Bitcoin - ಬಿಟ್​ಕಾಯಿನ್ ಪಾಸ್​ವರ್ಡ್ ಮರೆತು ಜನರು ಕಳೆದುಕೊಂಡ ಹಣ 10 ಲಕ್ಷ ಕೋಟಿಯಾ?

ಬಿಟ್ ಕಾಯಿನ್ ಎಂಬ ಕ್ರಿಪ್ಟೋಕರೆನ್ಸಿ ಜಾಲ ಇತ್ತೀಚೆಗೆ ಸಾಕಷ್ಟು ಸದ್ದು ಮಾಡುತ್ತಿದೆ. ನಾಡಿನ ಅಧಿಕೃತ ಕರೆನ್ಸಿಗೆ ಪರ್ಯಾಯವಾಗಿ ಇವು ವಹಿವಾಟಿಗೆ ಅನುವು ಮಾಡಿಕೊಡುತ್ತದೆ. ಈಗ ಬಿಟ್​ಕಾಯಿನ್​ಗಳ ಮೌಲ್ಯ ಇತ್ತೀಚೆಗೆ ಗಗನಕ್ಕೇರಿದೆ. ಒಂದು ಬಿಟ್ ಕಾಯಿನ್ ಬೆಲೆ ರೂಪಾಯಿಗೆ ಪರಿವರ್ತಿಸಿದರೆ 25 ಲಕ್ಷ ರೂ ಆಗುತ್ತದೆ. ಇದರ ಮೌಲ್ಯ ದಿನೇ ದಿನೇ ಹೆಚ್ಚಾಗುತ್ತಲೇ ಇದೆ. ಹೀಗಾಗಿ, ಜನರು ಬಿಟ್ ಕಾಯಿನ್ ಖರೀದಿಗೆ ಮುಗಿಬೀಳುತ್ತಿರುವುದು ಹೆಚ್ಚಾಗಿದೆ. ತಮ್ಮ ಬಿಟ್ ಕಾಯಿನ್ ಅಕೌಂಟ್​ಗೆ ಲಾಗಿನ್ ಆಗಲು ಸಾಧ್ಯವಾಗದೇ ಲಾಕೌಟ್ ಆಗುತ್ತಿರುವವರ ಸಂಖ್ಯೆ ಬಹಳ ಇದೆ. ಒಂದು ಅಂದಾಜು ಪ್ರಕಾರ, 140 ಬಿಲಿಯನ್ ಡಾಲರ್ ಮೌಲ್ಯದ ಬಿಟ್​ಕಾಯಿನ್​ಗಳಿಗೆ ಈಗ ವಾರಸುದಾರರೇ ಇಲ್ಲವಾಗಿದೆ. ಹೀಗೆ ಅನಾಥವಾಗಿರುವ ಬಿಟ್​ಕಾಯಿನ್ ಮೌಲ್ಯ ಸುಮಾರು 10 ಲಕ್ಷ ಕೋಟಿ ರೂ ಆಗಿದೆ. ಈ ಬಿಟ್ ಕಾಯಿನ್​ನ ಮಾಲೀಕರು ಬದುಕಿದ್ದರೂ ಪಾಸ್​ವರ್ಡ್ ಇಲ್ಲದೆಯೋ ಅಥವಾ ಹಾರ್ಡ್​ವೇರ್ ಇಲ್ಲದೆಯೋ ಇದನ್ನು ಪಡೆಯಲು ಸಾಧ್ಯವಾಗುತ್ತಿಲ್ಲ.

