ಜಾಗತಿಕ ಕಂಪನಿಗಳಾದ ಜಿಐಸಿ, ಟಿಪಿಜಿಯಿಂದ ರಿಲಯನ್ಸ್​ನಲ್ಲಿ ಒಂದೇ ದಿನ 7,350 ಕೋಟಿ ರೂ. ಹೂಡಿಕೆ

ನವದೆಹಲಿ (ಅ. 3): ಏಷ್ಯಾದ ಅತಿ ಶ್ರೀಮಂತ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಮುಖೇಶ್ ಅಂಬಾನಿ ಒಡೆತನದ ರಿಲಯನ್ಸ್​ ಇಂಡಸ್ಟ್ರೀಸ್​ ಲಿಮಿಟೆಡ್ (ಆರ್​ಐಎಲ್)ಗೆ ಶುಕ್ರವಾರ ಒಂದೇ ದಿನ 7,350 ಕೋಟಿ ರೂ. ಹೂಡಿಕೆಯಾಗಿದೆ. ಕಳೆದ ಮೂರ್ನಾಲ್ಕು ದಿನಗಳಿಂದ ರಿಲಯನ್ಸ್​ ಸಂಸ್ಥೆಗೆ ವಿಶ್ವಾದ್ಯಂತ ಹೂಡಿಕೆ ಹರಿದುಬರುತ್ತಿದೆ. ಜನರಲ್ ಅಟ್ಲಾಂಟಿಕ್, ಸಿಲ್ವರ್ ಲೇಕ್, ಮುಬಾದಲ ಕಂಪನಿಯ ಬೆನ್ನಲ್ಲೇ ನಿನ್ನೆ ಸಿಂಗಾಪುರ ಮೂಲದ ಜಿಐಸಿ ಮತ್ತು ಟಿಪಿಜಿ ಕಂಪನಿ ರಿಲಯನ್ಸ್​ ಇಂಡಸ್ಟ್ರೀಸ್​ ಲಿಮಿಟೆಡ್​ನ ಭಾಗವಾಗಿರುವ ರಿಲಯನ್ಸ್​ ರೀಟೇಲ್ ಯುನಿಟ್​ನಲ್ಲಿ ಒಟ್ಟು 7,35 ಕೋಟಿ ರೂ. ಹೂಡಿಕೆ ಮಾಡಿವೆ. ಇವೆರಡೂ ಕಂಪನಿಗಳು ಸೇರಿ ರಿಲಯನ್ಸ್​ ರೀಟೇಲ್ ವೆಂಚರ್ಸ್​ ಲಿಮಿಟೆಡ್​​ನ ಶೇ. 1.63 ಪಾಲನ್ನು ಖರೀದಿಸಿವೆ.

ಜಿಐಸಿ ಕಂಪನಿ ರಿಲಯನ್ಸ್​ ರೀಟೇಲ್ ವೆಂಚರ್ಸ್​ ಲಿಮಿಟೆಡ್​ನಲ್ಲಿ 5,512.5 ಕೋಟಿ ರೂ. ಹೂಡಿಕೆ ಮಾಡಿದೆ. ಕಳೆದ ಒಂದು ವಾರದಿಂದ ರಿಲಯನ್ಸ್​ನಲ್ಲಿ ಹೂಡಿಕೆ ಮಾಡುತ್ತಿರುವ 6ನೇ ಕಂಪನಿ ಇದಾಗಿದೆ. ರಿಲಯನ್ಸ್ ರೀಟೇಲ್ ವೆಂಚರ್​ನ 4.285 ಲಕ್ಷ ಕೋಟಿ ಈಕ್ವಿಟಿ ಮೊತ್ತದ​ ಶೇ. 1.22 ಪಾಲು ಪಡೆದಿರುವ ಸಿಂಗಾಪುರದ ಜಿಐಸಿ ಒಟ್ಟು 5,512 ಕೋಟಿ ರೂ. ಹೂಡಿಕೆ ಮಾಡಿದೆ. ಹಾಗೇ, ಟಿಪಿಜಿ ಕಂಪನಿ ರಿಲಯನ್ಸ್​ ರೀಟೇಲ್ ವೆಂಚರ್ಸ್​ ಲಿಮಿಟೆಡ್​ನ ಶೇ. 0.41 ಪಾಲು ಖರೀದಿಸುವ ಮೂಲಕ 1,837.5 ಕೋಟಿ ರೂ. ಹೂಡಿಕೆ ಮಾಡಿದೆ.

