ತಾಲಿಬಾನ್​ ಪ್ರಮುಖ ನಾಯಕ ಶೇರ್​ ಮೊಹಮ್ಮದ್​ಗೆ ಭಾರತದ ನಂಟು; ನೆನಪು ಹಂಚಿಕೊಂಡ ಮಿಲಿಟರಿ ಸ್ನೇಹಿತರು

ಶೇರ್ ಮೊಹಮ್ಮದ್ ಅಬ್ಬಾಸ್ ಸ್ಟಾನಿಕ್‌ಜಾಯ್, ಈಗ ತಾಲಿಬಾನ್‌ನಲ್ಲಿ ಮುಂಚೂಣಿಯಲ್ಲಿ ಕಂಡುಬರುತ್ತಿರುವ  ಅಗ್ರ ಏಳು ನಾಯಕರಲ್ಲಿ ಒಬ್ಬರಾಗಿದ್ದು, 1982 ರಲ್ಲಿ ಡೆಹ್ರಾಡೂನ್‌ನಲ್ಲಿ ಇರುವ ಭಾರತೀಯ ಮಿಲಿಟರಿ ಅಕಾಡೆಮಿಯ (ಐಎಂಎ)ಲ್ಲಿ ತರಬೇತಿ ಪಡೆದಿದ್ದರು ಮತ್ತು ಅವರ ಬ್ಯಾಚ್‌ಮೇಟ್‌ಗಳು ಇವರನ್ನು 'ಶೇರು' ಎನ್ನುವ ಅಡ್ಡಹೆಸರಿನಿಂದ ಕರೆಯುತ್ತಿದ್ದರು ಎಂದು ಹೇಳಲಾಗಿದೆ.

ಟೈಮ್ಸ್ ಆಫ್ ಇಂಡಿಯಾದ ವರದಿಯ ಪ್ರಕಾರ, ಸ್ಟಾನಿಕ್‌ಜಾಯ್ "ಕಟ್ಟುಮಸ್ತಾದ ಹಾಗೂ ಅಷ್ಟೇನೂ ತುಂಬಾ ಎತ್ತರವಿಲ್ಲದ ಮನುಷ್ಯ ಮತ್ತು ಎಂದಿಗೂ ಧಾರ್ಮಿಕವಾಗಿ ಒಲವು ಹೊಂದಿರಲಿಲ್ಲ". ಅವರು ಐಎಂಎ ಅಕಾಡೆಮಿಯಲ್ಲಿ ಭಗತ್ ಬೆಟಾಲಿಯನ್ ಕೆರೆನ್ ಕಂಪನಿಯ 45 ವಿದೇಶಿ ಸಂಭಾವಿತ ಕೆಡೆಟ್‌ ಆಗಿ ಸೇರಿಕೊಂಡಿದ್ದರು, ಆಗ ಅವರಿಗೆ 20 ವರ್ಷ ಮಾತ್ರ ವಯಸ್ಸಾಗಿತ್ತು.

"ಅವರು ಅಕಾಡೆಮಿಯಲ್ಲಿರುವ ಇತರ ಕೆಡೆಟ್‌ಗಳಿಗಿಂತ ಸ್ವಲ್ಪ ವಯಸ್ಸಾದವರಂತೆ ಕಾಣುತ್ತಿದ್ದರು, ಆದರೆ ವಯಸ್ಸು ಮಾತ್ರ ಚಿಕ್ಕದಾಗಿತ್ತು. ಒಳ್ಳೆಯ ವ್ಯಕ್ತಿಯಾಗಿದ್ದ ಅವರು ಎಲ್ಲರನ್ನು ಸೆಳೆಯುವಂತಹ ಗಮನಾರ್ಹವಾದ ಮೀಸೆ ಬಿಟ್ಟಿದ್ದರು. ಆ ಸಮಯದಲ್ಲಿ ಅವರು ಖಂಡಿತವಾಗಿಯೂ ಯಾವುದೇ ಮೂಲಭೂತ ದೃಷ್ಟಿಕೋನಗಳನ್ನು ಅಂದರೆ ಧಾರ್ಮಿಕವಾದ ದೃಷ್ಟಿಕೋನ ಹೊಂದಿರಲಿಲ್ಲ. ಸರಾಸರಿ ಅಫ್ಘಾನ್ ಕೆಡೆಟ್ ಆಗಿದ್ದರು, ಅವರು ಇಲ್ಲಿ ಇದ್ದಷ್ಟು ದಿನ ತಮ್ಮ ಸಮಯವನ್ನು ಆನಂದಿಸುತ್ತಿದ್ದರು ”ಎಂದು ಅವರ ಬ್ಯಾಚ್‌ಮೇಟ್ ಮೇಜರ್ ಜನರಲ್ ಡಿಎ ಚತುರ್ವೇದಿ (ನಿವೃತ್ತ) ಉಲ್ಲೇಖಿಸಿದ್ದಾರೆ.

ಅವರ ಇನ್ನೊಬ್ಬ ಬ್ಯಾಚ್‌ಮೇಟ್, ಕರ್ನಲ್ (ನಿವೃತ್ತ) ಕೇಸರ್ ಸಿಂಗ್ ಶೇಖಾವತ್, ತಮ್ಮ ವಾರಾಂತ್ಯದ ದಿನಗಳಲ್ಲಿ ನಡೆಸುತ್ತಿದ್ದ ಟ್ರಕ್ಕಿಂಗ್​ ಮತ್ತು ನದಿ ತೀರದ ಪ್ರವಾಸಗಳನ್ನು ನೆನಪಿಸಿಕೊಂಡರು.

