ಅಗ್ಗದ ಬೆಲೆಗೆ ಐಫೋನ್‌ ಕಂಡು ಆರ್ಡರ್‌ ಮಾಡಿದ ಯುವಕ: ಮನೆಗೆ ಬಂದಿದ್ದು ಮಾತ್ರ ಫೋನ್‌ ಆಕಾರದ ಕಾಫಿ ಟೇಬಲ್‌..!

ಐಫೋನ್‌ ಅಂದರೆ ಜಗತ್ತಿನ ಬಹುತೇಕ ಜನರಿಗೆ ಇಷ್ಟ. ಆದರೆ, ಅದರ ಬೆಲೆ ದುಬಾರಿಯಾಗಿದೆ, ಸ್ವಲ್ಪ ಕಡಿಮೆ ಬೆಲೆಗೆ ಸಿಕ್ಕರೆ  ತಗೆದುಕೊಳ್ಳಬಹುದು ಅಂತ ಹಲವರು ಅಂದುಕೊಂಡಿರುತ್ತಾರೆ. ಇದೇ ರೀತಿ ಕಡಿಮೆ ಬೆಲೆಗೆ ಐ ಫೋನ್‌ ಅಂತ ಇಂಟರ್‌ನೆಟ್‌ನಲ್ಲಿ ಆರ್ಡರ್‌ ಮಾಡಿ ಬೇರೆ ಏನನ್ನೋ ಪಡೆದುಕೊಂಡ ಹಲವು ಉದಾಹರಣೆಗಳು ಸಿಗುತ್ತದೆ. ಕಳೆದ ಕೆಲವು ದಿನಗಳ ಹಿಂದೆ ಆ್ಯಪಲ್‌ ಫೋನ್‌ ಪಡೆಯಲು ಹೋಗಿ ಆ್ಯಪಲ್‌ ಜ್ಯೂಸ್‌ ಪಡೆದಿದ್ದ ಘಟನೆ ಬೆಳಕಿಗೆ ಬಂದಿತ್ತು. ಇದೇ ರೀತಿಯ ಘಟನೆ ಥೈಲ್ಯಾಂಡ್‌ನಲ್ಲಿ ನಡೆದಿದೆ.

ಥೈಲ್ಯಾಂಡ್‌ನ ಹದಿಹರೆಯದ ಯುವಕ ಕಡಿಮೆ ಬೆಲೆಗೆ ಆನ್‌ಲೈನ್‌ನಲ್ಲಿ ಐಫೋನ್ ಕಂಡು ಸಂತೋಷಪಟ್ಟನು. ಆದರೆ ಪಾರ್ಸೆಲ್ ಪಡೆದ ಕ್ಷಣದಲ್ಲೇ ಆತನ ಸಂತೋಷ ಮರೆಯಾಯಿತು. ಯಾಕೆಂದರೆ, ಆತನಿಗೆ ಸಿಕ್ಕಿದ್ದು ಐಫೋನ್ ಆಕಾರದ ಕಾಫಿ ಟೇಬಲ್ ಆಗಿತ್ತು. ಆದರೆ, ಇಲ್ಲಿ ಕಾಫಿ ಟೇಬಲ್‌ ಅನ್ನು ಐಫೋನ್‌ ಎಂದುಕೊಂಡಿದ್ದು, ಆ ಖರಿದಿದಾರ ಯುವಕನದೇ ತಪ್ಪು ಎಂದು ತಿಳಿದುಬಂದಿದೆ. ಐಷಾರಾಮಿ ಫೋನ್ ಅನ್ನು  ಅಗ್ಗದ ಬೆಲೆಗೆ ಮಾರಾಟ ಮಾಡುವುದನ್ನು ನೋಡಿದಾಗ ಹದಿಹರೆಯದ ಯುವಕ ಅದನ್ನು ಕೊಳ್ಳಲು ಉತ್ಸುಕನಾಗಿದ್ದ. ತಾನು ಡೀಲ್‌ವೊಂದನ್ನು ಕ್ರ್ಯಾಕ್ ಮಾಡಿದ್ದೇನೆ ಎಂದು ಭಾವಿಸಿ ಆರ್ಡರ್‌ ಮಾಡಿದ್ದಾನೆ. ಆದರೆ, ಆರ್ಡರ್‌ ಪಡೆದುಕೊಂಡ ಬಳಿಕ ಏನೋ ತಪ್ಪಾಗಿದೆ ಎಂಬುದು ಆತನ ಅರಿವಿಗೆ ಬಂದಿದೆ.

