Rahul Dravid: ನಾನು ಇಂದಿರಾನಗರದ ಗೂಂಡಾ ಎಂದ ರಾಹುಲ್ ದ್ರಾವಿಡ್ ಹಿಂದೆ ಬಿದ್ದ ಮುಂಬೈ ಪೊಲೀಸರು!

ಭಾರತೀಯ ಕ್ರಿಕೆಟ್ ತಂಡದ ಮಾಜಿ ಆಟಗಾರ ರಾಹುಲ್ ದ್ರಾವಿಡ್ ಕಳೆದೆರಡು ದಿನಗಳಿಂದ ಭಾರೀ ಸುದ್ದಿಯಲ್ಲಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ, ಟ್ರೋಲ್-ಮೆಮೆ ಪೇಜ್​ಗಳಲ್ಲಿ ‘ಗೋಡೆ’ಯದ್ದೇ ಸದ್ದು ಜೋರಾಗಿದೆ. ಸದಾ ಶಾಂತ ವ್ಯಕ್ತಿತ್ವದಿಂದಲೇ ದಶಕಗಳಿಂದ ಗುರುತ್ತಿಸಿಕೊಂಡಿದ್ದ ದ್ರಾವಿಡ್ ‘ಇಂದಿರಾನಗರದ ಗೂಂಡಾ’ ಆಗಿ ಕಾಣಿಸಿಕೊಂಡಿದ್ದು ಅವರ ಅಭಿಮಾನಿಗಳಿಗೆ ಸಖತ್ ಕಿಕ್ ಕೊಟ್ಟಿದೆ. ದ್ರಾವಿಡ್ ಅವರ ಈ ಡೈಲಾಗನ್ನೇ ಬಳಿಸಿಕೊಂಡು ಮುಂಬೈ ಪೊಲೀಸರು ಈಗ ಕೊರೋನಾ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದಾರೆ.

ಕ್ರೆಡಿಟ್ ಕಾರ್ಡ್ ಆ್ಯಪ್​ವೊಂದರ ಜಾಹೀರಾತಿನಲ್ಲಿ ರಾಹುಲ್ ದ್ರಾವಿಡ್ ‘ಇಂದಿರಾನಗರದ ಗೂಂಡಾ ಹೂ ಮೇ’ ಎನ್ನುತ್ತಾ ಕಾಣಿಸಿಕೊಂಡಿದ್ದರು. ಟ್ರಾಫಿಕ್ ಮಧ್ಯೆ ಸಿಲುಕಿದಾಗ ಸಿಟ್ಟಿನಲ್ಲಿ ಏನೆಲ್ಲಾ ಮಾಡ್ತಾರೆ ಅನ್ನೋದನ್ನು ರಾಹುಲ್ ದ್ರಾವಿಡ್ ಜಾಹೀರಾತಿನಲ್ಲಿ ಅಭಿನಯಿಸಿದ್ದರು. ದ್ರಾವಿಡ್ ಅವರ ಈ ಹೊಸ ಅವತಾರ ನೆಟ್ಟಿಜನ್​ಗೆ ತುಂಬಾ ಮಜಾ ಕೊಡುತ್ತಿದೆ. ಜಾಹೀರಾತಿನ ಫೋಟೋ, ವಿಡಿಯೋವನ್ನು ಬಳಸಿಕೊಂಡು ಮೆಮೆ, ಟ್ರೋಲ್ ಮಾಡಿ ಹರಿಬಿಡಲಾಗ್ತಿದೆ. ಸೋಷಿಯಲ್ ಮಿಡಿಯಾದಲ್ಲಿ ಸದ್ಯಕ್ಕೆ ದ್ರಾವಿಡ್​ರದ್ದೇ ಹವಾ ಎಂದರು ತಪ್ಪಾಗಲಾರದು. ಇದನ್ನು ಬಳಸಿಕೊಂಡು ಮುಂಬೈ ಪೊಲೀಸರು ತಮ್ಮ ಇಸ್ಟಾಗ್ರಾಂ ಖಾತೆಯಲ್ಲಿ ಕೊರೋನಾ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದಾರೆ.

