ಬಾಹ್ಯಾಕಾಶ ಲೋಕದಲ್ಲಿ ನಾಸಾ ಮತ್ತೊಂದು ಮೈಲಿಗಲ್ಲು; ಮಂಗಳ ಗ್ರಹದಿಂದ ಕೇಳಿದ ಶಬ್ದ ಹೇಗಿತ್ತು ಗೊತ್ತಾ?

ಚಂದ್ರ ಮತ್ತು ಮಂಗಳನ ಅಂಗಳದಲ್ಲಿ ಉಪಗ್ರಹ ಇಳಿಸಿ, ಅಧ್ಯಯನ ಕೈಗೊಂಡಿರುವ ವಿಷಯ ಎಲ್ಲರಿಗೂ ತಿಳಿದೇ ಇದೆ. ಭೂಮಿ ಹೊರತುಪಡಿಸಿ, ಬೇರೆ ಗ್ರಹಗಳು ಹೇಗಿರುತ್ತವೆ, ಅಲ್ಲಿನ ವಾತಾವರಣ ಎಂತಹದ್ದು, ಅಲ್ಲೂ ಜೀವಿಗಳು ವಾಸಿಸುತ್ತಿವೆಯೇ, ಅಥವಾ ವಾಸ ಮಾಡಬಹುದೇ ಎಂಬುದೇ ಗೊತ್ತಿಲ್ಲದಿರುವಾಗ ಅದನ್ನು ಪರಿಚಯಿಸುವ ಕಾರ್ಯಕ್ಕೆ ಕೈಹಾಕಿದ ವಿಜ್ಞಾನಿಗಳು ನಮ್ಮ ಕಲ್ಪನೆಗೆ ಹೊಸ ಆಯಾಮ ನೀಡುತ್ತಾ, ವೈಜ್ಞಾನಿಕ ಲೋಕಕ್ಕೆ ಹೊಸ ತಿರುವು ನೀಡಿದ್ದಾರೆ.

ಇದೆಲ್ಲ ಯಾಕೆ ಹೇಳುತ್ತಿದ್ದಾರೆ ಎಂದು ಯೋಚಿಸುತ್ತಿದ್ದೀರಾ? ಬಾಹ್ಯಾಕಾಶ ಲೋಕದಲ್ಲಿ ಹಲವು ದಾಖಲೆಗಳನ್ನು ನಿರ್ಮಿಸಿರುವ ಅಮೆರಿಕ ಬಾಹ್ಯಾಕಾಶ ಸಂಸ್ಥೆ ನಾಸಾ ಇದೀಗ ಮತ್ತೊಂದು ಮೈಲಿಗಲ್ಲು ನಿರ್ಮಿಸಿದೆ. ನಾಸಾದಿಂದ ಮಂಗಳ ಗ್ರಹಕ್ಕೆ ಕಳುಹಿಸಲ್ಪಟ್ಟಿದ್ದ ಇನ್​ಸೈಟ್​ ಉಪಗ್ರಹ ಅಲ್ಲಿನ ಶಬ್ದವನ್ನು ಸೆರೆಹಿಡಿದಿದ್ದು, ಅದನ್ನು ಭೂಮಿಗೆ ರವಾನಿಸಿದೆ.

ಇದನ್ನೂ ಓದಿ: ಕಾಶ್ಮೀರದಲ್ಲಿ ಕಣಿವೆಗೆ ಉರುಳಿದ ಬಸ್​; 23 ಮಂದಿ ದುರ್ಮರಣ, ಎಂಟು ಮಂದಿಗೆ ಗಂಭೀರ ಗಾಯ