ಯಾಕೆಂದರೆ ಆತ ಪಡೆದುಕೊಂಡ ಪಾರ್ಸೆಲ್‌ನ ಪ್ಯಾಕೇಜ್‌ ಅವನಷ್ಟೇ ಎತ್ತರವಾಗಿತ್ತು. ಆಮೇಲೆ ಅದನ್ನು ಓಪನ್‌ ಮಾಡಿ ನೋಡಿದಾಗ ಅದು ಕಾಫಿ ಟೇಬಲ್‌ ಎಂದು ಆತ ಕಂಡುಕೊಂಡಿದ್ದಾನೆ. ಅಲ್ಲದೆ, ಆ ಖಾಫಿ ಟೇಬಲ್‌ ಐ ಫೋನ್‌ ಆಕಾರದಲ್ಲೇ ಇರುವುದರಿಂದ ಆತ ಆರ್ಡರ್‌ ಮಾಡುವ ಮೊದಲು ಆ ಉತ್ಪನ್ನದ ವಿವರಗಳನ್ನು ನೋಡಿರಲಿಲ್ಲ. ಬದಲಾಗಿ ಕಡಿಮೆ ಬೆಲೆಗೆ ತನ್ನ ಪ್ರಿಯವಾದ ಫೋನ್‌ ಸಿಗುತ್ತಿದೆ ಎಂದುಕೊಂಡಿದ್ದಾನೆ ಎಂದು ಓರಿಯಂಟಲ್ ಡೈಲಿ ಮಲೇಷ್ಯಾ ವರದಿ ಮಾಡಿದೆ.

ನಂತರ ಸಾಮಾಜಿಕ ಜಾಲತಾಣದಲ್ಲಿ ತನ್ನ ತಪ್ಪಿನ ಬಗ್ಗೆ ಫೋಟೋಗಳನ್ನು ಹಂಚಿಕೊಂಡಿದ್ದಾನೆ. ಫೋನ್‌ ಎಷ್ಟೊಂದು ಕಡಿಮೆ ಬೆಲೆಗೆ ಸಿಗುತ್ತಿದೆ ಎಂದಾಗಲೇ ಆಶ್ಚರ್ಯ ಪಟ್ಟಿದ್ದೆ. ಆದರೆ, ಶಿಪ್ಪಿಂಗ್‌ ಬೆಲೆ ಸಾಮಾನ್ಯಕ್ಕಿಂತ ಹೆಚ್ಚಾಗಿತ್ತು. ಆದರೂ, ಈ ಡೀಲ್‌ ತುಂಬಾ ಆಕರ್ಷಕವಾಗಿದ್ದರಿಂದ ಆರ್ಡರ್‌ ಮಾಡಿದೆ ಎಂದು ಹೇಳಿದ್ದಾನೆಂದೂ ವರದಿಯಾಗಿದೆ.

‘ನಕಲಿ’ ಐಫೋನ್‌ಗಳನ್ನು ಜನರು ಪಡೆಯುವುದು ಪುನರಾವರ್ತನೆಯಾಗುತ್ತಲೇ ಇದೆ. ಆದರೂ, ಖರೀದಿಸುವ ಮೊದಲು ಅವರೆಲ್ಲರೂ ಉತ್ಪನ್ನದ ವಿವರಗಳನ್ನು ಸರಿಯಾಗಿ ನೋಡಿದ್ದೇವೆ ಎಂದು ಹೇಳಿರುವುದನ್ನು ಕೇಳಿಲ್ಲ. ಈ ತಿಂಗಳ ಆರಂಭದಲ್ಲಿ ಗುವಾಹಟಿಯ ವ್ಯಕ್ತಿಯೊಬ್ಬರು ಫ್ಲಿಪ್‌ಕಾರ್ಟ್‌ ಮೂಲಕ ‘ನಕಲಿ’ ಐಫೋನ್ ಪಡೆದರು. ಆ ಫೋನ್‌ಗೆ ಅವರು 1,24,900 ರೂ. ನೀಡಿದ್ದರು. ಆದರೆ, ಆ ಫೋನ್‌ಗೆ ಅತ್ಯಂತ ಕಡಿಮೆ ಬೆಲೆಗೆ ಸಿಕ್ಕಿದೆ ಎಂಬ ಬಗ್ಗೆ ಆತ ಕಂಡುಕೊಂಡ ನಂತರ, ಆ ವ್ಯಕ್ತಿ ಹತ್ತಿರದ ಅಂಗಡಿಯಲ್ಲಿ ಅದನ್ನು ಪರಿಶೀಲನೆ ಮಾಡಿಸಿದಾಗ, ಆತ ಪಡೆದ ಫೋನ್‌ ನಕಲಿ ಎಂಬುದು ದೃಢವಾಗಿತ್ತು.