ಲೋಕಲ್​ ವಸ್ತುಗಳನ್ನು ಬಳಸಿ ಬಾಂಬ್​ ತಯಾರಿಸುತ್ತಿದ್ದೆ: ಭಯೋತ್ಪಾದಕನಾದ ಡಿಪ್ಲೊಮೊ ಪದವೀಧರ

ಮುಖ್ಯ ಆರೋಪಿ ವಿದ್ಯಾವಂತನಾಗಿದ್ದು, ಡಿಪ್ಲೊಮೋ ಪದವಿ ಪಡೆದುಕೊಂಡಿದ್ದಾನೆ. ಮೊದಲು ಲ್ಯಾಬ್​ ಟೆಕ್ನಿಶಿಯನ್​ ಆಗಿ ಕೆಲಸ ಮಾಡುತ್ತಿದ್ದ, ನಂತರ ತನ್ನದೇ ಆದ ಸ್ವಂತ ಬ್ಯಾಟರಿ ಅಂಗಡಿಯನ್ನು ನಡೆಸುತ್ತಿದ್ದ

ಸಾಂದರ್ಭಿಕ ಚಿತ್ರ

ಸಾಂದರ್ಭಿಕ ಚಿತ್ರ

  • Share this:
    ಉತ್ತರಪ್ರದೇಶದ ಭಯೋತ್ಪಾದನಾ ನಿಗ್ರಹ ದಳ (ಎಟಿಎಸ್)  ಅಲ್-ಖೈದಾ ಭಯೋತ್ಪಾದನಾ ಸಂಘಟನೆ ಜೊತೆಗೆ ಸಂಪರ್ಕ ಹೊಂದಿದ  ಘಟಕವನ್ನು ಭೇದಿಸಿದ ನಂತರ ಪ್ರಮುಖ ಸಂಗತಿಗಳು ಬೆಳಕಿಗೆ ಬಂದಿವೆ ಎಂದು ತಿಳಿಸಿದೆ. ಭಾನುವಾರ ಲಕ್ನೋದಲ್ಲಿ ಆರೋಪಿಗಳನ್ನು ಬಂಧಿಸಲಾಗಿತ್ತು. ಒಂದೂವರೆ ವರ್ಷದ ಹಿಂದೆ ಮೂಲ  ಹ್ಯಾಂಡ್ಲರ್‌ನೊಂದಿಗೆ ಸಂಪರ್ಕಕ್ಕೆ ಬಂದಿದ್ದಂತಹ ಈ ಆರೋಪಿಗಳಿಗೆ, ಹ್ಯಾಂಡ್ಲರ್​ ಸಾಕಷ್ಟು ಕೆಲಸಗಳನ್ನು ಮಾಡಿಸಿದ್ದ ಅಲ್ಲದೇ ಸಾಮಾನ್ಯವಾಗಿ ಲಭ್ಯವಿರುವ ಪದಾರ್ಥಗಳನ್ನು ಬಳಸಿಕೊಂಡು ಬಾಂಬುಗಳನ್ನು ತಯಾರಿಸುವಂತೆ ಸೂಚನೆ ನೀಡಿದ್ದ ಎನ್ನಲಾಗಿದೆ.

    ಎಟಿಎಸ್​ ಬಂದಿಸಿರುವ ಇಬ್ಬರು ಉಗ್ರರು ನಗರದ ಕಾಕೋರಿ ಪ್ರದೇಶಕ್ಕೆ ಸೇರಿದವರು.  ಭಾನುವಾರ ವಶಕ್ಕೆ ಪಡೆದಿದ್ದ ಎಟಿಎಸ್​​ ಸಾಕಷ್ಟು ವಿಚಾರಣೆಗೆ ಇವರನ್ನು ಒಳಪಡಿಸಿತ್ತು.

    ಉತ್ತರಪ್ರದೇಶದ ಭಯೋತ್ಪಾದನಾ ನಿಗ್ರಹ ದಳ ಬಂಧಿಸಿದ ಇಬ್ಬರು ಉಗ್ರರ ಬಂಧನದ ಅವಧಿ 14 ದಿನಗಳಾಗಿದ್ದು, ಮಂಗಳವಾರದಿಂದ ಮತ್ತಷ್ಟು ವಿಚಾರಣೆಗೆ ಒಳಪಡಿಸುವ ಸಾಧ್ಯತೆ ಇದೆ.

    ಮುಖ್ಯ ಆರೋಪಿ ವಿದ್ಯಾವಂತನಾಗಿದ್ದು, ಡಿಪ್ಲೊಮೋ ಪದವಿ ಪಡೆದುಕೊಂಡಿದ್ದಾನೆ. ಮೊದಲು ಲ್ಯಾಬ್​ ಟೆಕ್ನಿಶಿಯನ್​ ಆಗಿ ಕೆಲಸ ಮಾಡುತ್ತಿದ್ದ, ನಂತರ ತನ್ನದೇ ಆದ ಸ್ವಂತ ಬ್ಯಾಟರಿ ಅಂಗಡಿಯನ್ನು ನಡೆಸುತ್ತಿದ್ದ ಎಂದು ತಿಳಿಸಲಾಗಿದೆ.

