Zambian: ಜಾಂಬಿಯಾದಲ್ಲಿ 27 ವಲಸಿಗರ ಶವ ಪತ್ತೆ, ಮುಚ್ಚಿದ ಟ್ರಕ್‌ನಲ್ಲಿ ಉಸಿರುಗಟ್ಟಿ ಮೃತಪಟ್ಟಿರುವ ಶಂಕೆ!

ಲುಸಾಕಾ(ಡಿ.12): ಜಾಂಬಿಯಾ (Zambian) ರಾಜಧಾನಿ ಲುಸಾಕಾದಲ್ಲಿ (Lusaka) ಭಾನುವಾರ 27 ಮಂದಿಯ ಮೃತದೇಹಗಳು ಪತ್ತೆಯಾಗಿವೆ. ಇವರೆಲ್ಲರೂ ಇಥಿಯೋಪಿಯನ್ (Ethiopians) ಪ್ರಜೆಗಳೆಂಬ ಅನುಮಾನ ವ್ಯಕ್ತವಾಗಿದೆ. ಇದನ್ನು ಪೊಲೀಸರು ಖಚಿತಪಡಿಸಿದ್ದಾರೆ. ಉಪ ಪೊಲೀಸ್ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಡೆನ್ನಿ ಮ್ವಾಲೆ ಹೇಳಿಕೆಯಲ್ಲಿ, '20 ರಿಂದ 38 ವರ್ಷದೊಳಗಿನ ಎಲ್ಲಾ ಪುರುಷರ ಶವಗಳನ್ನು ಅಪರಿಚಿತ ವ್ಯಕ್ತಿಗಳು ಲುಸಾಕಾದ ಎಂಗ್ವೆರೆರೆ ಪ್ರದೇಶದಲ್ಲಿ ಎಸೆದಿದ್ದಾರೆ' ಎಂದು ಪೊಲೀಸ್ ತನಿಖೆಯಲ್ಲಿ ಬಯಲಾಗಿದೆ ಎಂದು ಹೇಳಿದರು. ಅವರು ಇಥಿಯೋಪಿಯನ್ ಪ್ರಜೆಗಳಾಗಿದ್ದರು. ಒಬ್ಬ ವ್ಯಕ್ತಿ ಇನ್ನೂ ಜೀವಂತವಾಗಿದ್ದು, ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ ಎಂದು ಅವರು ಹೇಳಿದ್ದಾರೆ.

ಜಾಂಬಿಯಾ 18 ಮಿಲಿಯನ್ ಜನಸಂಖ್ಯೆಯನ್ನು ಹೊಂದಿದೆ ಮತ್ತು ಇದು ಹಲವು ವರ್ಷಗಳಿಂದ ಅಕ್ರಮ ಮಾನವ ಕಳ್ಳಸಾಗಣೆ ವಿರುದ್ಧ ಹೋರಾಡುತ್ತಿದೆ. ವಿಶ್ವಸಂಸ್ಥೆಯ ನಿರಾಶ್ರಿತರ ಸಂಸ್ಥೆ, UNHCR ಪ್ರಕಾರ, ಜಾಂಬಿಯಾ ನೆರೆಯ ರಾಷ್ಟ್ರಗಳಾದ ಕಾಂಗೋ, ಬುರುಂಡಿ, ಅಂಗೋಲಾ ಮತ್ತು ರುವಾಂಡಾದಿಂದ 105,000 ಕ್ಕೂ ಹೆಚ್ಚು ನಿರಾಶ್ರಿತರಿಗೆ ಆತಿಥ್ಯ ವಹಿಸಿದೆ.