2008ರಿಂದಲೇ ಚಾಲನೆಗೆ ಬಂದ ಬಿಟ್ ಕಾಯಿನ್ ಬಹಳ ಸಂಕೀರ್ಣ ಎನಿಸುವ ಡಿಜಿಟಲ್ ಕರೆನ್ಸಿಯಾಗಿದೆ. ಅದರ ವ್ಯವಸ್ಥೆ ಕೂಡ ಬಹಳ ಜಟಿಲವಾದುದು, ರಹಸ್ಯವಾದುದು. ಒಂದು ಹಾರ್ಡ್​ವೇರ್​ನಲ್ಲಿ ಬಿಟ್​ಕಾಯಿನ್ ವ್ಯಾಲೆಟ್​ನ ಕೀಲಿಗಳು ಇರುತ್ತವೆ. ಈ ಹಾರ್ಡ್​ವೇರ್ ಅನ್ನು ತೆರೆಯಲು ಪಾಸ್​ವರ್ಡ್ ನೀಡಬೇಕಾಗುತ್ತದೆ. 10 ಬಾರಿ ಪಾಸ್​ವರ್ಡ್ ತಪ್ಪಾಗಿ ಹಾಕಿದರೆ ಹಾರ್ಡ್​ವೇರ್ ಸಂಪೂರ್ಣವಾಗಿ ಲಾಕ್ ಔಟ್ ಆಗುತ್ತದೆ. ನಮ್ಮ ಈಗಿನ ಅನೇಕ ಸೋಷಿಯಲ್ ಮೀಡಿಯಾ ಅಕೌಂಟ್​ಗಳಲ್ಲಿ ನಾವು ಪಾಸ್​ವರ್ಡ್ ರಿಕವರಿ ಮಾಡಲು ಅವಕಾಶ ಇರುವಂತೆ ಬಿಟ್​ಕಾಯಿನ್​ನಲ್ಲಿ ವ್ಯವಸ್ಥೆ ಇಲ್ಲ. ಹೀಗಾಗಿ, ಅನೇಕ ಮಂದಿ ಪಾಸ್​ವರ್ಡ್ ಮರೆತುಹೋಗಿ ಪರದಾಡುತ್ತಿದ್ದಾರೆ. ಇನ್ನೂ ಕೆಲವರು ವ್ಯಾಲೆಟ್ ಕೀಗಳಿರುವ ಹಾರ್ಡ್ ಡ್ರೈವ್ ಅನ್ನೇ ಕಳೆದುಕೊಂಡವರಿದ್ದಾರೆ.

ಇದನ್ನೂ ಓದಿ: Signal ಬಳಸಿ ಎಂದು ವಿಶ್ವದ ನಂ 1 ಶ್ರೀಮಂತ ಹೇಳಿದ್ದನ್ನ ತಪ್ಪಾಗಿ ಅರ್ಥೈಸಿಕೊಂಡ ಹೂಡಿಕೆದಾರರ ಫಜೀತಿ

ಬ್ರಿಟನ್​ನಲ್ಲಿ ವ್ಯಕ್ತಿಯೊಬ್ಬ 2013ರಲ್ಲಿ ಇಂಥದ್ದೊಂದು ಹಾರ್ಡ್ ಡ್ರೈವ್ ಅನ್ನು ಆಕಸ್ಮಿಕವಾಗಿ ಕಸದ ಬುಟ್ಟಿಗೆ ಎಸೆದಿದ್ದ. ಅದು ಅಂತಿಮವಾಗಿ ಡಂಪಿಂಗ್ ಯಾರ್ಡ್ ಸೇರಿಕೊಂಡಿತ್ತು. ಯಾವಾಗ ಬಿಟ್ ಕಾಯಿನ್​ಗಳ ಬೆಲೆ ಹೆಚ್ಚಳವಾಯಿತೋ ಆ ವ್ಯಕ್ತಿ 2017ರಲ್ಲಿ ಎಚ್ಚೆತ್ತುಕೊಳ್ಳುತ್ತಾನೆ. ಆಗ ಆತನ ಬಳಿ ಇದ್ದ 7,500 ಬಿಟ್ ಕಾಯಿನ್​ಗಳ ಮೌಲ್ಯ 127 ಮಿಲಿಯನ್ ಡಾಲರ್ ಆಗಿತ್ತು. ಇಷ್ಟು ಅಪಾರ ಮೌಲ್ಯದ ಬಿಟ್ ಕಾಯಿನ್​ಗಳ ಕೀಲಿ ಇರುವ ಹಾರ್ಡ್ ಡ್ರೈವ್ ಅನ್ನು ಡಂಪಿಂಗ್ ಯಾರ್ಡ್​​ನಲ್ಲಿ ಶೋಧಿಸಿಕೊಡುವಂತೆ ಈಗ ಪಾಲಿಕೆಗೆ ಮನವಿ ಮಾಡಿದ್ದ. ಆದರೆ, ಅದಕ್ಕೆ ಪಾಲಿಕೆ ಒಪ್ಪಲಿಲ್ಲ. ಈತ ಕೋಟಿ ಕೋಟಿ ಹಣ ಎದುರಿಗಿದ್ದರೂ ಪಡೆಯಲು ಸಾಧ್ಯವಾಗದೇ ಕೈ ಕೈ ಹಿಸುಕಿಕೊಂಡು ಕೂತಿದ್ದಾನೆ.

ಇಂಥ ಪ್ರಕರಣಗಳು ಹೆಚ್ಚಾಗುತ್ತಿರುವಂತೆಯೇ ಬಿಟ್ ಕಾಯಿನ್​ನ ವ್ಯಾಲೆಟ್ ತೆರೆಯಲು 12 ಪದಗಳ ರಿಕವರಿ ಪದಗುಚ್ಛ ಸೃಷ್ಟಿಸುವ ವ್ಯವಸ್ಥೆಯನ್ನು ಈ ವರ್ಷ ಜಾರಿಗೆ ತರಲಾಗುತ್ತಿದೆ.