    ಅತ್ಯಂತ ಮುಂದುವರೆದ ಹಾಗೂ ಸುಧಾರಿತ ಬಾಂಬ್​ ಇವರನ್ನು ಬಂಧಿಸುವಾಗ ದೊರೆತಿದ್ದು, ಇದನ್ನು ಪೋಟ್ಯಾಶಿಯಂ ನೈಟ್ರೇಟ್​ ಮತ್ತು ಪಾಸ್ಪರಸ್​ ಬಳಸಿ ತಯಾರಿಸಲಾಗಿದೆ ಎಂದು ಎಟಿಎಸ್​ ತಿಳಿಸಿದೆ. ಇದನ್ನು ತಮ್ಮ ದುಷ್ಕೃತ್ಯಗಳಿಗೆ ಬಳಸಲು ಯೋಜಿಸಿದ್ದರು ಎಂದು ತನಿಖೆ ವೇಳೆ ತಿಳಿದಿದೆ.

    ಪ್ರಮುಖ ಆರೋಪಿಯು ತನ್ನ ಹ್ಯಾಂಡ್ಲರ್​ ಜೊತೆಗೆ ನಡೆಸಿದ ಸಂಭಾಷಣೆಯನ್ನು ತನಿಖೆ ವೇಳೆ ತಿಳಿಸಿದ್ದು, ಬಾಂಬ್​ ತಯಾರಿಸಲು ಪಾಸ್ಪರಸ್​ ದೊರೆಯುವುದು ಕಷ್ಟ ಎಂದಾಗ ಬೆಂಕಿ ಕಡ್ಡಿ ಬಳಸಿಕೊಂಡು ಅದರಲ್ಲಿರುವ ಪಾಸ್ಪರಸ್​ ಬಳಸಿಕೋ ಎಂದು ಹೇಳಿದ್ದ ಎನ್ನಲಾಗಿದೆ.

    ಅಲ್ಲದೇ ಈ ಜಾಲದಲ್ಲಿ ಇರುವ ಅನೇಕ ಜನರ ಹೆಸರನ್ನು ಇವನು ಬಾಯಿಬಿಟ್ಟಿದ್ದು ಅವರ ಶೋಧಕಾರ್ಯ ಮುಂದುವರೆದಿದೆ ಎಂದು ಮೂಲಗಳು ತಿಳಿಸಿವೆ.

    ಎಟಿಎಸ್​ ಮತ್ತೊಂದು ಮಾಹಿತಿಯನ್ನು ಬಿಡುಗಡೆ ಮಾಡಿದ್ದು, ಅಲ್​ಖೈದಾ ತನ್ನ ಭಯೋತ್ಪಾದನಾ ನೆಲೆಯನ್ನು ಪಾಕಿಸ್ತಾನ ಮತ್ತು ಅಫಘಾನಿಸ್ತಾನ ಗಡಿಯಲ್ಲಿ ನಿರ್ಮಿಸಿಕೊಂಡಿದ್ದು, ಅಲ್ಲಿಂದ ತನ್ನ ಕಾರ್ಯಾಚರಣೆ ನಡೆಸುತ್ತಿದೆ. ಅಲ್ಲದೇ ಭಾರತದ ಯುವಕರನ್ನು ತನ್ನ ದುಷ್ಕೃತ್ಯಕ್ಕೆ ಬಳಸಿಕೊಳ್ಳಲು ತಯಾರಿ ನಡೆಸುತ್ತಿದೆ ಎಂದು ಹೇಳಿದೆ.

    ಅಲ್ ಖೈದಾದ ಒಂದು ಅಂಗವಾದ ಅನ್ಸರ್ ಘಜ್ವತ್-ಉಲ್-ಹಿಂದ್ (ಎಜಿಎಚ್) ಅಡಿಯಲ್ಲಿ ಈ ಮಾದರಿಯನ್ನು ಸಿದ್ಧಪಡಿಸಲಾಗುತ್ತಿದೆ, ಭಯೋತ್ಪಾದಕ ಚಟುವಟಿಕೆಗಳನ್ನು ನಡೆಸಲು ಇದನ್ನು ಸ್ಥಾಪಿಸಲಾಗಿದೆ ಎಂದು ಪೊಲೀಸರು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

