RBI Monetary Policy – ಆರ್​ಬಿಐನ ರೆಪೋ ದರ ಯಥಾಸ್ಥಿತಿ; ಜಿಡಿಪಿ ಗುರಿ ಏರಿಕೆ; ಗರಿಗೆದರಿದ ಸೆನ್ಸೆಕ್ಸ್

ನವದೆಹಲಿ(ಡಿ. 04): ಈ ವರ್ಷ ಭಾರತದ ಜಿಡಿಪಿ ಮೈನಸ್ 9.5 ಪ್ರತಿಶತ ಇರಬಹುದು ಎಂದು ಹೇಳಿದ್ದ ಭಾರತೀಯ ರಿಸರ್ವ್ ಬ್ಯಾಂಕ್ ಇದೀಗ ಮತ್ತೊಮ್ಮೆ ತನ್ನ ಅಂದಾಜನ್ನು ಪರಿಷ್ಕರಿಸಿದೆ. ಜಿಡಿಪಿ ಬೆಳವಣಿಗೆ -7.5 ಪ್ರತಿಶತಕ್ಕೆ ಬಂದು ನಿಲ್ಲಬಹುದು ಎಂದು ಆರ್​ಬಿಐ ಹೇಳಿದೆ. ಅಂದರೆ, ಭಾರತದ ಆರ್ಥಿಕ ಕುಸಿತ ಶೇ. 7.5ಕ್ಕೆ ಮಾತ್ರ ಸೀಮಿತವಾಗಬಹುದು. ಇದರೊಂದಿಗೆ ಭಾರತದ ಆರ್ಥಿಕತೆ ಆಶಾದಾಯಕ ಸ್ಥಿತಿಗೆ ಮರಳುವ ಸೂಚನೆಯನ್ನು ಆರ್​ಬಿಐ ಗ್ರಹಿಸಿದೆ. ಆರ್​ಬಿಐನ ಜಿಡಿಪಿ ಅಂದಾಜು ಪರಿಷ್ಕರಣೆಗೊಂಡು ಆರ್ಥಿಕತೆ ಮತ್ತೆ ಲಯಕ್ಕೆ ಬರಬಹುದು ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಲೇ ಭಾರತದ ಷೇರುಪೇಟೆ ಗರಿಗೆದರಿ ಹೊಸ ದಾಖಲೆಗಳ ಮಟ್ಟಕ್ಕೇರಿತು.

ಬಿಎಸ್​ಇ ಸೆನ್ಸೆಕ್ಸ್ ಡಿಢೀರ್ 370 ಅಂಕ ಹೆಚ್ಚಳಗೊಂಡು ಹೊಸ ದಾಖಲೆಯ 45,000 ಅಂಕಗಳ ಮಟ್ಟ ಮುಟ್ಟಿತು. ಎನ್​ಎಸ್​ಇ ನಿಫ್ಟಿ ಸೂಚ್ಯಂಕ ಕೂಡ 107 ಅಂಕ ಹೆಚ್ಚಳಗೊಂಡು ಹೊಸ ದಾಖಲೆಯ 13,240 ರ ಮಟ್ಟ ತಲುಪಿತು. ಬ್ಯಾಂಕಿಂಗ್ ಸಂಸ್ಥೆಗಳಾದ ಹೆಚ್​ಡಿಎಫ್​ಸಿ ಬ್ಯಾಂಕ್, ಎಸ್​ಬಿಐ ಮತ್ತು ಐಸಿಐಸಿಐ ಹಾಗೂ ಅಲ್ಟ್ರಾಟೆಕ್ ಸಿಮೆಂಟ್ ಸಂಸ್ಥೆಗಳ ಷೇರುಗಳು ಹೆಚ್ಚು ಮೊತ್ತಕ್ಕೆ ಮಾರಾಟ ಕಂಡವು.