ಭೂಮಿಯಿಂದ ಅತಿಹೆಚ್ಚು ದೂರದಲ್ಲಿರುವ ಗ್ರಹವೆಂದೇ ಕರೆಯಲಾಗುವ ಮಂಗಳ ಗ್ರಹದಿಂದ ಹೀಗೆ ಶಬ್ದವನ್ನು ಗ್ರಹಿಸಿ ನಾಸಾದ ಇನ್​ಸೈಟ್​ ಉಪಗ್ರಹ ಅದನ್ನು ರೆಕಾರ್ಡ್​ ಮಾಡಿದೆ. ಇದುವರೆಗೂ ಮಂಗಳ ಗ್ರಹದ ಮೇಲೆ ಸಂಶೋಧನೆಗಾಗಿ ಅನೇಕ ದೇಶಗಳು ಉಪಗ್ರಹವನ್ನು ಕಳುಹಿಸಿದ್ದರೂ ಅಲ್ಲಿನ ಚಿತ್ರವನ್ನು ಸೆರೆಹಿಡಿಯಲಾಗಿತ್ತೇ ವಿನಃ ಶಬ್ದವನ್ನು ಗ್ರಹಿಸಲು ಉಪಗ್ರಹಗಳಿಗೆ ಸಾಧ್ಯವಾಗಿರಲಿಲ್ಲ. ಆ ಸಾಧನೆಯನ್ನು ನಾಸಾ ವಿಜ್ಞಾನಿಗಳು ಮಾಡಿದ್ದಾರೆ. ಈ ಮೂಲಕ ವಿಜ್ಞಾನ ಲೋಕ ಅಚ್ಚರಿಯಿಂದ ನಾಸಾದತ್ತ ನೋಡುವಂತಾಗಿದೆ.

#Mars, I hear you and I’m feeling the good vibrations left in the wake of your Martian winds. Take a listen to the #SoundsOfMars I’ve picked up. 🔊
More on https://t.co/auhFdfiUMg pic.twitter.com/shVmYbfHRs

— NASA InSight (@NASAInSight) December 7, 2018

ಅಲ್ಲದೆ, ತಾವು ಮಂಗಳನ ಮೇಲೆ ಉಪಗ್ರಹ ಅಲ್ಲಿ ಇಳಿಯುತ್ತಿದ್ದಂತೆ ಸೆರೆಹಿಡಿಯಲ್ಪಟ್ಟ ಆ ಶಬ್ದವನ್ನು ನಾಸಾ ತನ್ನ ಟ್ವಿಟ್ಟರ್​ ಖಾತೆಯಲ್ಲಿ ಹಂಚಿಕೊಂಡಿದ್ದು, ನೀವು ಕೂಡ ಆ ಸದ್ದನ್ನು ಕೇಳಬಹುದು. ಮಂಗಳ ಗ್ರಹದ ಮೇಲೆ ನೀರು ಇದೆ, ವಾಸಕ್ಕೆ ಯೋಗ್ಯವಾದ ವಾತಾವರಣ ಇದೆ ಎಂಬ ಬಗ್ಗೆ ನಾಸಾ ಈ ಹಿಂದೆ ವರದಿ ನೀಡಿತ್ತು. ಆದರೆ, ಇದೀಗ, ಮಂಗಳನ ಮೇಲೆ ಇರುವ ಗಾಳಿಯ ಶಬ್ದವನ್ನು ರೆಕಾರ್ಡ್​ ಮಾಡಿ ಜನರಿಗೆ ಕೇಳಿಸುವ ಮೂಲಕ ತಮ್ಮ ಸಂಶೋಧನೆಯನ್ನು ನಾಸಾ ವಿಜ್ಞಾನಿಗಳು ಮತ್ತಷ್ಟು ವಿಸ್ತರಿಸಿದ್ದಾರೆ.