ರಿಲಯನ್ಸ್ ಇಂಡಸ್ಟ್ರೀಸ್ ಸಂಸ್ಥೆಗೆ ಸೇರಿದ ರಿಲಯನ್ಸ್ ರೀಟೇಲ್ ವೆಂಚರ್ಸ್ (RRVL) ಕಂಪನಿಯು ಫ್ಯೂಚರ್ ಗ್ರೂಪ್​ನ ಹಲವು ವ್ಯವಹಾರಗಳನ್ನ ಖರೀದಿ ಮಾಡಿತ್ತು. ಕಿಶೋರ್ ಬಿಯಾನಿ ಅವರ ಫ್ಯೂಚರ್ ಗ್ರೂಪ್​ನ ರೀಟೇಲ್, ಹೋಲ್​ಸೇಲ್, ಲಾಜಿಸ್ಟಿಕ್ಸ್, ವೇರ್​ಹೌಸಿಂಗ್ ವ್ಯವಹಾರಗಳನ್ನು ಒಟ್ಟು 24,713 ಕೋಟಿ ರೂಪಾಯಿಗೆ ಕೊಳ್ಳುತ್ತಿರುವುದಾಗಿ ರಿಲಯನ್ಸ್ ರೀಟೇಲ್ ವೆಂಚರ್ಸ್​ ಘೋಷಿಸಿತ್ತು. 3 ದಿನಗಳ ಹಿಂದೆ ಅಮೆರಿಕಾ ಮೂಲದ ಸಿಲ್ವರ್​ ಲೇಕ್​ ಎಂಬ ಸಂಸ್ಥೆ 1,875 ಕೋಟಿ ರೂ. ಬಂಡವಾಳ ಹೂಡಿಕೆ ಮಾಡಿತ್ತು.

ಇದನ್ನೂ ಓದಿ: GIC-Reliance Retail deal: ಸಿಂಗಾಪುರದ ಜಿಐಸಿಯಿಂದ ರಿಲಯನ್ಸ್​ ರೀಟೇಲ್​ನಲ್ಲಿ 5,512 ಕೋಟಿ ರೂ. ಹೂಡಿಕೆ

ಎರಡು ದಿನಗಳ ಹಿಂದೆ ಅಬುಧಾಬಿ ಮೂಲದ ಮುಬದಾಲ ಇನ್ವೆಸ್ಟ್​ಮೆಂಟ್ ಕಂಪನಿ ರಿಲಯನ್ಸ್​ ರೀಟೇಲ್ ವೆಂಚರ್ಸ್​ನಲ್ಲಿ 6,247.50 ಕೋಟಿ ರೂ ಹೂಡಿಕೆ ಮಾಡಿತ್ತು. ಈ ಹೂಡಿಕೆಯೊಂದಿಗೆ ಮುಬಾದಲಾ ರಿಲಯನ್ಸ್ ರೀಟೇಲ್​ನ ಶೇ. 1.4ರಷ್ಟು ಪಾಲನ್ನು ಖರೀದಿಸಿತ್ತು. ವಿಶ್ವದ ಅನೇಕ ಪ್ರಮುಖ ಹೂಡಿಕೆ ಸಂಸ್ಥೆಗಳಿಂದ ಬಂಡವಾಳ ಆಕರ್ಷಿಸುತ್ತಿರುವ ರಿಲಯನ್ಸ್ ರೀಟೇಲ್​ನ ವ್ಯವಹಾರ ದಿನೇ ದಿನೇ ಪ್ರಬಲಗೊಳ್ಳುತ್ತಿದೆ. ದೇಶಾದ್ಯಂತ 12 ಸಾವಿರ ಮಳಿಗೆಗಳೊಂದಿಗೆ ರಿಲಯನ್ಸ್ ರೀಟೇಲ್ ವ್ಯವಹಾರ ಹೊಂದಿದೆ.