ಇಂದು ಆರ್​ಬಿಐನ ಮಾನಿಟರಿ ಪಾಲಿಸಿ ಕಮಿಟಿಯ ಸಭೆಯ ಬಳಿಕ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಆರ್​ಬಿಐ ಗವರ್ನರ್ ಶಕ್ತಿಕಾಂತ್ ದಾಸ್, ಈ ವರ್ಷದ ದ್ವಿತೀಯಾರ್ಧದಲ್ಲಿ ಆರ್ಥಿಕ ಚಟುವಟಿಕೆಗಳು ಉತ್ತಮಗೊಂಡಿವೆ. ಇದರಿಂದ ನಿರೀಕ್ಷೆಮೀರಿ ವೇಗದಲ್ಲಿ ಆರ್ಥಿಕತೆ ಚೇತರಿಸಿಕೊಳ್ಳಬಹುದು ಎಂದಿದ್ಧಾರೆ. 2021ರ ವರ್ಷದಲ್ಲಿ ಜಿಡಿಪಿ ಶೇ. -9.5ರಷ್ಟು ಕುಸಿಯಬಹುದು ಎಂದು ಕಳೆದ ತಿಂಗಳಷ್ಟೇ ಆರ್​ಬಿಐ ಅಂದಾಜು ಮಾಡಿತ್ತು.

ಇದನ್ನೂ ಓದಿ: Delhi Air Pollution: ಗ್ಯಾಸ್ ಚೇಂಬರ್ ರೀತಿ ಆಗಿರುವ ದೆಹಲಿಯ ವಾಯುಮಾಲಿನ್ಯ

ರೆಪೋ, ರಿವರ್ಸ್ ರೆಪೇ ದರ ಯಥಾಸ್ಥಿತಿ:

ಇದೇ ವೇಳೆ, ಆರ್ಥಿಕ ಬೆಳವಣಿಗೆ ಇದೇ ಮಟ್ಟದಲ್ಲಿ ಮುಂದುವರಿಯುವ ಉದ್ದೇಶದಿಂದ ಆರ್​ಬಿಐ ತನ್ನ ರೆಪೋ ಮತ್ತು ರಿವರ್ಸ್ ರೆಪೋ ದರದಲ್ಲಿ ಯಾವುದೇ ಬದಲಾವಣೆ ಮಾಡದಿರಲು ನಿರ್ಧರಿಸಿದೆ. ಇದರೊಂದಿಗೆ ಶೇ. 4ರ ರೆಪೋ ದರ ಹಾಗೂ ಶೇ. 3.35ರ ರಿವರ್ಸ್ ರಿಪೋ ದರ ಮುಂದುವರಿಯಲಿದೆ. ಲಾಕ್​ಡೌನ್​ಗೆ ಮುನ್ನ ರೆಪೋ ದರ ಶೇ. 5.15ರಷ್ಟು ಇತ್ತು. ಅಲ್ಲಿಂದೀಚೆ ಆರ್​ಬಿಐ ರೆಪೋ ದರದಲ್ಲಿ 115 ಮೂಲಾಂಕಗಳಷ್ಟು ಕಡಿಮೆ ಮಾಡಿದೆ. ಇದು ಆರ್​ಬಿಐ ಇತಿಹಾಸದಲ್ಲೇ ಅತ್ಯಂತ ಕಡಿಮೆಯ ರೆಪೋ ದರವಾಗಿದೆ.

ರೆಪೋ ದರ ಎಂದರೆ ಆರ್​ಬಿಐನಿಂದ ಕಮರ್ಷಿಯಲ್ ಬ್ಯಾಂಕುಗಳು ಪಡೆಯುವ ಸಾಲಕ್ಕೆ ವಿಧಿಸಲಾಗುವ ಬಡ್ಡಿಯಾಗಿದೆ. ರಿವರ್ಸ್ ರೆಪೋ ಎಂದರೆ ಕಮರ್ಷಿಯಲ್ ಬ್ಯಾಂಕುಗಳು ಇಡುವ ಠೇವಣಿಗೆ ಆರ್​ಬಿಐ ನೀಡುವ ಬಡ್ಡಿ ದರವಾಗಿದೆ.