ಅರ್ಬನ್ ಲ್ಯಾಡರ್​ನ ಶೇ. 96ರಷ್ಟು ಷೇರು ಖರೀದಿಸಿದ ರಿಲಯನ್ಸ್​ ರೀಟೇಲ್ ವೆಂಚರ್ಸ್​

ಮುಂಬೈ (ನ. 15): ಅರ್ಬನ್ ಲ್ಯಾಡರ್ ಹೋಮ್ ಡೆಕೋರ್ ಸೊಲ್ಯೂಷನ್ಸ್​ ಪ್ರೈವೇಟ್ ಲಿಮಿಟೆಡ್​ (ಅರ್ಬನ್ ಲ್ಯಾಡರ್)ನ ಈಕ್ವಿಟಿ ಶೇರ್​ನ ಶೇ. 96ರಷ್ಟು ಷೇರನ್ನು ರಿಲಯನ್ಸ್​ ರೀಟೇಲ್ ವೆಂಚರ್ಸ್​ ಲಿಮಿಟೆಡ್ ಖರೀದಿ ಮಾಡಿದೆ. ಈ ಮೂಲಕ ಅರ್ಬನ್ ಲ್ಯಾಡರ್​ನಲ್ಲಿ ರಿಲಯನ್ಸ್​ ರೀಟೇಲ್ಸ್​ 182.12 ಕೋಟಿ ರೂ. ಹೂಡಿಕೆ ಮಾಡಿದೆ. ಇದರ ಜೊತೆಗೆ ಉಳಿದ 75 ಕೋಟಿ ರೂ.ಗಳನ್ನು ಕೂಡ ಹೂಡಿಕೆ ಮಾಡುವ ಬಗ್ಗೆ ರಿಲಯನ್ಸ್​ ರೀಟೇಲ್ ವೆಂಚರ್ಸ್​ ಪ್ರಸ್ತಾವನೆ ಇಟ್ಟಿದೆ.

ಉಳಿದ 75 ಕೋಟಿ ರೂ. ಹಣದ ಹೂಡಿಕೆಯ ಕುರಿತು 2023ರ ಡಿಸೆಂಬರ್ ಒಳಗೆ ನಿರ್ಧಾರವಾಗುವ ಸಾಧ್ಯತೆಯಿದೆ. 2012ರ ಫೆಬ್ರವರಿ 17ರಂದು ಅರ್ಬನ್ ಲ್ಯಾಡರ್ ಭಾರತದ ಮಾರುಕಟ್ಟೆಯನ್ನು ಪ್ರವೇಶಿಸಿತು. ಹೋಮ್ ಫರ್ನಿಚರ್​ ಮತ್ತು ಅಲಂಕಾರಿಕ ಉತ್ಪನ್ನಗಳನ್ನು ಡಿಜಿಟಲ್ ಪ್ಲಾಟ್​ಫಾರ್ಮ್​ ಮೂಲಕ ಅರ್ಬನ್ ಲ್ಯಾಡರ್ ಮಾರಾಟ ಮಾಡುತ್ತದೆ. ಭಾರತದ ಬಹುತೇಕ ಎಲ್ಲ ನಗರಗಳಲ್ಲಿ ಅರ್ಬನ್ ಲ್ಯಾಡರ್ ತನ್ನ ರೀಟೇಲ್ ಸ್ಟೋರ್​ಗಳನ್ನು ಹೊಂದಿದೆ.

ಇದನ್ನೂ ಓದಿ: ಬೆಂಗಳೂರಿನ ರೆಸಿಡೆನ್ಷಿಯಲ್ ಪ್ರದೇಶದಲ್ಲಿ ಕೆಮಿಕಲ್ ಗೋಡೌನ್ ಇದ್ದರೆ ಪೊಲೀಸರಿಗೆ ಮಾಹಿತಿ ನೀಡಿ!

ಆಶಿಶ್ ಗೋಯೆಲ್ ಮತ್ತು ರಾಜೀವ್ ಶ್ರೀವಾಸ್ತವ್ ಅವರ ಕನಸಿನ ಸಂಸ್ಥೆ ಅರ್ಬನ್ ಲ್ಯಾಡರ್. ರಿಲಯನ್ಸ್​ ಇಂಡಸ್ಟ್ರೀಸ್​ ಲಿಮಿಟೆಡ್​ಗೂ ಮೊದಲು ಹಲವು ಸಂಸ್ಥೆಗಳಿಂದ ಅರ್ಬನ್ ಲ್ಯಾಡರ್ ಆರ್ಥಿಕ ನೆರವನ್ನು ಪಡೆದುಕೊಂಡಿತ್ತು. ಇದೀಗ ರಿಲಯನ್ಸ್​ ಇಂಡಸ್ಟ್ರೀಸ್ ಲಿಮಿಟೆಡ್ ಅರ್ಬನ್ ಲ್ಯಾಡರ್ ಅನ್ನು ಖರೀದಿ ಮಾಡಿದೆ.
ಈ ಹೂಡಿಕೆಗೆ ಯಾವುದೇ ಸರ್ಕಾರದ ಅನುಮತಿ ಬೇಕಾಗಿಲ್ಲ ಎಂದು ತಿಳಿದುಬಂದಿದೆ.

ರಿಲಯನ್ಸ್​ ರೀಟೇಲ್ ವೆಂಚರ್ಸ್​​ ಲಿಮಿಟೆಡ್ ಭಾರತದಲ್ಲಿ 12 ಸಾವಿರ ಮಳಿಗೆಗಳನ್ನು ಹೊಂದಿದೆ. ಈಗಾಗಲೇ ಲಾಕ್​ಡೌನ್ ಅವಧಿಯಲ್ಲಿ ರಿಲಯನ್ಸ್​ ವೆಂಚರ್ಸ್​ನಲ್ಲಿ ಹಲವಾರು ಅಂತಾರಾಷ್ಟ್ರೀಯ ಕಂಪನಿಗಳು ಲಕ್ಷಾಂತರ ಕೋಟಿ ರೂ. ಹೂಡಿಕೆ ಮಾಡಿವೆ.