Aishwarya Dongre: ಮಫ್ತಿಯಲ್ಲಿದ್ದ ತಮ್ಮನ್ನ ಗುರುತಿಸದ ಮಹಿಳಾ​ ಕಾನ್ಸಟೇಬಲ್​ಗೆ ಶಿಕ್ಷೆ ನೀಡಿದ ಡಿಸಿಪಿ ಐಶ್ವರ್ಯಾ

ಕೊಚ್ಚಿ (ಜ. 14):   ಸಾಮಾನ್ಯ ಉಡುಗೆಯಲ್ಲಿ (ಮಪ್ತಿ) ಬಂದಿದ್ದ ತನ್ನನ್ನು ಗುರುತಿಸದ ಮಹಿಳಾ ಪೊಲೀಸ್​ ಕಾನ್ಸಟೇಬಲ್​ಗೆ ಕೊಚ್ಚಿಯ ಡಿಸಿಪಿ ಅಧಿಕಾರಿ ಐಶ್ವರ್ಯಾ ಡೊಂಗ್ರೆ ದಂಡನಾತ್ಮಕ ಶಿಕ್ಷೆಗೆ ಒಳಪಡಿಸಿರುವ ಪ್ರಕರಣ ಕೇರಳದಲ್ಲಿ ವರದಿಯಾಗಿದೆ. ಕೊಚ್ಚಿಯ ಡಿಸಿಪಿ ಐಶ್ವರ್ಯ ಡೊಂಗ್ರೆ ಅವರನ್ನು ಕಚೇರಿಯ ಮಹಿಳಾ ಪೊಲೀಸ್​ ಗುರುತಿಸುವಲ್ಲಿ ವಿಫಲರಾಗಿದ್ದಾರೆ. ಇದರಿಂದ ಸಿಟ್ಟಿಗೆದ್ದ ಡಿಸಿಪಿ ಐಶ್ವರ್ಯ ಮಹಿಳಾ ಪೊಲೀಸ್​ ಕಾನ್ಸಟೇಬಲ್​ನನ್ನು ಎರಡು ದಿನ ಟ್ರಾಫಿಕ್​ ಡ್ಯೂಟಿ ನಿರ್ವಹಿಸುವಂತೆ ಶಿಕ್ಷೆ ವಿಧಿಸಿದ್ದಾರೆ. ಈ ಪ್ರಕರಣಕ್ಕೆ ಕೇರಳದಲ್ಲಿ ಹಲವರು ವಿರೋಧ ವ್ಯಕ್ತಪಡಿಸಿದ್ದಾರೆ. ಆದರೆ, ಅಧಿಕಾರಿ ಐಶ್ವರ್ಯ ಮಾತ್ರ ತಮ್ಮ ಕಾರ್ಯವನ್ನು ಸಮರ್ಥಿಸಿ ಕೊಂಡಿದ್ದಾರೆ. ಅಷ್ಟಕ್ಕೂ ಈ ಎಡವಟ್ಟಾಗಲು ಕಾರಣ ಮಹಿಳಾ ಅಧಿಕಾರಿ ಮಫ್ತಿಯಲ್ಲಿ ಮಾಸ್ಕ್​ ಧರಿಸಿ ಬಂದಿದ್ದರಿಂದ ಅವರನ್ನು ಮಹಿಳಾ ಸೆಂಟ್ರಿ ಅಧಿಕಾರಿ (ಠಾಣೆಯ ಮುಂದೆ ಕಾವಲು ನಿಲ್ಲುವವರು) ಗುರುತು ಹಿಡಿದಿಲ್ಲ.

ಜ. 1ರಿಂದ ಕೊಚ್ಚಿ ಡಿಸಿಪಿಯಾಗಿ ಯುವ ಐಪಿಎಸ್​ ಅಧಿಕಾರಿ ಐಶ್ವರ್ಯಾ ಕರ್ತವ್ಯ ವಹಿಸಿಕೊಂಡಿದ್ದಾರೆ. ಭಾನುವಾರ ಇಲ್ಲಿನ ಉತ್ತರ ಠಾಣೆಗೆ ಅವರು ಪರಿಶೀಲನೆಗಾಗಿ ಮಫ್ತಿ ಬಟ್ಟೆಯಲ್ಲಿ ಬಂದಿದ್ದಾರೆ. ಈ ಸಂದರ್ಭದಲ್ಲಿ ತಮ್ಮ ಕಾರನ್ನು ಅವರು ಠಾಣೆಯಿಂದ ಕೊಂಚ ದೂರು ನಿಲ್ಲಿಸಿದ್ದರು. ಈ ಹಿನ್ನಲೆ ಸೆಂಟ್ರಿ ಕರ್ತವ್ಯ ನಿರ್ವಹಿಸುತ್ತಿದ್ದ ಮಹಿಳಾ ಕಾನ್ಸ್​ಟೇಬಲ್​ ಇವರನ್ನು ತಡೆದು ನಿಲ್ಲಿಸಿ, ಠಾಣೆಗೆ ಬಂದ ಕಾರಣ ವಿಚಾರಿಸಿದ್ದಾರೆ.

