ಯೆಸ್​ ಬ್ಯಾಂಕ್​ನಲ್ಲಿ 7,250 ಕೋಟಿ ರೂಪಾಯಿ ಹೂಡಿಕೆ ಮಾಡಲಿರುವ ಎಸ್​ಬಿಐ

ನವದೆಹಲಿ: ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿರುವ ಯೆಸ್​ ಬ್ಯಾಂಕ್​ನ ತಲಾ ಷೇರಿಗೆ 10 ರೂಪಾಯಿಯಂತೆ ಒಟ್ಟು 725 ಕೋಟಿ ಷೇರುಗಳನ್ನು ಖರೀದಿಸಲು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್​ಬಿಐ) ಎಕ್ಸಿಕ್ಯುಟಿವ್ ಕಮಿಟಿ ಆಫ್ ಸೆಂಟ್ರಲ್ ಬೊರ್ಡ್ (ಇಸಿಸಿಬಿ) ಗುರುವಾರ ಅನುಮತಿ ನೀಡಿದೆ.

ಪ್ರತಿ ಷೇರಿಗೆ 10 ರೂಪಾಯಿಯಂತೆ ಒಟ್ಟು 725 ಕೋಟಿ ಷೇರುಗಳನ್ನು ಖರೀದಿಸುವ ಮೂಲಕ ಒಟ್ಟು 7,250 ಕೋಟಿ ರೂಪಾಯಿಯನ್ನು ಯೆಸ್​ ಬ್ಯಾಂಕ್ ಮೇಲೆ ಹೂಡಿಕೆ ಮಾಡಲಿದೆ.

ಯೆಸ್​ ಬ್ಯಾಂಕ್ ಪುನಶ್ಚೇತನಗೊಂಡ ಬಳಿಕ ಎಸ್​ಬಿಐ ಶೇ.49 ಪಾಲುದಾರಿಕೆ ಮಿತಿಯನ್ನು ಹೊಂದಿರಲಿದೆ ಎಂದು ಎಸ್​ಬಿಐ ಸ್ಟಾಕ್​ ಎಕ್ಸ್​ಚೆಂಜ್​ಗೆ ತಿಳಿಸಿದೆ. ಷೇರು ಖರೀದಿಯು ಇನ್ನೂ ನಿಯಂತ್ರಕ ಅನುಮೋದನೆಗೆ ಒಳಪಟ್ಟಿರುತ್ತದೆ.

ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ ಯೆಸ್​ ಬ್ಯಾಂಕ್ ಪುನಶ್ಚೇತನಕ್ಕೆ ಆರ್​ಬಿಐ ಹೊಸ ನೀತಿಯ ಕರಡನ್ನು ಜಾರಿಗೆ ತಂದ ಬಳಿಕ ಯೆಸ್​ ಬ್ಯಾಂಕ್ ಪ್ರತಿ ಷೇರು 10 ರೂಪಾಯಿಯಂತೆ 2450 ಕೋಟಿ ವೆಚ್ಚದಲ್ಲಿ ಒಟ್ಟು 245 ಕೋಟಿ ಷೇರುಗಳನ್ನು ಎಸ್​ಬಿಐ ಖರೀದಿ ಮಾಡಿತ್ತು. ಇದೀಗ ಮತ್ತೆ ಹೆಚ್ಚುವರಿಯಾಗಿ ಯೆಸ್ ಬ್ಯಾಂಕ್​ ಷೇರುಗಳನ್ನು ಖರೀದಿ ಮಾಡಲು ಅನುಮೋದನೆ ನೀಡಲಾಗಿದೆ.

ಇದನ್ನು ಓದಿ: ಯೆಸ್ ಬ್ಯಾಂಕ್​ ಪುನಶ್ಚೇತನಕ್ಕೆ ಕ್ರಮ; ಎಸ್​ಬಿಐನಿಂದ ಶೇ. 49ರಷ್ಟು ಹೂಡಿಕೆ

ಕೆಟ್ಟ ಸಾಲಗಳಿಂದಾಗಿ ವಿಪರೀತ ಆರ್ಥಿಕ ನಷ್ಟದಲ್ಲಿರುವ ಯೆಸ್ ಬ್ಯಾಂಕನ್ನು ಮಾರ್ಚ್ 5ರಂದು ಆರ್​ಬಿಐ ಸೂಪರ್ ಸೀಡ್ ಮಾಡಿತು. ಯೆಸ್ ಬ್ಯಾಂಕ್​ನ ಗ್ರಾಹಕರು 50 ಸಾವಿರಕ್ಕಿಂತ ಹೆಚ್ಚು ಹಣವನ್ನು ವಿತ್​ಡ್ರಾ ಮಾಡಿಕೊಳ್ಳಬಾರದು ಎಂದು ನಿರ್ಬಂಧ ಹೇರಿತ್ತು.