Winter Session: ಕೋವಿಡ್​-19 ಹಿನ್ನಲೆ ಸಂಸತ್​ ಚಳಿಗಾಲ ಅಧಿವೇಶನ ರದ್ದು

ನವದೆಹಲಿ (ಡಿ.15): ಕೊರೋನಾವೈರಸ್​ ಸೋಂಕಿನ ಹಿನ್ನಲೆ ಈ ಬಾರಿ ಚಳಿಗಾಲ ಅಧಿವೇಶನವನ್ನು ರದ್ದುಮಾಡಲಾಗಿದೆ ಎಂದು ಸರ್ಕಾರದ ಅಧಿಕೃತ ಮೂಲಗಳು ತಿಳಿಸಿವೆ. ಸೋಂಕು ಹರಡುವುದನ್ನು ತಡೆಯುವ ಉದ್ದೇಶದಿಂದ ಈ ಬಾರಿ ಚಳಿಗಾಲ ಅಧಿವೇನ ನಡೆಸದಿರಲು ತೀರ್ಮಾನಿಸಲಾಗಿದೆ. ಈ ಕುರಿತು ಲೋಕಸಭಾ ಕಾಂಗ್ರೆಸ್​ ನಾಯಕ ಅಧಿರ್​ ರಂಜನ್​ ಚೌಧರಿ ಅವರಿಗೆ ಸಂಸದೀಯ ವ್ಯವಹಾರಗಳ ಸಚಿವ ಪ್ರಲ್ಹಾದ್​ ಜೋಶಿ ತಿಳಿಸಿದ್ದಾರೆ. ಚಳಿಗಾಲದ ಅಧಿವೇಶನದ ಬದಲು ಸರ್ಕಾರ ಜನವರಿಯಲ್ಲಿ ಬಜೆಟ್​ ಅಧಿವೇಶನ ನಡೆಸುವ ಇಚ್ಛೆ ವ್ಯಕ್ತಪಡಿಸಿದೆ.  ದೆಹಲಿಯ ಗಡಿಗಳಲ್ಲಿ ಹೊಸ ಕೃಷಿ ಮಸೂದೆ ರದ್ದುಪಡಿಸುವಂತೆ ಕೋರಿ ರೈತರು ನಡೆಸುತ್ತಿರುವ ಪ್ರತಿಭಟನೆ ಕುರಿತು ಚರ್ಚಿಸಲು ಅಧಿವೇಶನ ಕರೆಯುವಂತೆ ಒತ್ತಾಯಿಸಿ ಕಾಂಗ್ರೆಸ್​ ನಾಯಕ ಅಧಿರ್​ ರಂಜನ್​ ಚೌದರಿ ಪತ್ರ ಬರೆದಿದ್ದರು. 

ಇದಕ್ಕೆ ಉತ್ತರಿಸಿರುವ ಸಚಿವ ಪ್ರಲ್ಹಾದ್​ ಜೋಶಿ, ಕೋವಿಡ್​-19 ಸೋಂಕಿನ ಬಗ್ಗೆ ಎಚ್ಚರವಹಿಸುವುದು ಅಗತ್ಯವಾಗಿದೆ. ಈ ಹಿನ್ನಲೆ ಎಲ್ಲಾ ಪಕ್ಷಗಳ ಮುಖಂಡರೊಂದಿಗೆ ಚರ್ಚಿಸಲಾಗಿದೆ. ಅಧಿವೇಶನ ಕರೆಯದಿರುವ ಬಗ್ಗೆ ಒಪ್ಪಿಗೆ ಸೂಚಿಸಿದ ಹಿನ್ನಲೆ, ಈ ಬಾರಿ ಚಳಿಗಾಲ ಅಧಿವೇಶನ ನಡೆಸದಿರಲು ತೀರ್ಮಾನಿಸಲಾಗಿದೆ ಎಂದಿದ್ದಾರೆ.

