ಅಚ್ಚರಿಯಾದರೂ ಸತ್ಯ; 50 ವರ್ಷಗಳ ಹಿಂದೆ ಕಣ್ಮರೆಯಾಗಿದ್ದ ಫ್ರೆಂಚ್​ ಸಬ್​ಮೆರಿನ್​ ಈಗ ಪತ್ತೆ

ಫ್ರೆಂಚ್ ದೇಶದ​ ಸಬ್​ಮೆರಿನ್​(ಜಲಾಂತರ್ಗಾಮಿ) 50 ವರ್ಷಗಳ ಹಿಂದೆ ಕಣ್ಮರೆಯಾಗಿತ್ತು.  52 ಸಿಬ್ಬಂದಿಗಳಿದ್ದ ಈ ಸಬ್​ಮೆರಿನ್​ಗಾಗಿ ಫ್ರೆಂಚ್​ ಸರ್ಕಾರ​​ ಹುಡುಕಾಟ ನಡೆಸುತ್ತಲೇ ಇತ್ತು. ಈಗ ಆ ಸಬ್​ಮೆರಿನ್​​​ ಟೌಲಾನ್​ ಬಂದರಿನ ಮೆಡಿಟೇರಿಯನ್ ಸಮುದ್ರ ತೀರದಲ್ಲಿ ಪತ್ತೆಯಾಗಿದೆ.

'ಈಗ ನಿರಾಳವಾಗಿದೆ. ಇದೊಂದು ಗೆಲುವು. ತಂತ್ರಜ್ಞಾನದ ಸಾಧನೆಯಾಗಿದೆ' ಎಂದು ಫ್ರೆಂಚ್​ ರಕ್ಷಣಾ ಸಚಿವ ಫ್ಲೋರೆನ್ಸ್​ ಪಾರ್ಲೆ ಸಂತಸ ವ್ಯಕ್ತಪಡಿಸಿದ್ದಾರೆ. "ಈ ಕ್ಷಣಕ್ಕಾಗಿ ಸಿಬ್ಬಂದಿಗಳ ಕುಟುಂಬಸ್ಥರು ತುಂಬಾ ವರ್ಷಗಳಿಂದ  ಕಾಯುತ್ತಿದ್ದರು," ಎಂದು ಟ್ವೀಟ್​ ಮಾಡಿದ್ದಾರೆ.

52 ಸಿಬ್ಬಂದಿಗಳನ್ನೊಳಗೊಂಡ 'ಲಾ ಮಿನರ್ವೆ' ಹೆಸರಿನ ಸಬ್​ಮೆರಿನ್​ 1968ರ ಜನವರಿಯಲ್ಲಿ ಕಣ್ಮರೆಯಾಗಿತ್ತು. ಫ್ರೆಂಚ್​ ಸರ್ಕಾರ ಇಲ್ಲಿಯವರೆಗೆ ಸಾಕಷ್ಟು ಹುಡುಕಾಟ ನಡೆಸಿ ವಿಫಲವಾಗಿತ್ತು.



ಸಬ್​ಮೆರಿನ್​ನಲ್ಲಿದ್ದ 52 ಸಿಬ್ಬಂದಿಗಳ ಕುಟುಂಬಸ್ಥರಿಗೆ ವಿಷಯ ತಿಳಿಸಲಾಯಿತು. ಪ್ರತಿದಿನ ಸಿಬ್ಬಂದಿಗಳ ಸಂಬಂಧಿಕರು ತಮ್ಮವರನ್ನು ಹುಡುಕಿಕೊಡುವಂತೆ ಸರ್ಕಾರಕ್ಕೆ ಒತ್ತಡ ಹಾಕುತ್ತಿದ್ದರು. ಕುಟುಂಬಸ್ಥರ ಒತ್ತಡಕ್ಕೆ ಮಣಿದ ರಕ್ಷಣಾ ಇಲಾಖೆ ಈ ವರ್ಷದಿಂದ ಹೊಸ ಶೋಧ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತ್ತು.

