ಸಿಎಎ ಗದ್ದಲದಲ್ಲಿಯೇ ಮುಗಿದ ಬಜೆಟ್​ ಅಧಿವೇಶನ; ಮೋದಿ, ಶಾ ರಾಜೀನಾಮೆಗೆ ಪ್ರತಿಪಕ್ಷಗಳು ಪಟ್ಟು

ನವದೆಹಲಿ (ಮಾ.02): ಮೂರು ವಾರಗಳ ವಿರಾಮದ ಬಳಿಕ ಕೇಂದ್ರ ಬಜೆಟ್​ ಅಧಿವೇಶನ ಆರಂಭವಾಗಿದ್ದು, ಸಿಎಎ ಗದ್ದಲದಲ್ಲಿ ಉಭಯ ಕಲಾಪದ ಸಮಯ ವ್ಯರ್ಥವಾಗಿದೆ.

ದೇಶದಲ್ಲಿ ಪೌರತ್ವ ಪರ ವಿರೋಧಗಳ ಹೋರಾಟಕ್ಕೆ 46 ಜನ ಸಾವನ್ನಪ್ಪಿದ್ದು, ಈ ಘಟನೆ ಹೊಣೆ ಹೊತ್ತು ಪ್ರಧಾನಿ ನರೇಂದ್ರ ಮೋದಿ ಹಾಗೂ ಕೇಂದ್ರ ಸಚಿವ ಅಮಿತ್​ ಶಾ ರಾಜೀನಾಮೆ ನೀಡಬೇಕು ಎಂದು ಪ್ರತಿಪಕ್ಷಗಳು ಆಗ್ರಹಿಸಿದವು.

ದೆಹಲಿ ಸಿಎಎ ಹಿಂಸಾಚಾರ ಕುರಿತು ಚರ್ಚಿಸಲು ನಾಲ್ಕು ದಿನಗಳ ಕಾಲಾವಕಾಶ ನೀಡಬೇಕು ಎಂದು ಆಗ್ರಹಿಸಿ ಎರಡು ಸದನದ ಸದಸ್ಯರು ಸ್ಪೀಕರ್​ಗೆ ಮನವಿ ಮಾಡಿದರು. ಆದರೆ, ಇದಕ್ಕೆ ಅವಕಾಶ ನೀಡದ ಸ್ಪೀಕರ್ ಓಂ ಬಿರ್ಲಾ, ಬಜೆಟ್​ ಮೇಲಿನ ಚರ್ಚೆ ಬಿಟ್ಟು ಪೌರತ್ವ ತಿದ್ದುಪಡಿ ಕಾಯ್ದೆ ಕುರಿತ ವಾದ ವಿವಾದಗಳು ಸರಿಯಲ್ಲ. ಪರಿಸ್ಥಿತಿ ಕೊಂಚ ಸುಧಾರಿಸಲಿ. ಇದಾದ ಬಳಿಕ ಈ ಕುರಿತು ಚರ್ಚೆ ನಡೆಸೋಣ ಎಂದರು.

ಈ ವೇಳೆ ಗದ್ದಲ ಕಡಿಮೆಯಾಗದ ಹಿನ್ನೆಲೆಯಲ್ಲಿ ಕೊಂಚ ಕಾಲ ಸದನವನ್ನು ಮುಂದೂಡಲಾಯಿತಾದರೂ, ಮತ್ತೆ ಸದನದಲ್ಲಿ ಇದೇ ಹೇಳಿಕೆಗಳು ಪ್ರತಿಧ್ವನಿಸಿದವು. ಈ ಹಿನ್ನೆಲೆ ಲೋಕಸಭೆಯನ್ನು ಸಂಜೆ ನಾಲ್ಕು ಗಂಟೆವರೆಗೆ ಮುಂದೂಡಲಾಯಿತು. ಇನ್ನು  ರಾಜ್ಯಸಭೆಯಲ್ಲಿ ಕೂಡ ಕಾಂಗ್ರೆಸ್​, ಟಿಎಂಸಿ, ಎಸ್​ಪಿ, ಬಿಎಸ್​ಪಿ ಮತ್ತು ಡಿಎಂಕೆ ಈ ವಿಷಯ ಕುರಿತು ಚರ್ಚೆಗೆ ಆಗ್ರಹಿಸಿದರು. ಪ್ರತಿಪಕ್ಷಗಳನ್ನು ಸಮಾಧಾನಿಸುವಲ್ಲಿ ರಾಜ್ಯಸಭೆ ಚೇರ್ಮನ್​ ವೆಂಕಯ್ಯ ನಾಯ್ಡು ವಿಫಲವಾದ ಹಿನ್ನೆಲೆ ನಾಳೆಗೆ ಕಲಾಪವನ್ನು ಮುಂದೂಡಲಾಗಿದೆ.

ಇದನ್ನು ಓದಿ: ಅಮಿತ್ ಶಾ ಕೋಲ್ಕತ್ತಾ ರ‍್ಯಾಲಿಯಲ್ಲಿ ವಿವಾದಾತ್ಮಕ ‘ಗೋಲಿ ಮಾರೊ..’ ಘೋಷಣೆ; 3 ಜನ ಆರೋಪಿಗಳ ಬಂಧನ

ದೆಹಲಿಯಲ್ಲಿ ಸಿಎಎ ಕಿಚ್ಚು ಹೊತ್ತು ಉರಿಯುತ್ತಿದೆ. ಆದರೆ, ಕೇಂದ್ರ ಸರ್ಕಾರ ಮಲಗಿದೆ. ಇದರ ಹೊಣೆ ಹೊತ್ತು ಮೋದಿ, ಶಾ ರಾಜೀನಾಮೆ ನೀಡಬೇಕು ಎಂದು ಪಟ್ಟು ಹಿಡಿದರು. ಈ ವೇಳೆ ಮಧ್ಯಪ್ರವೇಶಿದ ರಾಜ್ಯ ಸಭಾ ಚೇರ್ಮನ್​ ವೆಂಕಯ್ಯ ನಾಯ್ಡು, ಖಂಡಿತವಾಗಿ ಇದು ಚರ್ಚೆ ಮಾಡಲು ಪ್ರಮುಖ ವಿಷಯ. ಇದನ್ನು ಚರ್ಚಿಸಲೇಬೇಕು. ಇದಕ್ಕೆ ಚರ್ಚಿಸಲು ಸಮಯ ನೀಡುತ್ತೇವೆ ಎಂದರು.