ಗಾಳಿಯಲ್ಲಿ ಧ್ವಜ ಬೀಸಿದ ಸದ್ದು:

ಈ ಕುರಿತು ಸುದ್ದಿಗೋಷ್ಠಿ ನಡೆಸಿರುವ ಅಮೆರಿಕದ ನಾಸಾ ವಿಜ್ಞಾನಿಗಳು, ಜಗತ್ತಿನಲ್ಲೇ ಮೊದಲ ಬಾರಿಗೆ ಮಂಗಳ ಗ್ರಹದ ಮೇಲಿರುವ ಗಾಳಿಯ ಶಬ್ದವನ್ನು ಸೆರೆಹಿಡಿಯಲಾಗಿದೆ. ಗಾಳಿಯಲ್ಲಿ ಧ್ವಜವನ್ನು ಬೀಸಿದಾಗ ಯಾವ ರೀತಿಯ ಶಬ್ದ ಬರುತ್ತದೋ ಅದೇ ರೀತಿಯ ಸದ್ದು ನಮಗೆ ಕೇಳಿಸಿದೆ. 15 ನಿಮಿಷಗಳ ಈ ಡಾಟಾವನ್ನು ಉಪಗ್ರಹದ ಮೂಲಕ ಸಂಗ್ರಹಿಸಿದ್ದೇವೆ. ಇದು ನಮ್ಮ ಸಂಶೋಧನೆಗೆ ಬಹಳ ಮುಖ್ಯ ಆಧಾರವಾಗಲಿದೆ ಎಂದು ಹೇಳಿದ್ದಾರೆ.

ಇದೇ ಮೊದಲ ಪ್ರಯೋಗ:

ಈ ಇನ್​ಸೈಟ್​ ಉಪಗ್ರಹವನ್ನು ಮಂಗಳ ಗ್ರಹದ ಇಂಟೀರಿಯರ್​ ಬಗ್ಗೆ ಅಧ್ಯಯನ ಮಾಡಲೆಂದೇ ವಿನ್ಯಾಸಗೊಳಿಸಲಾಗಿತ್ತು. ಈ ಮೊದಲು ಯಾರೂ ಈ ಪ್ರಯತ್ನಕ್ಕೆ ಕೈಹಾಕಿಲ್ಲ. ಅಲ್ಲಿಯ ಕಂಪನವನ್ನು ರೆಕಾರ್ಡ್​ ಮಾಡಲೆಂದು ಸೆಸ್ಮಾಲಜಿ ಉಪಕರಣಗಳನ್ನು ಬಳಸಲಾಗಿತ್ತು. ಅಮೆರಿಕದ ಕಾಲಮಾನದ ಪ್ರಕಾರ ಸುಮಾರು 5 ಗಂಟೆ ವೇಳೆಗೆ ನಮಗೆ ಗಾಳಿ ಬೀಸಿದ ಸದ್ದು ಕೇಳಿಸಿದೆ. ನಾವ್ಯಾರೂ ಇದನ್ನು ನಿರೀಕ್ಷಿಸಿರಲಿಲ್ಲವಾದ್ದರಿಂದ ನಮಗೆಲ್ಲರಿಗೂ ಅಚ್ಚರಿಯಾಗಿದೆ ಎಂದು ಇನ್​ಸೈಟ್​ ಉಪಗ್ರಹದ ಪ್ರಿನ್ಸಿಪಲ್ ಇನ್​ವೆಸ್ಟಿಗೇಟರ್​ ಬ್ರೂಸ್​ ಬನೆರ್ಟ್​ ಹೇಳಿದ್ದಾರೆ.

ಮಂಗಳ ಗ್ರಹದಿಂದ ಬಂದ ಗಾಳಿಯ ಸದ್ದು ನನಗೆ ಬೇಸಿಗೆಯ ಮಧ್ಯಾಹ್ನ ಬೀಸುವ ಗಾಳಿಯಂತೆ ಭಾಸವಾಯಿತು. ಅನಿರೀಕ್ಷಿತವಾಗಿ ಆ ಸದ್ದು ನಮ್ಮ ಕಿವಿಗೆ ಬಿದ್ದಾಗ ಬಹಳ ಸರ್​ಪ್ರೈಸ್​ ಆಯಿತು ಎಂದಿದ್ದಾರೆ ನಾಸಾದ ವಿಜ್ಞಾನಿ ಥಾಮಸ್​ ಪೈಕ್.