The wreck of the 🇫🇷 submarine La Minerve that disappeared in 1968 has been found off the Var coast in the Mediterranean thanks to the associated skills of the French Navy, Ifremer, and the 🇺🇸 ship Seabed Constructor.
Our thoughts go out to the families of the 52 missing sailors pic.twitter.com/eXPEJelT0x

— French Embassy U.S. (@franceintheus) July 22, 2019

ಇತ್ತೀಚಿನ ಹೈ-ಟೆಕ್​ ಸಾಧನಗಳ ಮೂಲಕ ಮೆಡಿಟೇರಿಯನ್​ ಸಮುದ್ರದಲ್ಲಿ ಸಬ್​ಮೆರಿನ್​ಗಾಗಿ ಹುಡುಕಾಟ ನಡೆಸಿತ್ತು. ಸಮುದ್ರದ ಅಲೆಗಳ ಉಬ್ಬರವಿಳಿತಗಳ ಬಗ್ಗೆಯೂ ಅಧ್ಯಯನ ನಡೆಸಿತ್ತು. ಸಬ್​ಮೆರಿನ್​ ಕಾಣೆಯಾದಾಗಿನ ಸಂದರ್ಭದ ದತ್ತಾಂಶಗಳನ್ನು ಸಹ ಮರುಪರೀಕ್ಷೆ ಮಾಡಲಾಗಿತ್ತು. ಸಬ್​​ಮೆರಿನ್​ ಸಮುದ್ರದ ತಳಭಾಗಕ್ಕೆ ಹೋದಾಗ ಸ್ಫೋಟಗೊಳ್ಳುವ ಸಾಧ್ಯತೆಯಿದೆ ಎನ್ನಲಾಗಿತ್ತು.



ಬಳಿಕ ಲಾ ಮಿನರ್ವೆ ಸಬ್​ಮೆರಿನ್​ನ್ನು ಪತ್ತೆ ಮಾಡಿದ್ದು ಅಮೆರಿಕಾ ಕಂಪನಿಗೆ ಸೇರಿದ ಶೋಧ ಹಡಗು. ಟೌಲಾನ್​ ಬಂದರಿನಲ್ಲಿ ​​ 2,370 ಮೀಟರ್, 27 ಮೈಲಿ (45 ಕಿ.ಮೀ)​ ಆಳದಲ್ಲಿ ಸಬ್​ಮೆರಿನ್​​ ಇತ್ತು ಎಂದು ಫ್ರೆಂಚ್​ನ ಹಿರಿಯ ನೌಕಾಧಿಕಾರಿ ತಿಳಿಸಿದ್ದಾರೆ.

ಕೇವಲ 4 ನಿಮಿಷಗಳಲ್ಲಿ ಸಬ್​ಮೆರಿನ್ ಮುಳುಗಲು ಕಾರಣವೇನು ಎಂಬ ಬಗ್ಗೆ ಇನ್ನೂ ಸಹ ಸುಳಿವು ಸಿಕ್ಕಿಲ್ಲ. ಆದರೆ ಕಾರಣ ಏನೆಂಬುದು ತಿಳಿಯಲಿದೆ ಎಂದು ಸಿಬ್ಬಂದಿಗಳ ಕುಟುಂಬಸ್ಥರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.



ಸದ್ಯ ಸಬ್​ಮೆರಿನ್​ನ​ ಮೂರು ತುಂಡುಗಳು ಸಿಕ್ಕಿದ್ದು, ಅವುಗಳಲ್ಲಿ ಮೊದಲನೇ ಅವಶೇಷದಲ್ಲಿ ಸಬ್​ಮೆರಿನ್​​​ನ ಮೊದಲು ಮೂರು ಅಕ್ಷರಗಳು ಸ್ಪಷ್ಟವಾಗಿ ಕಾಣುತ್ತಿವೆ ಎನ್ನಲಾಗಿದೆ.