾನದಲ್ಲಿ ಪ್ರತಿಷ್ಠಾಪಿಸಲಾಗುತ್ತದೆ ಎಂದಿದ್ದಾರೆ. ದೇಗುಲದಿಂದ ಬೇರೆಲ್ಲಿಯಾದರೂ ವಿಗ್ರಹಗಳು ಕಳ್ಳತನವಾಗಿವೆಯೇ ಎಂಬ ಬಗ್ಗೆಯೂ ಪರಿಶೀಲನೆ ನಡೆಸಲಾಗುತ್ತಿದೆ.

2 ಸಾವಿರ ವರ್ಷ ಹಳೆಯ ದೇವಸ್ಥಾನ

ತಿರುವೇಧಿಕುಡಿ ಕಂಡಿಯೂರ್ ದೇವಾಲಯವು 2,000 ವರ್ಷಗಳಷ್ಟು ಹಳೆಯದಾಗಿದೆ ಮತ್ತು ಇದು ಹಿಂದೂ ಧಾರ್ಮಿಕ ಮತ್ತು ದತ್ತಿ ದತ್ತಿ (HR&CE) ಇಲಾಖೆಯ ಅಡಿಯಲ್ಲಿದೆ. ಪಿರ್ಯಾದಿದಾರರು ಇದು ಪ್ರಸಿದ್ಧ ದೇವಾಲಯವಾಗಿದ್ದು, ಇಲ್ಲಿ ಮಹಾವಿದ್ವಾಂಸರಾದ ತಿರುನಾವ್ಕರಸರ್, ತಿರುಗಂಸಂಬದನಾರ್ ಮುಂತಾದವರು ದೇವಾಲಯಕ್ಕೆ ಆಗಮಿಸಿ ಪೀಠಾಧಿಪತಿಗಳ ಮಹಿಮೆಯನ್ನು ಹಾಡುತ್ತಿದ್ದರು ಎಂದಿದ್ದಾರೆ.

ಇದನ್ನೂ ಓದಿ: ಅತಿ ಎತ್ತರದ ಶಿವನ ಪ್ರತಿಮೆಗಳು ಇವು; ಎಲ್ಲಿವೆ ಗೊತ್ತಾ?

ಇನ್ನು ದೂರುದಾರರಾದ ಎಸ್. ವೆಂಕಟಾಚಲಂ ಅವರ ತಂದೆ ಸಮ್ಮಂತಮ್ ಚೆದುರಾಯರ್ ಅವರು ಸ್ಟ್ರೋಕ್‌ನಿಂದ ಸಾವನ್ನಪ್ಪಿದ್ದಾರೆ, ಏಕೆಂದರೆ ದೇವಾಲಯದಿಂದ ವಿಗ್ರಹವನ್ನು ಕಳವು ಮಾಡಿದ ನಂತರ ಅವರು ಪೊಲೀಸ್ ಠಾಣೆಗೆ ದೂರು ನೀಡಿದ್ದರು, ಆದರೆ ಈ ಬಗ್ಗೆ ತನಿಖೆ ನಡೆಸಲು ಇಲಾಖೆ ಸಿದ್ಧವಿರಲಿಲ್ಲ ಎನ್ನಲಾಗಿದೆ.

27 ವರ್ಷಗಳಲ್ಲಿ 5000ಕ್ಕೂ ಅಧಿಕ ಕಾರು ಕಳ್ಳತನ

ದೇಶದ ವಿವಿಧ ಭಾಗಗಳಲ್ಲಿ 5,000ಕ್ಕೂ ಅಧಿಕ ಕಾರುಗಳನ್ನು ಕದ್ದು ಮಾರಾಟ ಮಾಡುತ್ತಿದ್ದ ಆರೋಪಿ ಅನಿಲ್ ಚೌಹಾಣ್ ಎಂಬಾತನನ್ನು ದೆಹಲಿ ಪೊಲೀಸರು ಸೋಮವಾರ (ಸೆ.05) ಬಂಧಿಸಿದ್ದು, ಈತ ದೇಶದಲ್ಲಿ ಅತೀ ಹೆಚ್ಚು ಕಾರು ಕಳ್ಳತನ ಮಾಡಿರುವ ವ್ಯಕ್ತಿಯಾಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಾರು ಕಳ್ಳತನದಿಂದ ಈತ ದೆಹಲಿ, ಮುಂಬೈ ಮತ್ತು ಈಶಾನ್ಯ ರಾಜ್ಯಗಳಲ್ಲಿ ಭಾರೀ ಆಸ್ತಿಯನ್ನು ಹೊಂದಿದ್ದು, 52 ವರ್ಷದ ಅನಿಲ್ ಐಶಾರಾಮಿ ಜೀವನ ನಡೆಸುತ್ತಿದ್ದ. ಈತ ದೇಶದಲ್ಲಿಯೇ ಅತೀ ಹೆಚ್ಚು ಕಾರು ಕಳ್ಳತನ ಮಾಡಿರುವ ಆರೋಪಿಯಾಗಿದ್ದಾನೆ.

ಪೊಲೀಸರ ಮಾಹಿತಿ ಮೇರೆಗೆ, ಅನಿಲ್ ಇತ್ತೀಚೆಗೆ ಶಸ್ತ್ರಾಸ್ತ್ರಗಳ ಕಳ್ಳಸಾಗಣೆಯಲ್ಲಿ ತೊಡಗಿದ್ದ. ಈತ ಉತ್ತರಪ್ರದೇಶಕ್ಕೆ ಶಸ್ತ್ರಾಸ್ತ್ರ ಸರಬರಾಜು ಮಾಡುತ್ತಿದ್ದ. ಅನಿಲ್ ಈಶಾನ್ಯ ರಾಜ್ಯಗಳಲ್ಲಿ ನಿಷೇಧಿತ ಬಂಡುಕೋರ ಸಂಘಟನೆಗಳಿಗೆ ಶಸ್ತ್ರಾಸ್ತ್ರ ಸರಬರಾಜು ಮಾಡುತ್ತಿದ್ದ ಎಂದು ತಿಳಿದು ಬಂದಿದೆ.