"ಅವನು ನಮ್ಮ ಪಕ್ಕದ ಮನೆಯವನಂತೆ ಇದ್ದನು. ನನಗೆ ಇನ್ನೂ ನೆನಪಿದೆ ಒಮ್ಮೆ ನಾವು ಹೃಷಿಕೇಶಕ್ಕೆ ಹೋಗಿ ಗಂಗಾ ನದಿಯಲ್ಲಿ ಸ್ನಾನ ಮಾಡಿದ್ದೆವು. ನಾವು ರಿಷಿಕೇಶದಲ್ಲಿ ನದಿಗೆ ಹೋಗಿ ಗಂಗಾ ಸ್ನಾನ ಮಾಡಿದ ದಿನದ ಸ್ವಿಮ್ಮಿಂಗ್​ ಸೂಟ್​ ಧರಿಸಿರುವ ಅವರ ಛಾಯಾಚಿತ್ರವಿದೆ "ಎಂದು ಕರ್ನಲ್ ಶೇಖಾವತ್ ಹೇಳಿದರು.

1996 ರ ಹೊತ್ತಿಗೆ, ಸ್ಟಾನಿಕ್‌ಜಾಯ್ ಸೈನ್ಯವನ್ನು ತೊರೆದು ತಾಲಿಬಾನ್‌ ಪಡೆ ಸೇರಿದರು. ತಾಲಿಬಾನ್‌ಗೆ ರಾಜತಾಂತ್ರಿಕ ಮಾನ್ಯತೆ ನೀಡುವಂತೆ ಕ್ಲಿಂಟನ್ ಆಡಳಿತವನ್ನು ಮನವೊಲಿಸಲು ಅವರು ನಂತರ ವಾಷಿಂಗ್ಟನ್‌ಗೆ ಹೋದರು ಆದರೆ ಪ್ರಯತ್ನ ಯಶಸ್ವಿಯಾಗಿರಲಿಲ್ಲ.

ಇದನ್ನೂ ಓದಿ: ಯುಪಿಯಲ್ಲಿ ಏರುತ್ತಿದೆ ಚುನಾವಣಾ ಕಾವು; ಬ್ರಾಹ್ಮಣ ಮುಖಗಳಿಗೆ ಮಣೆ ಹಾಕಲು ಹೊರಟ ಬಿಜೆಪಿ

ಇವರನ್ನು ಅಫ್ಘಾನ್ ಸರ್ಕಾರಿ ಅಧಿಕಾರಿಗಳೊಂದಿಗೆ ಮಾತುಕತೆಯಲ್ಲಿ ತಾಲಿಬಾನ್‌ನ ಸಂಧಾನ ತಂಡದ ಮುಖ್ಯಸ್ಥ ಅಬ್ದುಲ್ ಹಕೀಮ್ ಹಕ್ಕಾನಿಗೆ ಉಪ ಸಮಾಲೋಚಕರಾಗಿಯೂ ಕಾರ್ಯನಿರ್ವಹಿಸಿದ್ದಾರೆ. ಇಂಗ್ಲಿಷ್ ಮತ್ತು ಮಿಲಿಟರಿ ತರಬೇತಿ ವಿಭಾಗದ ಹೊಣೆಯು ಇವರ ಮೇಲಿತ್ತು, ಕಾಲಾನಂತರದಲ್ಲಿ ಅವರು ತಾಲಿಬಾನ್‌ನ ಪ್ರಮುಖ ಸಂಧಾನಕಾರರಲ್ಲಿ ಒಬ್ಬರಾದರು. 2015 ರಲ್ಲಿ, ಅವರನ್ನು ಕತಾರ್‌ನಲ್ಲಿ ಇರುವ ತಾಲಿಬಾನ್‌ನ ರಾಜಕೀಯ ಕಚೇರಿಯ ಮುಖ್ಯಸ್ಥರಾಗಿ ನೇಮಿಸಲಾಯಿತು.

ನ್ಯೂಸ್​​​18 ಕನ್ನಡ ಕಳಕಳಿ: ಕೊರೋನಾ ಪಾಸಿಟಿವ್​ ಕೇಸ್​ಗಳ ಸಂಖ್ಯೆ ರಾಜ್ಯದಲ್ಲಿ ತಗ್ಗಿದೆಯಾದರೂ ಸೋಂಕಿನ ಅಪಾಯದಿಂದ ಸಂಪೂರ್ಣವಾಗಿ  ಇನ್ನೂ ಯಾರೂ ಸುರಕ್ಷಿತರಲ್ಲ. ಹೀಗಾಗಿ ಪ್ರತಿಯೊಬ್ಬರು ಕೋವಿಡ್​​ ನಿಯಮಗಳಾದ ಮಾಸ್ಕ್​​ ಧರಿಸುವುದು, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದನ್ನು ಮರೆಯಬಾರದು. ಆದಷ್ಟು ಶೀಘ್ರವೇ ಲಸಿಕೆ ಪಡೆದು ಸೋಂಕಿನ ವಿರುದ್ಧದ ಯುದ್ಧದಲ್ಲಿ ಪ್ರತಿಯೊಬ್ಬರು ಕೈ ಜೋಡಿಸಬೇಕು.