ತಮಿಳುನಾಡು ಚುನಾವಣೆಯಲ್ಲಿ ಆಟೋ ರಿಕ್ಷಾ ಚಿಹ್ನೆಯಲ್ಲಿ ಸ್ಪರ್ಧಿಸುತ್ತಾರಾ ರಜಿನಿಕಾಂತ್?; ಕುತೂಹಲವಾಗಿದೆ ನಟನ ನಡೆ

ಚೆನ್ನೈ (ಡಿಸೆಂಬರ್​ 15); ಬಹು ನಿರೀಕ್ಷಿತ ತಮಿಳುನಾಡಿನ ವಿಧಾನಸಭಾ ಚುನಾವಣೆ ಮುಂದಿನ ವರ್ಷ ನಡೆಯಲಿದೆ. ಈ ಚುನಾವಣೆಯಲ್ಲಿ ಡಿಎಂಕೆ ಮತ್ತು ಎಡಿಎಂಕೆ ಪಕ್ಷಗಳು ಗೆಲ್ಲುವ ಫೇವರಿಟ್​. ಆದರೆ, ತಮಿಳುನಾಡಿನ ಸಿನಿಮಾ ಸೂಪರ್​ ಸ್ಟಾರ್​ ರಜನಿಕಾಂತ್​ ತಮ್ಮ ಪಕ್ಷವನ್ನು ಸ್ಥಾಪಿಸಿ ಚುನಾವಣೆಯಲ್ಲಿ ಸ್ಪರ್ಧಿಸಿದರೆ ತ್ರಿಕೋನ ಸ್ಪರ್ಧೆ ಏರ್ಪಡುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ನಟ ರಜನಿಕಾಂತ್ ಸಹ ಡಿಸೆಂಬರ್ 31 ರಂದು ತಾವು ಪಕ್ಷವನ್ನು ಸ್ಥಾಪಿಸುವ ಕುರಿತು ಬಹಿರಂಗಪಡಿಸುವುದಾಗಿ ತಿಳಿಸಿದ್ದರು. ಈ ನಡುವೆ ತಮಿಳುನಾಡಿನಲ್ಲಿ "ಮಕ್ಕಳ್​ ಸೇವಯ್​ ಕಚ್ಚಿ" (MSK) ಎಂಬ ಹೆಸರಿನಲ್ಲಿ ಹೊಸ ಪಕ್ಷವೊಂದನ್ನು ನೊಂದಾಯಿಸಲಾಗಿದ್ದು, "ಆಟೋ ರಿಕ್ಷಾ"ವನ್ನು ಪಕ್ಷಕ್ಕೆ ಚಿಹ್ನೆಯನ್ನಾಗಿ ನೀಡಲಾಗಿದೆ. ​ಹೀಗಾಗಿ ಈ ಪಕ್ಷ ನಟ ರಜನಿಯವರೇ ನೋಂದಾಯಿಸಿದ್ದು, ಅವರು ಮುಂದಿನ ತಮಿಳುನಾಡು ಚುನಾವಣೆಯಲ್ಲಿ ಸ್ಪರ್ಧಿಸುವುದು ಖಚಿತ ಎಂಬ ಸುದ್ದಿಗಳು ತಮಿಳುನಾಡಿನಲ್ಲಿ ಹರಿದಾಡುತ್ತಿದೆ.

