Reliance O2C - ರಿಲಾಯನ್ಸ್​​ನ ಎಲ್ಲಾ O2C ವ್ಯವಹಾರಗಳು ಸ್ವತಂತ್ರ ಅಂಗಸಂಸ್ಥೆಯಡಿ ಸೇರ್ಪಡೆಗೆ ಕ್ರಮ

ಮುಂಬೈ(ಫೆ. 23): ರಿಲಾಯನ್ಸ್ ಇಂಡಸ್ಟ್ರೀಸ್ ಸಂಸ್ಥೆ ತನ್ನ ತೈಲದಿಂದ ರಾಸಾಯನಿಕ ತಯಾರಿಕೆಯ (O2C) ಎಲ್ಲಾ ವ್ಯವಹಾರಗಳನ್ನ ಒಂದು ಸ್ವತಂತ್ರ ಅಂಗಸಂಸ್ಥೆ (Independent Subsidiary) ಅಡಿ ತರುವುದಾಗಿ ಹೇಳಿದೆ. ಈ ಅಂಗ ಸಂಸ್ಥೆಯ ಸಂಪೂರ್ಣ ಮ್ಯಾನೇಜ್ಮೆಂಟ್ ಆರ್​ಐಎಲ್ ನಿಯಂತ್ರಣದಲ್ಲೇ ಇರಲಿದೆ. ಆದಾಯ ಸೇರಿದಂತೆ ಪ್ರತಿಯೊಂದು ಅಂಶವನ್ನೂ ಹೊಸದಾಗಿ ರಚಿಸಲಾಗುವ ಅಂಗಸಂಸ್ಥೆಗೆ ರವಾನಿಸಲಾಗುವುದು ಎಂದು ಆರ್​ಐಎಲ್ ಇಂದು ಹೇಳಿಕೆ ನೀಡಿದೆ.

ರಿಲಾಯನ್ಸ್​ನ ಎಲ್ಲಾ ತೈಲ ಮರುಸಂಸ್ಕರಣೆ (Oil Refining), ಮಾರ್ಕೆಟಿಂಗ್ ಮತ್ತು ಪೆಟ್ರೋಕೆಮಿಕಲ್ ವ್ಯವಹಾರಗಳು ನೂತನ ಅಂಗಸಂಸ್ಥೆಗೆ ಜೋಡಿತವಾಗುತ್ತವೆ. ರಿಲಾಯನ್ಸ್ ಸಂಸ್ಥೆಯ ಮರುಸಂಘಟನೆಯ ವೇಳೆ ಷೇರುದಾರಿಕೆಯಲ್ಲಿ ಯಾವುದೇ ಬದಲಾವಣೆ ಇರದೆ ಹಿಂದಿನಂತೆಯೇ ಉಳಿಯಲಿದೆ. ಈ O2C ವ್ಯವಹಾರಗಳಲ್ಲಿ ಶೇ. 49.14ರಷ್ಟು ಪಾಲು ಪ್ರೊಮೋಟರ್ ಕೈಯಲ್ಲೇ ಉಳಿಯಲಿದೆ ಎಂದು ತಿಳಿಸಲಾಗಿದೆ.