    ಬಂಧಿತರನ್ನು ಮಿನ್ಹಾಜ್ ಅಹ್ಮದ್ ಮತ್ತು ಮಾಸಿರುದ್ದೀನ್ ಅಕ್ ಮುಶೀರ್ ಎಂದು ಗುರುತಿಸಲಾಗಿದೆ. ಮೂರನೇ ಆರೋಪಿಯನ್ನು ಶಕೀಲ್ ಎಂದು ಗುರುತಿಸಲಾಗಿದೆ. ಆಗಸ್ಟ್ 15 ರ ಮೊದಲು ಲಕ್ನೋ ಸೇರಿದಂತೆ ಉತ್ತರ ಪ್ರದೇಶದ ವಿವಿಧ ನಗರಗಳಲ್ಲಿ ಭಯೋತ್ಪಾದಕ ಚಟುವಟಿಕೆಗಳನ್ನು ನಡೆಸಲು ಮೂವರು ಆಮ್​ಖೈದಾದ ಭಯೋತ್ಪಾದನಾ ನೆಲೆಯಾದ ಹಲ್ಮಾಂಡಿಯಿಂದ ಸೂಚನೆಗಳನ್ನು ಪಡೆಯುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

    ಎಟಿಎಸ್ ಕಮಾಂಡೋಗಳು ಮಿನ್ಹಾಜ್ ಮತ್ತು ಮಸಿರುದ್ದೀನ್  ಇರುವ ಮನೆಯನ್ನು ಸುತ್ತುವರಿದು ಬಂಧಿಸಲಾಯಿತು. ಬಾಂಬ್ ನಿಗ್ರಹ ದಳವನ್ನು ಸ್ಥಳಕ್ಕೆ ಕರೆಸಲಾಯಿತು. ಐಜಿ ಜಿಕೆ ಗೋಸ್ವಾಮಿ ನೇತೃತ್ವದ ಈ ಕಾರ್ಯಾಚರಣೆಯಲ್ಲಿ ಈವರೆಗೆ ಎರಡು ಪ್ರೆಶರ್ ಕುಕ್ಕರ್ ಬಾಂಬ್‌ಗಳು, ಟೈಮ್ ಬಾಂಬ್‌ಗಳು ಮತ್ತು ಬೃಹತ್ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ.

    ಅನೇಕ ದಿನಗಳಿಂದ ಈ ಮನೆ ಮೇಲೆ ಕಣ್ಣಿಟ್ಟಿದ್ದ ಎಟಿಎಸ್​ ಕೊನೆಗೂ ಭಯೋತ್ಪಾದಕರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ.

    ಇದನ್ನೂ ಓದಿ: SBI ಗ್ರಾಹಕರೇ ಎಚ್ಚರ..! ಬ್ಯಾಂಕ್​ನಿಂದ ಬಂದ ಹೊಸ ವಾರ್ನಿಂಗ್​ ಬಗ್ಗೆ ನೀವು ತಿಳಿಯಲೇಬೇಕು

    ಮಾಹಿತಿ ಖಚಿತವಾದ ನಂತರ ಎಟಿಎಸ್ ಭಾನುವಾರ ಶೋಧ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತ್ತು. ಸ್ಥಳದಲ್ಲೇ ಸ್ಥಳೀಯ ಪೊಲೀಸರು ಕೂಡ ಹಾಜರಿದ್ದರು. ಎಟಿಎಸ್ ಕಾಕೋರಿ ಪ್ರದೇಶವನ್ನು ಮೊಹರು ಮಾಡಿ ಹತ್ತಿರದ ಮನೆಗಳನ್ನು ಸ್ಥಳಾಂತರಗೊಳಿಸಿತು.

    ನ್ಯೂಸ್​​​18 ಕನ್ನಡ ಕಳಕಳಿ: ಕೊರೋನಾ ಪಾಸಿಟಿವ್​ ಕೇಸ್​ಗಳ ಸಂಖ್ಯೆ ರಾಜ್ಯದಲ್ಲಿ ತಗ್ಗಿದೆಯಾದರೂ ಸೋಂಕಿನ ಅಪಾಯದಿಂದ ಸಂಪೂರ್ಣವಾಗಿ  ಇನ್ನೂ ಯಾರೂ ಸುರಕ್ಷಿತರಲ್ಲ. ಹೀಗಾಗಿ ಪ್ರತಿಯೊಬ್ಬರು ಕೋವಿಡ್​​ ನಿಯಮಗಳಾದ ಮಾಸ್ಕ್​​ ಧರಿಸುವುದು, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದನ್ನು ಮರೆಯಬಾರದು. ಆದಷ್ಟು ಶೀಘ್ರವೇ ಲಸಿಕೆ ಪಡೆದು ಸೋಂಕಿನ ವಿರುದ್ಧದ ಯುದ್ಧದಲ್ಲಿ ಪ್ರತಿಯೊಬ್ಬರು ಕೈ ಜೋಡಿಸಬೇಕು.
    Published by:HR Ramesh
    First published: