ಪುಲ್ವಾಮ ದಾಳಿ ಪ್ರಕರಣ: ಎನ್ಐಎಯಿಂದ 5,000 ಪುಟಗಳ ಚಾರ್ಜ್​ಶೀಟ್ ಸಾಧ್ಯತೆ

ಬರೋಬ್ಬರಿ 18 ತಿಂಗಳ ಕಾಲ ತೀವ್ರವಾಗಿ ತನಿಖೆ ನಡೆಸಿ ವೈಜ್ಞಾನಿಕ ಹಾಗೂ ಡಿಜಿಟಲ್ ಸಾಕ್ಷ್ಯಗಳನ್ನ ಆಧರಿಸಿ ಈ ಪ್ರಕರಣಕ್ಕೆ ಒಂದು ರೂಪ ಕೊಟ್ಟಿರುವ ಎನ್ಐಎ ಇಂದು ಜಮ್ಮುವಿನ ವಿಶೇಷ ಕೋರ್ಟ್ನಲ್ಲಿ ಚಾರ್ಜ್ ಶೀಟ್ ಫೈಲ್ ಮಾಡುತ್ತಿದೆ.

ಪುಲ್ವಾಮ ದಾಳಿ ಘಟನೆಯ ದೃಶ್ಯ

ಪುಲ್ವಾಮ ದಾಳಿ ಘಟನೆಯ ದೃಶ್ಯ

  • News18
  • Last Updated :
  • Share this:
    ನವದೆಹಲಿ(ಆ. 25): ಕಳೆದ ವರ್ಷ ಕಾಶ್ಮೀರದ ಪುಲ್ವಾಮದಲ್ಲಿ ನಡೆದಿದ್ದ ಉಗ್ರ ದಾಳಿ ಘಟನೆ ಸಂಬಂಧ ರಾಷ್ಟ್ರೀಯ ತನಿಖಾ ಸಂಸ್ಥೆ ಇವತ್ತು 5,000 ಪುಟಗಳ ಚಾರ್ಜ್ ಶೀಟ್ ಸಲ್ಲಿಸುವ ನಿರೀಕ್ಷೆ ಇದೆ. 40 ಸಿಆರ್​ಪಿಎಫ್ ಯೋಧರನ್ನು ಬಲಿತೆಗೆದುಕೊಂಡ ಈ ಘಟನೆಯಲ್ಲಿ ಜೈಷ್ ಎ ಮೊಹಮ್ಮದ್ (ಜೆಇಎಂ) ಸಂಘಟನೆ ನಡೆಸಿದ ಸಂಚು, ಸ್ಫೋಟಕಗಳನ್ನ ಸಾಗಿಸಿದ್ದು, ದಾಳಿ ನಡೆಸಿದ ಉಗ್ರರ ಗುರುತು, ದಾಳಿಗೆ ನೆರವಾದವರು ಹೀಗೆ ಹಲವು ವಿವರಗಳು ಈ ಚಾರ್ಜ್​ಶೀಟ್​ನಲ್ಲಿ ಇರಲಿದೆ. ಪಾಕ್ ಮೂಲದ ಜೆಇಎಂ ಸಂಘಟನೆಯ ಮೌಲಾನ ಮಸೂದ್ ಅಜರ್, ರೌಫ್ ಅಜ್ಗರ್ ಸೇರಿದಂತೆ 20 ಉಗ್ರರನ್ನು ಆರೋಪಿಗಳನ್ನಾಗಿ ಹೆಸರಿಸುವ ಸಾಧ್ಯತೆ ಇದೆ. ಪ್ರಮುಖ ಸಂಚುಕೋರ ಫಾರೂಕ್​ನ ಫೋನ್​ನಿಂದ ಕಾಲ್ ರೆಕಾರ್ಡಿಂಗ್, ವಾಟ್ಸಾಪ್ ಚಾಟ್, ಫೋಟೋ, ವಿಡಿಯೋ ಇತ್ಯಾದಿಗಳನ್ನ ಪಡೆಯಲಾಗಿದೆ. ಇದರಲ್ಲೂ ಕೆಲ ಮಹತ್ವದ ಸಾಕ್ಷ್ಯಾಧಾರಗಳು ಸಿಕ್ಕಿವೆ.

    ಬರೋಬ್ಬರಿ 18 ತಿಂಗಳ ಕಾಲ ತೀವ್ರವಾಗಿ ತನಿಖೆ ನಡೆಸಿ ವೈಜ್ಞಾನಿಕ ಹಾಗೂ ಡಿಜಿಟಲ್ ಸಾಕ್ಷ್ಯಗಳನ್ನ ಆಧರಿಸಿ ಈ ಪ್ರಕರಣಕ್ಕೆ ಒಂದು ರೂಪ ಕೊಟ್ಟಿರುವ ಎನ್​ಐಎ ಇಂದು ಜಮ್ಮುವಿನ ವಿಶೇಷ ಕೋರ್ಟ್​ನಲ್ಲಿ ಚಾರ್ಜ್ ಶೀಟ್ ಫೈಲ್ ಮಾಡುತ್ತಿದೆ.

    ಇದನ್ನೂ ಓದಿ: ರಾಯಗಢದಲ್ಲಿ ಐದು ಅಂತಸ್ತಿನ ಕಟ್ಟಡ ಕುಸಿತ; ಇಬ್ಬರು ಸಾವು, 18 ಮಂದಿಗಾಗಿ ಶೋಧ ಕಾರ್ಯ

    2019ರಲ್ಲಿ ಈ ದಾಳಿ ನಡೆದದ್ದು. ದಾಳಿಯ ಪ್ರಮುಖ ಸಂಚುಕೋರ ಉಮರ್ ಫಾರೂಕ್ 2018ರ ಏಪ್ರಿಲ್​ನಲ್ಲಿ ಪಾಕಿಸ್ತಾನದಿಂದ ಭಾರತವನ್ನ ಪ್ರವೇಶ ಮಾಡಿದ್ದ. ದಾಳಿಗೆ ಬೇಕಾದ ಐಇಡಿ ಸ್ಫೋಟಕಗಳನ್ನ ಸಂಗ್ರಹಿಸುವ ವ್ಯವಸ್ಥೆ ಮಾಡಿದ್ದು ಈತನೇ. 2020, ಮಾರ್ಚ್ 29ರಂದು ಭದ್ರತಾ ಪಡೆಗಳು ನಡೆಸಿದ ಎನ್​ಕೌಂಟರ್​ನಲ್ಲಿ ಈತ ಹಾಗೂ ಮತ್ತೊಬ್ಬ ಐಇಡಿ ತಜ್ಞ ಕಮ್ರಾನ್ ಹತ್ಯೆಯಾಗಿದ್ದರು. ಆಗ ಫಾರೂಖ್​ನ ಫೋನ್ ಅನ್ನು ಭದ್ರತಾ ಪಡೆಗಳು ವಶಪಡಿಸಿಕೊಂಡಿದ್ದರು.

    ಫಾರೂಕ್​ನ ಫೋನ್​ನಲ್ಲಿರುವ ವಾಟ್ಸಾಪ್ ಸಂದೇಶಗಳಿಂದ ಒಂದಷ್ಟು ಸುಳಿವು ಸಿಕ್ಕಿವೆ. ಪಾಕಿಸ್ತಾನದಲ್ಲಿ ಜೈಷ್ ಸಂಘಟನೆಯ ನಿರ್ವಾಹಕರಿಗೆ ಈತ ತಾನು ಸ್ಫೋಟಕಗಳೊಂದಿಗೆ ಭಾರತಕ್ಕೆ ಸುರಕ್ಷಿತವಾಗಿ ಬಂದಿದ್ದಾಗಿ ವಾಟ್ಸಾಪ್​ನಲ್ಲಿ ಮೆಸೇಜ್ ಹಾಕಿದ್ದ. ಈತನ ಮೊಬೈಲ್​ನಲ್ಲಿರುವ ಒಂದು ವಿಡಿಯೋದಲ್ಲಿ ಉಗ್ರರು ಹೇಗೆ ಗಡಿದಾಟಿ ಬರುತ್ತಾರೆಂಬ ದೃಶ್ಯ ಇದೆ. ಉಗ್ರಗಾಮಿಗಳು ಕಗ್ಗತ್ತಲೆಯ ವೇಳೆಯಲ್ಲಿ ಗಡಿಯ ಮುಳ್ಳುತಂತಿಯನ್ನು ಕತ್ತರಿಸಿ ನಂತರ ದಾಟಿ ಹೋಗುತ್ತಿರುವ ದೃಶ್ಯ ಈ ವಿಡಿಯೋದಲ್ಲಿ ಇದೆ. ಇವೆಲ್ಲವೂ ಎನ್​ಐಎ ತನಿಖಾ ವರದಿಗೆ ಹೆಚ್ಚು ಬಲ ಕೊಡುವ ಸಾಧ್ಯತೆ ಇದೆ.

    ಇದನ್ನೂ ಓದಿ: ಐದು ಟ್ರಿಲಿಯನ್ ಆರ್ಥಿಕತೆ ಸಾಧ್ಯವಾಗಲು ಭಾರತಕ್ಕೆ ಜಾಗತಿಕ ಮಟ್ಟದ ಬ್ಯಾಂಕ್​ಗಳು ಅಗತ್ಯ: ಸಿಇಎ