1995 ರಲ್ಲಿ ಬಿಡುಗಡೆಯಾದ 'ಬಾಷಾ' ನಟ ರಜಿನಿಯವರ ಸಿನಿಮಾ ಕೆರಿಯರ್​ ಅನ್ನೇ ಬದಲಿಸಿದ ಬ್ಲಾಕ್​ಬಸ್ಟರ್​ ಚಿತ್ರ. ಈ ಚಿತ್ರದಲ್ಲಿ ರಜಿನಿಕಾಂತ್​ ಆಟೋ ರಿಕ್ಷಾ ಚಾಲಕನಾಗಿ ನಟಿಸಿ ಜನಮನ ಗೆದ್ದಿದ್ದರು. ಜನರೊಂದಿಗೆ ಸುಲಭವಾಗಿ ಸಂಪರ್ಕ ಸಾಧಿಸುವ ಕಾರಣ ಈ ಚಿಹ್ನೆಯನ್ನೇ ಪಡೆದಿದ್ದಾರೆ ಎನ್ನಲಾಗುತ್ತಿದೆ. ಏಕೆಂದರೆ ಈಗಲೂ ತಮಿಳುನಾಡಿನ ತಳವರ್ಗ ಮತ್ತು ಆಟೋ ರಿಕ್ಷಾ ಚಾಲಕರ ಪಾಲಿಗೆ ರಜಿನಿಯವರೇ ನೆಚ್ಚಿನ ನಾಯಕನಾಗಿದ್ದು, ಅವರನ್ನು ಆರಾಧಿಸುವ ಜನರಿಗೂ ಕಡಿಮೆ ಏನಿಲ್ಲ. ಹೀಗಾಗಿ ಈ ಪಕ್ಷ ರಜಿನಿಯವರದ್ದೇ ಎನ್ನಲಾಗುತ್ತಿದೆ.

ಮೂಲಗಳ ಪ್ರಕಾರ, ಪಕ್ಷವನ್ನು ನೋಂದಾಯಿಸಿದ ಅರ್ಜಿದಾರನು ತೂತುಕುಡಿಯಲ್ಲಿರುವ ರಜಿನಿ ಮಕ್ಕಲ್ ಮಂದಿರಂ (ಆರ್‌ಎಂಎಂ) ನ ಹಿರಿಯ ಕಾರ್ಯಕಾರಿಣಿಯಾಗಿದ್ದು, ರಜನಿಕಾಂತ್ ಅವರ ಸೂಚನೆಯ ಮೇರೆಗೆ ಇನ್ನೊಬ್ಬ ವ್ಯಕ್ತಿಯ ಹೆಸರಿನಲ್ಲಿ ನೋಂದಣಿ ಪ್ರಕ್ರಿಯೆಯನ್ನು ಮಾಡಲಾಗಿದೆ. ಆದರೆ, ಅರ್ಜಿದಾರರ ವಿವರಗಳೂ ಇನ್ನೂ ಬಹಿರಂಗವಾಗಿಲ್ಲ ಎಂಬ ಮಾಹಿತಿಗಳು ಲಭ್ಯವಾಗುತ್ತಿವೆ.

ನಟ ರಜಿನಿಕಾಂತ್ ಈ ಹಿಂದೆ ತಮ್ಮ ಪಕ್ಷವನ್ನು "ಅನೈತ್ತಿಂದಿಯ ಮಕ್ಕಳ್​ ಶಕ್ತಿ ಕಳಗಮ್​" ಎಂದು ನಮೂದಿಸಿದ್ದು ಪಕ್ಷದ ಚಿಹ್ನೆಯಾಗಿ ಅವರ ಬಾಬಾ ಸಿನಿಮಾದ ಬಾಬಾ ಮುದ್ರೆಯನ್ನು ಕೋರಿದ್ದಾರೆ ಎನ್ನಲಾಗಿತ್ತು.