Come Man Come.. You come Man..!! ಎಂಬ ದ್ರಾವಿಡ್​ರ ಡೈಲಾಗ್ ಬಳಸಿಕೊಂಡು ಮುಂಬೈ ನಿವಾಸಿಗಳೇ ನೀವು ಮಾಸ್ಕ್ ಧರಿಸದಿದ್ದರೆ ಕೊರೋನಾ ಕೂಡ ನಿಮ್ಮ ಬಳಿ ಇದೇ ರೀತಿ ಬರುತ್ತೆ ಎಂದು ಎಚ್ಚರಿಸಿದ್ದಾರೆ.

View this post on Instagram

A post shared by Mumbai Police (@mumbaipolice)

ಮುಂಬೈ ಪೊಲೀಸರ ಈ ಹಾಸ್ಯಪ್ರಜ್ಞೆಗೆ ಮುಂಬೈನ ಜನರು ಫಿದಾ ಆಗಿದ್ದಾರೆ. ಮುಂಬೈ ಪೊಲೀಸರು ಇದೇ ಮೊದಲಲ್ಲ, ಈ ಹಿಂದೆಯೂ ಇದೇ ರೀತಿ ಮೆಮೆ-ಟ್ರೋಲ್​ ಮೂಲಕ ಜನರನ್ನು ಎಚ್ಚರಿಸುವ, ಜಾಗೃತಿ ಮೂಡಿಸುವ ಕೆಲಸ ಮಾಡಿದ್ದಾರೆ. ಈಗ ದ್ರಾವಿಡ್ ಫೋಟೋ ಬಳಸಿ ಸೋಂಕಿನ ಬಗ್ಗೆ ಎಚ್ಚರಿಸಿರೋದಕ್ಕೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಇಷ್ಟೇ ಅಲ್ಲ, ದ್ರಾವಿಡ್​ರ ‘ಇಂದಿರಾನಗರದ ಗೂಂಡಾ ಹೂ ಮೇ’ ಡೈಲಾಗನ್ನು ಬಳಸಿಕೊಂಡು ಫುಡ್ ಆ್ಯಪ್ ಜೊಮ್ಯಾಟೋ ಕೂಡ ನಗೆಚಟಾಕಿ ಹಾರಿಸಿತ್ತು. ಬೆಂಗಳೂರಿನ ಇಂದಿರಾನಗರದ ಟ್ರಾಫಿಕ್ನಲ್ಲಿ ಗೂಂಡಾ ಇರೋದರಿಂದ ಆ ಕಡೆ ಫುಡ್ ಡೆಲಿವರಿ ಮಾಡಲು ಕೊಂಚ ತಡವಾಗುತ್ತಿದೆ ಎಂದು ತಮಾಷೆ ಮಾಡಿ ಟ್ವೀಟ್ ಮಾಡಿದ್ದರು.

View this post on Instagram

A post shared by Surat City Traffic Police (@suratcitytrafficpolice)

ಇನ್ನು ಬೆಂಗಳೂರಿನವರೇ ಆದ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಕೂಡ ದ್ರಾವಿಡ್ ಡೈಲಾಗ್​ಗೆ ಮನಸೋತಿದ್ದಾರೆ. ತಮ್ಮ ಬಾಲ್ಯದ ಫೋಟೋವನ್ನು ಪೋಸ್ಟ್ ಮಾಡಿ, ‘ಮೇ ಇಂದಿರಾನಗರ ಕಿ ಗೂಂಡಿ ಹೂ’ ಅಂತ ಬರೆದುಕೊಂಡಿದ್ದಾರೆ. ದ್ರಾವಿಡ್ ಅವರು ಹಿಂದೆಂದೂ ಕಾಣದ ರೀತಿಯಲ್ಲಿ ಕಾಣಿಸಿಕೊಂಡು ಡೈಲಾಗ್ ಹೊಡೆದಿರೋದು ಸದ್ಯಕ್ಕಂತೂ ಹೊಸ ಟ್ರೆಂಡನ್ನೇ ಸೃಷ್ಟಿಸಿದೆ.

(ವರದಿ: ಕಾವ್ಯ ವಿ)