ದೆಹಲಿಯಲ್ಲಿ ಚಳಿ ಹೆಚ್ಚಿದ್ದು, ಈ ಚಳಿಗಾಲದಲ್ಲಿ ಕೊರೋನಾ ಸೋಂಕು ನಿರ್ವಹಣೆ ಬಹು ದೊಡ್ಡ ಸವಾಲ್​ ಆಗಿದೆ. ಅಲ್ಲದೇ ರಾಜಧಾನಿಯಲ್ಲಿ ಪ್ರಕರಣಗಳು ಕೂಡ ಹೆಚ್ಚಿವೆ ಎಂದು ಜೋಶಿ ತಿಳಿಸಿದ್ದಾರೆ.

ಇದನ್ನು ಓದಿ: 2022 ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಗೆ ಸ್ಪರ್ಧಿಸಲು ಎಎಪಿ ಸಜ್ಜು; ಅರವಿಂದ್​ ಕೇಜ್ರಿವಾಲ್​

ಅಲ್ಲದೇ ಕೊರೋನಾ ಸೋಂಕಿನ ಹಿನ್ನಲೆ ಮಳೆಗಾಲದ ಅಧಿವೇಶನವೇ ವಿಳಂಬವಾಗಿ ಸೆಪ್ಟೆಂಬರ್​ನಲ್ಲಿ ನಡೆಸಲಾಗಿತ್ತು. 10 ದಿನಗಳ ಕಾಲ ನಡೆದ ಆ ಅಧಿವೇಶನದಲ್ಲಿ 27 ಮಸೂದೆಗಳನ್ನು ಪಾಸ್​ ಮಾಡಲಾಗಿದೆ. ಇದರಲ್ಲಿ ವಿವಾದಿತ ಕೃಷಿ ಮಸೂದೆಗಳು ಕೂಡ ಮಂಡನೆಯಾಗಿದ್ದವು.

ಡಿಸೆಂಬರ್​ ಮಧ್ಯದಲ್ಲಿರುವ ನಾವು ಕೋವಿಡ್​ ಲಸಿಕೆಯ ನಿರೀಕ್ಷೆಯಲ್ಲಿದ್ದೇವೆ. ಈ ಹಿನ್ನಲೆ ವಿವಿಧ ಪಕ್ಷಗಳ ರಾಜಕೀಯ ಮುಖಂಡರನ್ನು ಅನೌಪಚಾರಿಕವಾಗಿ ಸಂಪರ್ಕಿಸಿದ್ದು, ಅವರು ಕೂಡ ಕೋವಿಡ್​ 19 ವಿರುದ್ಧ ಕಳವಳ ವ್ಯಕ್ತಪಡಿಸಿದ್ದಾರೆ. ಅಲ್ಲದೇ ಇಂತಹ ಸಮಯದಲ್ಲಿ ಅಧಿವೇಶನ ನಡೆಸದಿರುವುದು ಒಳಿತು ಎಂಬ ಅಭಿಪ್ರಾಯ ತಿಳಿಸಿದ್ದಾರೆ. ಈ ಹಿನ್ನಲೆ ಮುಂದಿನ ಅಧಿವೇಶನವನ್ನು ಸರ್ಕಾರ ಶೀಘ್ರವಾಗಿ ನಡೆಸಲು ನಿರ್ಧರಿಸಿದೆ, 2021ರ ಜನವರಿಯಲ್ಲಿ ಬಜೆಟ್​ ಅಧಿವೇಶನ ನಡೆಸುವುದು ಸೂಕ್ತ. ಕೊರೋನಾ ಸೃಷ್ಟಿಸಿದ ಈ ಬಿಕ್ಕಟ್ಟನ್ನು ಗಮನದಲ್ಲಿಟ್ಟುಕೊಂಡು ಈ ನಿರ್ಧಾರ ಕೈಗೊಳ್ಳಲಾಗಿದೆ. ಇದಕ್ಕೆ ಸಂಸದರು ಕೂಡ ಸಹಕರಿಸಬೇಕು ಎಂದು ಉತ್ತರಿಸಿದ್ದಾರೆ.