ಕಳ್ಳ ಬಂದಿದ್ದು ಬಂಗಾರ ಕದಿಯಲು; ಆದ್ರೆ, ಮನಸೋತಿದ್ದು ಎಣ್ಣೆ ಬಾಟಲ್​ಗೆ; ಮುಂದೇನಾಯ್ತು ಗೊತ್ತಾ?

ಸಾಮಾನ್ಯವಾಗಿ ಕದಿಯಲು ಬಂದ ಕಳ್ಳನ ಕಣ್ಣು ಮೊದಲು ಬೀಳುವುದು ಬೆಲೆ ಬಾಳುವ ವಸ್ತುಗಳ ಮೇಲೆ ಅಥವಾ ಆಭರಣಗಳ ಮೇಲೆ. ಆದರೆ ಇಲ್ಲೊಬ್ಬ ಕಳ್ಳತನ ಮಾಡಲೆಂದು ಮನೆ ಹೊಕ್ಕಿದ ಕಳ್ಳನ ಕಣ್ಣು ಬಿದ್ದಿದ್ದು ಮಾತ್ರ ಷಾಂಪೆನ್​ ಬಾಟಲಿಯೊಂದರ ಮೇಲೆ.

ಮುಂಬೈನ ಮೆರೈನ್​ ಡ್ರೈವ್​ ಪ್ರದೇಶದಲ್ಲಿನ ಗಿರಿಕುಂಜ್​ ಕಟ್ಟಡದಲ್ಲಿ ಈ ಘಟನೆ ನಡೆದಿದೆ. 19 ವರ್ಷದ ಸಂಜೀವ್​ ವರ್ಮ ಎಂಬಾತ ಮೂರನೆ ಮಹಡಿಯಲ್ಲಿನ ಸಿದ್ಧಾರ್ಥ್​ ಸಬೂ ಎಂಬವರ ಮನೆಗೆ ಕದಿಯಲು ಹೊಂಚು ಹಾಕಿದ್ದ. ಹಾಗಾಗಿ ಯಾರು ಇಲ್ಲದ ವೇಳೆ  ಬಾಲ್ಕನಿ ಮೂಲಕ  ಮನೆ ಪ್ರವೇಶ ಮಾಡುತ್ತಾನೆ.

ಆದರೆ, ಮನೆಯ ಒಳಗೆ ಪ್ರವೇಶಿಸಿದ ಕಳ್ಳನ ಕಣ್ಣಿಗೆ ಮೊದಲು ಬಿದ್ದಿದ್ದು 2 ಷಾಂಪೇನ್​ ಬಾಟಲಿಗಳು. ಹೀಗಾಗಿ ಕಳ್ಳತನವನ್ನು ಮರೆತ ಸಂಜೀವ್​ 2 ​ ಶಾಂಪೇನ್​ ಬಾಟಲಿಯನ್ನು ಕುಡಿದು ಮುಗಿಸುತ್ತಾನೆ.

ಮಾತ್ರವಲ್ಲದೆ ಕುಡಿದ ನಶೆಯಲ್ಲಿ ಅಲ್ಲಿಯೇ ಮಲಗಿದ್ದಾನೆ. ಕುಡಿದ ಅಮಲಿನಲ್ಲಿ ಕಳ್ಳ ನಿದ್ರೆಯ ಮಂಪರಿಗೆ ಜಾರಿದ್ದಾನೆ. ಈ ವೇಳೆ ಮನೆ ಕೆಲಸಕ್ಕೆ ಮಹಿಳೆಗೆ ಬಾಗಿಲು ತೆಗೆಯಲು ಮುಂದಾದಾಗ ಮನೆ ಒಳಗಿನಿಂದ ಬಾಗಿಲು ಹಾಕಿರುವುದು ಗೊತ್ತಾಗಿದೆ. ನಂತರ ಸಿದ್ಧಾರ್ಥ್​ ಸಬೂಗೆ ತಿಳಿಸುತ್ತಾರೆ.

ಈ ವಿಚಾರ ಕೇಳಿ ಫ್ಲಾಟ್​ಗೆ ಬಂದ ಸಿದ್ಧಾರ್ಥ್​ ಮನೆಯ ಬಾಗಿಲಿನ ಬೀಗ ಒಡೆಯುತ್ತಾರೆ. ಈ ವೇಳೆ ಕಳ್ಳ ಮಂಚದ ಮೇಲೆ ಮಲಗಿರುವುದು ಕಂಡಿದ್ದಾರೆ. ತಕ್ಷಣ ಈ ವಿಚಾರವನ್ನು  ಪೋಲಿಸರಿಗೆ ತಿಳಿಸಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಕಳ್ಳನನ್ನು ಬಂಧಿಸಿದ್ದಾರೆ.

ಸಿದ್ಧರ್ಥ್​ ಸಬೂ ಇತ್ತೀಚೆಗೆ ಗಿರಿಕುಂಜ್​ ಬಿಲ್ಡಿಂಗ್​ನಲ್ಲಿ 3ನೇ ಪ್ಲಾನ್​ನಲ್ಲಿ ಹೊಸ ಮನೆಯನ್ನು ಖರೀದಿಸಿದ್ದರು. ಹಾಗಾಗಿ ತಮ್ಮ ಹಳೇಯ ಮನೆಯಿಂದ ವಸ್ತುಗಳನ್ನು ಹೊಸ ಮನೆಗೆ ಸಾಗಿಸುತ್ತಿದ್ದರು. ಇದನ್ನು ಗಮನಿಸಿದ ಕಳ್ಳ ಕದಿಯಲು ಪ್ಲಾನ್​ ಮಾಡಿದ್ದಾನೆ ಎನ್ನಲಾಗಿದೆ.

ಇದನ್ನೂ ಓದಿ: 8 ವರ್ಷದ ಪ್ರೀತಿಗೆ ಕೂಡಿ ಬಂತು ಕಂಕಣ ಭಾಗ್ಯ; ಹಸೆಮಣೆ ಏರಲು ಸಜ್ಜಾದ ಭೀಷ್ಮ ಚಿತ್ರದ ನಾಯಕ!