1996ರಲ್ಲಿ ಅಂದಿನ ತಮಿಳುನಾಡಿನ ಮುಖ್ಯಮಂತ್ರಿ ಜೆ.ಜಯಲಲಿತ ವಿರುದ್ಧ ರಜಿನಿಕಾಂತ್ ಬಹಿರಂಗವಾಗಿ ಅಸಮಾಧಾನ ವ್ಯಕ್ತಪಡಿಸಿದ್ದರು. ಈ ವೇಳೆ ಅವರು ಕಾಂಗ್ರೆಸ್​ ಡಿಎಂಕೆ ಮೈತ್ರಿಗೆ ಬೆಂಬಲ ಸೂಚಿಸಿ "ತಮ್ಮ ಅಭಿಮಾನಿಗಳು ಡಿಎಂಕೆಗೆ ಮತ ಚಲಾಯಿಸಬೇಕು. ಒಂದು ವೇಳೆ ಜಯಲಲಿತಾ ಅವರಿಗೆ ಮತ ಚಲಾಯಿಸಿದರೆ ಇಡೀ ತಮಿಳುನಾಡು ಸ್ಮಶಾನವಾಗುತ್ತದೆ" ಎಂದ್ದಿದ್ದರು. ಪರಿಣಾಮ ಈ ಚುನಾವಣೆಯಲ್ಲಿ ಜಯಲಲಿತಾ ಅವರ ಎಡಿಎಂಕೆ ಪಕ್ಷ ಹೇಳ ಹೆಸರಿಲ್ಲದಂತಾಗಿತ್ತು. ಇದು ತಮಿಳುನಾಡು ರಾಜಕಾರಣ ಅಖಾಡದಲ್ಲಿ ರಜಿನಿಯವರ ಮೊದಲ ಪ್ರವೇಶ ಎಂದೇ ಬಣ್ಣಿಸಲಾಗಿತ್ತು.

ಇದನ್ನೂ ಓದಿ : ಜಿಲ್ಲಾ ಪಂಚಾಯತ್​ ಗೆಲುವಿನೊಂದಿಗೆ ಗೋವಾದಲ್ಲಿ ಖಾತೆ ತೆರೆದ ಎಎಪಿ; ವಿಧಾನಸಭಾ ಚುನಾವಣೆಗೆ ಸಿದ್ದರಾಗಲು ಕೇಜ್ರಿವಾಲ್ ಕರೆ

ಆನಂತರ ಎರಡು ದಶಕಗಳಿಂದ ಅವರು ರಾಜಕೀಯಕ್ಕೆ ಅಧೀಕೃತವಾಗಿ ಎಂಟ್ರಿ ಕೊಡುವ ಕುರಿತ ಸುದ್ದಿಗಳು ಹರಿದಾಡುತ್ತಲೇ ಇವೆ. ಆದರೆ, ಈವರೆಗೆ ಈ ಕುರಿತು ರಜಿನಿ ತುಟಿ ಬಿಚ್ಚಿರಲಿಲ್ಲ. ಸ್ಪಷ್ಟತೆ ನೀಡಿರಲಿಲ್ಲ. ಆದರೆ, ಡಿಸೆಂಬರ್​ 31 ರಂದುತಾವು ಪಕ್ಷವನ್ನು ಘೋಷಿಸುವುದಾಗಿ ಅವರು ತಿಳಿಸಿರುವುದು ತಮಿಳುನಾಡಿನಲ್ಲಿ ದೊಡ್ಡ ಸಂಚಲನವನ್ನೇ ಸೃಷ್ಟಿಸಿದೆ.

ಏತನ್ಮಧ್ಯೆ, 2021 ರ ವಿಧಾನಸಭಾ ಚುನಾವಣೆಗೆ ತಮಿಳುನಾಡಿನಲ್ಲಿ ನಟ ಕಮಲ್ ಹಾಸನ್ ಅವರ ಮಕ್ಕಲ್ ನೀಧಿ ಮಯ್ಯಂ (ಎಂಎನ್‌ಎಂ) ಪಕ್ಷ ಸಹ ತಾವು ಚುನಾವಣೆಯಲ್ಲಿ ಸ್ಪರ್ಧಿಸುವುದನ್ನು ಖಚಿತಪಡಿಸಿದೆ. ಹೀಗಾಗಿ ಈ ಬಾರಿಯ ತಮಿಳುನಾಡಿನ ಚುನಾವಣಾ ಅಖಾಡ ಹಿಂದೆಂದಿಗಿಂತಲೂ ಹೆಚ್ಚು ವರ್ಣ ರಂಜಿತವಾಗಿರಲಿದೆ ಎನ್ನಲಾಗುತ್ತಿದೆ.