ತಾವು ಐಪಿಎಸ್​ ಅಧಿಕಾರಿ ಎಂಬುದನ್ನು ಮಹಿಳಾ ಕಾನ್ಸಟೇಬಲ್​ ಪತ್ತೆ ಮಾಡುವಲ್ಲಿ ವಿಫಲರಾದ ಹಿನ್ನಲೆ ಸಿಟ್ಟಿಗೆದ್ದ ಅಧಿಕಾರಿ ಸೆಂಟ್ರಿ ಡ್ಯೂಟಿ ಬದಲು ಎರಡು ದಿನ ಟ್ರಾಫಿಕ್​ ಡಿಪಾರ್ಟ್​ಮೆಂಟ್​ಗೆ ಆಕೆಯನ್ನು ಶಿಕ್ಷೆ ಮೇಲೆ ಕಳುಹಿಸಿದ್ದಾರೆ.

ಇದನ್ನು ಓದಿ: ಶಬರಿಮಲೆಯಲ್ಲಿ ಮಕರ ಜ್ಯೋತಿ ದರ್ಶನ ಪಡೆದ ಅಯ್ಯಪ್ಪ ಭಕ್ತರು

ಈ ಕುರಿತು ಮಾತನಾಡಿದ ಐಪಿಎಸ್​ ಅಧಿಕಾರಿ ಐಶ್ವರ್ಯಾ, ಸೆಂಟ್ರಿಗಳು ಯಾರು ಅಧಿಕಾರಿ, ಯಾರು ಸಾಮಾನ್ಯರು ಎಂಬ ಬಗ್ಗೆ ಅರಿವನ್ನು ಹೊಂದಿರಬೇಕು. ಕಾರಿನಲ್ಲಿ, ಐಪಿಎಸ್​ ಧಿರಿಸಿನಲ್ಲಿ ಬಾರದಿದ್ದ ಮಾತ್ರಕ್ಕೆ ಗುರುತು ಪತ್ತೆ ಮಾಡದಿದ್ದರೆ ಇದು ಅವರ ಕರ್ತವ್ಯ ಲೋಪ. ಹಿರಿಯ ಅಧಿಕಾರಿಗಳು ಮಫ್ತಿಯಲ್ಲಿದ್ದರು ಅವರನ್ನು ಕಿರಿಯ ಅಧಿಕಾರಿಗಳು ಪತ್ತೆ ಮಾಡಬೇಕು ಎಂಬ ಕಾನೂನು ಇದೆ ಎಂದಿದ್ದಾರೆ.

ಆದರೆ, ಯುವ ಅಧಿಕಾರಿ ತೆಗೆದುಕೊಂಡ ಈ ನಿರ್ಣಯ ಕೊಂಚ ಕಠೋರವಾಗಿದೆ ಎಂದ ಮಾತು ಕೇಳಿಬಂದಿದೆ. ಇತ್ತೀಚೆಗಷ್ಟೇ ಐಶ್ವರ್ಯಾ ಇಲ್ಲಿಗೆ ಅಧಿಕಾರ ವಹಿಸಿಕೊಂಡಿದ್ದಾರೆ. ಈ ಹಿನ್ನಲೆ ಈ ರೀತಿ ತಪ್ಪಾಗಿದೆ. ಅವರು ಈ ರೀತಿ ಶಿಕ್ಷೆ ನೀಡುವ ಬದಲು ಮಹಿಳಾ ಕಾನ್ಸ್ಟೇಬಲ್​ಗೆ ಎಚ್ಚರಿಕೆ ನೀಡಬಹುದಿತ್ತು. ಅಲ್ಲದೇ ಮಾಸ್ಕ್​ ಧರಿಸಿದ್ದ ಕಾರಣ ಈ ಪ್ರಮಾದ ಆಗಿರಬಹುದು. ಡಿಸಿಪಿ ತಮ್ಮ ಮೇಲಾಧಿಕಾರಿ ಸಲಹೆ ಪಡೆದು ಶಿಕ್ಷೆ ವಿಧಿಸಬೇಕಿತ್ತು. ಈ ಹಿನ್ನಲೆ ಈ ಪ್ರಕರಣ ಕುರಿತು ಕಮಿಷನರ್​ಗೆ ವರದಿ ಮಾಡಲಾಗಿದೆ ಎಂದು ಕೇರಳ ಪೊಲೀಸ್​ ಸಂಘದ ಎರ್ನಾಕುಲಂ ಜಿಲ್ಲಾ ಕಾರ್ಯದರ್ಶಿ ತಿಳಿಸಿದ್ದಾರೆ.