Suryakumar Yadav: ನಾಯಕ ರೋಹಿತ್​ಗಾಗಿ ತನ್ನ ವಿಕೆಟ್​​ಅನ್ನೇ ತ್ಯಾಗ ಮಾಡಿದ ಸೂರ್ಯಕುಮಾರ್ ಯಾದವ್

ದೇಶೀಯ ಕ್ರಿಕೆಟ್​ ಹಾಗೂ ಐಪಿಎಲ್​ನಲ್ಲಿ ಉತ್ತಮ ಪ್ರದರ್ಶನ ನೀಡಿರುವ ಸೂರ್ಯಕುಮಾರ್​ ಯಾದವ್​ ಟೀಂ ಇಂಡಿಯಾಗೆ ಆಯ್ಕೆಯಾಗಿರಲಿಲ್ಲ. ಇದು ಭಾರೀ ಚರ್ಚೆಗೆ ಕಾರಣವಾಗಿತ್ತು. ಅಷ್ಟೇ ಅಲ್ಲ, ರಾಯಲ್​ ಚಾಲೆಂಜರ್ಸ್​ ವಿರುದ್ಧದ ಪಂದ್ಯದಲ್ಲಿ ನಾಯಕ ವಿರಾಟ್​ ಕೊಹ್ಲಿ ಅವರನ್ನು ದಿಟ್ಟಿಸಿ ನೋಡಿ ಸಾಕಷ್ಟು ಸುದ್ದಿ ಆಗಿದ್ದರು. ಆದರೆ, ಈಗ ಅವರು ನಾಯಕ ರೋಹಿತ್​ ಶರ್ಮ ಅವರಿಗಾಗಿ ಮಾಡಿದ ತ್ಯಾಗದ ವಿಚಾರ ಸಾಕಷ್ಟು ಮೆಚ್ಚುಗೆ ಪಡೆದುಕೊಳ್ಳುತ್ತಿದೆ.

ಡೆಲ್ಲಿ ನೀಡಿದ್ದ 157 ರನ್​ಗಳ ಸಾಧಾರಣ ಟಾರ್ಗೆಟ್ ಬೆನ್ನಟ್ಟಿದ ಮುಂಬೈ ಸ್ಫೋಟಕ ಆರಂಭ ಪಡೆದುಕೊಳ್ಳುವ ಜೊತೆ ಒಂದು ವಿಕೆಟ್ ಕಳೆದುಕೊಂಡಿತು. ಓಪನರ್​ಗಳಾದ ಕ್ವಿಂಟನ್ ಡಿಕಾಕ್ ಹಾಗೂ ನಾಯಕ ರೋಹಿತ್ ಶರ್ಮಾ ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಮೊದಲ 4 ಓವರ್​ನಲ್ಲೇ 45 ರನ್ ಚಚ್ಚಿದರು. ಆದರೆ, 5ನೇ ಓವರ್​ನಲ್ಲಿ ಕೀಪರ್​ಗೆ ಕ್ಯಾಚಿತ್ತು ಡಿಕಾಕ್(20) ಔಟ್ ಆದರು.



ಈ ವೇಳೆ ಬ್ಯಾಟಿಂಗ್​ಗೆ ಬಂದಿದ್ದು ಸೂರ್ಯಕುಮಾರ್. ಇಬ್ಬರೂ ಉತ್ತಮವಾಗಿಯೇ ಆಡುತ್ತಿದ್ದರು. ಈ ವೇಳೆ ರೋಹಿತ್​ ನೇರವಾಗಿ ಬೀಸಿದ ಬ್ಯಾಟ್​ ಫೀಲ್ಡರ್​ ಕೈ ಸೇರಿತ್ತು. ಇದನ್ನು ಗಮನಿಸದ ಅವರು ರನ್​ ಕದಿಯಲು ಯತ್ನಿಸಿದ್ದರು. ಆದರೆ, ಸೂರ್ಯ ಕುಮಾರ್​ ಓಡಿಯೇ ಇರಲಿಲ್ಲ. ಇಬ್ಬರೂ ಒಂದೇ ದಿಕ್ಕಿನಲ್ಲಿ ನಿಂತು ಬಿಟ್ಟಿದ್ದರು. ಈ ವೇಳೆ ನಾಯಕನ ರಕ್ಷಣೆಗೆ ಮುಂದಾದ ಸೂರ್ಯಕುಮಾರ್​,  ರೋಹಿತ್​ಗೆ ಸ್ಕ್ರೀಜ್​ ಬಿಟ್ಟುಕೊಟ್ಟರು. ಈ ಮೂಲಕ ತಾವು ಔಟ್​ ಆದರು.