ರಿಲಯನ್ಸ್​ ರೀಟೇಲ್ಸ್​ ಇದುವರೆಗೂ ಶೇ. 6.87 ಪಾಲಿನ ಮೂಲಕ 30,360 ಕೋಟಿ ರೂ. ಹೂಡಿಕೆಯನ್ನು ಆಕರ್ಷಿಸಿದೆ. ರಿಲಯನ್ಸ್​ ರೀಟೇಲ್​ನಲ್ಲಿ ಹೂಡಿಕೆ ಮಾಡಿರುವ ಜಿಐಸಿ ಇದುವರೆಗೂ 40 ವಿವಿಧ ದೇಶಗಳಲ್ಲಿ ಹೂಡಿಕೆ ಮಾಡಿದೆ. 2 ದಶಕಗಳಿಗೂ ಹೆಚ್ಚು ಕಾಲದಿಂದ ಜಿಐಸಿ ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುತ್ತಿದೆ. ಸಿಂಗಾಪುರದಲ್ಲಿ ಇದರ ಕೇಂದ್ರ ಕಚೇರಿಯಿದ್ದು, 1,700 ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ. ಜಗತ್ತಿನ 10ಕ್ಕೂ ಹೆಚ್ಚು ಪ್ರಮುಖ ನಗರಗಳಲ್ಲಿ ಇದರ ಕಚೇರಿಗಳಿವೆ.

ಇದನ್ನೂ ಓದಿ: Mubadala-Reliance Retail Deal – ಅಬುಧಾಬಿಯ ಮುಬಾದಲದಿಂದ ರಿಲಾಯನ್ಸ್ ರೀಟೇಲ್​ನಲ್ಲಿ 6,247 ಕೋಟಿ ಹೂಡಿಕೆರಿಲಯನ್ಸ್​ ರೀಟೇಲ್​ನಲ್ಲಿ ಹೂಡಿಕೆ ಮಾಡಿರುವ ಟಿಪಿಜಿ ಕೋ-ಸಿಇಓ ಜಿಮ್ ಕೌಲ್ಟರ್ ಈ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದು, ರಿಲಯನ್ಸ್​ ಇಂಡಸ್ಟ್ರೀಸ್​ ತಂತ್ರಜ್ಞಾನವನ್ನು ಬಳಸಿಕೊಂಡು ರೀಟೇಲ್ ಕ್ಷೇತ್ರದಲ್ಲಿ ತನ್ನ ಪ್ರಾಬಲ್ಯ ಸಾಧಿಸುತ್ತಿದೆ. ಅತ್ಯುತ್ತಮ ನಾಯಕತ್ವ, ಸಮರ್ಪಕವಾದ ಪ್ಲಾನ್ ಮೂಲಕ ರೀಟೇಲ್ ಕ್ಷೇತ್ರದಲ್ಲಿ ಪ್ರಬಲವಾಗಿ ನೆಲೆಯೂರುತ್ತಿರುವ ರಿಲಯನ್ಸ್​ ರೀಟೇಲ್ಸ್ ಜೊತೆ ಕೈಜೋಡಿಸುತ್ತಿರುವುದಕ್ಕೆ ನಮಗೆ ಬಹಳ ಖುಷಿಯಾಗುತ್ತಿದೆ ಎಂದಿದ್ದಾರೆ.

ಈ ಹೂಡಿಕೆಗಳ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ರಿಲಯನ್ಸ್​ ರೀಟೇಲ್ಸ್​ ನಿರ್ದೇಶಕಿ ಇಶಾ ಅಂಬಾನಿ, ರಿಲಯನ್ಸ್​ ರೀಟೇಲ್ ಕುಟುಂಬಕ್ಕೆ ಟಿಪಿಜಿಯನ್ನು ನಾವು ಬಹಳ ಸಂತೋಷದಿಂದ ಸ್ವಾಗತಿಸುತ್ತಿದ್ದೇವೆ. ಭಾರತೀಯ ರೀಟೇಲ್ ಕ್ಷೇತ್ರದಲ್ಲಿ ಹೊಸತನ ತರಬೇಕು, ಗ್ರಾಹಕರಿಗೆ ಹೊಸ ಆಯ್ಕೆಗಳನ್ನು ನೀಡಬೇಕೆಂಬ ನಮ್ಮ ಉದ್ದೇಶಕ್ಕೆ ಹಲವು ಕಂಪನಿಗಳು ಕೈಜೋಡಿಸಿವೆ. ಟಿಪಿಜಿ ಈ ಕ್ಷೇತ್ರದಲ್ಲಿ ಹೊಂದಿರುವ ಅನುಭವ ನಮಗೆ ಇನ್ನಷ್ಟು ಹೆಚ್ಚಿನ ಬಲ ನೀಡಲಿದೆ ಎಂಬ ವಿಶ್ವಾಸ ನಮಗಿದೆ ಎಂದಿದ್ದಾರೆ.