ಹೆರಿಗೆಗಾಗಿ ಸೈಕಲ್​ ತುಳಿದು ಆಸ್ಪತ್ರೆಗೆ ಹೋದ ನ್ಯೂಜಿಲೆಂಡ್​ನ ಸಚಿವೆ..!

ನ್ಯೂಸ್​18 ಕನ್ನಡ

ವೆಲ್ಲಿಂಗ್ಟನ್​ (ಆ. 21): ನ್ಯೂಜಿಲೆಂಡ್​ ದೇಶದ ಮಹಿಳಾ ಖಾತೆ ಸಚಿವೆ ಮತ್ತು ಸಾರಿಗೆ ಖಾತೆಯ ಸಹಾಯಕ ಸಚಿವೆಯೂ ಆಗಿರುವ ಜೂಲಿ ಆನ್ನೆ ಜೆಂಟರ್​ ತಮ್ಮ ಮೊದಲ ಹೆರಿಗೆಯ ತಪಾಸಣೆಗಾಗಿ ಸೈಕಲ್​ ತುಳಿದುಕೊಂಡೇ ಆಸ್ಪತ್ರೆಯನ್ನು ತಲುಪಿದ್ದಾರೆ.

ಸೈಕ್ಲಿಂಗ್​ಪ್ರಿಯರಾಗಿರುವ ಜೂಲಿ ಅವರು ಭಾನುವಾರ ತಮ್ಮ ಮನೆಯಿಂದ 1 ಕಿ.ಮೀ. ದೂರ ಇರುವ ಆಕ್ಲೆಂಡ್​ ಸಿಟಿ ಹಾಸ್ಪಿಟಲ್​ಗೆ ಸೈಕಲ್​ನಲ್ಲೇ ಪ್ರಯಾಣ ಮಾಡಿದ್ದಾರೆ. 42 ವಾರಗಳ ಗರ್ಭಿಣಿಯಾಗಿರುವ ಇವರು ತಮ್ಮ ರೆಗ್ಯುಲರ್​ ತಪಾಸಣೆಗೆ ಸೈಕಲ್​ನಲ್ಲೇ ತೆರಳಿದ್ದಾರೆ. ಈ ಬಗ್ಗೆ ಸ್ವತಃ ಫೋಟೋ ಹಾಕಿ ಪೋಸ್ಟ್​ ಮಾಡಿರುವ ಸಚಿವೆಯ ಬಗ್ಗೆ ಸಾಕಷ್ಟು ಉತ್ತಮ ಪ್ರಶಂಸೆಗಳು ವ್ಯಕ್ತವಾಗುತ್ತಿವೆ.

ನ್ಯೂಜಿಲೆಂಡ್​ ಪ್ರಧಾನಮಂತ್ರಿ ಜೆಸಿಂಡಾ ಆರ್ಡರ್ನ್​ ಅಧಿಕಾರದಲ್ಲಿದ್ದಾಗಲೇ ಹೆರಿಗೆ ರಜೆ ಪಡೆದು ಮಗುವಿಗೆ ಜನ್ಮ ನೀಡಿದ್ದರು. ಇದೀಗ ನ್ಯೂಜಿಲೆಂಡ್ ಸರ್ಕಾರದ ಸಚಿವೆಯಾಗಿರುವ ಜೂಲಿ ಅವರು ಕೂಡ ಅಧಿಕಾರದಲ್ಲಿರುವಾಗಲೇ ಮಗುವಿಗೆ ಜನ್ಮ ನೀಡಲಿದ್ದಾರೆ.

ಅಂದಹಾಗೆ, ಪಾಕಿಸ್ತಾನದ ಪ್ರಧಾನಿಯಾಗಿದ್ದ ಬೆನಜೀರ್​ ಬುಟ್ಟೋ ತನ್ನ ಎರಡನೇ ಮಗುವಿಗೆ ಜನ್ಮ ನೀಡಿದ್ದಾಗ ಅಧಿಕಾರದಲ್ಲಿರುವಾಗಲೇ ಮಗುವಿಗೆ ಜನ್ಮ ನೀಡಿದ ಮೊದಲ ಜಾಗತಿಕ ನಾಯಕಿ ಎನ್ನುವ ಖ್ಯಾತಿ ಪಡೆದಿದ್ದಾರೆ.