    ಇನ್ನು, ಪುಲ್ವಾಮ ದಾಳಿಗೆ ಬೇಕಾದ ಅಷ್ಟೊಂದು ಪ್ರಮಾಣದ ಸ್ಫೋಟಕಗಳು ಎಲ್ಲಿಂದ ಬಂದವು ಎಂಬ ಯಕ್ಷಪ್ರಶ್ನೆಗೆ ಎನ್​ಐಎ ತನ್ನ ಚಾರ್ಜ್​ಶೀಟ್​ನಲ್ಲಿ ಉತ್ತರ ನೀಡುವ ನಿರೀಕ್ಷೆ ಇದೆ. ದಾಳಿಗೆ ಬಳಸಿದ ಸ್ಫೋಟಕ ಯಾವುದು, ಎಲ್ಲಿಂದ ತಂದಿದ್ದು ಇತ್ಯಾದಿ ವಿವರಗಳು ಬಯಲಾಗಲಿವೆ. ನ್ಯೂಸ್18 ಈ ಹಿಂದೆ ಪ್ರಕಟಿಸಿದ ವರದಿಯೊಂದರಲ್ಲಿ, ಪುಲ್ವಾಮ ದಾಳಿಗೆ ಬಳಸಿದ್ದ ಸ್ಫೋಟಕ ಆರ್​ಡಿಎಕ್ಸ್ ಆಗಿದ್ದು, ಅದು ಪಾಕಿಸ್ತಾನದಲ್ಲಿ ಕೊಳ್ಳಲಾಗಿತ್ತು ಎಂದು ಅಧಿಕಾರಿಯೊಬ್ಬರ ಹೇಳಿಕೆ ಉಲ್ಲೇಖಿಸಿ ಹೇಳಲಾಗಿತ್ತು.

    “ದಾಳಿಕೋರರು ತಮ್ಮ ಗನ್ ಮತ್ತಿತರ ವಸ್ತುಗಳ ಜೊತೆಗೆ ಸ್ಫೋಟಕಗಳನ್ನೂ ಹೊತ್ತು ಬಂದಿದ್ದರು. ಒಟ್ಟು 20 ಕಿಲೋಗಿಂತ ಕಡಿಮೆ ತೂಕದ ಆರ್​ಡಿಎಕ್ಸ್ ಸ್ಫೋಟಕವನ್ನು ಬಳಕೆ ಮಾಡಲಾಗಿತ್ತು” ಎಂದು ಆ ಅಧಿಕಾರಿ ತಿಳಿಸಿದ್ದರು.

    ಇದನ್ನೂ ಓದಿ: ನವೆಂಬರ್ 2ಕ್ಕೆ ಭೂಮಿಗೆ ಬಡಿಯುತ್ತಾ ಈ ಕ್ಷುದ್ರಗ್ರಹ?; ಚಾನ್ಸ್ ಇದೆ ಅಂತಿದೆ ನಾಸಾ

    ಆರೋಪಿಯ ಫೋನ್​ನಿಂದ ಸಾಕ್ಷ್ಯಗಳು ಸಿಕ್ಕಿರುವುದರ ಜೊತೆಗೆ ಜಮ್ಮು ಸೆಕ್ಟರ್​ನಲ್ಲಿ ಪಾಕಿಸ್ತಾನದಿಂದ ಗಡಿದಾಟಿ ಭಾರತಕ್ಕೆ ಬಂದ ನುಸುಳುಕೋರರ ಫೂಟ್​ಪ್ರಿಂಟ್​ಗಳು ಸಹ ಸಿಕ್ಕಿವೆ. ಕುತೂಹಲವೆಂದರೆ ಪುಲ್ವಾಮದಲ್ಲಿ ಸಿಆರ್​ಪಿಎಫ್ ಟ್ರಕ್ ಮೇಲೆ ಸ್ಫೋಟಕಗಳಿದ್ದ ಕಾರನ್ನು ಗುದ್ದಿಸಿದ್ದ ಅದಿಲ್ ಅಹ್ಮದ್ ದರ್ ಸ್ಥಳೀಯ ಕಾಶ್ಮೀರೀ ವ್ಯಕ್ತಿಯೇ. ದಾಳಿಗೆ ಬಳಸಲಾದ ಐಇಡಿಯನ್ನು ಸ್ಥಳೀಯವಾಗಿ ಲಭ್ಯವಾದ ಅಮೋನಿಯಮ್ ನೈಟ್ರೇಟ್ ಹಾಗೂ ನೈಟ್ರೋ ಕ್ಲಿಸೆರಿನ್ ಬಳಸಿ ಅಸೆಂಬಲ್ ಮಾಡಲಾಗಿತ್ತು. ಆದರೆ, 20 ಕಿಲೋ ಆರ್​ಡಿಎಕ್ಸ್ ಸ್ಫೋಟಕವನ್ನು ಪಾಕಿಸ್ತಾನದಿಂದ ತಂದಿರುವ ಶಂಕೆ ಇದೆ. ದಾಳಿಯಲ್ಲಿ ಪಾಕಿಸ್ತಾನದ ಪಾತ್ರ ಇರುವುದಕ್ಕೆ ಇದು ಪ್ರಮುಖ ಸಾಕ್ಷಿಯಾಗಬಹುದು.
    Published by:Vijayasarthy SN
    First published: